ព្រះមហាក្សត្រ​ប្រទាន​ព្រះរាជដំណាក់​នៅ​កោះកុង​ជូន​មន្ទីរ​ពេទ្យ​គន្ធបុប្ផា

យោង​តាម​លិខិត​មួយ​ច្បាប់​ចុះ​ថ្ងៃ​ព្រហស្បតិ៍ និង​ឡាយ​ព្រះ​ហត្ថលេខា​ដោយ​ព្រះ​មហាក្សត្រ​និង​សម្តេច​ម៉ែ​បាន​ឲ្យ​ដឹង​ថា ព្រះមហាក្សត្រ នរោត្តម សីហមុនី និង​សម្តេច​ម៉ែ នរោត្តម មុនិនាថ បាន​ប្រទាន​ព្រះរាជ​ដំណាក់​មិន​ប្រើ​ប្រាស់​មួយ​កន្លែង​ក្នុង​ខេត្ត​កោះកុង ជូន​មន្ទីរ​ពេទ្យ​កុមារ​គន្ធបុប្ផា ដែល​កំពុង​ប្រឈម​មុខ​នឹង “ការ​លំបាក​ផ្នែក​ហិរញ្ញវត្ថុ”។

លិខិត ដែល​ផ្ញើ​ទៅ​លោក ប៊ីត រិចឆ្នឺរ (Beat Richner) នាយក​និង​ស្ថាបនិក​ជនជាតិ​ស្វីស​​នៃ​មន្ទីរ​ពេទ្យ​គន្ធបុប្ផា​មាន​ខ្លឹមសារ​ថា “ក្នុង​នាម​ព្រះ​បរម​នាម ព្រះ​ករុណា ព្រះ​បាទ​សម្តេច​ព្រះ នរោត្តម សីហនុ នៃ​ព្រះ​រាជាណាចក្រ​កម្ពុជា យើង​ខ្ញុំ​សូម​ជូន​ព្រះ​រាជដំណាក់ នៅ​ខេត្ត​កោះកុង នា​សម័យ​សង្គម​រាស្ត្រ​និយម ទសវត្សរ៍​ឆ្នាំ​៦០ ជូន​មន្ទីរ​ពេទ្យ​គន្ធបុប្ផា”។

លិខិត​បន្ត​ទៀត​ថា “យើង​ខ្ញុំ​ជឿ​ជាក់​ថា ព្រះ​រាជ​អំណោយ​នេះ​នឹង​ជួយ​រំលែក​និង​ដោះស្រាយ​ការ​លំបាក​ផ្នែក​ហិរញ្ញវត្ថុ​នៃ​មន្ទីរ​ពេទ្យ​គន្ធបុប្ផា និង​បម្រើ​ផល​ប្រយោជន៍​ជូន​កុមារ​កំព្រា​ទីទ័លក្រ”។

លិខិត​នោះ​មិន​បាន​និយាយ​ថា​តើ​ព្រះ​មហាក្សត្រ និង សម្តេច​ម៉ែ សង្ឃឹម​ថា​ព្រះ​រាជដំណាក់​នោះ​នឹង​បម្រើ​សេចក្តី​ត្រូវការ​ផ្នែក​ហិរញ្ញវត្ថុ​នៃ​មន្ទីរ​ពេទ្យ​គន្ធបុប្ផា​របៀប​ណា​ទេ ហើយ​ក្រុម​មន្ត្រី​នៅ​ព្រះ​បរម​រាជ​វាំង​មិន​អាច​ទាក់ទង​សុំ​ការ​ពន្យល់​បាន​ដែរ​។

លោក រិចឆ្នឺរ មិន​អាច​ទាក់ទង​បាន​ទេ​កាលពី​ថ្ងៃ​ច័ន្ទ ប៉ុន្តែ លោក ដិនិស ល័រវិន (Denis Laurent) ប្រធាន​វេជ្ជ​បណ្ឌិត​រោគ​សាស្ត្រ នៅ​មូលនិធិ​គន្ធបុប្ផា បាន​បញ្ជាក់​អំពី​ការ​ប្រទាន​ព្រះ​រាជ​អំណោយ​នេះ ក៏​ប៉ុន្តែ​បាន​បដិសេធ​មិន​ឆ្លើយ​សំណួរ​ផ្សេងទៀត​ទេ។

​លោក ប៊ុន ឡឺត អភិបាល​ខេត្ត​កោះកុង បាន​មាន​ប្រសាសន៍​ថា លោក​មិន​បាន​ដឹង​អំពី​ការ​ប្រទាន​នេះ​ទេ ប៉ុន្តែ​បាន​និយាយ​ថា ព្រះ​រាជ​ដំណាក់​នោះ​ស្ថិត​នៅ​ក្នុង​សង្កាត់​ស្មាច់​មាន​ជ័យ ក្រុង​ខេមរភូមិន្ទ។

លោក​ ប៊ុន ឡឺត​ បាន​មាន​ប្រសាសន៍​ថា​ “វា​ស្ថិត​នៅ​លើ​ផ្ទៃដី​ប្រហែល​មួយ​ហិកតា ហើយ​គ្មាន​នរណា​ម្នាក់​ស្នាក់នៅ​ទេ តាំង​ពី​ឆ្នាំ​១៩៧៩​មក”។ លោក​បាន​បន្ថែម​ថា ព្រះរាជ​ដំណាក់​នោះ​ត្រូវ​ចាក់សោ​និង​យាម​ការពារ​២៤ម៉ោង។

ក្នុង​បទ​សម្ភាស​មួយ​កាលពី​ថ្ងៃ​ច័ន្ទ​ លោក ដារិល ខូលលិន​ អ្នកប្រវត្តិសាស្ត្រ​សិល្បៈ​បាន​មាន​ប្រសាសន៍​ថា លោក​មិន​បាន​ដឹង​អ្វី​ជាក់លាក់​អំពី​ព្រះរាជ​ដំណាក់​នៅ​ខេត្ត​កោះកុង​ទេ​ ប៉ុន្តែ ព្រះរាជ​ដំណាក់​ប្រហែល​ដប់​របស់​ព្រះ​រាជវង្ស​បាន​នៅ​គង់​ពី​ “ការ​បំផ្លាញ​នា​ទសវត្សរ៍​៧០​និង​៨០ និង​ការ​មិន​យក​ចិត្ត​ទុក​ដាក់”។

លោក ខូលលិន បាន​មាន​ប្រសាសន៍​ថា “[ព្រះ​បរម​រតន​កោដ្ឋ] នរោត្តម សីហនុ មាន​ព្រះទ័យ​សាងសង់​ព្រះរាជ​ដំណាក់​មួយ​នៅ​គ្រប់​ខេត្ត ដូច្នេះ​ព្រះអង្គ​មាន​ព្រះរាជ​ដំណាក់​ស្នាក់នៅ​រាល់​ពេល​ព្រះអង្គ​ធ្វើ​ព្រះរាជ​ទស្សនកិច្ចម្តងៗ”។

យោង​តាម​វិបសាយ​ផ្ទាល់​របស់​លោក​បាន​ឲ្យ​ដឹង​ថា លោក​សាស្ត្រាចារ្យ​វេជ្ជបណ្ឌិត រិចឆ្នឺរ បាន​មកដល់​ប្រទេស​កម្ពុជា​ពី​ប្រទេស​ស្វីស​នៅ​ឆ្នាំ​១៩៧៤​ ធ្វើការ​នៅ​មន្ទីរពេទ្យ​គន្ធបុប្ផា​ប្រចាំ​តំបន់​ក្នុង​ក្រុង​ភ្នំពេញ ដែល​ដាក់​ឈ្មោះ​តាម​ព្រះ​រាជបុត្រី​ព្រះមហាក្សត្រ សីហនុ ដែល​បាន​សោយព្រះទិវង្គត​នៅ​ឆ្នាំ​១៩៥២​ក្នុង​ព្រះជន្ម​៥​វស្សា។

លោក​បាន​វិល​ត្រឡប់​មកវិញ​នៅ​ឆ្នាំ​១៩៩១ ហើយ​បាន​បញ្ចុះ​បញ្ចូល​ឲ្យ​រៀបចំ​មន្ទីរពេទ្យ​ប្រចាំ​តំបន់​នេះ​ឡើង​វិញ​ ហើយ​នៅ​ឆ្នាំ​បន្ទាប់មក​បាន​បង្កើត​មូលនិធិ​គន្ធបុប្ផា ដែល​ឥឡូវនេះ​កំពុង​ដំណើរការ​មន្ទីរពេទ្យ​ប្រាំ​កន្លែង​ក្នុង​ក្រុង​ភ្នំពេញ​និង​ក្រុង​សៀមរាប៕ និត​

 

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.