34 C
Phnom Penh

នាយករដ្ឋ​​​មន្ត្រី ​ហ៊ុន សែន ​ប្រកាស​​​​លុប​​​ចោល​​​​ការ​​​​យក​​​​ពន្ធ​​​តូច​​​​តាច​​​

ដោយ ឌឹ ខេមបូឌា ដេលី

បទវិភាគ

cam-photo-front1លោក​​​នាយក​​​រដ្ឋ​​​មន្ត្រី ហ៊ុន សែន បាន​​​ប្រកាស​​​កាល​​​ពី​​​ម្សិលមិញ​​​ថា ប្រជា​ពល​​​រដ្ឋ​​​សាមញ្ញ​​​​​នៅ​​​ក្នុង​​​ប្រទេស​​​នឹង​​​ទទួល​​​បាន​​​ការ​​​មិន​​យក​​​​ពន្ធ​​​មួយ​​​ចំនួន​​​ចាប់​​​ពី​​​ឆ្នាំ​​​២០១៦​​​ទៅ ​​​​​​ដោយ​​​ពន្ធ​​​ផ្លូវ​លើ​​​ម៉ូតូ​​​​​​ រ៉ឺម៉ក​​​ម៉ូតូ និង​​​គ្រឿង​​​ចក្រ​​​កសិកម្ម​​​ត្រូវ​​​លុប​​​ចោល​​​ រួ​​​ម​​​ទាំង​​​ថ្លៃ​​​តូប​​​នៅ​​​ក្នុង​​​ផ្សារ​​​គ្រប់​​​គ្រង​​​ដោយ​​​រដ្ឋ​​​ផង​​​ដែរ​​​។

ដោយ​​​និយាយ​​​តាម​​​បែប​​​ភាសាសាមញ្ញ​​​អំឡុង​​​ពិធី​​​សម្ពោធ​​​ដាក់​​​ឲ្យ​​​ប្រើ​​​ប្រាស់​​​ស្ពាន​​​មិត្ត​​​ភាព​​​កម្ពុជា​​​-ចិន​​​​​ចំណាយ​​​អស់​​​ទឹក​​​ប្រាក់​​​ចំនួន​​​២៧,៥លាន​​​ដុល្លារ​​​ដែល​​​​​​ជា​​​ជំនួយ​​​របស់​​​​​រដ្ឋាភិបាល​​​ក្រុង​​​ប៉េកាំង​​​នៅ​​​ក្នុង​​​រាជធានី​​​ភ្នំពេញ​​​ ​​​លោក​​​នាយក​​​រដ្ឋ​​​មន្ត្រី​​​​​​បាន​​​លើក​​​ឡើង​​​ថា ប្រជា​​​ពល​​​រដ្ឋ​​​នឹ​​​ងមិន​​​ចា​​​ំ​​​បាច់​​​គេច​​​ពី​​​អ្នក​​​ប្រមូល​​​ពន្ធ​​​ទៀត​​​ឡើយ​​​។ ​​​​​​

លោក​​​បាន​​​មាន​​​ប្រសាសន៍​​​ថា ”ចាប់​​​ពី​​​ឆ្នាំ​​​ក្រោយ​​​នេះ​​​ទៅ​​​ ពន្ធ​​​ផ្លូវ​​​សម្រាប់​​​ម៉ូតូ ម៉ូតូកង់​​​បី សម្រាប់​​​គ្រឿង​​​យន្ត​​​កសិកម្ម​​​ ជា​​​ត្រាក់​​​ទ័រ​​​ ​​​ជា​​​គោយន្ត​​​ ជា​​​ទូក​​​ កាណូត ហៅ​​​ថា ជល​​​យាន​​​អត់​​​ ត្រូវ​​​​​​យក​​​ពន្ធ​​​ទៀត​​​ទេ​​​។ លុប​​​ចោល​​​ហើយ​​​”។

ពន្ធ​​​ផ្លូវ​​​ក្នុង​​​ពេល​​​បច្ចុប្បន្ន​​​មាន​​​តម្លៃ​​​ខុស​​​ៗ​​​គ្នា​​​អាស្រ័យ​​​លើ​​​ប្រភេទ​​​យាន​​​យន្ត​​​ ប៉ុន្តែ ពន្ធ​​​ផ្លូវ​​​សម្រាប់​​​ម៉ូតូ​​​ជា​​​ទូទៅ​​​មាន​​​តម្លៃ​​​ចន្លោះ​​​ពី​​​១ដុល្លារ​​​ទៅ​​​២​​​ដុល្លារ​​​ក្នុង​​​មួយ​​​ឆ្នាំ​​​។

ដោយ​​​ឈរ​​​នៅ​​​លើ​​​ឆាក​​​​​​​ភាគ​​​ខាង​​​កើត​​​ចុង​ស្ពាន​​​ថ្មី​​​ លោក​​​ ហ៊ុន សែន បាន​​​ប្រាប់​​​អ្នក​​​ចូល​​​រួម​​​ប្រហែល​​​១.០០០នាក់​​​ថា ការ​​​មិន​​​យក​​​ពន្ធ​​​នឹង​​​ផ្តល់​​​ផល​​​ប្រយោជន៍​​​ជា​​​ច្រើន​​​ដល់​​​ប្រជា​​​ពល​​​រដ្ឋ​​​ជាង​​​១លាន​​​នាក់​​​ ដែល​​​មាន​​​ម៉ូតូ​​​ក្នុង​​​រាជធានីភ្នំពេញ​​​។

លោក​​​បាន​​​មាន​​​ប្រសាសន៍​​​​​​បន្ត​​​ថា “នេះ​​​ជា​​​ការ​​​ដែល​ប្រជាជន​​​ទទួល​​​ផល​​​ ដោយ​​​គាត់​​​ធ្លាប់​​​ យក​​​អាលុយ​​​ហ្នឹង​​​មក​​​បង់​​​ពន្ធ​​​ ឥឡូវ​​​មិន​​​ចាំ​​​បាច់​​​បង់​​​ពន្ធ​​​ទៀត​​​ទេ​​​។ មុន​​​នេះ ​​​អ្នក​​​ដែល​​​មិន​​​បាន​​​បង់​​​ពន្ធ​​​​​​ត្រូវ​​​ជិះ​​​គេច​​​ផ្លូវ​​​ពី​​​នគរ​​​បាល​​​ចរាចរ​​​ ឥឡូវ​​​នេ​​​ះ​​​មិន​​​ចាំ​​​បាច់​​​គេច​​​ទៀត​​​ទេ​​​ចាប់​​​ពី​​​ឆ្នា​​​ំ​​​ក្រោយ​​​ទៅ​​​”។ លោក​​​បាន​​​មាន​​​ប្រសាសន៍​​​បន្ត​​​ទៀត​​​ថា ”ក្រៅ​​​ពី​​​នោះ​​​ក៏​​​សូម​​​ជូន​​​ប្រជា​​​ពល​​​រដ្ឋ​​​ដែល​​​ជា​​​អាជីវករ​​​ផង​​​ដែរ​​​ ក៏​​​បាន​​​លុប​​​ចោល​​​នូវ​​​របប​​​ម៉ៅ​​​ការ​​​ គេ​​​ហៅ​​​ថា ពន្ធ​​​តាម​​​របប​​​ម៉ៅ​​​ការ​​​ ហើយ​​​ក៏​​​នឹង​​​កាត់​​​បន្ថយ​​​តម្លៃ​​​បា៉តង់​​​ តាម​​​ទំហំ​​​ក្រុមហ៊ុន​​​ពាណិជ្ជកម្ម​​​”។​ បច្ចុប្បន្ន​​​អាជីវករ​​​នៅ​​​តាម​​​ផ្សារ​​​គ្រប់​​​គ្រង​​​ដោយ​​​រដ្ឋ​​​ត្រូវ​​​បង់​​​ថ្លៃ​​​ប្រចាំ​​​ខែ​​​ចន្លោះ​​​ពី​​​៥​​​ដុល្លារ​​​ទៅ​​​៧,៥​​​ដុល្លារ​​​។

លោក​​​នាយក​​​រដ្ឋ​​​មន្ត្រី​​​បាន​​​គូស​​​បញ្ជាក់​​​ថា ការ​​​មិន​​​យក​​​ពន្ធ​​​នេះ​​​នឹង​​​ធ្វើ​​​ឲ្យខាត​​​បង់​​​ប្រាក់​​​ចំណូល​​​​​​ដល់​​​រដ្ឋាភិបាល​​​ ហើយ​​​បាន​​​ជំរុញ​​​ឲ្យ​​​​ប្រជា​ពល​​​រដ្ឋ​​​បង់​​​ពន្ធ​​​ជា​​​លើក​​​ចុង​​​ក្រោយ​​​នៅ​​​ត្រឹម​តំណាច់​​​ឆ្នាំ​​​នេះ​​​។

លោក​​​បាន​​​មាន​​​ប្រសាសន៍​​​ថា “​​​នៅ​​​សល់​​​បី​​​ខែ​​​ទៀត​​​បាន​​​ចប់​​​ សូម​​​អំពាវ​​​នាវ​​​អ្នក​​​ដែល​​​មិន​​​ទាន​​​់​​​បាន​​​បង់​​​ពន្ធ​​​ មេត្តា​​​ចូល​​​ទៅ​​​បង់​​​ពន្ធ​​​ ព្រោះ​​​ខ្ញុំ​​​ព្រះករុណា​​​ខ្ញុំ​​​អត់​​​មាន​​​សិទ្ធិ​​​លុប​​​ចោល​​​ច្បាប់​​​ហ្នឹង​​​ទេ​​​។ ចាត់​​​ទុក​​​ថា ​​​ជា​​​ការ​​​បង់​​​ពន្ធ​​​លើក​​​ចុង​​​ក្រោយ​​​ ដើម្បី​​​រួម​​​វិភាគ​​​ទាន​​​ជួស​​​ជុល​​​ផ្លូវ​​​ថ្នល់​​​។  សូម​​​មក​​​បង់​​​ពន្ធ​​​ទុក​​​ជា​​​អនុស្សាវរីយ៍”។

នៅ​​​ក្រៅ​​​ពិធី​​​សម្ពោធ​​​នេះ​​​ លោក វង្សី  វិសុទ្ធ​​​ រដ្ឋលេខាធិការ​​​ក្រសួង​​​សេដ្ឋកិច្ច​​​ និង​​​ហិរញ្ញ​​​វត្ថុ​​​បាន​​​លើក​​​ឡើង​​​ថា វិធានការ​​​ថ្មី​​​នេះ​​​នឹង​​​ជួយ​​​សម្រាល​​​បន្ទុក​​​​មន្ត្រី​​​របស់លោក​ដែល​​​ធ្វើ​​​ការ​​​​​ច្រើនជ្រុល​​​ និង​ដែល​​​លោក​​​​​​​លើក​​​ឡើង​​​ ថា បាន​​​ចំណាយ​​​ពេល​​​ជាង​​​៦០​​​ភាគ​​​រយ​​​​របស់​​​ខ្លួន​​​ទៅ​​​ប្រមូល​​​ពន្ធ​​​តូច​​​តាច​​​។

លោក​​​រដ្ឋលេខាធិការរូប​​​នេះ​​​បាន​​​មាន​​​ប្រសាសន៍​​​ថា ”ជា​​​សេដ្ឋកិច្ច​​​​​ វា​​​អត់​​​មាន​​​ប្រសិទ្ធ​​​ភាព​​​។ ហើយ​​​ជា​​​សង្គម​​​វិញ​​​ការ​​​ដើរ​​​ទារ​​​ពន្ធ​​​ពី​​​ប្រជា​​​ពល​​​រដ្ឋ​​​តូច​​​តាច​​​វា​​​គ្មាន​​​​​​ផ្តល់​​​ផល​​​អីទេ​​​។ហេតុ​​​ដូច្នេះ​​​វា​​​ជា​​​ការ​​​ខ្ជះ​​​ខ្ជាយ​​​ពេល​​​វេលា​​​ និង​​​ជា​​​ការ​​​ធ្វើ​​​ឲ្យ​​​ពល​​​រដ្ឋ​​​មួរ​​​ម៉ៅ​​​។  ឧទាហរណ៍​​​ជា​​​រៀង​​​រាល់​​​ខែ​​​ មន្ត្រី​​​ចុះ​​​ទៅទារ​​​ពន្ធ​​​ចុះ​​​ឡើង​ៗ​​​។ អ៊ីចឹង​​​លុប​​​វា​​​ចោល​​​បណ្តោយ​​​ទៅ​​​”៕​​​ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស