ភរិយាលោក ហុង សុខហួរ សមាជិកព្រឹទ្ធសភាគណបក្សប្រឆាំងដែលជាប់ពន្ធនាគារ កាលពីម្សិលមិញបានបដិសេធការដែលថា លោកស្រី និងអ្នកបើករថយន្តរបស់ស្វាមីលោកស្រីបានរត់គេចពីកន្លែងកើតហេតុបន្ទាប់ពីគ្រោះថ្នាក់ចរាចរណ៍មួយក្នុងខេត្តកណ្ដាលដែលបានបណ្ដាលឲ្យបុរសម្នាក់ទៀតបាក់ភ្លៅ។
លោក ស៊ិន បុត្របណ្ឌិត អធិការនគរបាលក្រុងតាខ្មៅបានមានប្រសាសន៍ថា លោក ម៉ី វណ្ណា អាយុ៤៨ឆ្នាំ បានបាក់ភ្លៅខាងឆ្វេងនៅ ក្នុងគ្រោះថ្នាក់ចរាចរណ៍ដែលបង្កឡើងដោយ រថយន្តតូយ៉ូតាឡង់គ្រីស័រពាក់ស្លាកលេខព្រឹទ្ធសភា ខណៈដែលគាត់កំពុងបើកបរឆ្លងកាត់ចំណុចប្រសព្វនៃផ្លូវលេខ១១០ និងផ្លូវលេខ២១នៅក្នុងក្រុងនេះកាលពីថ្ងៃពុធ។
លោក បុត្របណ្ឌិត បានថ្លែងថា លោក វណ្ណា បានបើកបររ៉ឺម៉កម៉ូតូដឹកជ្រូក ស្រាប់តែនៅពេលនោះរថយន្តទំនើបមួយគ្រឿងបានបើកឆ្លងភ្លើងក្រហមត្រង់ចំណុចផ្លូវប្រសព្វផ្នែកខាងត្បូងនៃក្រុងនេះ ប៉ុន្តែថា អ្នកជិះក្នុងរថយន្តបានរត់គេចខ្លួន។
ដោយពន្យល់ថា នគរបាលមិនទាន់បានពិនិត្យមើលស្លាកលេខនេះនៅឡើយនោះលោក បុត្របណ្ឌិត បានថ្លែងថា “រថយន្តនោះពាក់ស្លាកលេខព្រឹទ្ធសភា ប៉ុន្តែយើងមិន ដឹងថានរណាជាម្ចាស់រថយន្តនេះនៅឡើយទេ ពីព្រោះអ្នកបើកបរបានរត់គេចខ្លួនបាត់បន្ទាប់ពីមានគ្រោះថ្នាក់កើតឡើង” ។
លោកបន្ថែមថា “យើងកំពុងសហការ ជាមួយមន្ទីរសាធារណការនិងដឹកជញ្ជូនរាជធានីភ្នំពេញស៊ើបអង្កេតរកស្លាកនេះ ដើម្បីឲ្យអ្នក បើកបរទទួលខុសត្រូវចំពោះគ្រោះថ្នាក់នោះ”។
ប៉ុន្តែ បណ្ដាញផ្សព្វផ្សាយព័ត៌មានក្នុងស្រុក បានរាយការណ៍យ៉ាងឆាប់រហ័សថា រថយន្តនោះ ដែលឥឡូវនេះកំពុងត្រូវរក្សាទុកនៅអធិការដ្ឋាននគរបាលក្រុងតាខ្មៅ ជាកម្មសិទ្ធិរបស់លោក ហុង សុខហួរ ដែលកំពុងជាប់ពន្ធនាគារ បន្ទាប់ ពីលោកនាយករដ្ឋមន្ត្រី ហ៊ុន សែន បានបញ្ជាឲ្យចាប់ខ្លួនកាលពីខែសីហា។
លោកស្រី គុណ លំអង ភរិយាលោក ហុង សុខហួរ និងលោកស្រីផ្ទាល់ជាបេក្ខភាពសមាជិកសភាគណបក្សសង្គ្រោះជាតិនៅក្នុងការបោះឆ្នោតឆ្នាំ២០១៣ បានមានប្រសាសន៍ ថា លោកស្រីនៅក្នុងរថយន្តនៅពេលគ្រោះថ្នាក់ចរាចរណ៍នោះ ប៉ុន្តែអ្នកបើកបររថយន្តគ្មានកំហុសទេ ហើយបានបដិសេធការដែលថា ពួកគាត់រត់គេចខ្លួនពីកន្លែងកើតហេតុ។
លោកស្រី គុណ លំអង បានថ្លែងថា “អ្នកបើករ៉ឺម៉កម៉ូតូជាអ្នកខុស ពីព្រោះគាត់បុករថយន្តរបស់យើងចំពីមុខ ខណៈដែលរ៉ឺម៉កម៉ូតូនោះដឹកធ្ងន់”។ លោកស្រីបានបន្ថែមថា លោកស្រី និងអ្នកបើកបររថយន្តបានដោះស្រាយបញ្ហានោះទៅតាមច្បាប់។
លោកស្រីបានថ្លែងថា “ខ្ញុំនឹងអ្នកបើកបររថយន្តរបស់ខ្ញុំមិនបានរត់គេចដូចការចោទប្រកាន់ពីនគរបាល និងបណ្ដាញផ្សព្វផ្សាយ ព័ត៌មានដែលថា យើងបានរត់គេចពីកន្លែងកើតហេតុឡើយ។ ខ្ញុំនៅក្នុងរថយន្ត ប៉ុន្តែអ្នកបើកបររបស់ខ្ញុំបានចេញក្រៅរថយន្ត ទៅមើលគ្រោះថ្នាក់នោះ”៕ សារុន