លោកនាយករដ្ឋមន្ត្រី ហ៊ុន សែន បានប្រកាសអំឡុងពេលថ្លែងសុន្ទរកថាកាលពីម្សិលមិញក្នុងពិធីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន ក្នុងរាជធានីភ្នំពេញថា លោក ឌីមីទ្រី ម៉េដវេដេវ (Dmitry Medvedev) នាយករដ្ឋមន្ត្រីរុស្ស៊ីនឹងមកបំពេញទស្សនកិច្ចនៅកម្ពុជាក្នុងខែវិច្ឆិកា។
លោក ហ៊ុន សែន បានលើកឡើងថា លោក ឌីមីទ្រី ម៉េដវេដេវ នឹងមកដល់រាជធានីភ្នំពេញនៅថ្ងៃទី២៣ និងថ្ងៃទី២៤ ខែវិច្ឆិកា ប៉ុន្តែមិនបានបញ្ជាក់ពីគោលបំណងនៃការមកបំពេញទស្សនកិច្ចរបស់លោកឡើយ។
លោកបានមានប្រសាសន៍ថា “បើគ្មានការផ្លាស់ប្ដូរទេ នាយករដ្ឋមន្ត្រីរុស្ស៊ីនឹងមកបំពេញទស្សនកិច្ចនៅភ្នំពេញនៅថ្ងៃទី២៣ និងថ្ងៃទី២៤”។ លោកបានបន្ថែមថា លោកនឹងជួបជាមួយនាយករដ្ឋមន្ត្រីរូបនេះដោយផ្ទាល់បន្ទាប់ពីត្រឡប់ពីកិច្ចប្រជុំកំពូលអាសា៊ននៅក្នុងប្រទេសម៉ាឡេស៊ីវិញ។
លោកបានមានប្រសាសន៍បន្ថែមថា “ប្រជុំ អាស៊ានចប់ភ្លាម ត្រូវហោះភ្លាមមកភ្នំពេញដើម្បីឲ្យបានមុននាយករដ្ឋមន្ត្រីរុស្ស៊ី”។
អំឡុងពេលបំពេញទស្សនកិច្ចរបស់លោក លោក ឌីមីទ្រី មេ៉ដវេដេវ នឹងក្លាយជាមន្ត្រីបរទេសទី១ដែលឆ្លងកាត់ស្ពានអាកាសតិចណូដែលកំពុងសាងសង់ក្នុងពេលបច្ចុប្បន្នតាមបណ្ដោយមហាវិថីសហព័ន្ធរុស្ស៊ី ដោយគ្រោងនឹងបើកឲ្យដំណើរការនៅថ្ងៃទី២១ ខែវិច្ឆិកា។
តំណាងមកពីស្ថានទូតរុស្ស៊ីប្រចាំរាជធានីភ្នំពេញ មិនបានបញ្ជាក់ ឬបដិសេធចំពោះការមកបំពេញទស្សនកិច្ចនេះឡើយ ពេលទាក់ទងកាលពីម្សិលមិញ។
លោក ឌីមីទ្រី ម៉េដវេដេវ គឺជាសម្ពន្ធមិត្តយ៉ាងជិតស្និទ្ធរបស់លោក វ្លា៉ឌីមៀ ពូទីន ប្រធានាធិបតីរុស្ស៊ី។ ពេលលោក វ្លា៉ឌីមៀ ពូទីន ត្រូវចុះចេញពីតំណែងកាលពីឆ្នាំ២០០៨ ដោយសារការកំណត់អាណត្តិប្រធា នាធិបតីនៅក្នុងប្រទេសរុស្ស៊ី លោក ឌីមីទ្រី ម៉េដវេដេវ បានធ្វើជាប្រធានាធិបតីរុស្ស៊ីរយៈពេល៤ឆ្នាំ មុនពេលក្លាយជានាយករដ្ឋមន្ត្រីកាលពីឆ្នាំ២០១២៕ ស៊ុយឈាង