កាលពីសប្តាហ៍មុន សាលាដំបូងខេត្តសៀមរាបបានផ្តន្ទាទោសឈ្មោះ តៅ សាវឿន អាយុ២៦ឆ្នាំ ពីបទគំរាមសម្លាប់លោក ស ខេង រដ្ឋមន្ត្រីក្រសួងមហាផ្ទៃក្នុងពិធីប្រគល់សញ្ញាបត្រ ប៉ុន្តែនឹងតម្រូវឲ្យគាត់អនុវត្តទោសជាប់ពន្ធនាគារត្រឹម១ខែប៉ុណ្ណោះនៃទោសជាប់ពន្ធនាគាររយៈពេល១៥ខែ មានន័យថា គាត់គួរតែត្រូវបានដោះលែងនៅប៉ុន្មានថ្ងៃទៀត។
លោក តៅ សាវឿន ដែលជាអតីតនិស្សិតម្នាក់នៃសាកលវិទ្យាល័យ សៅស៍អីុស អេយសៀ (University of South-East Asia) នៅក្នុងក្រុងសៀមរាប បានលើកឡើងនៅក្នុងការបញ្ចេញមតិតាមហ្វេសប៊ុកកាលពីខែមុនថា គាត់នឹងដាក់គ្រាប់បែកនៅក្នុងពិធីប្រគល់សញ្ញាបត្រក្រោមអធិបតីភាពលោក ស ខេង ។
បុរសវ័យក្មេងរូបនេះបាននិយាយថា ខ្លួនខឹងដោយសារពិធីនេះត្រូវបានផ្អាកម្តងហើយម្តងទៀត ប៉ុន្តែ ថា ខ្លួនគ្មានបំណងធ្វើដូចការគំរាមឡើយ។
ចៅក្រម ឈុន ចាន់សីហា បានលើកឡើងកាលពីម្សិលមិញថា លោកបានប្រកាសសេចក្តីសម្រេចនេះភ្លាមៗ បន្ទាប់ពីការបើកសវនាការជំនុំជម្រះរឿងក្តីរបស់លោក តៅ សាវឿន កាលពីថ្ងៃព្រហស្បតិ៍។
ចៅក្រមរូបនេះ បានមានប្រសាសន៍ថា ”យើងបានផ្តន្ទាទោសគាត់កាលពីព្រឹកថ្ងៃទី២២ ហើយគាត់បានសារភាពថា ពិតជាបានធ្វើដូច្នេះមែន ប៉ុន្តែគ្មានបំណងធ្វើដូចអ្វីដែលគាត់បានសរសេរឡើយ។ គាត់បានផ្ញើលិខិតសុំការអភ័យទោសពី[លោក ស ខេង] ហើយសម្តេចបានឆ្លើយតបថា គាត់អភ័យទោស ឲ្យ។ បន្ទាប់ពីយើងបានពិចារណាកត្តាទាំងនេះ យើងបានសម្រេចផ្តន្ទាទោសឲ្យជាប់ពន្ធនាគារ ១៥ខែ ប៉ុន្តែអនុវត្តទោស១ខែប៉ុណ្ណោះ”។
លោក ថា រ័ត្នថុន មេធាវីរបស់លោក តៅ សាវឿន បានលើកឡើងថា កូនក្តីរបស់លោក គួរតែមានសេរីភាពនៅក្នុងសប្តាហ៍នេះ។
លោកបានមានប្រសាសន៍ថា ”ដោយសារការមិនចេះទប់កំហឹង គាត់បានខឹងយ៉ាងខ្លាំងព្រោះសាលាបានពន្យារពេល [ប្រគល់សញ្ញាបត្រ] ពីរ ឬបីលើក ហើយគាត់មានការលំបាកក្នុងការសុំច្បាប់ [ឈប់សម្រាក] ពីកន្លែងធ្វើការ។ គាត់សប្បាយចិត្តខ្លាំងណាស់ ពេលបានឮសេចក្តីសម្រេចរបស់តុលាការ ព្រោះតុលាការបានបន្ធូរបន្ថយទោសរបស់គាត់”។
លោក ថា រ័ត្នថុន បានលើកឡើងទៀតថា ការជាប់ពន្ធនាគាររយៈពេល១ខែ គឺគិតចាប់ពីថ្ងៃទី៣០ ខែកញ្ញា មក ជាថ្ងៃដែលកូនក្តីរបស់លោកត្រូវបានចោទប្រកាន់ និងឃុំខ្លួនជាបណ្តោះអាសន្ន ហើយថា លោករំពឹងថា លោក តៅ សាវឿន នឹងត្រូវដោះលែងវិញនៅថ្ងៃពុធ ឬថ្ងៃ ព្រហស្បតិ៍។
បងប្អូនជីដូនមួយរបស់លោក តៅ សាវឿន ម្នាក់ឈ្មោះ ខូ សុខា បានលើកឡើងថា ខ្លួនបានចូលរួមស្តាប់ការបើកសវនាការ ហើយបានស្វាគមន៍ចំពោះសេចក្តីសម្រេចនេះ។
ខូ សុខាបាននិយាយថា “ឪពុកម្តាយរបស់គាត់ និងខ្ញុំសប្បាយចិត្តខ្លាំងណាស់ ដែលតុលាការបានសម្រេចបន្ធូរបន្ថយទោសមកត្រឹម១ខែ។ តុលាការមានយុត្តិធម៌ចំពោះគាត់ព្រោះគាត់គ្មានបំណងធ្វើដូចអ្វីដែលគាត់បានសរសេរតាមហ្វេសប៊ុកឡើយ។ នេះគឺជាមេរៀនល្អមួយសម្រាប់គាត់ និងអ្នកផ្សេងៗទៀតកុំឲ្យធ្វើអ្វីដូចដែលគាត់បានធ្វើ”។
ទោះជាយ៉ាងណា លោក អំ សំអាត ប្រធានបច្ចេកទេសឃ្លាំមើលសិទ្ធិមនុស្សនៃអង្គការសិទ្ធិមនុស្សលីកាដូ បានលើកឡើងថា សេចក្តីសម្រេចនេះ គឺជាភ័ស្តុតាងបង្ហាញថា តុលាការនៅកម្ពុជាមិនឯករាជ្យ។
លោកមានប្រសាសន៍ថា “តុលាការបានសម្រេចបន្ធូរបន្ថយទោសរបស់គាត់…ព្រោះ [ លោក ស ខេង ] មានការអត់ឱន និងអភ័យទោសឲ្យគាត់។ នេះបង្ហាញឲ្យឃើញថា តុលាការមិនឯករាជ្យទេ ហើយស្ថិតក្រោមឥទិ្ធពលរបស់អ្នកមានប្រាក់ និងមានអំណាច”។
លោកបានមានលើកឡើងទៀតថា តុលាការក៏បានបង្ហាញឲ្យឃើញពីភាពលម្អៀងនៅក្នុងករណីគំរាមតាមអីុនធឺណិតផ្សេងៗទៀតក្នុងពេលថ្មីៗនេះផងដែរ ក្នុងនោះរួមមានដូចជា ករណីរបស់យុវជនឈ្មោះ គង់ រ៉ាយ៉ា និស្សិតសាកលវិទ្យាល័យដែលត្រូវបានចាប់ខ្លួនកាលពីខែសីហា ពីបទអំពាវនាវតាមហ្វេសប៊ុកឲ្យមានការធ្វើ “បដិវត្តន៍ពណ៌” និងករណីរបស់លោក ផែង វណ្ណៈ មន្ត្រីក្រសួងមហាផ្ទៃដែលនៅមានសេរីភាពនៅឡើយបន្ទាប់ពីការគំរាមសម្លាប់លោក កឹម សុខា អនុប្រធានគណបក្សសង្គ្រោះជាតិត្រូវបានបង្ហោះនៅលើទំព័រហ្វេសប៊ុកដែលមានឈ្មោះរបស់គាត់ជាដើម៕ស៊ុយឈាង