40.5 C
Phnom Penh

ពីរនាក់​​​ជាប់​​​ទោស​​​ដោ​​​យ​​​សារ​​​​​​ថា ឧត្តម​​​សេនីយ៍ និង​​​តំណាង​​​រាស្ត្រ​​​ជា​​​​​​សាហាយ​​​ស្មន់​​​

ដោយ ឌឹ ខេមបូឌា ដេលី

បទវិភាគ

ភរិយា​ឧត្ដម​សេនីយ៍​យោធា​មួយ​រូប​ និង​មន្ត្រី​ក្រសួង​ព័ត៌មាន​ម្នាក់​​ដែល​​ត្រូវ​បាន​សាលា​ ដំបូង​រាជធានី​ភ្នំពេញ​​កាត់​ឲ្យ​ជាប់​ទោស​ពីបទ​បរិហារកេរ្តិ៍​​កាលពី​ម្សិលមិញ​​ជុំវិញ​ការ​បង្ហោះ​​សារ​តាម​ហ្វេសប៊ុក​ ចោទ​ប្រកាន់​​ឧត្ដម​សេនីយ៍​រូប​នេះ​ថា​​​ មាន​សាហាយ​ស្មន់​ជាមួយ​​លោក​ស្រី កែវ ម៉ាលី សមាជិក​​ព្រឹទ្ធសភា​គណបក្ស​ប្រជាជន​កម្ពុជា ជា​​ការ​អះអាង​ដែល​សមាជិក​​ ព្រឹទ្ធសភា​​រូប​នេះ​បដិសេធ​។

លោក ព្រំ សាន ដែល​​​ជា​​​អនុប្រធាន​នាយកដ្ឋាន​ព័ត៌មាននៃ​ក្រសួង​ព័ត៌មាន​​ និង​អ្នក​​​ស្រី មុំ​​​ ម៉ានុត ភរិយា​របស់​​​ឧត្ដម​សេនីយ៍​ឯក សៀក សុជាតិ ​​នៃ​​​​កង​យោធពល​ខេមរ​​​ភូមិន្ទ​ ត្រូវ​បាន​ចោទ​ប្រកាន់​កាលពី​ខែ​មុន​ជុំវិញ​សារ​ និង​រូប​ថត​​ដែល​ពួកគេ​បាន​បង្ហោះ​កាលពី​ខែ​កក្កដា។

លោក​ចៅក្រម ម៉ុង​​​​​​ មុនីសោភា ​បាន​ប្រាប់​ តុលាការ​ថា “​តុលាការ​បាន​ដាក់​ទោស​​លោក ព្រំ សាន និង​អ្នក​​​ស្រី មុំ​​​ ម៉ានុត ​ដោយ​ការ​ពិន័យ​ជា​ប្រាក់​​​ក្នុង​ម្នាក់​ៗ​​ចំនួន​៥​.០០០.០០០​រៀល ចំពោះ​បទ​បរិហារកេរ្តិ៍​ដែល​ពួកគេ​បាន​ប្រព្រឹត្ត​កាលពី​ថ្ងៃ​ទី​២៣ ខែ​កក្កដា”។

ដោយ​មិន​បាន​​ពន្យល់​ពី​មូល​ហេតុ​នៃ​សេចក្ដី​សម្រេច​នោះ ​ចៅក្រម ម៉ុង មុនីសោភា ក៏​បាន​បង្គាប់​ឲ្យ​អ្នក​ទាំង​ពីរ​បង់​ប្រាក់​​សំណង​ជំងឺ​ចិត្ត​ដល់​លោក​ស្រី កែវ ម៉ាលី ក្នុង​ម្នាក់ៗ​ចំនួន​១០.០០០.០០០​រៀល​ផង​ដែរ។

លោកស្រី កែវ ម៉ាលី ដែលពី​ដំបូង​បាន​ទាម​​​ទារ​​​​សំណង​ជា​ទឹក​ប្រាក់​ចំនួន​៥០០.០០០​​​​ដុល្លារ​​នោះ បាន​ស្វាគមន៍​សេចក្ដី​សម្រេច​នេះ ហើយ​លោកស្រី​បាន​​​លើក​ឡើង​ថា លោកស្រី​នឹងមិន​​​​យក​​​ទោស​​​ពៃរ​​​អ្នក​​​ទាំង​​​​​​ពីរ​​​ទេ​​​ ​ផ្អែក​លើ​លក្ខខណ្ឌ​មួយ​។ លោកស្រី​បាន​មាន​ប្រសាសន៍​ថា “​ខ្ញុំ​នឹង​មិន​ទាម​​ទារ​​ប្រាក់​សំណង​ជំងឺ​ចិត្ត​ដែល​​អ្នក​ទាំង​ពីរ​បាន​​បង្ក​ឡើង​​នោះ​ទេ ប្រសិន​បើ​ពួកគេ​​សារភាព​ពី​កំហុស​របស់​ខ្លួន​ជា​សាធារណៈ​នោះ​”។

លោក ព្រំ សាន បាន​មាន​ប្រសាសន៍​ថា ​លោក​មិន​​​ធ្វើ​រឿង​បែប​នោះ​ទេ។ លោក​បាន​ថ្លែង​ថា “​ខ្ញុំ​នឹង​មិន​សារភាព​ទេ ពីព្រោះ​ខ្ញុំ​មិន​បាន​​​ធ្វើ​អ្វី​ខុស​ឡើយ”។

លោក ព្រំ សាន​​​ ដែលអះអាង​​​​ថា បាន​រាយការណ៍​ប្រាប់​​កាសែត​ក្នុង​ស្រុក​មួយ​ បាន​ថ្លែង​ថា លោក​នឹង​ប្ដឹង​ទាស់ ចំពោះ​​​​សេចក្ដី​សម្រេច​របស់​តុលាការ​​ដើម្បី​​ប្រយោជន៍អ្នក​កាសែត​ទូទាំង​ប្រទេស​។

លោក​បាន​ថ្លែង​ថា “​ប្រសិន​បើ​ខ្ញុំ​មិន​ប្ដឹង​ទៅ​សាលា​ឧទ្ធរណ៍​ទេ​នោះ អ្នក​កាសែត​ទាំង​អស់​នឹង​ចាញ់​ក្ដី​ដូច​ខ្ញុំ​​​​ នៅ​ពេលពួកគេ​សរសេរ ​អត្ថបទដែលប៉ះពាល់​​​ដល់​មន្ត្រី​រដ្ឋាភិបាល​ជាន់​ខ្ពស់​ណាម្នាក់​”។

អ្នក​​​ស្រី មុំ​​​ ម៉ានុត បាន​មាន​លើក​​​ឡើង​​​​ថា អ្នក​​​ស្រី​នឹង​មិន​សូម​អភ័យ​ទោស​ឡើយ ហើយ​​​​អ្នក​​​ស្រី​ក៏​មាន​គម្រោង​ប្ដឹង​ឧទ្ធរណ៍​ផង​ដែរ​។ អ្នក​​​ស្រី​បាន​​​និយាយ​​​​ថា “​​ខ្ញុំ​មិន​ទទួល​យក​សេចក្ដី​សម្រេច​របស់​តុលាការ​ឡើយ ពី​​​ព្រោះ​ ខ្ញុំ​មិន​បាន​ធ្វើ​អ្វី​ខុស​ទេ។ខ្ញុំ​​​​គ្មាន​អ្វី​ត្រូវ​សារភាព​ឡើយ​ ពីព្រោះ​ខ្ញុំ​គ្រាន់​តែ​សរសេរ​​​នៅ​ក្នុង​ទំព័រ​ហ្វេសប៊ុក​ព្រមាន​លោកស្រី កែវ ម៉ាលី ​ឲ្យ​នៅឲ្យ​​ឆ្ងាយ​ពី​​ប្ដី​របស់​ខ្ញុំ​តែ​ប៉ុណ្ណោះ ពីព្រោះ​​ខ្ញុំ​បារម្ភ​ថា ​គាត់​នឹង​ត្រូវអូសទាញ​ឲ្យ​​​មាន​​ស្នេហា​លួច​លាក់​ជាមួយ​គាត់​”។

អំឡុង​សវនាការ​ជំនុំជម្រះ​កាលពី​ថ្ងៃ​ទី​១៩ ខែ​តុលា អ្នក​​​ស្រី មុំ​​​ ម៉ានុត បាន​ប្រាប់​តុលាការ​ថា ស្វាមី​របស់​អ្នក​​​ស្រី​មាន​ស្រី​កំណាន់​ ច្រើន​ ហើយ​បាន​ចោទ​ប្រកាន់​តុលាការ​​ថា បាន ​កែប្រែ​ភ័ស្តុតាង​ ដោយការ​​​កាត់​រូប​ថត​លោក​ឧត្ដម​សេនីយ៍​​ចេញ​ពី​​​រូប​​​ថត​​​ដែល​​អ្នក​​​ស្រី​បាន​ផ្ដល់​ឲ្យ ​​​​​និង​​​​​​ដែល​បង្ហាញ​ថា ឧត្តម​​​សេនីយ៍​​​រូប​​​​​​នេះ​​​នៅ​​ជា​មួយ​​លោក​​​ស្រី កែវ ម៉ាលី។

​មុន​សវនាការ​ជំនុំជម្រះ​ អ្នក​​​ស្រី មុំ ម៉ានុត បាន​និយាយថា ​អ្នក​​​ស្រី​បាន​ទៅ​រក​​លោក ព្រំ​ សាន ឲ្យ​ជួយ​ផ្សព្វផ្សាយជា​​​​សាធារណៈ​អំពី​​ស្នេហា​លួច​លាក់នេះ​​​ ដោយ​សង្ឃឹម​ថា នឹង​រារាំង​​ស្វាមី​របស់​អ្នក​​​ស្រី​មិន​ឲ្យ​បន្ត​គម្រោង​​លែងលះទាម​​​ទារ​​​សិទ្ធិ​​​ចិញ្ចឹម​​​កូន​ និង​​​មិន​​បន្សល់​ទុក​អ្វី​​ដល់​អ្នក​​​ស្រី​​​៕ សារុន​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស