កាលពីថ្ងៃអាទិត្យ លោកនាយករដ្ឋមន្ត្រី ហ៊ុន សែន បានព្រមានលោក សម រង្ស៊ី ប្រធានគណបក្សសង្គ្រោះជាតិថា លោកអាចត្រូវយកមកកាត់ទោសទាក់ទិននឹងបទក្លែងដូចគ្នា និងករណីញុះញង់ ដែលបានឈានទៅដល់ការចាប់ខ្លួនសមាជិកព្រឹទ្ធសភាបក្សប្រឆាំង គឺលោក ហុង សុខហួរ កាលពីខែសីហា។
ថ្លែងទៅកាន់និស្សិតនិងពលរដ្ឋខ្មែរប្រហែល៨០០នាក់នៅល្ងាចថ្ងៃអាទិត្យក្នុងក្រុងប៉ារីសក្នុងពេលបំពេញទស្សនកិច្ចនៅប្រទេសបារាំង លោក ហ៊ុន សែន បានការពារការចាប់ខ្លួនលោក សុខហួរ ទោះបីជាមានអភ័យឯកសិទ្ធិសភារបស់គាត់ជាសមាជិកព្រឹទ្ធសភាក៏ដោយ។
សមាជិកព្រឹទ្ធសភារូបនេះត្រូវបានចាប់ខ្លួននិងចោទប្រកាន់ពាក់ព័ន្ធនឹងវីដេអូមួយដែលគាត់បានបង្ហោះនៅទំព័រហ្វេសប៊ុករបស់លោក រង្ស៊ី ដែលបង្ហាញសន្ធិសញ្ញាក្លែងក្លាយមួយ ដែលអះអាងថាកិច្ចព្រមព្រៀងឆ្នាំ១៩៧៩រវាងប្រទេសកម្ពុជានិងប្រទេសវៀតណាម នឹងរំលាយព្រំដែនរួមរបស់ខ្លួន។ លោក សុខហួរ អះអាងថា លោកបានរកឃើញឯកសារនោះតាមរយៈកម្មវិធីហ្គូហ្គោលសឺច ហើយមិនបានក្លែងវាទេ។
លោក ហ៊ុន សែន បានប្រាប់អ្នកចូលរួមស្តាប់លោកក្នុងក្រុងប៉ារីសថា “សូមកុំភាន់ច្រឡំថាម៉េចបានចាប់គេ បើទោះគេមានអភ័យឯកសិទ្ធិក៏ដោយ។ យើងគោរពអភ័យឯកសិទ្ធិ ប៉ុន្តែក្នុងករណីបទល្មើសជាក់ស្តែង ចាប់ខ្លួនភ្លាមៗ”។
រដ្ឋធម្មនុញ្ញអនុញ្ញាតឲ្យចាប់ខ្លួនសមាជិកសភា នៅពេលដែលពួកគេកំពុងប្រព្រឹត្តបទល្មើសជាក់ស្តែង ឬកំពុងប្រព្រឹត្តឧក្រិដ្ឋកម្ម។ នៅពេលចាប់ខ្លួនលោក សុខហួរ លោក រង្ស៊ី បានហៅវាថា “ខុស” និង “មិនសមហេតុសមផលសោះដែល” ត្រូវអនុវត្តមាត្រាពេលកំពុងប្រព្រឹត្តជាក់ស្តែងចំពោះការបង្ហោះហ្វេសប៊ុកនោះ។
ក៏ប៉ុន្តែ នៅទីក្រុងប៉ារីស លោក ហ៊ុន សែន បានមានប្រសាសន៍ថា មាត្រាដូចគ្នានេះ ក្នុងពេលឆាប់ៗអាចធ្វើឲ្យប្រធានគណបក្សសង្គ្រោះជាតិចូលតុលាការដែរ ពីព្រោះវីដេអូនោះត្រូវបានបង្ហោះលើទំព័រហ្វេសប៊ុករបស់គាត់។
លោកនាយករដ្ឋមន្ត្រីបានមានប្រសាសន៍ថា “ម្ចាស់ផេកគឺ រង្ស៊ី អ៊ីចឹងទេអាចដល់ម្នាក់ហ្នឹង។ ម្តងនេះ ខ្ញុំនឹងឈប់លើកលែងទោសឲ្យហើយ ព្រោះខ្ញុំធ្លាប់លើកលែងទោសឲ្យម្នាក់នេះពីរដងហើយ”។
លោក ហ៊ុន សែន នាពេលថ្មីៗនេះ បានរៀបចំសុំព្រះរាជទានលើកលែងទោសលោក រង្ស៊ី នៅឆ្នាំ២០១៣ ដោយបើកផ្លូវឲ្យមេដឹកនាំបក្សប្រឆាំងរូបនេះត្រឡប់មកប្រទេសកម្ពុជាវិញ ក្រោយពីចំណាយពេលជាងបីឆ្នាំរស់នៅនិរទេសដោយខ្លួនឯងក្នុងប្រទេសបារាំង។ គាត់បានភៀសខ្លួនទៅទីនោះ បន្ទាប់ពីតុលាការបានកាត់ឲ្យជាប់ទោសពីបទញុះញង់ និងបំផ្លាញទ្រព្យសម្បត្តិសាធារណៈនៅឆ្នាំ២០១០ ព្រោះបានដកបង្គោលតម្រុយព្រំដែនជាប់ប្រទេសវៀតណាមក្នុងពេលមានការតវ៉ាមួយ។
លោក រង្ស៊ី ក៏ត្រូវបានផ្តន្ទាទោសដាក់ពន្ធនាគារក្នុងឆ្នាំ២០០៥ដែរ ពីបទបរិហារកេរ្តិ៍លោកនាយករដ្ឋមន្ត្រី ប៉ុន្តែ បានទទួលព្រះរាជទានលើកលែងទោសដែលសម្របសម្រួលដោយលោក ហ៊ុន សែន នៅឆ្នាំបន្ទាប់មក។
លោកនាយករដ្ឋមន្ត្រីបានមានប្រសាសន៍ថា “និយាយអ៊ីចឹងថា អាងគុក អាងច្រវាក់ ទាហាន និងប៉ូលិស។ អ៊ីចឹង កាន់អំណាច បើមិនឲ្យអាងអាហ្នឹង អាងអីគេ?”
“ឥឡូវខ្ញុំសួរគាត់វិញៈ ប្រសិនបើគាត់កាន់អំណាច តើគាត់នឹងអាងលើអ្វី? វាមិនដែលកាន់អំណាចឲ្យអាងទៀនធូបទេវ៉ឺយ”។
លោក ហ៊ុន សែន បានព្យាយាមការពារយុទ្ធសាស្ត្ររបស់លោក ដោយរំឭកអ្នកចូលរួមស្តាប់ថា សូម្បីតែអតីតប្រធានាធិបតីបារាំង លោក នីកូឡាស សាកូហ្ស៊ី ក៏ត្រូវបាននាំខ្លួនទៅតុលាការដែរ បន្ទាប់ពីរដ្ឋាភិបាលរបស់លោកត្រូវបានជំនួសដោយរដ្ឋាភិបាលបច្ចុប្បន្នរបស់លោកប្រធានាធិបតី ហ្វ្រង់ស័រ ហូឡង់។
លោកបានសួរថា “ពេលលោក ហូឡង់ ឡើងកាន់អំណាច លោក សាកូហ្ស៊ី ត្រូវបានហៅចូលតុលាការ។ ម៉េចមិនថា រឿងនយោបាយផង?”
លោក សាកូហ្ស៊ី ត្រូវបានប៉ូលិសសាកសួរកាលពីឆ្នាំមុន ជាផ្នែកមួយនៃការស៊ើបអង្កេតរបស់តុលាការក្នុងការចោទប្រកាន់ថា ប្រើឥទ្ធិពលរបស់លោកនិងមេធាវីរបស់លោក។ លោក សាកូហ្ស៊ី បានចោទសត្រូវរបស់លោកថា បានប្រើរឿងអាស្រូវជាបន្តបន្ទាប់ដើម្បីទម្លាក់រូបគាត់ និងធ្វើមិនឲ្យគាត់អាចចូលឆាកនយោបាយវិញបាន។
លោក ហ៊ុន សែន បានចំណាយពេលថ្លែងជិតពីរម៉ោងរបស់លោកដោយលើកសរសើរកំណើនសេដ្ឋកិច្ចដ៏ច្រើនរបស់ប្រទេសកម្ពុជាក្នុងពេលប៉ុន្មានឆ្នាំកន្លងមកនេះ និងការការពារព្រំដែនរបស់ខ្លួន ក្នុងនោះមានទាំងជ័យជម្នះខាងផ្លូវច្បាប់របស់ខ្លួនលើប្រទេសថៃ នៅតុលាការអន្តរជាតិផងដែរ។
មុនពេលបញ្ចប់ លោកនាយករដ្ឋមន្ត្រីលើកឡើងអំពីការបរាជ័យរបស់លោក រង្ស៊ី ក្នុងការជំនួសរូបលោក និងអំពីការរៀនសូត្រដែលប្រៀបធៀបគ្នានៃកូនៗរបស់ពួកគេ។
លោកបាននិយាយថា “ខ្ញុំបានមកស្រុកបារាំងមានប្រធានាធិបតីបារាំងទទួល ហ៊ុន សែន ជានាយករដ្ឋមន្ត្រី។ គ្មាននាយករដ្ឋមន្ត្រី សម រង្ស៊ី ទេ”។
លោក ហ៊ុន សែន បានមានប្រសាសន៍ថា លោកក៏បានផ្តល់អំណោយ៣០០ដុល្លារក្នុងម្នាក់ៗដល់និស្សិតខ្មែរ១០៥នាក់ ដែលកំពុងសិក្សានៅប្រទេសបារាំង ដោយបញ្ជាក់ថា មិនមែនជាការសូកនិស្សិតឲ្យមកស្តាប់លោកនិយាយទេ។ លោក ហ៊ុន សែន បានបន្ទោសគណបក្សសង្គ្រោះជាតិចំពោះពាក្យចចាមអារ៉ាមនាពេលថ្មីៗ ដែលថា លោកបានគំរាមផ្តាច់អាហារូបករណ៍ពីនិស្សិតខ្មែរណានៅប្រទេសបារាំងដែលមិនបានមកចូលរួមស្តាប់សុន្ទរកថារបស់លោក គឺជាការអះអាងដែលគណបក្សប្រឆាំងបានបដិសេធ។
លោក ហ៊ុន សែន បានមានប្រសាសន៍ថា “ខ្ញុំសង្ឃឹមថា បក្សប្រឆាំងគេមិនចោទថា គេជួលឲ្យមកស្តាប់ខ្ញុំទេ”។
លោកបានមានប្រសាសន៍ថា “នៅទីនេះ ខ្ញុំនិយាយទៅកាន់សូម្បីតែកូនៗរបស់ រង្ស៊ី ខ្ញុំគោរព ស្រឡាញ់ និងឃើញគេល្អ។ ប៉ុន្តែ ខ្ញុំមិនដឹងថា រង្ស៊ី ចាត់ទុកកូនៗខ្ញុំជាស្អីនោះទេ”។
“ពិតមែនហើយ សមត្ថភាពនិងសញ្ញាប័ត្ររង្ស៊ីទាបជាងរបស់កូនខ្ញុំឆ្ងាយណាស់”។ កូនរបស់គាត់មិនទាន់មានបណ្ឌិត គាត់ក៏អត់បណ្ឌិតដែរ។ កូនខ្ញុំ មានបណ្ឌិតពីរនាក់ ក្រៅពីនោះអនុបណ្ឌិតទាំងអស់”។
លោក ហ៊ុន សែន បានមានប្រសាសន៍ថា “ប៉ុន្តែ ខ្ញុំមិនបានយកសញ្ញាប័ត្របណ្ឌិតនិងអនុបណ្ឌិតរបស់កូនខ្ញុំទៅអួតអាងចំពោះអ្នកដទៃទេ។ មានតែ រង្ស៊ី ទេអួតអាង មើលងាយពួកខ្ញុំ”។
លោក រង្ស៊ី ដែលកំពុងធ្វើដំណើរនៅអឺរ៉ុប មិនបានឆ្លើយតបទៅនឹងសំណើសុំការអត្ថាធិប្បាយអំពីការថ្លែងចុងក្រោយរបស់លោកនាយករដ្ឋមន្ត្រីទេ។ អ្នកនាំពាក្យគណបក្សសង្គ្រោះជាតិមិនអាចទាក់ទងបានដែរ៕ និត