30 C
Phnom Penh

ប្រទេស​បារាំង​យល់​ព្រម​ជា​ផ្លូវការ​លើ​កម្ចី​១១៥​លាន​ដុល្លារ​និង​សន្ធិសញ្ញា​បត្យាប័ន

ដោយ ឌឹ ខេមបូឌា ដេលី

បទវិភាគ

យោង​តាម​ទំព័រ​ហ្វេសប៊ុក​របស់​លោក ហ៊ុន សែន ឲ្យ​ដឹង​ថា កម្ចី​សម្បទាន​មាន​ទឹក​ប្រាក់​ប្រហែល​១១៥​លាន​ដុល្លារ​ឲ្យ​ប្រទេស​កម្ពុជា និង​សន្ធិសញ្ញា​បត្យាប័ន​ទៅ​វិញ​ទៅ​មក​ត្រូវ​បាន​សម្រេច​យល់​ព្រម​ក្នុង​អំឡុង​កិច្ច​ប្រជុំ​មួយ​រវាង​លោក​នាយករដ្ឋមន្ត្រី ហ៊ុន សែន និង ប្រធានាធិបតី​បារាំង លោក ហ្វ្រង់ស័រ ហូឡង់ ក្នុង​ទីក្រុង​ប៉ារីស​កាលពី​ថ្ងៃ​ច័ន្ទ។

ក្នុង​កិច្ច​ប្រជុំ​នៅ​វិមាន​អេលីហ្សេ តែ​ប៉ុន្មាន​ម៉ោង​បន្ទាប់ពី​តំណាង​រាស្ត្រ​គណបក្ស​ប្រឆាំង​ពីរ​រូប​​រង​ការ​វាយ​ធ្វើ​បាប​នៅ​មុខ​រដ្ឋ​សភា​ក្នុង​ក្រុង​ភ្នំពេញ លោក

ហូឡង់ បាន​ទទួល​ស្វាគមន៍​លោក ហ៊ុន សែន ដើម្បី​ពិភាក្សា​កិច្ចព្រមព្រៀង។

លោក ហ៊ុន សែន បាន​សរសេរ​ថា “ប្រធានាធិបតី​បារាំង លោក ហ្វ្រង់ស័រ ហូឡង់ នឹង​លើក​ទឹក​ចិត្ត​អ្នក​វិនិយោគ​បារាំង​មក​ប្រទេស​កម្ពុជា ជា​ពិសេស​ដើម្បី​វិនិយោគ​ផ្នែក​អាកាសចរណ៍ ទឹក​ស្អាត និង​រថភ្លើង​ក្នុង​ក្រុង”។ លោក​បាន​បន្ថែម​ថា លោក ហូឡង់ មាន​ផែនការ​អញ្ជើញ​មក​ធ្វើ​ទស្សនកិច្ច​ទីក្រុង​ភ្នំពេញ​ក្នុង​ពេល​អនាគត​ដ៏​ខ្លី។

ក្នុង​ការ​បង្ហោះ​មួយ​ដោយ​ឡែក​ទាក់ទិន​នឹង​កិច្ច​ប្រជុំ​ជាមួយ​រដ្ឋមន្ត្រី​ការបរទេស​បារាំង ឡូរ៉ង់ ហ្វាប្យូស និង​មន្ត្រី​កម្ពុជា​និង​បារាំង​ផ្សេងទៀត ដើម្បី​ចុះ​ហត្ថលេខា​លើ​ឯកសារ​ចំនួន​៦ លោក​នាយករដ្ឋមន្ត្រី​បាន​លើក​ឡើង​ថា ប្រទេស​បារាំង​បាន​ផ្តល់​អំណោយ៤០៦​លាន​អឺរ៉ូ (ប្រហែល​៤៥០​លាន​ដុល្លារ)​ហើយ តាំងពី​ឆ្នាំ​១៩៩៣​មក។

ក្នុង​ចំណោម​កម្ចី​សម្បទាន​បន្ថែម​មាន​ទឹក​ប្រាក់​សរុប​១០៤​លាន​អឺរ៉ូ (ប្រហែល​១១៥​លាន​ដុល្លារ) ដែល​បាន​ប្រកាស​ក្នុង​ការ​បង្ហោះ​នោះ លោក ហ៊ុន សែន បាន​មាន​ប្រសាសន៍​ថា ទឹក​ប្រាក់​១១​លាន​អឺរ៉ូ សម្រាប់​គម្រោង​សាងសង់​សាលា​ជាតិ បណ្តុះបណ្តាល​វិជ្ជាជីវៈ​ទេសចរណ៍​នៅ​រាជធានី​ភ្នំពេញ​និង​ខេត្ត​ព្រះសីហនុ។

ទឹក​ប្រាក់​១៤​លាន​អឺរ៉ូ សម្រាប់​គម្រោង​ពង្រីង​”វិស័យ​អប់រំ” ចំណែក​ទឹក​ប្រាក់​៧០​លាន​អឺរ៉ូ​សម្រាប់​គម្រោង​​សាង​សង់​ប្រព័ន្ធ​ខ្សែ​បញ្ជូន​និង​ចែក​ចាយ​អគ្គិសនី នៅ​ខេត្ត​កំពង់​ចាម ក្រចេះ និង​ខេត្ត​​កោះកុង។

លោក អង្គវង្ស វឌ្ឍានា រដ្ឋមន្ត្រី​ក្រសួង​យុត្តិធម៌​កម្ពុជា ក៏​បាន​ជួប​ជាមួយ​សម​ភាគី​បារាំង​របស់​លោក​ដែរ គឺ​លោក គ្រិស្ទាន តូប៊ីរ៉ា នៅ​វិមាន​អេលីហ្សេ ដើម្បី​ចុះ​ហត្ថលេខា​លើ​កិច្ចព្រមព្រៀង​មួយ​តម្រូវ​ឲ្យ​ប្រទេស​ទាំង​ពីរ​ធ្វើ​បត្យាប័ន​ឧក្រិដ្ឋជន​ដែល​ត្រូវ​ចោទ​ប្រកាន់​ក្នុង​ដែន​សមត្ថកិច្ច​របស់​ប្រទេស​នីមួយៗ។

ជាមួយ​នឹង​អ្នក​នយោបាយ​ប្រឆាំង​ផ្សេងទៀត ប្រធាន​គណបក្ស​ប្រឆាំង គឺ​លោក សម រង្ស៊ី ជាង​២០​ឆ្នាំ​មក​ហើយ​បាន​ប្រើ​លិខិត​ឆ្លង​ដែន​បារាំង​របស់​លោក​ជា​ញឹកញាប់ ក្នុង​ការ​ភៀសខ្លួន​ពី​ប្រទេស​កម្ពុជា ដើម្បី​គេច​ចេញ​ពី​ការ​កាត់​ឲ្យ​ជាប់​ទោស ដែល​ជាទូទៅ​​គេ​ចាត់​ទុក​ថា​ជា​រឿង​នយោបាយ។

លោក រង្ស៊ី ដែល​លោក ហ៊ុន សែន បាន​គំរាម​ចាប់​ដាក់​ពន្ធនាគារ​កាលពី​យប់​ថ្ងៃ​អាទិត្យ​ថ្មីៗ​នេះ មិន​អាច​ទាក់ទង​សុំ​ការ​អត្ថាធិប្បាយ​បាន​ទេ ប៉ុន្តែ​ធ្លាប់​បាន​និយាយ​កាលពី​ឆ្នាំ​មុន​ថា លោក​ជឿ​ថា គណបក្ស​សង្គ្រោះ​ជាតិ​រឹងមាំ​ណាស់​ឥឡូវ​នេះ ជា​ហេតុ​ដែល​លោក​នឹង​មិន​ភៀស​ខ្លួន​ពី​ប្រទេស​កម្ពុជា​ក្នុង​ពេល​អនាគត​ទេ៕និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស