27 C
Phnom Penh

ស្លាក​លេខ​ ខ.ម. ក្លែង​​​ក្លាយ​​​រក​មិន​ឃើញ​នៅ​បញ្ជាការ​ដ្ឋាន​កង​រាជ​អាវុធ​ហត្ថ​ផ្ទៃ​ប្រទេស​

ដោយ ឌឹ ខេមបូឌា ដេលី

បទវិភាគ

អ្នកនាំពាក្យ​ម្នាក់​បាន​និយាយ​កាល​ពី​ម្សិល​មិញ​ថា រយៈពេល​ពីរ​ថ្ងៃ​ដំបូង​នៃ​ការ​បង្ក្រាប​ជា​ថ្មីទៅ​លើ​ការ​ប្រើ​ប្រាស់​ស្លាក​លេខ​​​យោធា​​​​មិន​ត្រឹម​ត្រូវ បាន​ផ្ដោត​ទៅ​លើ​យាន​យន្ត​ជាច្រើន​គ្រឿង​ដែល​ចត​នៅ​​ទីបញ្ជាការដ្ឋាន​​កង​រាជអាវុធ​​ហត្ថ​​លើ​ផ្ទៃ​ប្រទេស​ក្នុង​រាជ​​​ធានី​ភ្នំពេញ។

លោក អេង ហ៊ី ​អ្នក​នាំពាក្យ​កង​រាជអាវុធ​ហត្ថ​លើ​ផ្ទៃ​ប្រទេស​បាន​ពន្យល់​ថា មន្ត្រី​កង​រាជ​អាវុធ​ហត្ថ​១០​រូប​​ត្រូវ​បាន​ចាត់​តាំង​ឲ្យ​ទៅ​​ពិនិត្យ​មើល​រថយន្ត​ទាំង​អស់​ដែល​បើក​​ចូល​ក្នុង​ទីបញ្ជា​ការដ្ឋាននៅ​ក្នុង​ខណ្ឌ​ដង្កោ ដើម្បី​ធ្វើ​ឲ្យ​​ប្រាកដ​ថា ស្លាក​លេខ​ ខ.ម. ​ពណ៌​ខៀវ​និង​ក្រហមរបស់​យាន​យន្ត​ទាំង​នោះ​​​ជា​ស្លាក​លេខ​ពិត​ឬយ៉ាង​ណា។

​លោក​បាន​លើកឡើង​​កាលពី​ម្សិល​​​មិញ​​​ថា “​យើង​បាន​ដាក់​​ក្រុម​ការ​ងារ​ឱ្យ​ប្រចាំ​ការ​នៅ​ ច្រក​ចូល​ទី​បញ្ជាការដ្ឋាន​កង​រាជអាវុធ​ហត្ថ​នេះ ហើយ​ឃាត់​​មន្ត្រី​ណា​ដែល​​ប្រើ​ប្រាស់​រថយន្ត​ និង​ម៉ូតូ​ដែល​មាន​ស្លាក​លេខ​យោធា​ប៉ុន្តែ​យើង​រក​មិន​ឃើញ​នរ​ណា​ម្នាក់​ដែល​ប្រើ​ ប្រាស់​​ស្លាក​លេខ​យោធា​ក្លែង​ក្លាយ​ឡើយ​”។

កាលពី​ម្សិលមិញ លោក អេង ហ៊ី ​កំពុង​រង់​​​ចាំ​ទទួល​ព័ត៌មាន​​ពី​លទ្ធផល​​នៃ​ការ​​ពិនិត្យ​មើល​ស្រដៀង​គ្នា​ដែល​​ធ្វើ​ឡើង​នៅ​ទីបញ្ជាការ ដ្ឋាន​កង​រាជអាវុធ​ហត្ថ​ខេត្ត​ទូទាំង​ប្រទេស​នៅ​ឡើយ។

លោក​បាន​ថ្លែង​ថា “​យើង​បាន​​ដាក់​បញ្ជា​ទៅ​ដល់​មេ​​​បញ្ជាការ​កង​រាជអាវុធ​ហត្ថ​ខេត្ត​ទាំង​អស់​ឲ្យ​ពិនិត្យ​មើល​ស្លាក​លេខ​យោធា​ក្លែង​ក្លាយ​នៅ​ក្នុង​អង្គភាព​របស់​ខ្លួន​ ប៉ុន្តែ​រហូត​មក​ទល់​ពេល​នេះ ខ្ញុំ​មិន​ទាន់​​ទទួល​​​បាន​ព័ត៌មាន​ពី​ពួកគេ​នៅ​ឡើយ​ទេ”។

លោក អេង ហ៊ី បាន​ថ្លែង​ថា ​មន្ត្រី​ទាំង​​​នោះ​ក៏បាន​​​​ក្រឡេកមើល​រថយន្ត​ទាំង​អស់​ដែល​បើក​ចូល​បរិវេណ​កង​រាជអាវុធ​ហត្ថ​ ដើម្បី​​រក​ឲ្យ​ឃើញ​ថា​តើ​​រថយន្ត​ទាំង​នោះ​​​មាន​បិទ​ស្ទីកគ័រ​ខ្មៅ​លើ​កញ្ចក់​បង្អួច​​ទេ ដែល​ត្រូវ​បាន​លោក​នាយក​រដ្ឋមន្ត្រី ហ៊ុន សែន បញ្ជាមិន​​ឲ្យ​បើក​បរ​នៅ​លើ​ដង​ផ្លូវ​កាលពី​​ឆ្នាំ​១៩៩៧ បើ​ទោះ​ជា​បម្រាម​នេះ​ត្រូវ​បាន​​​អនុវត្ត​ដោយ​កម្រ​ក៏ដោយ ​ប៉ុន្តែរកមិន​​ឃើញ​មានអ្នក​រំលោភ​ច្បាប់ឡើយ​។

ទោះ​ជា​យ៉ាង​ណា លោក​បាន​ថ្លែង​ថា ក្រុម​របស់​លោក​ “បាន​អប់រំ​” មន្ត្រី​មួយ​ចំនួន​​ដែល​បាន​មក​ដល់​​ទីបញ្ជាការដ្ឋាន​កង​រាជ​​​អាវុធ​ហត្ថ​ដោយ​ជិះម៉ូតូ​មិន​បាន​ពាក់​មួក​សុវត្ថិភាព​ ដែល​ជាការ​​ខុស​ច្បាប់។ កាលពី​ថ្ងៃ​អាទិត្យ​ លោក អេង ហ៊ី បាន​ថ្លែង​ថា កង​រាជអាវុធ​ហត្ថ​នឹង​ចាប់​ផ្ដើម​ពិនិត្យ​យាន​យន្ត​ទាំង​អស់​ទូទាំង​រាជធានី​ភ្នំពេញ​នៅ​ថ្ងៃ​ច័ន្ទ ដើម្បី​រក​​មើល​ស្លាក​លេខ​ ខ.ម. ក្លែង​ក្លាយ ​ឬ​ប្រើ​ប្រាស់​មិន​បាន​ត្រឹម​ត្រូវ​។

តាម​លក្ខណៈ​បច្ចេកទេស ​សមាជិក​យោធា​​មិន​ត្រូវ​ប្រើ​ស្លាក​លេខ​យោធា​​​​លើ​យាន​យន្ត​ផ្ទាល់​ខ្លួន​ឡើយ បើ​ទោះ​ជា​ការ​អនុវត្ត​នេះ​​មាន​ការ​រីក​រាល​ដាល​ក៏ដោយ​។

ប៉ុន្តែ​គិត​ត្រឹម​ថ្ងៃ​អង្គារ ការ​ត្រួត​​ពិនិត្យ​ទាំង​នេះ​​​​មិន​​ទាន់​ចាប់​ផ្ដើម​​នៅ​ឡើយ​ទេ។ លោក អេង ហ៊ី បាន​ពន្យល់​ថា“យើង​មិន​ទាន់​បាន​ចាប់​ផ្ដើម​ត្រួត​ពិនិត្យ​មើល​យាន​យន្ត​នៅ​តាម​ដង​ផ្លូវ​នៅ​ឡើយ​ទេ ពីព្រោះ​យើង​មិន​ទាន់​ទទួល​បាន​បទបញ្ជា​ពី​ថ្នាក់​លើ​”៕ សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស