31 C
Phnom Penh

លោក ហ៊ុន សែន ​​បដិសេធ​ថា ​​លោកមិន​ពាក់​ព័ន្ធ​​​​ហេតុ​ការណ៍​​​​វាយ​ដំ​​តំណាង​រាស្ត្រ​​បក្ស​ប្រឆាំង​

ដោយ ឌឹ ខេមបូឌា ដេលី

បទវិភាគ

លោក​នាយក​រដ្ឋមន្ត្រី​ ហ៊ុន សែន បាន​បង្ហាញ​មុខ​ដោយ​សភាព​ស្ងប់​ស្ងាត់​​តាម​​​ទូរ​ទស្សន៍​​ជាតិ​​​កាល​ពី​យប់មិញ ដើម្បី​អំពាវ​នាវ​​​ឲ្យ​​​ប្រជា​ព​រដ្ឋ​រក្សា​ភាព​ស្ងប់​ស្ងាត់​ក្រោយ​​ហេតុ​​​ការណ៍​​វាយ​ដំ​​យ៉ាង​សាហាវ​កាលពី​ថ្ងៃ​ច័ន្ទ លើ​តំណាង​រាស្ត្រ​​គណ​បក្ស​សង្គ្រោះ​ជាតិ​ពីរ​រូប ដែល​​ទាំង​គណបក្ស​ប្រឆាំង និង​សង្គម​ស៊ីវិល​​សុទ្ធ​តែ​ចោទ​ប្រកាន់​​ថា​លោក ហ៊ុន សែន ជា​អ្នក​រៀបចំ​​។

លោក​នាយករដ្ឋមន្ត្រី​ក៏​បាន​បញ្ជា​ឲ្យ​ចាប់​ខ្លួន​​ជា​បន្ទាន់​នូវ​ជន​ប្រព្រឹត្ត​អំពើ​ហិង្សា​ដែល​បាន​ចូល​រួម​បាតុកម្ម​​ប្រឆាំង​​​លោក កឹម សុខា អនុប្រធាន​គណបក្ស​សង្គ្រោះ​ជាតិ​​ផង​ដែរ​ ជា​​​ការ​បញ្ជា​មួយ​​ដែល​លោក សម រង្ស៊ី ប្រធាន​​​​គណបក្ស​ប្រឆាំង​​សង្ឃឹម​ថា​មាន​ភាព​ស្មោះ​ត្រង់​។

លោក សម រង្ស៊ី បាន​ចោទ​ប្រកាន់​លោក ហ៊ុន សែន ថា​ជា​អ្នក​រៀបចំ​​ការ​វាយ​ដំ​​លើ​តំណាង​រាស្ត្រ​ទាំង​នេះ​ជា​ការ​សង​សឹក​ចំពោះ​​​​បាតុកម្ម​​របស់​គណបក្ស​ប្រឆាំង​​ដើម្បី​​ស្វាគមន៍​​លោក​អំឡុង​ដំណើរ​ទស្សនកិច្ច​​​​របស់​លោក​​កាល​ពី​ពេល​ថ្មីៗ​នេះ​ទៅ​កាន់​សហរដ្ឋ​អាមេរិក​ និង​​ប្រទេស​បារាំង​។

លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន ពេល​​​មក​​​ដល់​​​អាកាសយានដ្ឋាន​​​អន្តរជាតិ​​​ភ្នំពេញ​​​ កាល​ពីម្សិលមិញ បន្ទាប់​​​ពី​​​ធ្វើ​​​ដំណើរ​​​ទស្សនកិច្ច​​​ផ្លូវ​​​រដ្ឋ​​​ទៅ​​​កាន់​​​ប្រទេស​​​បារាំង​​​។ រូបថតៈ សីុវ  ចាន់ណា​​​/The Cambodia Daily
លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន ពេល​​​មក​​​ដល់​​​អាកាសយានដ្ឋាន​​​អន្តរជាតិ​​​ភ្នំពេញ​​​ កាល​ពីម្សិលមិញ បន្ទាប់​​​ពី​​​ធ្វើ​​​ដំណើរ​​​ទស្សនកិច្ច​​​ផ្លូវ​​​រដ្ឋ​​​ទៅ​​​កាន់​​​ប្រទេស​​​បារាំង​​​។ រូបថតៈ សីុវ ចាន់ណា​​​/The Cambodia Daily

លោក​នាយក​រដ្ឋមន្ត្រី​បាន​​ចាប់ផ្ដើម​សុន្ទរ​កថា​របស់​លោក​កាល​ពី​យប់មិញ​ដោយ​ការ​ភ្ជាប់​ទំនាក់​ទំនង​ដែល​អាច​ទៅ​រួច។ លោក​មាន​ប្រសាសន៍​ថា “​កាលពី​ខែ​កញ្ញា ឆ្នាំ​២០១៥​​​កន្លង​ទៅ​ នៅ​ពេល​ដែល​ខ្ញុំ​បាន​​ធ្វើ​ដំណើរ​​ទៅ​​​​ចូល​រួម​​កិច្ច​ប្រជុំ​កំពូល​របស់​​​​អង្គការ​សហ​ប្រជា​​​ជាតិ បក្ស​ប្រឆាំង​បាន​ចាត់​​តាំង​ធ្វើ​បាតុ​កម្ម​នៅ​ទីនោះ​ក្នុង​ចំនួន​មនុស្ស​ប្រមាណ​៤០​ទៅ៥០​នាក់​​ ក្នុង​ពេល​ដែល​ខ្ញុំ​ជួប​បង​​ប្អូន​ជន​រួម​ជាតិ​​​​ប្រមាណ​ជិត៣០០​នាក់​។ លើក​នេះ​ជាថ្មី​ម្ដង​ទៀត ​​នៅ​ពេល​ដែល​ខ្ញុំ​បាន​ធ្វើ​ដំណើរ​​​​​ទៅ​ប្រទេស​បារាំង ​​ក្នុង​ឋានៈ​ជា​ភ្ញៀវ​ផ្លូវ​រដ្ឋ​​ដែល​មាន​ការ​​ត្រួត​ពល​​​​ពី​ព្រលាន​​​យន្តហោះ​​អម​ដោយ​ម៉ូតូ​​​ពាក់​ទង់ជាតិ​របស់​កម្ពុជា​​ តំណាង​​​​ឲ្យ​ពូជ​សាសន៍​កម្ពុជា​ គឺ​បក្ស​ប្រឆាំង​បាន​​រៀបចំ​​​​​នូវ​ការ​ធ្វើ​បាតុកម្ម​​មួយ​ដែល​មាន​​មនុស្ស​ចូល​រួម​​ប្រមាណ​១០០​នាក់​​ ក្នុង​ពេល​ដែល​ខ្ញុំ​​ធ្វើ​ការ​ជួបជុំ​ជាមួយ​បង​ប្អូន​ប្រជាពលរដ្ឋ​​ខ្មែរ​​ប្រមាណ​ជិត​១.០០០​នាក់​។ ដូច្នេះ ​​បាតុកម្ម​នៅ​​ទីក្រុង​ភ្នំពេញ​ អាច​ជះឥទ្ធិពល​​ពី​ចំណែក​មួយ​នៃ​បាតុកម្ម​ដែល​រៀបចំ​​ជា​បន្ត​បន្ទាប់​ដោយ​គណបក្ស​ប្រឆាំង​នៅ​ឯ​ទីក្រុង​​ញូវ​យ៉ក និង​នៅ​ឯ​ប្រទេស​បារាំង​ ឬ​អាច​ថា​​​វា​ជា​ការ​គាប់​ជួន​ ព្រោះ​បក្ស​ប្រឆាំង​​​​ផ្គើន​​ម្ដង​ហើយ​ម្ដង​ទៀត​ [បាតុកម្ម​] ​ដោយ​គ្មាន​គិត​ពី​​សេចក្ដី​ថ្លៃថ្នូរ​របស់​ជាតិ​”។

គណបក្ស​​កាន់​អំណាច​របស់​លោក ហ៊ុន សែន ​​បាន​បដិសេធ​​​​ថា ​ខ្លួន​​មិន​មែន​ជា​អ្នក​​រៀបចំ​បាតុកម្ម​​​ទាម​ទារ​​ឲ្យ​លោក កឹម សុខា ចុះ​ចេញ​​ពី​តំណែង​អនុប្រធាន​រដ្ឋសភា​ឡើយ ​ដោយ​លើក​ឡើង​​ថា វា​​ជា​ការ​បង្ហាញ​​កំហឹង​ដោយ​ឯក​ឯង​​របស់​អ្នក​គាំទ្រ​គណបក្ស​ប្រជា​​ជន​កម្ពុជា។

លោក ហ៊ុន សែន បាន​មាន​ប្រសាសន៍​ថា លោក​មិន​​ទាំង​ប្រា​ដក​ថា ការ​វាយ​ដំ​តំណាង​រាស្ត្រ​ទាំង​ពីរ​រូប​នៅ​ខាង​ក្រៅ​ទ្វារ​របង​នៃ​រដ្ឋសភា​​ជា​រឿង​នយោបាយ​​ឡើយ ប៉ុន្តែ​លោក​​​បាន​ទាម​ទារ​​ឲ្យ​ផ្ដន្ទាទោស​​ជន​ប្រព្រឹត្ត​ល្មើស​។

លោក​​​បាន​បក​ស្រាយ​ថា ”​មាន​ការ​លើក​ឡើង​​​នូវ​ប្រធាន​បទ​មួយ​ចំនួន​ទាក់​ទិន​នឹង​រឿង​​​នេះ​រឿង​នោះ ការ​ជេរ​គ្នា​ ស្នេហា​ត្រីកោណ សង​សឹក​គ្នា ឬ​យ៉ាង​នេះ​យ៉ាង​នោះ​។ ប៉ុន្តែ​ទោះ​បី​រឿង​អ្វី​ក៏ដោយ ​​មិន​ត្រូវ​​ឲ្យ​មាន​អំពើ​ហិង្សា​កើត​ឡើង​ជា​ដាច់​ខាត​។ ថ្ងៃ​នេះ​ខ្ញុំ​​ប្រកាស​ជា​ផ្លូវ​ការ​សុំ​ឲ្យ​សមត្ថកិច្ច​​តាម​ចាប់​ខ្លួន​ជន​ដៃដល់​ដែល​បាន​ប្រព្រឹត្ត​​ហិង្សា​​លើ​អ្នក​តំណាង​រាស្ត្រ​ទាំង​ពីរ​រូប។ យើង​មិន​អាច​យោគ​យល់​ និង​អត់ឱន​ឲ្យ​ចំពោះ​អ្នក​ប្រព្រឹត្ត​ បើ​ទោះ​បី​អ្នក​នោះ​​ជា​អ្នក​គាំទ្រ​គណបក្ស​ប្រជាជន​ ឬ​គាំទ្រ​​បក្ស​ប្រឆាំង​​ក៏ដោយ”។

លោក ហ៊ុន សែន បាន​បញ្ជាក់​ថា ការ​​ប្រើ​អំពើ​ហិង្សា​​លើ​គណបក្ស​សង្គ្រោះ​ជាតិ​ទាំង​ពីរ​រូប​​គឺ​លោក ញ៉យ ចំរើន និង​លោក គង់ សភា ដែល​​ត្រូវ​បាន​​​គេ​ទាត់​ធាក់​​ និង​ជាន់​លើ​យ៉ាង​រន្ថើន​​បន្ទាប់ពី​ត្រូវ​បាន​ទាញ​ទម្លាក់​ពី​លើ​រថយន្ត​របស់​ពួក​លោក បាន​កើត​ឡើង​មួយ​ម៉ោង​ក្រោយ​​បាតុកម្ម​​គាំទ្រ​​គណបក្ស​ប្រជា​ជន​នេះ​រម្សាយ។

លោក​​បាន​ថ្លែង​ថា “​អ្នក​ណា​ក៏ដោយ​​ដែល​​​ប្រព្រឹត្ត​អំពើ​ដ៏​ថោក​ទាប​នេះ​ គឺ​ត្រូវ​តែ​ចាប់​យក​មក​ផ្ដន្ទាទោស​ឲ្យ​ខាន​តែ​បាន​។ សង្ឃឹម​ថា នឹង​មាន​កិច្ច​សហប្រតិបត្តិការ​​​ ហើយ​អំពាវ​​​​នាវ​ឲ្យ​ប្រជាពលរដ្ឋ​ស្ងប់​ស្ងាត់ ​ការ​រក​ទទួល​ទាន​នៅ​តែ​បន្ត​ធ្វើ​”។

លោក​​​បាន​​​បន្ថែម​ថា ​​​​លោក ហេង សំរិន​ ប្រធាន​រដ្ឋសភា​បាន​ផ្ដល់​ប្រាក់​​​ចំនួន​​២០.០០០​​​ដុល្លារ​​ដើម្បី​ចេញ​ថ្លៃ​ព្យាបាល​លោក​ ញ៉យ ចំរើន និង​លោក គង់ សភា ​ហើយ​​អាច​នឹង​ផ្ដល់​បន្ថែម​ទៀត ​ប្រសិន​បើ​​​ថ្លៃ​ព្យាបាល​​​​អស់​ច្រើន​ជាង​នេះ​។

​បន្ទាប់ពី​ការ​​វាយ​ប្រហារ​កាល​ពីថ្ងៃ​ច័ន្ទ លោក សម រង្ស៊ី បាន​ពណ៌នា​ពី​ហេតុការណ៍​នេះ​​​ថា​ជា​​ឧទាហរណ៍​​មួយ​​ស្តីពី​​លោក ហ៊ុន សែន ​ប្រើ​ប្រាស់​​ “​វិធី​សាស្ត្រ​​របស់​ពួក​ហ្វា​ស៊ីស” ​និង​​ជា​ទង្វើ​សង​សឹក​ដែល​ត្រូវ​បាន​​ព្រមាន​ជា​មុន​ចំពោះ​បាតុកម្ម​​នៅ​ក្នុង​ប្រទេស​បារាំង និង​សហរដ្ឋអាមេរិក​។

ប៉ុន្តែ​លោក សម​ រង្ស៊ី មាន​ឥរិយាបថ​សម្រុះ​​សម្រួល​​ច្រើន​កាលពី​យប់​មិញ ដោយ​លើក​ឡើង​ថា លោក​​នឹង​​អនុញ្ញាត​ឲ្យ​ការ​ស៊ើប​អង្កេត​​​ផ្លូវ​ការ​បញ្ចប់​សិន​ មុន​​នឹង​លោក​ធ្វើ​ការ​អះ​អាង​បន្ថែម​ទៀត​ ទោះ​បី​​ជា​លោក​នៅ​តែ​ជឿ​​ថា លោក​ ហ៊ុន សែន ជា​អ្នក​រៀបចំ​ការ​វាយ​ប្រហារ​នេះ​ក៏ដោយ។

​លោក​​បាន​គូស​បញ្ជាក់​ថា ​”​នេះ​ជា​​ការ​ជឿ​​ជាក់​របស់​ខ្ញុំ ប៉ុន្តែ​​​រវាង​កា​រ​ជឿ​​ជាក់​របស់​ខ្ញុំ​ និង​ការ​បញ្ជាក់​ជា​ផ្លូវ​ការ​​ យើង​ត្រូវ​ទុក​ឲ្យ​អ្នក​ដែល​ត្រូវ​​​ធ្វើ​ការ​ស៊ើបអង្កេត​​ធ្វើ​ការ​ងារ​របស់​ខ្លួន ដូច្នេះ​ខ្ញុំ​ស្វាគមន៍​ការ​ស៊ើបអង្កេត​នេះ​។ ប៉ុន្តែ​ខ្ញុំ​​សុំ​ឲ្យ​មាន​ការ​ស៊ើបអង្កេត​​ឯក​រាជ្យ​ និង​មិន​​លម្អៀង​។ នេះ​ជា​អ្វី​ដែល​ពិត​ជា ចាំបាច់​។ វា​ជា​ឱកាស​មាស​សម្រាប់​រដ្ឋាភិបាល​​​របស់​​លោក ហ៊ុន សែន បង្ហាញ​ថា​គ្មាន​ស្ដង់​ដារ​​​ពីរ​​​​នៅ​កម្ពុជា​។ ​​តែង​តែ​មានការ​ស៊ើបអង្កេត​​ នៅ​ពេល​មាន​ការ​ចោទ​​កាន់​​​​​​គណបក្ស​ប្រឆាំង ​និង​អ្នក​គាំទ្រ​របស់​ខ្លួន​ពី​បទ​ប្រើ​អំពើ​ហិង្សា ហើយ​​ការ​ស៊ើបអង្កេត​​​ទាំង​នោះបាន​បញ្ចប់​​យ៉ាង​ឆាប់​រហ័ស។ វា​ត្រូវ​បាន​ធ្វើ​ឡើង​យ៉ាង​ច្បាស់​លាស់​នៅ​ពេល​​​គេ​ចោទ​ប្រកាន់​អ្នក​គាំទ្រ​​គណបក្ស​សង្គ្រោះ​ជាតិ ដូច្នេះ​ខ្ញុំ​​ចង់​ឃើញ​​វា​ដំណើរ​ការ​ឆាប់​រហ័ស​ដូច​ពួក​គេ​​​​ជាអ្នក​គាំទ្រ​គណបក្ស​សង្គ្រោះ​ជាតិ​អ៊ីចឹង​​ដែរ”។

ឧត្តមសេនីយ៍​ឯក ឆៃ ស៊ីណារិទ្ធ ​អគ្គ​ស្នង​ការ​រង​នគរ​បាល​ជាតិ ​​ដែល​​ជា​សមាស​ភាព​មួយ​រូប​​​នៅ​ក្នុង​គណៈ​កម្មការ​​​ដែល​មាន​សមា​ជិក​​​​ប្រាំពីរ​រូប​ដែល​ត្រូវ​បាន​បង្កើត​ឡើង​​ដើម្បី​​​ស៊ើបអង្កេត​ការ​វាយ​ប្រហារ​នេះ​ បាន​មាន​ប្រសាសន៍​​ថា ការ​ស៊ើបអង្កេត​បាន​ចាប់​ផ្ដើម​​ឡើង​ហើយ​​ ដោយ​នគរ​បាល​​កំពុង​ស្រាវ​ជ្រាវ​​​រក​​វីដេអូឃ្លីប​តាម​បណ្ដាញ​ទំនាក់​ទំនង​សង្គម​។

លោក​បាន​​ថ្លែង​ថា ”​ព្រឹក​នេះ​យើង​បាន​ចាប់​ផ្តើម​​​ប្រមូល​ភ័ស្តុតាង និង​សាក្សី​​។ យើង​ចាំបាច់​ត្រូវ​ប្រមូល​​​ភ័ស្តុតាង​​ឲ្យ​បាន​ច្រើន​តាម​ដែល​អាច​ធ្វើ​ទៅ​បាន​ដើម្បី​វែក​មុខ​​​​ជន​ល្មើស​​ ហើយ​ពេល​នេះ​យើង​កំពុង​ខិតខំ​យ៉ាង​ខ្លាំង​ និង​​បាន​ឃើញ​ព័ត៌មាន​ដែល​បង​ប្អូន​​​បង្ហោះ​តាម​បណ្ដាញ​ទំនាក់​ទំនង​សង្គម”។

ប៉ុន្តែ​លោក​សង្ឃឹម​ថា ​គណៈកម្មការ​នេះ​នឹង​ស្វែង​រក​ជន​សង្ស័យ​ឃើញ ទោះបី​ជា​​​អង្គការ​ឃ្លាំមើល​សិទ្ធិ​មនុស្ស​​ (Human Rights Watch)​ ចោទ​ប្រកាន់​ថា ​គណៈកម្មការ​នេះ​​គឺ​ជា​កម្លាំង​ចាត់​តាំង​មួយ​​ដែល​ត្រូវ​បាន​បង្កើត​ឡើង​ដើម្បី​បិទ​បាំង​ការ​រៀបចំ​ផែនការ​ប្រើ​អំពើ​ហិង្សា​របស់​គណបក្ស​​ប្រជាជន​កម្ពុជា។

លោក​​មាន​ប្រសាសន៍​បន្ត​ថា “​​ពេល​យើង​ាន​ភ័ស្តុ​តាង និង​មាន​អត្តសញ្ញាណ​របស់​ពួក គេ​ យើង​នឹង​ធ្វើ​ការ​​ងារ​ទៅ​តាម​នីតិវិធី​​ដើម្បី​ធ្វើ​សំណើ​ទៅ​តុលាការ​​​ដើម្បី​​​ចាប់​ខ្លួន​ពួកគេ​”។ ​​​

លោក កឹម សុខា អនុប្រធាន​​​គណបក្ស​​​ប្រឆាំង​​​​​​បាន​​​បង្ហោះ​​​សារ​​​តាម​​​ហ្វេស​​​ប៊ុក​​​ពី មន្ទីរ​​​ពេទ្យ​​​ក្នុង​​​ប្រទេស​​​ថៃ​​​ដោយ​​​និយាយ​​​ថា លោក ញ៉យ ចំរើន បាន​​​​​​វះ​​​កាត់របួស​​​​​​បាក់​​​ឆ្អឹងកដៃ និង​​​របួស​​​បាក់​​​ឆ្អឹង​​​រង្វង់ភ្នែក​​​ រីឯ ​​​លោក គង់ សភា វិញ​​​វះកាត់​​​របួស​​​បាក់​​​ឆ្អឹង​​​ខ្ទង់ច្រមុះ និង​​​របួស​​​រហែក​​​ក្រដាស​​​ត្រចៀក។

ការ​​​អះ​​​អាង​​​ដែល​​​ថា​​​ គណបក្ស​​​ប្រជាជន​​​កម្ពុជា​​​បាន​​​រៀប​​​ចំ​​​ការ​​​តវ៉ា​​​កាល​​​ពី​​​ថ្ងៃ​​​ច័ន្ទ ត្រូវ​​​បាន​​​បញ្ជាក់​​ឲ្យឃើញកាន់ច្បាស់​​​​តាមរយៈ​ការ​​​អំពាវ​​​នាវ​​​មួយទៀត​ដែលក៏​ទាមទារ​ឲ្យ​​​លោក ​​​កឹម សុខា ចុះ​​​ចេញ​​​ពី​​​តំណែង​​​​​​ដែរ​ អំឡុង​​​ការ​​​តវ៉ា​​​​​​ដាច់​​​ដោយ​​​ឡែក​​​​​​របស់​​​ទាហានដែល​ស្ថិត​​​​ក្រោម​​​ការ​​​គ្រប់គ្រង​​​​របស់​​​លោក គន់ គីម អគ្គ​​​មេបញ្ជាការ​​​រង​​​នៃ​​​កង​​​យោ​​​ពល​​​ខេមរភូមិន្ទ​​​ដែល​​​ជា​​​មនុស្ស​​​ជំនិត​​​របស់​​​លោក ហ៊ុន ​​​សែន ​​​។​​​

ពេល​​​ទៅទទួល​​​លោក ហ៊ុន សែន នៅ​​​អាកាសយាន​​​ដ្ឋាន​​​អន្តរជាតិ​​​ភ្នំពេញ កាល​​​ពី​​​ព្រឹក​​​ម្សិលមិញ​​​ លោក ទៀ បាញ់​​​ រដ្ឋ​​​មន្ត្រីក្រសួង​​​​​​ការ​​​ពារ​​​ជាតិ​​​បាន​​​បដិសេធ​​​ថា ការ​​​តវ៉ាទាំង​នេះ​​​​​​​មិន​​​មែន​​​ជា​​​ផ្នែក​​​នៃ​​​យុទ្ធនាការ​​​របស់​​​រដ្ឋាភិបាល​​​ដើម្បី​​​បំភិត​​​បំភ័យ​​​គណបក្ស​​​ប្រឆាំង​​​ឡើយ។​

​​​ឧត្តម​​​សេនីយ៍ ទៀ បាញ់​​​​​​ បាន​​​ប្រាប់​​​អ្នក​​​យក​​​ព័ត៌​​​មាន​​​ថា ទាហាន​​​ដែល​​​អំពាវ​​​នាវ​​​ទាម​​​ទារ​​​​​​​​​​​​​​​ឲ្យ​​​លោក កឹម សុខា ចុះ​​​ចេញ​​​ពី​​​តំណែង​​​ ” ​​​ក៏​​​មាន​​​សិទ្ធិ​​​​​​គាំទ្រ​​​ និង​​​មិនពេញចិត្ត​នឹង​នរណា​​​ម្នាក់​​​ដែរ​។​នេះជា​​​​សិទ្ធិ​​​​​​​របស់គេ​”។

​​​ជា​​​ផ្នែក​​​នៃការ​​​គំរាម​​​កំហែង​​​ និងការ​​​ប្រើ​​អំពើ​​​ហិង្សា​​​​​​ពី​​​សំណាក់​​​រដ្ឋាភិបាល​​​ដែលកើត​​​ឡើង​ភ្លាម​ៗ​ក្នុង​រយៈ​​​ពេល​​​បី​​​ថ្ងៃ​​​​​​​​​​ កាល​​​ពី​​​ថ្ងៃ​​​អាទិត្យ​​​លោក ហ៊ុន សែន ​​​ក៏​​​បាន​​​ព្រមាន​​​ផង​​​ដែរ​​​ ថា លោក​​​ សម រង្ស៊ី អាច​​​ជាប់​​​ពន្ធនាគារ​​​ដូច​​​ សមាជិក​​​ព្រឹទ្ធ​​​សភា​​​គណបក្ស​​​ប្រឆាំង​​​មួយ​​​រូប​​​ដែល​​​ត្រូវ​​​បាន​​​ចោទ​​​ប្រកាន់​​ទាក់​​​ទិន​​​នឹង​សន្ធិ សញ្ញា​​​ក្លែង​​​ក្លាយ​​​ដែល​​​សមាជិក​​​ព្រឹទ្ធ​​​សភា​​​រូប នេះ​​​បាន​​​បង្ហាញ​​​នៅ​​​ក្នុង​​​វីដេអូ​​​ឃ្លីប​​​មួយ​​​ដែល បង្ហោះ​តាម​​​ហ្វេសបុ៊ក​​​របស់​​​លោក ​​​សម ​​​រង្ស៊ី ។

អភ័យ​​​ឯកសិទ្ធ​​ិ​​​សភាដែល​រួច​​​ផុត​ពី​​​ការ​​​​​​ផ្តន្ទាទោស​​​របស់​​​សមាជិក​​​ព្រឹទ្ធ​​​សភា​​​ ហុង ​​​សុខហួរ មិន​ត្រូវបាន​គោរពទេ ​កាល​​​ពី​​​ខែ​​​សីហា ដោយ​​​សារ​​​​​​​​​បទល្មើស​ជាក់ស្តែង​​​​ ឬ​​​សកម្ម ភាព​​​​ល្មើស​​​ដែលរកឃើញ​នៅ​​​ក្នុង​​​វីដេអូឃ្លីប​។

លោក​​​ ហ៊ុន សែន បាន​​​មាន​​​ប្រសាសន៍​​​អំឡុង​​​ពេល​ថ្លែង​សុន្ទរកថា​នៅក្នុង​ទីក្រុង​ប៉ារីសថា​​​​ “អភ័យ​​​ឯកសិទ្ធិ​​​គេ​គោរព​ហើយ​ប៉ុន្តែ​ បទល្មើស​ជាក់​​​ស្តែង​​​ គេ​​​ចាប់​​​​​​​ភ្លាម​”។​​​លោក​​​ បាន​បន្ថែម​ថា​ “អាម្ចាស់Page [​​​ទំព័រ​​​ហ្វេស​​​បុ៊ក​​​​​​] ជានរណា​ ជា​ រង្ស៊ីហ្មង​​​​ អ៊ីចឹង​ទេ​​​​វា​​​អាច​​​​ដល់​ម្នាក់​ហ្នឹង​ ហើយ​បើដល់ម្នាក់​ហ្មឹង​ ម្តង​នេះ​​​ខ្ញុំ​​​ឈប់លើកលែងទោស​ឲ្យហើយ​​​​”។

ប៉ុន្តែ លោក​​​ សម រង្ស៊ី បាន​​​​​​លើក​​​ឡើង​​​កាល​​​​​​ពី​​​យប់​​​មិញ​​​ថា ការ​​​ចាប់​​​លោក​​​ដាក់​​​ពន្ធនាគារ​​​នឹង​​​ធ្វើ​​​ឲ្យ​​​មាន​​​បញ្ហា​​​ច្រើន​​​សម្រាប់​​​រដ្ឋាភិបាល​​​ហើយ​​​ថា លោក​​​មាន​​​គម្រោង​​​ត្រឡប់​​​ពី​​​ប្រទេស ​​​បារាំង​​​វិញ​មិន​ឲ្យ​ហួសពី​​​​ថ្ងៃ​​​ពុធ​ទេ​​​​។ លោក​​​បាន ​​​បន្ថែម​​​​ថា លោក​​​មិន​​​ខ្លាច​​​​​​គេ​​​ចាប់​​​ខ្លួន​​​ឡើយ​​​។

លោក​​​បាន​​​មាន​​​ប្រសាសន៍​​​ថា ” មិន​​​ខ្លាច​​​ទាល់​​​​​​តែ​​​សោះ​​​។ ករណី​​​របស់​​​លោក ហុង ​​​សុខហួរ​​​ ​​​វា​​​មិន​​​សម​​​ហេតុ​​​សម​​ផល​​​ទេ។ ប្រសិន​​​បើ​​​គេ​​​ចង់​​​ចាប់​​​ខ្ញុំ​​​ទៀត​​​នោះ​​​ វា​​​កាន់​​​តែ​​​មិន​​​សម​ហេតុ​​​ផល​​​ទៅ​​​ទៀត​​​។ ​​​ពេល​​​នោះ ​​​ខ្ញុំ​​​នៅ​​​សហរដ្ឋ​​​អាមេរិកពេញ​​​មួយ​​​ខែ​​​សីហា”។

លោក​​​បាន​​​បន្ថែមទៀត​​​​ថា “ខ្ញុំ​​​គិត​​​ថា ​​​រដ្ឋា​​​ភិបាល​​​កំពុង​​​ជាប់​​​រវល់​​​ខ្លាំង​​​ណាស់​​​ទៅ​​​ហើយ​​​ប៉ុន្តែ ខ្ញុំ​​​ក៏​ត្រៀម​​​ខ្លួន​​​​​​ចូល​ពន្ធនាគារ​​​​​​រួច​​​ហើយ​​​ដែរ​។ ពីរ​​​បី​​​ថ្ងៃ​​​ទៀត​​​ខ្ញុំ​​​នឹង​​​ត្រឡប់​​​ទៅ​​​កម្ពុជា​​​វិញ​​​​​​​​​។ ខ្ញុំ​​​មិន​​​ព្រួយ​​​បារម្ភ​​​ទេ​​​។ ប្រសិន​​​បើ​​​គេ​​​ចង់​​​ចា​​​ប់ខ្ញុំ ខ្ញុំ​​​ឲ្យ​​​ចាប់”៕ សុខុម និង ស៊ុយឈាង​​​ (រាយការណ៍​​​បន្ថែម​​​ដោយ​​​ មិុច ដារ៉ា)​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស