នគរបាលបាននិយាយថា បុរសបីនាក់ និងស្ត្រីបីនាក់ត្រូវបានចាប់ខ្លួននៅក្នុងរាជធានីភ្នំពេញ កាលពីម្សិលមិញ ដោយជាប់សង្ស័យថា បានជួញដូរស្ត្រីខ្មែរទៅប្រទេសចិនដើម្បីលក់ជាកូនក្រមំុ។
លោក កែវ ធា នាយការិយាល័យនគរបាល រាជធានីប្រឆាំងការជួញដូរមនុស្ស និងការពារអនីតិជនបានមានប្រសាសន៍ថា មន្ត្រីរបស់លោក ដំបូងបានចាប់ខ្លួនស្ត្រីម្នាក់ដែលគេជឿថា ជាមេខ្លោង ខណៈដែលស្ត្រីរូបនេះ បានធ្វើដំណើរទៅ ប្រទេសវៀតណាម។
លោកបានថ្លែងថា “ជនរងគ្រោះបីនាក់និងស្ត្រីជាមេខ្លោង ត្រូវបានគេរកឃើញខណៈពេលពួកគេធ្វើដំណើរតាមរថយន្តក្រុង…ទៅប្រទេសវៀតណាមហើយនឹងត្រូវបញ្ជូនទៅប្រទេសចិន”។
ប៉ុន្តែ លោក កែវ ធា បានថ្លែងថា ការធ្វើដំណើរតាមផ្លូវគោកកាត់តាមប្រទេសវៀត ណាមគឺជាមធ្យោបាយដ៏ពេញនិយមក្នុងការជួញដូរអនាគតកូនក្រមុំទៅប្រទេសចិន បន្ទាប់ពីមានករណីជួញដូរជាច្រើន ដែលនាំឲ្យក្រុមមន្ត្រីធ្វើការពិនិត្យពិច័យយ៉ាងប្រុងប្រយ័ត្ននូវការដាក់ពាក្យសុំទិដ្ឋាការរបស់ស្ត្រីខ្មែរវ័យក្មេងដែលធ្វើដំណើរតាមយន្តហោះតែម្នាក់ឯងទៅប្រទេសចិន។
លោក កែវ ធា បានថ្លែងថា នគរបាលបានតាមឃ្លាំមើលស្ត្រីរូបនេះដែលត្រូវបានចាប់ខ្លួនកាលពីម្សិលមិញ ហើយរង់ចាំចាប់ខ្លួនស្ត្រីរូបនេះពេលកំពុងធ្វើសកម្មភាព។ លោកបានថ្លែងថា ”យើងបានសើុបអង្កេតជាយូរមកហើយ ហើយនៅពេលស្ត្រីរូបនេះ ចាប់ផ្តើមធ្វើសកម្មភាពពិតប្រាកដ យើងបានចាប់ខ្លួនតែម្តង”។
លោក កែវ ធា បានថ្លែងថា បន្ទាប់មក នគរបាលបានចុះទៅផ្ទះស្ត្រីរូបនោះ ដែលស្ថិតក្នុងសង្កាត់បឹងសាឡាង ខណ្ឌទួលគោកជាកន្លែងដែលពួកគេជឿថា ស្ត្រីរូបនេះបានរៀបចំក្រុមជួញដូរមួយ។ ពួកគេបានរកឃើញជនរងគ្រោះពីរនាក់ទៀតនៅក្នុងផ្ទះនោះ ហើយបានចាប់ខ្លួនជនសង្ស័យប្រាំនាក់ផ្សេងទៀត។
លោក អឹុង មី នាយប៉ុស្តិ៍រងសង្កាត់បានអះអាងថា ការឆ្មក់ចូលនេះបានកើតឡើងមែន ប៉ុន្តែ បានលើកឡើងថា ពីមុនលោកមិនបានទទួលការចង្អុលបង្ហាញណាមួយថា ផ្ទះនេះត្រូវគេប្រើជាកន្លែងសម្រាប់ការជួញដូរមនុស្សឡើយ។
លោក អឹុង មី បានថ្លែងថា “យើងមិនដឹងថា តើពួកគេជាប់ទាក់ទងការជួញដូរមនុស្សឬយ៉ាងណានោះឡើយ ពីព្រោះពួកគេមើលទៅដូចជាគ្រួសារធម្មតាអ៊ីចឹង។ គ្មានអ្វីខុសប្លែក ដែលធ្វើឲ្យយើងសង្ស័យឡើយ”។
យោងតាមលោក កែវ ធា បានឲ្យដឹងថា នៅពេលសាកសួរ ជនសង្ស័យទាំងនោះបានសារភាពថា ពីមុនធ្លាប់បានលក់ស្ត្រីជាកូនក្រមុំទៅប្រទេសចិនមែន។
លោក កែវ ធា បានថ្លែងថា “ប្រសិនបើយើងមិនបានបង្ក្រាបទាន់ពេលវេលាទេនោះ អាចមានស្ត្រីច្រើនទៀតត្រូវគេបញ្ជូនទៅប្រទេសចិន”។ លោកបានបន្ថែមថា នគរបាលបានចាប់ផ្តើមប្រមូលភ័ស្តុតាងក្នុងករណីនេះកាលពីមួយខែមុន បន្ទាប់ពីនគរបាលទទួលបានពាក្យបណ្តឹងពីសាច់ញាតិជនរងគ្រោះ៕សារុន