យោងតាមរបាយការណ៍ព័ត៌មានឲ្យដឹងថា ជនជាតិម៉ាឡេស៊ីពីរនាក់ប្តីប្រពន្ធដែលកាត់ឲ្យជាប់ទោសពីបទឃាតកម្មលើស្ត្រីបម្រើជនជាតិខ្មែររបស់គេកាលពីឆ្នាំ២០១២ ត្រូវបានសាលាឧទ្ធរណ៍ម៉ាឡេស៊ី ផ្តន្ទាទោសប្រហារជីវិតដោយព្យួរកកាលពីថ្ងៃសុក្រ។
ដកស្រង់ម៉ាឡេម៉េលអនឡាញ កាសែតស្ត្រេតស៍ ថែមស៍ បានរាយការណ៍កាលពីថ្ងៃសៅរ៍ថា សាលាឧទ្ធរណ៍បានប្តូរការកាត់ឲ្យជាប់ទោសពីបទឃាតកម្មឆ្នាំ២០១៣ប្រឆាំងលោក ស៊ូ ជូទុងនិងប្រពន្ធគាត់ឈ្មោះជិន ឆុយលីងទៅជាឃាតកម្មដែលមានទោសធ្ងន់គឺទោសប្រហារជីវិត។
ជនជាតិម៉ាឡេស៊ីទាំងពីរនាក់ប្តីប្រពន្ធបានរកឃើញថាមានទោសពីបទសម្លាប់ស្ត្រីបម្រើរបស់គេកាលពីឆ្នាំ២០១២ គឺ ម៉ី ស៊ីចាន់ អាយុ ២៣ឆ្នាំ ដែលគេរកឃើញសាកសពស្គមស្គាំងនៅក្នុងផ្ទះរបស់គេ ហើយមានស្នាមរបួសនិងជាំពេញខ្លួន។
យោងតាមរបាយការណ៍ព័ត៌មានឲ្យដឹងថា បុព្វហេតុនៃការស្លាប់បានកំណត់ថាមានការរលាកក្រពះធ្ងន់ធ្ងរ ដោយសារតែដំបៅក្រពះទាក់ទងនឹងការធ្វើបាប ដែលទំនងកាន់តែមានសភាពធ្ងន់ធ្ងរដោយការអត់អាហារ។
កាសែតបានបន្តថាជនជាតិម៉ាឡេស៊ីប្តីប្រពន្ធពីរនាក់បានណែនាំមេធាវីរបស់គេឲ្យប្តឹងសាទុកកាលពីថ្ងៃសុក្រទៅតុលាការសហព័ន្ធ។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បាននិយាយថា លោកមិនបានដឹងអំពីការកាត់ឲ្យជាប់ទោសកាលពីថ្ងៃសុក្រទេ ហើយបដិសេធមិនអត្ថាធិប្បាយ។
លោក ជួប ណារ័ត្ន អនុប្រធាននាយកដ្ឋានមុខងារនិងហត្ថកម្មនៃក្រសួងការងារ បាននិយាយថាលោកបានអានសាលដីការបស់តុលាការក្នុងសារព័ត៌មាន។ លោកបាននិយាយថា លោកពេញចិត្តចំពោះការកាត់ទោសជនជាតិម៉ាឡេស៊ីពីរនាក់ប្តីប្រពន្ធ ប៉ុន្តែបានបដិសេធមិនអត្ថាធិប្បាយចំពោះការកាត់ឲ្យទោសប្រហារជីវិតទេ។
ក្នុងឆ្នាំ២០១១ លោកនាយករដ្ឋមន្ត្រី ហ៊ុន សែន បានដាក់បម្រាមមិនឲ្យបញ្ជូនស្ត្រីបម្រើតាមផ្ទះទៅប្រទេសម៉ាឡេស៊ី ព្រោះមានភ័ស្តុតាងយ៉ាងច្រើនដែលថា ខ្មែរនៅទីនោះត្រូវគេធ្វើបាប បង្ខំឲ្យជំពាក់បំណុលនិងហិង្សាផ្នែកផ្លូវភេទ។
ក្នុងខែមីនា ក្រសួងការងារបាននិយាយថាប្រទេសកម្ពុជាបានយល់ព្រមលើអនុស្សារណៈនៃការយោគយល់គ្នាថ្មីមួយដែលនឹងលើកបម្រាមនោះ ហើយដាក់វិធានការថ្មី ដើម្បីការពារស្ត្រីបម្រើតាមផ្ទះ ហើយកំពុងរង់ចាំប្រទេសម៉ាឡេស៊ី ដើម្បីចុះហត្ថលេខា។
កាលពីម្សិលមិញ លោក ណារ័ត្ន បាននិយាយថាប្រទេសម៉ាឡេស៊ីបានយល់ព្រមលើអនុស្សារណៈនោះរួចហើយ និងថាបម្រាមនោះនឹងលើកឆាប់ៗនេះ។
លោក ណារ័ត្ន បាននិយាយថា “គេនឹងចុះហត្ថលេខាឆាប់ៗនេះ នៅចុងឆ្នាំនេះ។ យើងទើបតែរៀបចំកាលវិភាគសម្រាប់រដ្ឋមន្ត្រីនៃប្រទេសទាំងពីរចុះហត្ថលេខា”។ លោក ណារ័ត្ន បានបដិសេធមិនផ្តល់សេចក្តីលម្អិតទេ ដោយរង់ចាំកិច្ចព្រមព្រៀងបានធ្វើរួចរាល់សិន៕ រើន