28 C
Phnom Penh

​មន្ត្រី​ស្មោះ​ស្ម័គ្រ​នឹង​គណបក្ស​ប្រជាជន​កម្ពុជា ​ដឹកនាំ​​ការ​ស៊ើប​​អង្កេត​ការ​​​វាយ​តំណាង​រាស្ត្រ​

ដោយ ឌឹ ខេមបូឌា ដេលី

បទវិភាគ

បាតុ​កម្ម​កាល​ពី​សប្តាហ៍​មុន​នៅ​ខាង​មុខ​រដ្ឋ​​សភា ដែល​ត្រូវ​បាន​​ជំរុញ​ដោយលោក​នាយក​​រដ្ឋមន្ត្រី ហ៊ុន សែន កាលពី​​ពេល​យប់​​​​មុន​នោះ​​ដើម្បី​ឆ្លើយតប​ទៅ​នឹង​បាតុកម្ម​របស់​​គណ​បក្ស​​​ប្រឆាំង​​ដែល​ធ្វើ​ឲ្យ​លោក​​មាន​កំហឹង​​រាល់​​ពេល​​​​​ដែល​លោក​ធ្វើ​ដំណើរ​ទៅ​បរទេស​​​​នោះ​​មាន​​សញ្ញា​​សម្គាល់​ថា​ជា​ព្រឹត្តិការណ៍​​ដែល​​រៀបចំ​ឡើង​ដោយ​គណបក្ស​ប្រជាជន​កម្ពុជា ​ដើម្បី​​សម្រេច​បំណង​អ្វី​មួយ។

ដោយ​មាន​ការ​ចូល​រួម​​ពីសំណាក់​​ក្រុម​បុរស​​កាត់​សក់​យោធា ដែល​​​មួយ​ចំនួនធំ​​ចង​ក្រណាត់​ក្រហម​ដែល​​គេ​ស្គាល់​ជាយូរ​មក​ហើយ​​​​ថាជា​​សញ្ញា​​បង្ហាញ​ពី​​ភាព​ស្មោះ​ស្ម័គ្រ​​ចំពោះ​គណបក្ស​ប្រជាជន​កម្ពុជា អំឡុង​ពេល​កើត​មាន​​អំពើ​ហិង្សា​លើ​ក្រុម​ប្រឆាំង​ និង​​​សូម្បី​​​​​​​​នគរ​បាល​ដែល​ស្លៀក​ពាក់​ស៊ីវិល​ផង​នោះ បាតុ​កម្ម​​​នេះ​​​​​នៅ​តែ​ប្រព្រឹត្ត​ទៅ​ដោយ​អហិង្សា​​​រហូត​ដល់​ក្រុម​បាតុករ​វាយ​ដំ​​​តំណាង​រាស្ត្រ​​គណបក្ស​សង្គ្រោះ​ជាតិ ​ពីរ​រូប​យ៉ាង​​សាហាវ។

ឆៃ ស៊ីណារិទ្ធ និង ឯម សំអាន (រូបថតៈ ស៊ីវ ចាន់ណា​/The Cambodia Daily)

លោក សម រង្ស៊ី ប្រធាន​គណបក្ស​ប្រឆាំង ​បាន​​​​ធ្វើ​ការ​​ចោទ​ប្រកាន់​ភ្លាមៗ​ថា លោក ហ៊ុន សែន គឺ​ជា​អ្នក​រៀបចំ​​ការ​វាយ​ប្រហារ​នេះ ចំណែក​ឯ​បណ្ដា​អង្គការ​​​​សង្គម​ស៊ីវិល​បាន​គូស​បញ្ជាក់​ថា នគរ​បាល​​នៅក្បែរ​នោះ​​​​មិន​បាន​ព្យា​យាម​​ឃាត់​ការ​​ប្រើ​អំពើ​ហិង្សា​នោះ​​ឡើយ។ អង្គការ​ឃ្លាំមើល​សិទ្ធិ​មនុស្ស​ (Human Rights Watch) បាន​ពណ៌​នា​​អំពីព្រឹត្តិការណ៍​នេះ​ថា​មាន​​សញ្ញា​សម្គាល់​​ថា​ជា​​​ការ​វាយ​ប្រហារ​របស់​​គណបក្ស​ប្រជាជន​កម្ពុជា ​ដែល​បាន​កើត​ឡើង​​​​ក្នុង​រយៈ​ពេល​ប៉ុន្មាន​ឆ្នាំ​មក​នេះ។

ប៉ុន្តែទោះ​បីជារាល់​​ការ​ចោទ​ប្រកាន់​កំពុង​​​​បាញ់​ឆ្ពោះ​ទៅ​រក​គណបក្ស​កាន់​អំណាច​ថា​ជា​អ្នក​រៀបចំ​ការ​វាយ​ប្រហារ​នេះ ហើយ​អង្គការ​​​​សហប្រជាជាតិ​បាន​គូស​បញ្ជាក់​​​​​ថា ​ចាំ​បាច់​​ត្រូវ​មាន​ការ​ស៊ើប​អង្កេត​ដែល​​​គួរ​ឲ្យ​ជឿ​ទុក​ចិត្ត​​បានយ៉ាង​ណា​ក្ដី ក៏​កាលពី​សប្ដាហ៍​មុន ក្រសួង​មហាផ្ទៃ​បាន​​​​ប្រើ​ប្រាស់​​​ថ្នាក់​ដឹក​នាំ​​​ផ្ទាល់​​​របស់​គណបក្ស​ប្រជាជន​កម្ពុជា ​ឲ្យ​ដឹកនាំ​ការ​ស៊ើបអង្កេត​នេះ​។

ដោយ​ជ្រើស​រើស​​លោក ឯម សំអាន រដ្ឋលេខាធិការ​ក្រសួងមហាផ្ទៃ​ ឲ្យ​ធ្វើ​ជា​ប្រធាន​ស៊ើបអង្កេត និង​លោក ឆៃ ស៊ីណារិទ្ធ អគ្គស្នងការ​​រង​នគរ​បាលជាតិ​ឲ្យ​ធ្វើ​ជា​អនុ​ប្រធាន​របស់​លោក ក្រសួង​​​​នេះ​​បាន​ដាក់​​សមា​ជិក​​សំខាន់ពីរ​រូប​នៃ​គណៈ​កម្មាធិការ​កណ្ដាល​​របស់​គណបក្ស​ប្រជាជន​កម្ពុជា​ ឲ្យ​ទទួល​បន្ទុក​ការ​ស៊ើបអង្កេត​។

​ឧត្ដម​សេនីយ៍​ឯក ឆៃ ស៊ីណារិទ្ធ ក៏​ជា​សមា​ជិក​មួយ​រូប​ដែរ​​នៃ ”​គណៈកម្មការ​​ឃោសនា​អប់រំ” ថ្មី​របស់​​​គណបក្ស​ប្រជាជន​កម្ពុជា ដែល​ត្រូវ​បាន​បង្កើត​ឡើង​កាលពី​ខែ​កញ្ញា ដើម្បី​ជួយ​គណបក្ស​កាន់​អំណាច​​​​​បង្ហាញ​មុខ​មាត់​​ល្អ​ទៅ​ដល់​​​សាធារណជន​​ទូទៅ​។

រហូត​មក​ទល់ពេល​នេះ មិន​ទាន់​មាន​ការ​ប្រកាស​អំពី​​ការ​វិវឌ្ឍ​​ណាមួយ​​នៅ​ឡើយ​​ទេ​ក្នុង​ការ​​​វែក​មុខ​ជន​​ដែល​បាន​​ប្រើ​អំពើ​ហិង្សា​ទៅ​លើ​​តំណាង​រាស្ត្រ​​ទាំង​ពីររូប​អំឡុង​បាតុ​កម្ម​កាលពី​​​សប្ដាហ៍​មុន ប៉ុន្តែ​មន្ត្រី​​បាន​​សង្កត់​ធ្ងន់​កាលពី​ម្សិលមិញ​ថា ការ​តែង​តាំង​សមា​ជិក​​ពីរ​រូប​នៃ​គណៈ​កម្មាធិការ​កណ្ដាល​​របស់​​គណបក្ស​ប្រជាជន​កម្ពុជា​ ឲ្យ​ដឹកនាំ​ការ​ស៊ើប​អង្កេត​នេះ នឹង​មិន​ធ្វើ​ឲ្យ​ប៉ះពាល់​ដល់​ភាព​គួរ​ឲ្យ​ជឿទុក​ចិត្ត​​​នៃ​ការ​ស៊ើប​អង្កេត​​ឡើយ​។

ដោយ​សន្យា​ថា​គណៈកម្មការ​នេះ​នឹង​​វែក​​​មុខ​អ្នក​រៀបចំ​ការ​វាយ​ប្រហារ​តំណាង​រាស្ត្រ​ទាំងពីរ ទោះ​បី​ជា​ពួកគេ​មក​ពី​គណបក្ស​ប្រជា​ជន​កម្ពុជា​ក៏ដោយ​នោះ លោក ផៃ ស៊ីផាន អ្នក​នាំពាក្យទីស្ដីការ​គណៈរដ្ឋមន្ត្រី​បាន​មាន​ប្រសាសន៍​ថា “​វា​​គ្មានន័យ​អ្វី​ទេ។ ​អស់​លោក​​មិន​​អាច​​រក​បុគ្គល​ឯករាជ្យ​បាន​ទេ​នៅ​ទីនេះ។ តើ​​នៅ​​​កម្ពុជា អស់​លោក​​​​​​អាច​រក​បាន​ទេ​អ្នក​ដែល​គ្មាន​និន្នាការ​​គណបក្ស​នយោបាយ​​​? មាន​នីតិវិធី​ត្រឹម​ត្រូវ ហើយ​នេះ​គឺ​ជា​ជំនាញ​របស់​ពួកគាត់​។ មិន​ថាពួកគេ​ [​ជន​ដៃដល់] មក​​​ពី​គណ​បក្ស​ណា​​ទេ ពួកគេ​នឹង​ត្រូវ​វែក​មុខ។ ​​​អ្នក​​ទាំង​នេះ​​មាន​​ការ​​ប្រុង​ប្រយ័ត្ន​​ខ្ពស់ ព្រោះ​ពួកគាត់​​​មក​ពី​គណបក្ស​ប្រជាជន​កម្ពុជា​។ អ្នក​ទាំង​នេះ​នឹង​មាន​ការ​​ប្រុង​ប្រយ័ត្ន​​ក្នុង​ការ​អនុ​វត្ត​​​​តាម​នីតិវិធី​ត្រឹម​ត្រូវ​”។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា ​​​ក៏​បាន​គូស​បញ្ជាក់​ដែរ​ថា ថ្នាក់​​ដឹកនាំភាគ​ច្រើន​នៃ​​​មន្ត្រី​រាជការ​ កង​កម្លាំង​ប្រដាប់​អាវុធ ឬ​​​កង​កម្លាំង​សន្តិសុខ​​​ទូទាំង​ប្រទេស គឺ​ជា​សមាជិក​ជាន់​ខ្ពស់​របស់​គណ​បក្ស​ប្រជាជន​កម្ពុជា ប៉ុន្តែ​​លោក​បាន​គូស​បញ្ជាក់​ថា លោក​​ ឯម សំអាន និង​​លោក ឆៃ ស៊ីណារិទ្ធ នឹង​​អព្យាក្រឹត។

​​លោក​ទទួល​ស្គាល់​ថា “​ពួកគាត់​​ជា​សមា​ជិក​​​របស់​គណបក្ស​​ប្រជាជន​កម្ពុជា​” ​ប៉ុន្តែ​​លោក​បដិសេធ​ថា​​​នឹង​គ្មាន​​​ជម្លោះ​ផល​ប្រយោជន៍​កើតឡើង​​ឡើយ​សម្រាប់​ការ​ស៊ើបអង្កេត​​នេះ។ លោក​បាន​បន្ត​ថា “ពួកគាត់​មិន​ធ្វើ​ការ​​ផ្អែក​លើ​និន្នាការ​នយោបាយ​​ទេ ប៉ុន្តែ​ពួកគាត់​ធ្វើ​ការ​​តាម​ជំនាញ​នគរ​​បាល​របស់​ពួកគាត់​។ រដ្ឋាភិបាល​បាន​ប្រកាស​ហើយ​​ថា ​មិន​ថា​​ក្រុម​នោះ​ចេញ​មក​ពី​ណា មក​ពីគណបក្ស​ប្រជា​ជន​​​ ឬ​ជា​មន្ត្រី​​មក​ពី​គណបក្ស​ផ្សេង​​ឡើយ ពួកគេ​ត្រូវ​តែ​ទទួល​ខុស​ត្រូវ​ចំពោះ​មុខ​ច្បាប់​​ដោយ​គ្មាន​ការ​លើក​លែង”។

អ្នក​នាំ​ពាក្យ​រូប​នេះ​បាន​​ថ្លែង​​​ថា អ្នក​ដែល​មាន​មន្ទិល​ចំពោះ​ភាព​គួរ​ឲ្យ​ជឿទុក​ចិត្ត​នៃ​​​ការ​​​ស៊ើប​​អង្កេត​លើ​ការ​ប្រើ​អំពើ​ហិង្សា​យ៉ាង​​​សាហាវ​​ទៅ​លើ​តំណាង​រាស្ត្រ​គណបក្ស​ប្រឆាំង​​​​​​ទាំង​ពីរ​រូប​ដែល​កំពុង​សម្រាក​​ព្យាបាល​​​ក្នុង​មន្ទីរពេទ្យ​​​​​​​ក្រុង​បាង​កក​ នៅ​ឡើយ គួរ​តែ​ទុក​​ពេល​​ឲ្យ​គណៈកម្មការ​ធ្វើ​ការ​សិន​។

លោក​បាន​​​លើក​ឡើង​បន្ថែម​​ថា “​ពួក​គាត់​ត្រូវ​​តែ​ជឿជាក់​លើ​សមត្ថកិច្ច​របស់​​​​កម្ពុជា​។ វា​​គ្មាន​ឥទ្ធិពល​ [លើ​ការ​ស៊ើបអង្កេត​] ទេ ទោះ​​​​​​បី​ជា​ពួកគាត់​ស្ថិត​​ក្នុង​គណៈកម្មាធិការ​កណ្ដាល ​ឬ​គណៈកម្មការ​ឃោសនា​​ក៏ដោយ។ សូម​​កុំ​បារម្ភ​​ចំពោះ​រឿង​នេះ​អី”។

ក្នុង​ចំណោម​​សមាជិក​​ធម្មតា​ទាំង​ប្រាំមួយ​រូប​នៃ​​គណៈ​កម្ម​ការ​ស៊ើបអង្កេត​នេះ គ្មាន​នរណា​​​​ម្នាក់​ជា​​សមាជិក​គណៈ​កម្មាធិការ​កណ្ដាល​​​​​របស់​គណបក្ស​ប្រជាជន​កម្ពុជា​ឡើយ​ ​ក្នុង​នោះ​រួម​មាន​ទាំង​លោក សៀង សេន ដែល​​​បាន​ជំនួសតំណែង​របស់​​​​​​​ឧត្ដម​សេនីយ៍​ឯក ឆៃ ស៊ីណារិទ្ធ ជា​ប្រធាន​នាយក​ដ្ឋាន​​សន្តិ​សុខ​ផ្ទៃ​ក្នុង​ក្រសួង​មហាផ្ទៃ និង​​​​ប្រធាន​​នាយក​​ដ្ឋាន​​​បី​រូប​ទៀត​​​​នៃ​ក្រសួង​នេះ​ផង​ដែរ។​​​​​​​​​​​​

មន្ត្រី​ពីរ​នាក់​ចុង​ក្រោយ​​គឺ​​​​ស្នងការរង​នគរ​បាល​រាជធានី​​ លោក សុង​ លី និង​លោក ស៊ឹម វុទ្ធី ​​ក៏​មិន​ស្ថិត​នៅ​ក្នុង​គណៈកម្មាធិការ​កណ្ដាល​​​​គណបក្ស​ប្រជាជន​កម្ពុជា​​​នោះ​ដែរ​ ប៉ុន្តែ​ត្រូវ​​​រាយការណ៍​ប្រាប់​​​ស្នង​ការ​​នគរ​បាល​រាជធានី​ ដែល​ត្រូវ​បាន​​បញ្ចូល​ឈ្មោះ​បន្ថែម​​​ទៅ​ក្នុង​​គណៈកម្មាធិការ​កណ្ដាល​គណបក្ស​ប្រជាជន​កម្ពុជា​​ក្នុង​​សន្និបាត​បក្ស​​នៅ​ឆ្នាំ​នេះ​។

លោក ​ជួន សុវណ្ណ ក៏​ត្រូវ​បាន​លើក​ឡើង​ក្នុង​​របាយការណ៍​​​មួយ​របស់​អង្គការ​​​ឃ្លាំ​មើល​សិទ្ធិ​មនុស្ស​កាល​ពី​សប្ដាហ៍​មុន​ថា ជា​ “​អ្នក​​ដែល​ទទួល​​​​​​បាន​ការ​បណ្ដុះ​បណ្ដាល​​ និង​ជួយ​ជ្រោមជ្រែង​ដ៏​សំខាន់​” ​របស់​​អគ្គមេបញ្ជាការ​រង​កង​ទ័ព​លោក គន់ គីម ជា​មនុស្ស​​ជំនិត​​​របស់​លោក ហ៊ុន សែន ដែល​បាន​ប្រមូល​ផ្ដុំទាហាន​​​​អំពាវ​នាវ​​ឲ្យ​ដក​លោក ​កឹម សុខា នៅ​ថ្ងៃ​តែ​មួយ​ដែល​​តំណាង​រាស្ត្រ​​ត្រូវ​បាន​គេ​​ធ្វើ​បាប​​ក្នុង​បាតុកម្ម​ដែល​​អំពាវ​នាវ​​ដូច​គ្នា​នោះ​​​។

អ្នកទាំង​ពីរ​ក៏​មាន​​ក្នុង​ការ​​បញ្ជា​តគ្នា​​ស្ថិត​នៅ​​ក្រោម​​អគ្គស្នងការ​​នគរ​បាល​ជាតិ​​លោក នេត សាវឿន ​ជា​សមាជិក​​គណៈកម្មាធិការ​​អចិន្ត្រៃយ៍​គណបក្ស​ប្រជាជន​កម្ពុជា​​ម្នាក់​​ដែល​​​លោក ហ៊ុន សែន ​បាន​ព្រមាន​​កាលពី​ខែ​​មុន​ថា ​អាច​ធ្វើ​ការ​បះបោរ​​ប្រឆាំង​រដ្ឋាភិបាល​​​អនាគត​របស់​​​​គណបក្ស​សង្គ្រោះ​ជាតិ ប្រសិន​បើ​ខ្លួន​ព្យាយាម​​ដក​គាត់​ចេញ​នោះ​។

ទាំង​លោក ឯម សំអាន ​​​ទាំង​ឧត្ដម​សេនីយ៍​ឯក ឆៃ ស៊ីណារិទ្ធ ​មិន​អាច​ទាក់​ទង​​​សុំ​ការ​អត្ថា​ធិប្បាយ​បាន​ទេ។ ​ក៏​ប៉ុន្តែ​​លោក សុខ ខេមរិន្ទ​ ​ប្រធាន​នាយកដ្ឋាន​នគរ​បាល​​​​ព្រហ្មទណ្ឌ​​​នៃ​ក្រសួង​មហាផ្ទៃ​ ដែល​​​​ស្ថិត​​ក្នុង​គណៈកម្មការ​នេះ​​​បាន​មាន​ប្រសាសន៍​ថា លោក​មិន​ខ្វល់​​អំពី​​ការ​ស៊ើបអង្កេត​​​​ត្រូវ​ធ្វើ​​ឲ្យ​អាប់​អួរ​ដោយ​ថ្នាក់​​​​ដឹកនាំ​របស់​ខ្លួន​ទេ​។

​ឧត្ដម​សេនីយ៍ទោ សុខ ខេមរិន្ទ ​បាន​​មាន​ប្រសាសន៍​​​ថា ”​យើង​ជា​មន្ត្រី​តុលាការ​”។ លោក​​​​ពន្យល់​ថា នរណា​ក៏ដោយ​ដែល​ភ័ស្តុ​តាង​បង្ហាញ​​​ថា​មាន​ទោស​​នឹង​ត្រូវ​ចាប់​ខ្លួន​​។ ​យើង​​អនុវត្ត​ច្បាប់​ និង​នីតិវិធី​​​ច្បាប់​ក្នុង​ប្រទេស​កម្ពុជា​”។

លោក​​​បាន​ថ្លែង​​ថា “​ច្បាប់​ព្រហ្មទណ្ឌ​គឺ​ថា ​​ក្បាល​អ្នក​ណា​សក់​អ្នក​ហ្នឹង​។ យើង​មិន​លម្អៀង​​​​ទេ​​ វា​ជា​សិទ្ធិ​របស់​គេ​​​​ក្នុង​ការ​និយាយ​បែប​នេះ​​ ប៉ុន្តែ​​រឿង​សំខាន់​បំផុត​​​គឺ​ថា យើង​​មាន​​ច្បាប់​​

របស់​យើង​​”។

​ឧត្ដម​សេនីយ៍​​ទោ ​ខេមរិន្ទ ​​ទំនង​ជា​​​សម្រាល​​​​តួនាទី​​របស់​គណបក្ស​ប្រជាជន​កម្ពុជា​ក្នុង​ការ​វាយ​ប្រហារ​នោះ​ ដោយ​លើក​ឡើង​​ថា បាតុ​កម្ម​​កាល​ពី​សប្ដាហ៍​មុន​​បាន​បញ្ចប់​ជា​ផ្លូវ​ការ​​នៅ​​​ម៉ោង​១១​ ហើយ​​ការ​វាយ​ប្រហារ​​តំណាង​​​រាស្ត្រ​បាន​កើត​ឡើង​​​ក្រោយ​​ថ្ងៃ​ត្រង់​បន្តិច​។

លោក​បាន​មាន​ប្រសាសន៍​ថា ”​បាតុកម្ម​​បាន​​​ចប់​នៅ​ម៉ោង​១១​ ហេតុ​ដូច្នេះ​​​មនុស្ស​បន្ទាប់​​ជា​​ជន​ឱកាស​និយម​​ ហើយ​​ជួន​កាល​​វា​ជា​ការ​សង​សឹក​។ យើង​ត្រូវ​​បញ្ចប់​ការ​ស៊ើប​អង្កេត​​នេះ​សិន​ មុន​យើង​អាច​​​និយាយ​ថា​វា​យ៉ាង​ណា​នោះ​”។

លោក​​ ​មួង សុធា ​​​ប្រធាន​នាយកដ្ឋាន​បច្ចេក​​​ទេស​វិទ្យាសាស្ត្រ​នៃ​ក្រសួង​មហាផ្ទៃ ​ក៏​បាន​​បាន​​ថ្លែង​ដែរ​ថា លោក​នឹង​មិន​​លម្អៀង​​ដោយ​​កត្តា​នយោបាយ​ទេ​នៅ​​ពេល​ព្យាយាម​​រក​ឲ្យ​ឃើញ​​អ្នក​ដែល​បាន​រៀបចំ​​ការ​វាយ​ដំ​​កាលពី​សប្ដាហ៍​មុន​។ លោក​មាន​ប្រសាសន៍​ទៀត​ថា “​ខ្ញុំ​​ជា​អ្នក​មាន​វិជ្ជាជីវៈ​។ យើង​​ឯករាជ្យ​”។

លោក កែម ឡី ស្ថាបនិក​ក្រុម​តស៊ូ​មតិ​​នយោ​បាយ​មូលដ្ឋាន​​​ខ្មែរ​ដើម្បី​ខ្មែរ ​មាន​ប្រសាសន៍​ថា វា​មិន​មែន​ជា​រឿង​ថ្មី​ទេ​សម្រាប់​គណបក្ស​​ប្រជាជន​កម្ពុជា​​​ក្នុង​ការ​​បង្កើត​​​​ការ​ស៊ើប​អង្កេត​​មួយ​ដែល​ដាក់​​អ្នក​ស្មោះ​ត្រង់​របស់​ខ្លួន​ ដើម្បី​ស៊ើបអង្កេត​​បទ​ល្មើស​ហិង្សា​​ដែល​ខ្លួន​​​​​ទទួល​រង​​ការ​ចោទ​ប្រកាន់​ថា បាន​រៀបចំ​​​ប្រឆាំង​​​​​​គណបក្ស​នយោបាយ​​​ប្រឆាំង​របស់​ខ្លួន។

លោក​ កែម ឡី បានមាន​ប្រសាសន៍​ថា “​តាម​​ធម្មតា​​ ពួកគេ​សុទ្ធតែ​ជា​សមាជិក​នៃ​គណៈ​កម្មា​​​ធិការ​ ឬ​គណៈកម្មាធិការ​​អចិន្ត្រៃយ៍​​គណបក្ស​ប្រជាជន​កម្ពុជា​។ តើ​ពួកគេ​​មាន​ឯករាជ្យ​យ៉ាង​​​ម៉េច​? ខ្ញុំ​មិន​អាច​ជឿ​ទាល់​តែ​សោះ​​ លើក​លែង​​​​​​តែ​​ប្រសិន​បើ​​ពួកគេ​​​បង្កើត​​គណៈកម្មការ​មួយ​​ចូល​រួម​ដោយ​​គណបក្ស​ប្រឆាំង​​ សង្គម​ស៊ីវិល និង​​សហគមន៍​​អន្តរជាតិ​”។

លោក​បាន​បន្ថែម​ថា “​គណៈកម្មការ​​នេះ​​​គឺ​ដើម្បី​បង្ហាញ​​សហគមន៍​អន្តរជាតិ​​ ហើយ​បន្ទោស​​​​អ្នក​ផ្សេង​។ ពួកគេ​​​តែង​តែ​​ធ្វើ​តាម​បញ្ជា​​មេរបស់​ពួកគេ​ ហើយ​រាយការណ៍​ដោយ​ស្វ័យ​ប្រវត្តិ​។ យើង​ដឹង​​លទ្ធផល​​រួច​ទៅ​ហើយ​”៕ សុខុម និង​ និត​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស