29 C
Phnom Penh

អ្នកកាសែត​និង​បុគ្គលិក NGO ​​​​​ត្រូវ​ចាប់​ខ្លួនពី​បទ​កំហែង​ទារ​ប្រាក់​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​​បាន​ឲ្យ​ដឹង​កាលពី​ម្សិលមិញ​ថា ​នគរ​បាល​​​ខេត្ត​កំពង់ធំ​​​កាលពី​ថ្ងៃ​អាទិត្យ​បាន​ចាប់​ខ្លួន​​មនុស្ស​១១​នាក់ ដែល​​​ក្នុង​នោះ​​មាន​​​ប្រាំ​​​បី​​​នាក់​អះអាង​ថា ​ជា​អ្នក​កាសែត និង​បី​នាក់​និយាយ​ថា ​​ខ្លួន​ជា​​ប្រធាន​អង្គការ​មិន​មែន​​​រដ្ឋាភិបាល​​ការ​ពារ​បរិស្ថាន ​​​ពី​​​បទ​កំហែង​ទារ​ប្រាក់​​​ពី​អ្នក​បើក​បរ​រថយន្ត​​ដឹក​ទំនិញ​​នៅ​ក្នុង​ស្រុក​​​ប្រាសាទ​បល្ល័ង្ក​។

លោក ផល ភឿន ​អធិការ​រង​នគរ​បាល​​ស្រុក​​​នេះ​​​​​បានលើក​ឡើង​ថា មន្ត្រី​​របស់​លោក​​​​​បាន​ឃាត់​ខ្លួន​បុគ្គលិក​អង្គការ​មិនមែន​រដ្ឋា​ភិបាល​​​នៅ​ម៉ោង​ប្រហែល​១​រសៀល​ និង​ក្រុម​អ្នក​យក​​ព័ត៌មាន​​៣​ម៉ោង​ក្រោយ​មក ខណៈ​ពួកគេ​​​កំពុង​​​ព្យាយាម​កំហែង​ទារ​ប្រាក់​ ពី​​ម្ចាស់​រថយន្ត​ធុនធំ​​​ចំនួន​​ពីរ​គ្រឿង។

លោក​​មាន​ប្រសាសន៍​ថា ”​អ្នក​កាសែត​​ប្រាំ​​​បី​នាក់​មាន​ប័ណ្ណ​ព័ត៌មាន​​​សម្រាប់​កាសែត​របស់​ពួកគេ​ ប៉ុន្តែ​យើង​មិន​ច្បាស់​ទេ​​ថា​តើ​ពួកគេ​​ពិត​ជា​ធ្វើ​ការ​​ឲ្យ​ស្ថាប័ន​ប្រព័ន្ធ​ផ្សព្វ​ផ្សាយ​​​​មែន​ឬ​​​យ៉ាង​ណា​នោះ”។

លោក​បាន​បន្ថែម​ថា ​”​យើង​​បាន​ចាប់​ខ្លួន​មនុស្ស​​​​​១១​នាក់ នៅ​​​ទីតាំង​​​​ខុស​​​ៗ​គ្នា​​បន្ទាប់​ពី​មាន​បណ្ដឹង​​​ពី​​​​ប្រជា​ពលរដ្ឋ​​​​​ ព្រោះ​ពួកគេ​បាន​​កំហែង​​​​​ទារ​ប្រាក់​​ពី​ពួក​​​គាត់​​​​​ ពេល​ពួកគាត់​កំពុង​​​​​​ដឹក​​​[ឈើ]”។

​លោក​​ ផល ភឿន ​បាន​ឲ្យដឹង​​​​​​បន្ថែម​​ទៀត​ថា ​​ក្រុម​នេះ​ល្បី​ឈ្មោះ​​ខាង​កំហែង​ទារ​ប្រាក់​ពី​​​អ្នក​បើក​បរ​រថយន្ត​​ដឹក​​​ឈើ​ និង​ទំនិញ​ផ្សេងៗ​​​​ទៀត​នៅ​ក្នុង​តំបន់​នេះ ហើយ​ថា​​​ ក្នុង​ពេល​ថ្មីៗ​​​​នេះ នគរ​បាល​​​​​ទទួល​បាន​ពាក្យ​បណ្ដឹង​ចំនួន​​​​១៥ និង​​​ការ​​​ទូរស័ព្ទ​​​​​មក​​​ប្ដឹង​​​មួយ​ចំនួន​ទៀត​ពី​​អ្នក​បើក​បរ​ដែល​មាន​ការ​មិន​​ពេញ​ចិត្ត​។

លោក កែ ខាន់ណារ៉ា ស្នង​ការ​រង​នគរ​បាល​​​​ខេត្ត​នេះ​​បាន​លើក​ឡើង​ថា ក្រុម​នេះ​​កំពុង​ត្រូវ​​​​បាន​សាក​សួរ​នៅ​ឯ​ស្នង​​​ការ​​​ដ្ឋាន​​​នគរ​បាល​​​​ខេត្ត​​ពាក់ព័ន្ធ​​​​ការ​អះអាង​ដែល​ថា ពួកគេ​​បាន​ទារ​ប្រាក់​​ចន្លោះ​ពី​១០០.០០០​រៀល​ទៅ​៥០០.០០០​រៀល​ ទើប​អនុញ្ញាត​ឲ្យ​រថយន្ត​ដឹក​​​ទំនិញ​​​ឆ្លង​កាត់​។ ដីកា​ចាប់​ខ្លួននេះ​​​​ចេញ​​​​​​ដោយ​ព្រះរាជ​អាជ្ញា​អម​សាលា​ដំបូង​ខេត្ត​ អុិត សុធា។

លោក​បាន​មាន​ប្រសាសន៍​ថា “​យើង​​បាន​ចាប់​ខ្លួន​មនុស្ស​១១​នាក់​ ព្រោះ​ពួកគេ​ឃាត់​រថយន្ត​ ហើយ​​កំហែង​​ទារ​​​ប្រាក់​​ចន្លោះ​ពី​១០០.០០០រៀល​ទៅ​៥០០.០០០​រៀល​ ពី​​​​​អ្នក​ដែល​​​​​​​ដឹក​ឈើ​​សម្រាប់​យក​​​ទៅ​​​សាង​សង់​ផ្ទះ​របស់​ខ្លួន​​​​។​​​ជួន​កាល​ពួកគេ​​បាន​រឹប​អូស​យក​ទូរស័ព្ទ​​​ពី​ម្ចាស់​រថយន្ត​ក៏​​​មាន​ ប្រសិន​បើ​ពួកគាត់​គ្មាន​ប្រាក់​បង់​​​ឲ្យ​ពួកគេ​”។

លោក​​​បាន​លើក​ឡើង​ទៀត​ថា អ្នក​បើក​​បរ​​រថយន្ត​ចំនួន​១៥​នាក់​ដែល​បាន​ដាក់​ពាក្យ​បណ្ដឹង​​សុទ្ធ​តែ​ទទួល​បាន​ការ​អនុញ្ញាត​​ឲ្យ​ដឹក​​​​ឈើ​ ឪឡឹក និង​ដំឡូង​មី​ពី​អាជ្ញាធរ​ខេត្ត​ ហើយ​​​ថា ក្រុម​ដែល​អះអាង​​ថា​ ខ្លួន​​​ជា​អ្នក​កាសែត​​ និង​​ជា​បុគ្គលិក​អង្គការ​មិន​មែន​រដ្ឋាភិបាល​​​នោះ​​​​​​​ត្រូវ​បាន​ព្រមាន​ឲ្យ​ឈប់​​ទារ​​​ប្រាក់​​ពី​ពួកគាត់​ទៀត​។

លោក​​បាន​មាន​​ប្រសាសន៍​បន្ថែម​ថា “​យើង​​​បាន​អប់រំ​អ្នក​ទាំង​នោះ​​ជា​ច្រើន​លើក​ច្រើន​សា​​​ថា​ មិន​គួរ​ធ្វើ​ដូច្នេះ​ទេ​ ព្រោះ​ [អ្នក​បើក​បរ​] ទទួល​បាន​ការ​អនុញ្ញាត​​ឲ្យ​ដឹក​ជញ្ជូន​ ប៉ុន្តែ​ពួកគេ​មិន​បាន​​ផ្លាស់​ប្ដូរ​សកម្មភាព​របស់​ខ្លួន​ឡើយ ហេតុ​ដូច្នេះ​ហើយ​ទើប​​ព្រះរាជអាជ្ញា​ អុិត សុធា បង្គាប់​ឲ្យ​អាជ្ញាធរ​របស់​យើង​​​ធ្វើ​តាម​នីតិវិធី​នេះ​”។

លោក កែ ខាន់ណារ៉ា បាន​លើកឡើង​ទៀត​ថា លោក​​ជឿ​ថា អ្នក​បើក​បរ​មិន​ដឹក​ជញ្ជូន​​​​ឈើ​​​ដែល​​​​​កាប់​ខុស​ច្បាប់​ឡើយ។​”ខ្ញុំ​ជឿ​ថា​ អ្នក​ភូមិ​មិន​កាប់​ឈើ​ទេ។ប្រសិន​បើ​ពួក​គាត់​កាប់​ឈើ​ខុស​ច្បាប់​ មន្ត្រី​មកពី​រដ្ឋបាល​​​​​​​ព្រៃ​ឈើ​ដែល​ធ្វើ​ការ​នៅ​ក្នុង​ព្រៃ​នឹង​ចាប់ខ្លួន​ពួក​គាត់​ហើយ”។

លោក ផល​ ភឿន​ បាន​ប្រាប់​ឈ្មោះ​អ្នក​កាសែត​ដែល​ត្រូវ​បាន​ចាប់​​​ខ្លួន​​​ទាំង​​​នោះ​​​​ថា​ មាន​ឈ្មោះ​ដូច​ជា​​ សឹក សុជាតិ​ អាយុ​ ៤៨​ឆ្នាំ​ ឃុត ឌីណា អាយុ​ ៤៨​​​​ឆ្នាំ​​​​ សឿន​ សេន​ អាយុ​ ៤៨​​​​ឆ្នាំ​​​​ដែរ​ ធួន​ ម៉ៅ​ អាយុ​ ៤០​ឆ្នាំ ឡេក​ វុទ្ធី​ អាយុ​ ៤៥​ឆ្នាំ និង​​​ ថន ប៊ុនលាង​ អាយុ​៤៣ឆ្នាំ​ ដែល​សុទ្ធតែ​មកពី​កាសែត​ជ័យ​ជម្នះ​៧មករា រីឯ​ឈ្មោះ​ សែម​ សម្បត្តិ អាយុ​៤៤​ឆ្នាំ​ និង​ ពៅ​ ​​ប្រុស អាយុ​៤៥​ឆ្នាំ​​មាន​កាន់​ប័ណ្ណ​ព័ត៌​មាន​សម្រាប់​​​​​​កាសែត​សហគមន៍​​​​ឃ្លាំ​មើល​កម្ពុជា​។​

លោក​បាន​បន្ថែម​​​ថា​ បុគ្គលិក​អង្គការ​មិន​មែន​រដ្ឋា​ភិបាល​ដែល​ត្រូវ​បាន​ចាប់ខ្លួន​សុទ្ធ​តែ​មាន​ឯកសារ​បញ្ជាក់​​​ថា​ ពួកគេ​គឺ​ជា​ប្រធាន​អង្គការ​ការពារ​បរិស្ថាន​ខុស​ៗ​​គ្នា ក្នុង​​​នោះ​​​ មាន​​​ដូចជា ឈ្មោះ​​​​​​ ហូ ហឿន​ អាយុ​ ៥៥​ឆ្នាំ​ ជា​​​ប្រធាន​​​​អង្គការ​អភិរក្ស​ព្រៃឈើ​និង​ធនធាន​ធម្មជាតិ ឈ្មោះ​ រ័ត្ន​ ថា​ អាយុ​ ៥២ឆ្នាំ​ ជា​ប្រធាន​​​​​​អង្គការ​ការពារ​បរិស្ថាន​និង​ធន​ធាន​ធម្មជាតិ និង​ឈ្មោះ​ ថេង ផល​ ជា​ប្រធាន​អង្គការ​ការ​ពារ​ធនធាន​ធម្មជាតិ​និង​បរិស្ថាន៕​ស៊ុយឈាង​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស