ប្រធានគណៈកម្មការវប្បធម៌និងទេសចរណ៍របស់សភាបាននិយាយកាលពីថ្ងៃអង្គារថា លោកនឹងកោះហៅរដ្ឋមន្ត្រីក្រសួងទេសចរណ៍ លោក ថោង ខុន មកសាកសួរទាក់ទិននឹងការអះអាងថា ឆ្នេរសមុទ្រសាធារណៈកំពុងត្រូវកាន់កាប់ជាប្រយោជន៍ឯកជន។
លោក យ៉ែម បុញ្ញឫទ្ធិ តំណាងរាស្ត្រគណបក្សសង្គ្រោះជាតិ ដែលជាប្រធានគណៈកម្មការនេះ បានមានប្រសាសន៍ថា លោកនឹងកោះហៅលោករដ្ឋមន្ត្រីមកសាកសួរនៅថ្ងៃ១៩ខែវិច្ឆិកា ដើម្បីសួរគាត់អំពីឆ្នេរសមុទ្រសាធារណៈជាច្រើនកន្លែង”ដែលរួចតូច”។
លោក បុញ្ញឫទ្ធិ បានមានប្រសាសន៍ថា “យើងបានសង្កេតឃើញថា ឆ្នេរសមុទ្រសាធារណៈរបស់យើងកាន់តែរួញតូចទៅៗ ហើយកន្លែងឆ្នេរខ្លះបានក្លាយជារបស់ឯកជន”។
តំណាងរាស្ត្រគណបក្សប្រឆាំងរូបនេះមានប្រសាសន៍ថា គណៈកម្មការបានដឹងពីការតវ៉ាពីប្រជាពលរដ្ឋមូលដ្ឋាននៅអំឡុងពេលដំណើរចុះបំពេញទស្សនកិច្ចការងារនាពេលថ្មីៗទៅតំបន់ឆ្នេរ។
លោកបានមានប្រសាសន៍ថា “យើងចាំបាច់ត្រូវដឹង ថាតើការអភិវឌ្ឍផ្នែកទេសចរណ៍គិតដល់ប្រជាពលរដ្ឋមូលដ្ឋានដែរឬទេ។ [បញ្ហានេះ] នឹងប៉ះពាល់ដល់វិស័យទេសចរណ៍ជាតិដែរ”។
លោក បុញ្ញឫទ្ធិ បានមានប្រសាសន៍ថា ករណីធ្ងន់ធ្ងរបំផុតនៃការហ៊ុំព័ទ្ធយកឆ្នេរសមុទ្រគឺក្នុងខេត្តព្រះសីហនុ ប៉ុន្តែ លោកមិនបានបរិយាយច្រើនអំពីអ្វីពិតប្រាកដដែលរារាំងសាធារណជនមិនឲ្យចូលតំបន់នោះទេ។
នៅពេលសួរ ថាតើគណៈកម្មការនេះនឹងកំណត់លើក្រុមហ៊ុនឯកជនណាទទួលខុសត្រូវចំពោះការទន្ទ្រានដែលគេចោទប្រកាន់នេះ លោក បុញ្ញឫទ្ធិ បានមានប្រសាសន៍ថា នោះជាការទទួលខុសត្រូវរបស់លោក ថោង ខុន ដើម្បីផ្តល់ការពន្យល់។
លោកបានមានប្រសាសន៍ថា “យើងនឹងមិនទាន់ស៊ីជម្រៅលើបញ្ហានេះទេ ប៉ុន្តែអ្វីដែលយើងចង់បាន គឺចង់ឲ្យរដ្ឋាភិបាលការពារឆ្នេរសាធារណៈសម្រាប់ប្រយោជន៍ដល់ប្រជាជនទូទៅ។ វាឆាប់ពេកមិនអាចនិយាយយ៉ាងណាទេនៅពេលនេះ ពីព្រោះយើងត្រូវជួបជាមួយរដ្ឋមន្ត្រីក្រសួងទេសចរណ៍…ស្តាប់ការពន្យល់ជាមុនសិន”។
ទាំងលោក ថោង ខុន ទាំងលោក ទិត្យ ចន្ថា អ្នកនាំពាក្យក្រសួងនេះ មិនអាចទាក់ទងសុំការពន្យល់បានទេកាលពីថ្ងៃអង្គារ។
លោក បុញ្ញឫទ្ធិ បានមានប្រសាសន៍ថា លោកក៏នឹងកោះហៅរដ្ឋមន្ត្រីក្រសួងអប់រំ ក្រសួងសាសនានិងវប្បធម៌ ដែលស្ថិតនៅក្រោមគណៈកម្មការរបស់គាត់ មកសាកសួរនៅចុងឆ្នាំនេះ។
តំណាងរាស្ត្រគណបក្សសង្គ្រោះជាតិរូបនេះបានដឹកនាំយុទ្ធនាការនៅឆ្នាំនេះ ដើម្បីការពារ “អត្តសញ្ញាណជាតិ” ផ្នែកវប្បធម៌និងទេសចរណ៍ក្នុងប្រទេសកម្ពុជា ដោយបានដឹកនាំដំណើរចុះទៅពិនិត្យនៅភ្នំបូកគោក្នុងខេត្តកំពតកាលពីខែកុម្ភៈ ដើម្បីស៊ើបអង្កេតរបាយការណ៍ដែលថា ទីសក្ការបូជាច្រើនកន្លែងក្នុងព្រៃបានក្លាយជាកន្លែងធម្មយាត្រាសម្រាប់ភ្ញៀវទេសចរវៀតណាម៕ និត