លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា បុរសបីនាក់ក្នុងចំណោមបុរសដែលបានចូលរួមបាតុកម្មគាំទ្រគណបក្សប្រជាជនកម្ពុជា និងដែលបានវាយដំលោក ញ៉យ ចំរើន និងលោក គង់ សភា តំណាងរាស្ត្រគណបក្សសង្គ្រោះជាតិកាលពីសប្ដាហ៍មុន ខណៈពួកលោកព្យាយាមចាកចេញពីរដ្ឋសភានោះ បានចូលខ្លួនសារភាពហើយកាលពីម្សិលមិញ។
សេចក្ដីប្រកាសព័ត៌មានមួយចេញដោយលោក ខៀវ សុភ័គ កាលពីយប់មិញ បានលើកឡើងថា បុរសទាំងបីនាក់ដែលមានឈ្មោះដូចជា ចាយ សារិទ្ធ អាយុ៣៣ឆ្នាំ ម៉ៅ ហឿន អាយុ៣៤ឆ្នាំ និង សុត វណ្ណនី អាយុ៤៥ឆ្នាំ បានចូលខ្លួនសារភាពនៅម៉ោងប្រហែល៤និង៣០នាទីរសៀល នៅចំពោះមុខមន្ត្រីគណៈកម្មការដែលស៊ើបអង្កេតការវាយប្រហារនេះ។
ពេលទាក់ទងតាមទូរស័ព្ទ លោក ខៀវ សុភ័គ បានមានប្រសាសន៍ថា បុរសទាំងនេះគឺជាជនដែលគេមើលឃើញក្នុងវីដេអូឃ្លីបធ្វើសកម្មភាពទាត់ធាក់ និងជាន់តំណាងរាស្ត្រអំឡុងបាតុកម្មកាលពីថ្ងៃទី២៦ ខែតុលា ហើយថា ទំនងជាគ្មានការចាប់ខ្លួនមនុស្សបន្ថែមទៀតទេ។
លោកបានបកស្រាយថា “អ្នកទាំងនេះជាពិរុទ្ធជនដែលបានវាយប្រហារពួកគាត់ដោយផ្ទាល់។ អ្នកផ្សេងទៀតគ្រាន់តែនៅជុំវិញពួកគេស្រែកប៉ុណ្ណោះ” ហើយលោកមិនជឿថា មានអ្នកណាផ្សេងទៀតជាអ្នករៀបចំការវាយប្រហារតំណាងរាស្ត្រទាំងនេះឡើយ។
លោកថ្លែងថា ”ពួកគេបានដឹកនាំដោយ
ខ្លួនឯង។ ពួកគេបានសារភាពនៅចំពោះមុខសមត្ថកិច្ច ហើយជំហានបន្ទាប់គឺពួកគេនឹងទទួលការផ្ដន្ទាទោសតាមច្បាប់។ យើងនឹងបញ្ជូនខ្លួនពួកគេទៅតុលាការនៅថ្ងៃស្អែក”។
លោកលើកឡើងបន្តថា លោកមិនអាចធ្វើអត្ថាធិប្បាយបន្ថែមទៀតបានទេជុំវិញសេចក្ដីលម្អិតនៃការចាប់ខ្លួនបុរសទាំងបីនាក់នេះ ឬមូលហេតុដែលពួកគេវាយប្រហារតំណាងរាស្ត្រគណបក្សសង្គ្រោះជាតិទាំងពីររូប ព្រោះលោកមិនមែនជាសមាជិកគណៈកម្មការស៊ើបអង្កេតដែលមានសមាជិកប្រាំបីរូប។
លោក សម រង្ស៊ី ប្រធានគណបក្សប្រឆាំងដែលបានចោទប្រកាន់លោកនាយករដ្ឋមន្ត្រី ហ៊ុន សែន និងគណបក្សប្រជាជនកម្ពុជា ថាជាអ្នករៀបចំការវាយប្រហារតំណាងរាស្ត្រទាំងនេះដើម្បីសងសឹកចំពោះបាតុកម្មដែលបានស្វាគមន៍លោកនៅបរទេស បានមានប្រសាសន៍បន្ទាប់ពីវិលត្រឡប់ពីប្រទេសបារាំង វិញកាលពីយប់មិញថា លោកនៅតែចង់បានការស៊ើបអង្កេតទូលំទូលាយ។
លោកបានធ្វើការកត់សម្គាល់ថា ”ពេលនេះវាឆាប់រហ័សពេកហើយសម្រាប់ខ្ញុំធ្វើអត្ថាធិប្បាយ ពីព្រោះខ្ញុំចង់សាកសួរអ្នកដឹងរឿង និងអ្នកដែលបានតាមដានរឿងនេះជាប់ ហើយពេលនោះទើបខ្ញុំអាចធ្វើអត្ថាធិប្បាយបានត្រឹមត្រូវ។ នេះគ្រាន់តែជាតម្រុយមួយ ជាសូចនាករមួយប៉ុណ្ណោះ។ ខ្ញុំនៅតែអំពាវនាវឲ្យមានការស៊ើបអង្កេតទូលំទូលាយ ដោយធ្វើការស៊ើបអង្កេតរាល់ទិដ្ឋភាពទាំងអស់”។
ពេលសួរថា តើនោះមានន័យថាស៊ើបអង្កេតវែកមុខអ្នកដែលបានរៀបចំឲ្យបុរសទាំងបីនាក់នេះវាយប្រហារតំណាងរាស្ត្រ ខណៈនគរបាលឈរមើល ឬយ៉ាងណានោះ លោក សម រង្ស៊ី បានឆ្លើយថា “ខ្ញុំនិយាយថា ‘រាល់ទិដ្ឋភាព’”។
លោក សម រង្ស៊ី និងគណបក្សសង្គ្រោះជាតិបានស្នើឲ្យមានការស៊ើបអង្កេតដែលមានការចូលរួមពាក់ព័ន្ធច្រើនលើការវាយប្រហារនេះ ដោយសមាជិកគណបក្សប្រឆាំង អង្គការសង្គមស៊ីវិល និងអង្គការសហប្រជាជាតិត្រូវបានអនុញ្ញាតឲ្យចូលរួម ឬត្រួតពិនិត្យការស៊ើបអង្កេតផ្លូវការនេះ។
ទោះបីជាមានការអំពាវនាវឲ្យមានការស៊ើបអង្កេតដែលមានការចូលរួមពាក់ព័ន្ធច្រើនបែបនេះក្ដី ក៏ក្រសួងមហាផ្ទៃបានប្រកាសមួយថ្ងៃបន្ទាប់ពីការវាយប្រហារនោះថា សមាជិកពីររូបនៃគណៈកម្មាធិការកណ្ដាលរបស់គណបក្សប្រជាជនកម្ពុជា នឹងដឹកនាំក្រុមស៊ើបអង្កេតដែលមានសមាជិកប្រាំបីរូបរបស់ខ្លួន។
លោក ឯម សំអាន រដ្ឋលេខាធិការក្រសួងមហាផ្ទៃ ដែលជាប្រធានគណៈកម្មការស៊ើបអង្កេតនេះ និងលោក ឆៃ ស៊ីណារិទ្ធ អគ្គស្នងការរងនគរបាលជាតិ ដែលជាអនុប្រធានរបស់លោក សុទ្ធតែស្ថិតក្នុងជួរគណៈកម្មាធិការកណ្ដាលរបស់គណបក្សប្រជាជនកម្ពុជា ហើយទន្ទឹមនេះ ឧត្ដមសេនីយ៍ឯក ឆៃ ស៊ីណារិទ្ធ ក៏ស្ថិតក្នុងជួរគណៈកម្មការឃោសនាអប់រំថ្មីរបស់គណបក្សកាន់អំណាចដែរ។
មន្ត្រីប្រាំមួយរូបផ្សេងទៀតក៏ជាសមាជិករបស់គណបក្សប្រជាជនកម្ពុជាដែរ ក្នុងនោះរួមមានទាំងស្នងការរងរាជធានីភ្នំពេញពីររូប ដែលកងកម្លាំងរបស់ខ្លួនរងការចោទប្រកាន់ថា បានឈរមើលធ្វើព្រងើយ ខណៈតំណាងរាស្ត្រទាំងពីររូបត្រូវបានវាយដំ និងបានចូលរួមបាតុកម្មក្នុងសម្លៀកបំពាក់ពាក់ស៊ីវិលផងដែរ។
កាលពីសប្ដាហ៍មុន ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស បានសង្កត់ធ្ងន់ថា ការស៊ើបអង្កេតលើការវាយដំកាលពីសប្ដាហ៍មុន ត្រូវតែឯករាជ្យ។
លោកស្រី វ៉ាន ហៀលី (Wan-Hea Lee) តំណាងការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំប្រទេសកម្ពុជា មានប្រសាសន៍កាលពីម្សិលមិញថា រដ្ឋាភិបាលគួរតែពិចារណាឡើងវិញចំពោះសមាសភាពគណៈកម្មការរបស់ខ្លួន ប្រសិនបើខ្លួនមិនអាចបកស្រាយអំពីភាពឯករាជរបស់វាឲ្យបានសមរម្យទេនោះ។
នៅក្នុងសារអេឡិចត្រូនិកមួយ លោកស្រី វ៉ាន ហៀលី បានគូសបញ្ជាក់ជាថ្មីម្តងទៀតចំពោះសេចក្ដីថ្លែងការណ៍របស់ OHCHR ដែលបានលើកឡើងកាលពីសប្ដាហ៍មុនថា ភាពគួរឲ្យជឿទុកចិត្តនៃការស៊ើបអង្កេតនេះ ”ពឹងផ្អែកលើភាពឯករាជ្យ ភាពមិនលម្អៀង ភាពហ្មត់ចត់ និងការធ្វើឡើងភ្លាមៗរបស់វា។ ក្នុងន័យនេះ រដ្ឋាភិបាលនឹងទទួលបានអត្ថប្រយោជន៍ពីការបកស្រាយអំពីភាពឯករាជ និងភាពមិនលម្អៀងរបស់ក្រុមស៊ើបអង្កេតនេះ បើមិនដូច្នោះទេ គួរពិចារណាសមាសភាពរបស់វាឡើងវិញដើម្បីកែលម្អភាពគួរឲ្យជឿទុកចិត្តរបស់វា។ OHCHR ត្រៀមខ្លួនរួចជាស្រេចដើម្បីរួមចំណែកជួយ ប្រសិនបើយល់ថា ខ្លួនអាចជួយបាន”។
ក្នុងបទសម្ភាសមួយនៅឯក្រសួងមហាផ្ទៃកាលពីម្សិលមិញ លោក ខៀវ សុភ័គ បានមានប្រសាសន៍ថា ការលើកឡើងរបស់លោកស្រី វ៉ាន ហៀលី ដែលថា ការិយាល័យសិទ្ធិមនុស្សរបស់អង្គការសហប្រជាជាតិ ឬអ្នកផ្សេងទៀតអាចចូលរួមក្នុងការស៊ើបអង្កេតនេះបាន គឺជាការរំលោភអធិបតេយ្យរបស់កម្ពុជា។
លោកចោទសួរថា ”តើនៅក្នុងប្រទេសប៉ុន្មានហើយដែល OHCHR របស់អង្គការសហប្រជាជាតិបានធ្វើរឿងនេះ? ច្បាប់របស់កម្ពុជា មានអធិបតេយ្យ ហើយមិនត្រូវការការចូលរួមរបស់អង្គការមិនមែនរដ្ឋាភិបាលណាមួយឡើយ ក្រៅតែពីគណៈកម្មការដែលត្រូវបានបង្កើតឡើងនេះ។
លោកថ្លែងថា លោក ឯម សំអាន និងឧត្ដមសេនីយ៍ឯក ឆៃ ស៊ីណារិទ្ធ នឹងមិនបណ្ដោយឲ្យនយោបាយជ្រៀតជ្រែកការស្វែងរកការពិតទាំងមូលនៃអ្នកនៅពីក្រោយការវាយប្រហារតំណាងរាស្ត្រអំឡុងបាតុកម្មគាំទ្រគណបក្សប្រជាជនកម្ពុជា កាលពីសប្ដាហ៍មុនឡើយ។
លោកបានមានប្រសាសន៍បន្ថែមទៀតថា ”ពួកគាត់ស្ថិតនៅក្នុងបក្ស ហើយពួកគាត់បំពេញតួនាទីរបស់ខ្លួននៅក្នុងបក្ស ប៉ុន្តែសម្រាប់ការងាររដ្ឋ ពួកគាត់ធ្វើការងាររបស់ខ្លួនធម្មតា ពីព្រោះពួកគាត់ស៊ីប្រាក់ខែរដ្ឋ។ យើងចង់ទទួលបានការសរសើរពីមតិជាតិ និងអន្តរជាតិ ដូច្នេះយើងចាំបាច់ត្រូវខិតខំតាមចាប់ខ្លួនជនដៃដល់។ បើយើងមិនអាចចាប់ជនដៃដល់បានទេ យើងនឹងបាត់បង់កិត្តិយស”៕ សុខុម