សមាជិកស្ថាបនិកបីរូបរបស់គណបក្សសម្បុកឃ្មុំ សង្គម ប្រជាធិបតេយ្យរបស់លោក ម៉ម សូណង់ដូ ជាម្ចាស់វិទ្យុ បានមានវត្តមាននៅសាលាដំបូងរាជធានីភ្នំពេញកាលពីម្សិល មិញសម្រាប់ការសាកសួរជុំវិញពាក្យបណ្តឹងដែលពួកគេប្តឹងសុំឲ្យរម្លាយគណបក្សនេះ ពីព្រោះមេដឹកនាំរបស់បក្សពុករលួយ។
និយាយនៅខាងក្រៅតុលាការ លោក ហ៊ាង ឫទ្ធី អនុប្រធានគណបក្សបានប្រាប់អ្នកយកព័ត៌មានថា លោកបានពន្យល់ទៅចៅ ក្រម លី សុខឡេង ថា លោកបានដាក់ពាក្យប្តឹងលោក ម៉ម សូណង់ដូ ពីព្រោះគាត់គ្រប់ គ្រងថវិកាមិនត្រឹមត្រូវ។
លោកបានមានប្រសាសន៍ថា “លោក ម៉ម សូណង់ដូ ប្រធានគណបក្ស បានប្រើប្រាស់អំណាចផ្តាច់ការ ហើយទី២ គាត់បានចាយវាយមូលនិធិបក្សដោយគ្មានតម្លាភាព”។
មន្ត្រីបួននាក់ដែលបានដាក់ពាក្យបណ្តឹងគឺ លោក ហ៊ាង ឫទ្ធី ញ៉ែម វណ្ណថន អគ្គលេខាធិការ ហ៊ាង គឹមសឿន អគ្គលេខាធិការរង និង អ៊ូ ចាន់ផល្លា អនុប្រធានហិរញ្ញវត្ថុ បានលើកឡើងថា លោក ម៉ម សូណង់ដូ មិនព្រមបង្ហាញ ចំនួនទឹកប្រាក់ដែលលោកទទួលបានពីម្ចាស់ជំនួយទេ ហើយបានចាត់ចែងមូលនិធិរបស់បក្សទាំងអស់ដោយខ្លួនឯង។
លោក ហ៊ាង ឫទ្ធី បានថ្លែងថា លោក ម៉ម សូណង់ដូ ក៏ដាក់ឯកសារទាមទារប្រាក់ចំណាយដោយគ្មានវិក្កយបត្រច្បាស់លាស់ដែរ។ លោកនិយាយថា “ខ្ញុំនឹងមិនធ្វើការជាមួយមនុស្សពុករលួយដូចនេះទេ ហើយគាត់ប្រើពាក្យ ’ប្រជាធិបតេយ្យ’ ប៉ុន្តែការអនុវត្តវិញ គាត់ចាយវាយមូលនិធិពុករលួយ និងគ្មានតម្លាភាព”។
លោក ហ៊ាង ឫទ្ធី បន្តថា ”ខ្ញុំដាក់ពាក្យបណ្តឹង សុំឲ្យរម្លាយបក្ស ដោយសារការចំណាយ មិនប្រកបដោយលទ្ធិប្រជាធិបតេយ្យ…ហើយខ្ញុំស្នើសុំដីការក្សាការពារឲ្យបញ្ឈប់សកម្មភាពបក្សបណ្តោះអាសន្ន”។ លោកបានពន្យល់ថា លោកបានបន្តករណីនេះដើម្បីរារាំងលោក ម៉ម សូណង់ដូ កុំឲ្យ ” បោកប្រាស់ប្រជាពលរដ្ឋ”។
លោក ម៉ម សូណង់ដូ បានបដិសេធការចោទប្រកាន់នេះ ហើយបានអះអាងថា លោក ហ៊ាង ឫទ្ធី មិនសប្បាយចិត្តចំពោះលោក ពីព្រោះគាត់ចង់ធ្វើជាអនុប្រធានបក្សតែម្នាក់ឯង ជាជាងចែករំលែកតួនាទីជាមួយលោក ហារី សំអាត។
លោក ម៉ម សូណង់ដូ បាននិយាយតាមទូរស័ព្ទថា ”គាត់បំផ្លើសការពិត…លោកឫទ្ធី មិនចង់ឲ្យមានអនុប្រធានបក្សពីរនាក់ទេ ដូច្នេះគាត់រកមធ្យោបាយដើម្បីបង្កបញ្ហា”។
លោកបានបន្ថែមថា ”ខ្ញុំចង់ដឹងថា តើប្រាក់ប៉ុន្មានដែលលោក ឫទ្ធី បានបង់ទៅឲ្យបក្ស? ហើយក្នុងចំណោមសមាជិកទាំងអស់ តើពួកគេបង់ប្រាក់ប៉ុន្មាន? គឺគ្មានទេ”។ ចៅក្រម សុខឡេង មិនអាចទាក់ទងសុំអត្ថាធិប្បាយ បានឡើយ៕សារុន