34 C
Phnom Penh

នាយករដ្ឋមន្ត្រីព្រមាន ‘មន្ត្រីខិលខូច’ ​ពាក់ព័ន្ធ​ការរំលោភ​ច្បាប់​សាង​សង់​

ដោយ ឌឹ ខេមបូឌា ដេលី

បទវិភាគ

ប៉ុន្មានថ្ងៃបន្ទាប់ពីសាលារាជធានីចេញបទបញ្ជាឲ្យក្រុមហ៊ុនណាហ្គាវើលកាស៊ីណូ បញ្ឈប់​ការពង្រីកសំណង់របស់ខ្លួន ព្រោះវាកំពុងធ្វើឲ្យខូចសោភណភាពរាជធានីភ្នំពេញ កាល ពីម្សិលមិញ លោក នាយករដ្ឋមន្ត្រី ហ៊ុន សែន បានព្រមាន “មន្ត្រីខិលខូច” ឲ្យឈប់ បណ្តោយឲ្យគម្រោងសាងសង់នានាធ្វើឲ្យខូចសោភ័ណភាព ប្រទេសតទៅទៀត។

នៅក្នុងសារមួយបង្ហោះលើទំព័រហ្វេសប៊ុកផ្លូវការរបស់លោក លោក ហ៊ុន សែន បាន​លើក​ឡើងថា ការពង្រីកសំណង់របស់ក្រុមហ៊ុន ណាហ្គាវើលកាស៊ីណូបាន”រំលោភ” លើដីរដ្ឋ​នៅ​តាមបណ្តោយផ្លូវក្នុងរាជធានី ហើយ “ប៉ះពាល់” ដល់វិទ្យាស្ថានពុទ្ធសាសនបណ្ឌិត្យ ដែលមានទីតាំងជាប់កាស៊ីណូនេះ។

កម្មករ សំណង់ សមាក នៅ លើ ការដ្ឋាន សាង សង់ ដាល ជាផ្នាក នា ការ ពងាីក សំណង់ របស់ កាុមហ៊ុន ណាហ្គាវើល កាសីុណូ ក្នុងរាជធានី ភ្នំពាញកាល ពី មាសិលមិញ។ រូបថត: Jens Welding Ollgaard/The Cambodia Daily
កម្មករសំណង់​សម្រាក​លើ​ការដ្ឋាន​សាងសង់​ដែល​ជាផ្នែក​នៃការពង្រីក​សំណង់​របស់​ក្រុមហ៊ុន​ណាហ្គាវើល​ កាស៊ីណូ ក្នុង​រាជធានីភ្នំពេញ កាលពី​ម្សិលមិញ។ រូបថត: Jens Welding Ollgaard/The Cambodia Daily

កម្មករសំណង់​សម្រាក​លើ​ការដ្ឋាន​សាងសង់​ដែល​ជាផ្នែក​ធានាការពង្រីក​សំណង់​ របស់​ក្រុមហ៊ុន​ណាហ្គាវើល​ កាស៊ីណូ ក្នុង​រាជធានីភ្នំពេញ កាលពី​ម្សិលមិញ។

 

សារនេះមានខ្លឹមសារដូច្នេះថា “សំណង់ដែល​មាន​លក្ខណៈ​រំលោភកេង​ស៊ីចំណី​ផ្លូវ​សាធារណៈ​និងសួនច្បារសាធារណៈ គឺត្រូវរុះរើ​រំលាយ​ចេញជាបន្ទាន់។​​ ហើយអាជ្ញាធរ​មាន​សមត្ថកិច្ចនិងក្រសួង​ពាក់ព័ន្ធត្រូវតែទទួលខុសត្រូវ”។

សារនេះលើកឡើងទៀតថា ក្រុមហ៊ុនក៏នឹង​តម្រូវឲ្យទទួល​ខុសត្រូវចំពោះ​គម្រោង​សាង​សង់​ដែលពង្រីកចូលដីរដ្ឋ និងរំលោភច្បាប់អនុញ្ញាតសាងសង់ដែរ។

សារនេះមានខ្លឹមសារបន្តដូច្នេះថា”ទោះបីនៅពេលនេះប្រមុខ​រាជរដ្ឋាភិបាល​មិនទាន់​បាន​ដឹង​ តែរឿងទាំងអស់នោះលាក់មិនជិតពីភ្នែកសាធារណជនឡើយ។​ សម្តេច តេជោ ហ៊ុន សែន មិនបណ្តោយ​ឲ្យមន្ត្រី​ខិលខូច​ទាំងនោះ​បំផ្លាញ​សង្គមជាតិ​ឲ្យ​អាប់​ឱន​តទៅ​ទៀត​ជា​ដាច់ខាត”។

លោក ឡុង ឌីម៉ង់ អ្នកនាំពាក្យ​សាលារាជធានី​បានបដិសេធ​មិនធ្វើ​អត្ថាធិប្បាយ​លើការ​ព្រមាន​របស់លោកនាយករដ្ឋមន្ត្រីឡើយ។ លោកបានមានប្រសាសន៍ថា”ខ្ញុំមិនដឹងទេ ព្រោះ​នេះជាដែន​សមត្ថកិច្ច​របស់​ក្រសួង​រៀបចំ​​ដែនដី​នគរូបនីយកម្ម និងសំណង់”។

លោក ជាម ផល្គុណមករា អ្នកនំាពាក្យក្រសួងនេះ​បានលើកឡើងថា មន្ត្រីនៅក្រសួង របស់​លោកនឹងចុះពិនិត្យមើល ហើយនឹងដាក់ទោសទណ្ឌក្រុមហ៊ុនឬមន្ត្រីដែលរកឃើញ ថា រំលោភច្បាប់អនុញ្ញាតសាងសង់។

លោក​បាន​មានប្រសាសន៍ថា “អំឡុងការសាងសង់ ប្រសិនបើ​យើងពិនិត្យ​មើលឃើញថា បើពួកគេ​មាន​កំហុស​ណាមួយ យើងនឹង​ឲ្យពួកគេ​កែតម្រូវ​ផ្នែក​ដែល​ប៉ះពាល់​ដល់ដីរដ្ឋ ឬ​ប្រយោជន៍​សាធារណៈដូចជាឲ្យពួកគេរុះរើចេញជាដើម”។

នៅពេល​ត្រូវបាន​សួរថា តើក្រុមហ៊ុនណាហ្គាវើលកាស៊ីណូ ឬ​មន្ត្រីដែល​មើល​ខុស​ត្រូវ​គម្រោង​នេះ នឹងប្រឈមការដាក់ទណ្ឌឬយ៉ាងណា លោក ជាម ផល្គុណមករា បា​ន​លើក​ឡើង​​ថា វាឆាប់ពេកហើយក្នុងការប្រាប់ពីរឿងនេះ។ លោកបានថ្លែងថា”ពាក់ព័ន្ធនឹងបញ្ហា នេះ យើងនឹងពិនិត្យមើលទិដ្ឋភាពច្បាប់។ ហើយយើងក៏ត្រូវពិភាក្សា ថាតើ​យើង​ត្រូវ​ពិន័យ​ ឬដាក់ទោសយ៉ាងម៉េច បើយោងតាមច្បាប់នេះ”។

អ្នកនាំពាក្យរូបនេះ បាន​លើក​ឡើង​ទៀតថា រដ្ឋាភិបាល​នឹង​ជួប​ជាមួយ​តំណាង​របស់​ក្រុម​ហ៊ុន ណាហ្គាវើល​កាស៊ីណូ​ ដើម្បី “ចរចាគ្មា” មុនពេលមានការដាក់ទោសទណ្ឌណាមួយ ហើយ​ថា ការប្រជុំចរចានេះនឹងធ្វើឡើង បន្ទាប់ពីក្រុមហ៊ុននេះ ដាក់​សំណើរ​ផ្លូវការ​ស្នើ​សំុ​បន្ត​ការសាងសង់។ លោកបានថ្លែងបន្តថា “ប្រសិនក្រុមហ៊ុនមានភ័ស្តុតាង​ផ្លូវច្បាប់មក​បង្ហាញយើង​ឲ្យបាន​ច្បាស់​ យើងនឹងមិនចាត់វិធានការផ្លូវច្បាប់ទេ។ ហេតុដូច្នេះលទ្ធផលនឹងបង្ហាញក្រោយ​ការ​ប្រជុំចរចា”៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស