មន្ត្រីនគរបាលម្នាក់និងមន្ត្រីរដ្ឋបាលព្រៃឈើម្នាក់ត្រូវបានអ្នកកាប់ឈើខុសច្បាប់បាញ់ស្លាប់នៅក្នុងខេត្តព្រះវិហារកាលពីរំលងអធ្រាត្រឈានចូលព្រឹកថ្ងៃសៅរ៍ ក្នុងហេតុការណ៍បាញ់ប្រហារមួយ ដែលក៏បានបណ្តាលឲ្យមន្ត្រីទី២ម្នាក់ទៀតរងរបួសផងដែរ នេះបើតាមមន្ត្រីម្នាក់ដែលបានបកស្រាយខុសគ្នាពីហេតុការណ៍ទាំងពីរនេះ។
នៅពេលត្រូវបានទាក់ទងកាលពីព្រឹកម្សិលមិញ លោក ខាត់ ហ៊ុន ស្នងការរងនគរបាល ខេត្តបានមានប្រសាសន៍ថា មន្ត្រីទាំងពីរនាក់នេះកំពុងដើរល្បាតនៅក្នុងព្រៃការពារផ្នែកខាងជើងខេត្តព្រះវិហារ ហើយទើបតែបានដកហូតរណារមួយចំនួនពីអ្នកកាប់ឈើមួយក្រុម នៅពេលពួកគេជួបក្រុមទី២ ហើយត្រូវបានបាញ់ប្រហារតែម្តង។
លោកបាននិយាយថា ”មន្ត្រីរបស់យើងបានឃើញមនុស្សមួយក្រុមមានគ្នាបីនាក់កំពុងកាប់ឈើនៅក្នុងព្រៃការពារព្រះរកា។ ក្រុមអ្នកកាប់ឈើបានប្រើកាំភ្លើងអាកា- ៤៧ បាញ់មកលើមន្ត្រីទាំងនោះ ហើយមន្ត្រីពីរនាក់ត្រូវបានបាញ់ស្លាប់នៅកន្លែងកើតហេតុ”។
លោក ខាត់ ហ៊ុន បានកំណត់អត្តសញ្ញាណ ជនរងគ្រោះថា ឈ្មោះ សៀង ណារ៉ុង ជាមន្ត្រី រដ្ឋបាលព្រៃឈើប្រចាំស្រុកឆែប និង លោក សាប់ យស់ ជាមន្ត្រីនគរបាលស្រុកឆែប។លោកបានថ្លែងថា លោកទទួលបានព័ត៌មានពីហេតុការណ៍នេះពីលោក ភេទ សុភ័ណ មន្ត្រីនគរបាលព្រំដែន ដែលត្រូវបានបាញ់ចំកំប៉េះគូទ ប៉ុន្តែបានរត់គេចខ្លួនរួចជាមួយមន្ត្រីម្នាក់ទៀតដែលមិនបានរងរបួស។
លោក បានមានប្រសាសន៍ថា “ឥឡូវនេះ ខ្ញុំកំពុងសាកសួរមន្ត្រីនគរបាលដែលមានរបួសនៅមន្ទីរពេទ្យខេត្តដើម្បីប្រមូលព័ត៌មាន អំពីការបាញ់ប្រហារនោះ។ យើងនឹងធ្វើការស៊ើបអង្កេតបន្ទាប់ពីប្រមូលបានព័ត៌មានដើម្បីស្វែងរកជនដៃដល់ មិនថា ពួកគេជាអ្នកដែលត្រូវបានចាប់ខ្លួនពីមុន និងជាអ្នកដែលកំពុងស្វែងរកនោះឡើយ”។
និយាយពីមន្ទីរពេទ្យ លោក សុភ័ណ បាន ប្រាប់ថា លោកមិនបានឃើញជនដៃដល់ទេ ។ លោកបាននិយាយថា ”យើងបានទៅដល់ព្រៃជ្រៅ ហើយឃើញមនុស្សបីនាក់កំពុងកាប់ឈើនៅម៉ោងប្រហែល ១និង ៣០នាទីរំលងអធ្រាត្រ។ ពេលនោះ ខ្ញុំឮសូរកាំភ្លើងចេញពីភាគីទាំងពីរ ហើយមន្ត្រីពីរនាក់ក្នុងចំណោមមន្ត្រីរបស់យើងត្រូវបានបាញ់ស្លាប់តែម្តង។ ខ្ញុំព្យាយាមរត់គេចពីការបាញ់នោះ ប៉ុន្តែខ្ញុំត្រូវគ្រាប់កាំភ្លើងអាកា-៤៧មួយគ្រាប់ចំកំប៉េះគូទខាងឆ្វេង”។
លោកបាននិយាយថា “ខ្ញុំមិនដឹងច្បាស់ថា ពួកគេមានគ្នាប៉ុន្មាននាក់ ឬមានកាំភ្លើងប៉ុន្មានដើមនោះទេពីព្រោះវាងងឹតពេក។ ខ្ញុំគិតថា ពួកគេប្រហែលជាមានកាំភ្លើងពីរដើម ពី ព្រោះស្នូរកាំភ្លើងចេញពីផ្នែកខាងឆ្វេងផង និងខាងស្តាំផង”។
លោក សុភ័ណ បាននិយាយថា លោកបានត្រឡប់ទៅដល់បន្ទាយវិញនៅម៉ោងប្រហែល៨ព្រឹក។ លោកសន្និដ្ឋានថា ជនដៃដល់ប្រហែលជាក្រុមទាហានមកពីកងពលធំលេខ៣ដែលមានគំនុំដោយសារលោក និងមន្ត្រីរបស់លោកបានចាប់ខ្លួនពួកគេពីបទកាប់ឈើខុសច្បាប់នៅក្នុងតំបន់នេះកាលពីពីរបីខែកន្លងមក។
ទោះយ៉ាងណា នៅពេលត្រូវបានទាក់ទង ម្តងទៀតកាលពីរសៀលម្សិលមិញដើម្បីស្វែងរកថា តើមន្ត្រីទាំងនោះ ដែលមានអាវុធក្នុងដៃដែរ បានបាញ់ដាក់ក្រុមអ្នកកាប់ឈើវិញឬយ៉ាងណានោះ លោក ខាត់ ហ៊ុន ស្នងការរងបានមានប្រសាសន៍ថា លោក សុភ័ណ បានបកស្រាយប្រាប់លោកផ្សេងពីហេតុការណ៍នៅព្រឹកនោះ។
លោកបានថ្លែងថា ពេលនេះ មន្ត្រីរូប នេះបានប្រាប់លោកថា គាត់ និងមនុស្សបីនាក់ទៀតបានដេកលង់លក់ក្នុងអង្រឹងនៅពេលពួកគេជួបហេតុការណ៍នោះ។ លោកបាននិយាយថា “លោក សុភ័ណ បានប្រាប់ខ្ញុំថា ក្រុមអ្នកកាប់ឈើបានបាញ់លោក ណារ៉ុង មួយគ្រាប់ត្រង់ក្បាល និងបាញ់លោក សាប់ យស់ មួយគ្រាប់ត្រង់ទ្រូង ខណៈពេលពួកគេដេកលង់លក់ក្នុងអង្រឹងនៅក្នុងព្រៃ”។
លោកបានបន្ថែមថា “លោក សុភ័ណ ប្រាប់ខ្ញុំមិនត្រង់ឡើយ នៅពេលខ្ញុំបានសួរគាត់ដំបូង ពីព្រោះគាត់មិនហា៊នប្រាប់ការពិតដល់ខ្ញុំ។ ក្រុមអ្នកកាប់ឈើប្រហែលជាខឹង ព្រោះមន្ត្រីរបស់យើងបានឃាត់ពួកគេមិនឲ្យកាប់ឈើហើយបានដកហូតយករណាររបស់ពួកគេកាលពីមួយខែមុន”។
លោក សុភ័ណ មិនអាចទាក់ទងសុំការបញ្ជាក់ អះអាងពីហេតុការណ៍ទី២បានទេ។ មន្ត្រីនគរបាលនិងមន្ត្រីរដ្ឋបាលព្រៃឈើ ជារឿយៗ ត្អូញត្អែរពីការប្រឈមមុខដាក់គ្នាជាមួយទាហានប្រដាប់អាវុធពាក់ព័ន្ធការកាប់ឈើខុសច្បាប់ដ៏រាលដាលនៅក្នុងប្រទេស។ទោះយ៉ាងណា ការបាញ់មន្ត្រីទាំងនោះស្លាប់ពីសំណាក់ក្រុមអ្នកកាប់ឈើ ជារឿងកម្រណាស់។
លោក ឆេង គឹមស៊ុន ប្រធានរដ្ឋបាលព្រៃឈើបានមានប្រសាសន៍ថា វាបានកើតឡើងប្រហែលពីរទសវត្សរ៍មកហើយចាប់តាំងពីមន្ត្រីម្នាក់ក្នុងចំណោមមន្ត្រីរដ្ឋបាលព្រៃឈើត្រូវអ្នកកាប់ឈើបាញ់ស្លាប់។
លោកបានថ្លែងថា “នេះជាការក្រៀមក្រំណាស់។ឆ្នាំនេះ យើងអនុវត្តតឹងរ៉ឹងបំផុតដើម្បីដកហូតយករណារ ជាមូលហេតុដែលជនមិនល្អខឹងនឹងមន្ត្រីរបស់យើង”។
លោក ឆេង គឹមស៊ុន បានមានប្រសាសន៍ថាការបាញ់ស្លាប់នេះប្រហែលជាជំរុញឲ្យមន្ត្រីរបស់លោកធ្វើការប្រុងប្រយ័ត្នអំពីសន្តិសុខបន្ថែមទៀតខណៈពេលដើរល្បាត។ លោកបានថ្លែងថា”យើងចាំបាច់ត្រូវអនុវត្តដោយមានការប្រុងប្រយ័ត្នបន្ថែមទៀត។ ប្រហែលជាក្រុមទាហានត្រូវមានមនុស្សមួយចំនួនទៀតឈរយាម… និងប្រហែលជាយើងមានក្រុមធំជាងនេះ”៕សារុន