34 C
Phnom Penh

​មនុស្ស​​​៦​​​នាក់​​​ត្រូវ​​​ចាប់​​​ខ្លួន​​​ទាក់​​​ទិន​​​នឹង​​​ការ​​​សម្លាប់​​​​​​មន្ត្រី​​​ប៉ូលិស​​​និង​​​មន្ត្រី​​​​​​ព្រៃ​​​ឈើ​​​

ដោយ ឌឹ ខេមបូឌា ដេលី

បទវិភាគ

នគរ​​​បាល​​​ខេត្ត​​​ព្រះ​​​វិហារ​​​​​​កាល​​​ពី​​​ថ្ងៃ​​​ច័ន្ទ​​​បាន​​​ចាប់​​​ខ្លួន​​​បុរស​​​៦​​​នាក់​​​​​​ដែល​​​​​​សង្ស័យ​​​ថា​​​ជាប់​​​ពាក់​​​ព័ន្ធ​​​នឹង​​​​​​ការ​​​បាញ់​​​សម្លាប់​​​​​​មន្ត្រី​​​នគរ​​​បាល​​​ម្នាក់​​​ និង​​​មន្ត្រី​​​រដ្ឋ​​​បាល​​​ព្រៃ​​​ឈើ​​​ម្នាក់​​​​​​កាល​​​ពី​​​​​​ព្រហាម​​​ថ្ងៃ​​​សៅរ៍​​​ ក្នុង​​​ពេល​​​ដែល​​​ពួក​​​គេ​​​​​​កំពុង​​​ដេក​​​លង់​​​លក់​​​​​​ពេលចុះ​​​​​​ល្បាត​​​​​​បង្ក្រាប​​​អ្នក​​​កាប់​​​ឈើ​​​ខុស​​​ច្បាប់​​​​​​នៅ​​​ក្នុង​​​ព្រៃ​​​ព្រះ​​​រក្ខ។​​​​​​

យោង​​​តាម​​​ការ​​​រៀប​​​រាប់​​​របស់​​​មន្ត្រី​​​ម្នាក់​​​ដែល​​​រស់​​​រាន​​​មាន​​​ជីវិត​​​ពី​​​ការ​​​បាញ់​​​ប្រហារ​​​ដោយ​​​រង​​​របួស​​​កំប៉េះ​​​គូទ​​​ឲ្យ​​​ដឹង​​​ថា​​​ ​​សាប់ យស់ ជា​​​មន្ត្រី​​​នគរ​​​បាល​​​ស្រុក​​​ឆែប និងសៀង​​​ ណារ៉ុង​​​ មន្ត្រី​​​រដ្ឋ​​​បាល​​​ព្រៃ​​​ឈើផ្នែក​​​ឆែប ត្រូវ​​​បាន​​​គេ​​​បាញ់​​​ស្លាប់​​​ពេល​​​​​​ដេក​​​ក្នុង​​​អង្រឹង​​​នៅ​​​ម៉ោង​​​ប្រហែល​​​១​​​និង​​​៣០​​​នាទី​​​ព្រឹក​​​ ដោយ​​​បុរស​​​មួយ​​​ក្រុម​​​​​​ដែល​​​បាន​​​រត់​​​គេច​​​​​​ទៅ​​​ក្នុង​​​ព្រៃ​​​ជិត​​​នោះ។​​​​​​

កាលពី​​​ម្សិលមិញ ស្នងការ​​​រងខេត្ត​​​ លោក ខាត់ ហ៊ុន បាន​​​និយាយ​​​ថា មន្ត្រី​​​របស់​​​លោកបាន​​​ចាប់​​​ខ្លួន​​​បុរស​​​ប្រាំមួយនាក់​​​ដែល​​មន្ត្រី​​​​នៅរស់​​​គឺលោក ភេទ សុភ័ណ្ឌ បាន​​​អះអាង​​​ថា បាន​​​ឃើញ​​​កាប់​​​ឈើ​​​​​​ដោយ​​​ខុស​​​ច្បាប់​​​នៅ​​​ក្នុង​​​តំបន់​​​នោះ​​​កាលពី​​​ការ​​​ចុះ​​​ល្បាត​​​ពី​​​លើក​​​មុន​​។ លោក ហ៊ុន បាន​​​និយាយ​​​ថា បុរស​​​ទាំង​​​នោះ​​​ត្រូវ​​​បាន​​​ចាប់​​​ខ្លួន​​​នៅក្បែរ​​​កន្លែង​​​កើត​​​ឃាតកម្ម​​​ ហើយ​​​ថា បុរស​​​ទាំង​​​ប្រាំមួយ​​​នាក់​​​នោះ​​​បាន​​​បដិសេធ​​​ថា មិន​​​បាន​​​ជាប់​​​ពាក់ព័ន្ធទេ។

លោកស្នងការរង​​​រូបនេះ​​​បាន​​​និយាយ​​​ថា “មនុស្ស​​​ប្រាំមួយ​​​នាក់​​​នោះ​​​បាន​​​បដិសេធ​​​ថា មិនបាន​​​បាញ់​​​មន្ត្រី​​​យើង​​​ទេ ប៉ុន្តែ តុលាការ​​​បាន​​​ផ្តល់​​​ការ​​​ណែនាំ​​​ថា យើង​​​គួរ​​​ចោទ​​​ពួកគេ​​​ពីបទ​​​កាប់​​​ឈើ​​​ខុស​​​ច្បាប់។ យើង​​​នឹងមិន​​​​​​ដោះ​​​លែង​​​អ្នកទាំង​​​ប្រាំមួយ​​​នាក់ទេ​​​ ពីព្រោះ​​​​​​យើង​​​ប្រាកដ​​​ថា ពួកគេ​​​បាញ់​​​មន្ត្រី​​​ ប៉ុន្តែ យើង​​​មិន​​​មាន​​​ភ័ស្តុតាង​​​ដើម្បី​​​ចោទ​​​ពួកគេ​​​ទេ”។​​​​

លោក ហ៊ុន បាន​​​និយាយ​​​ថា ទោះជាយ៉ាង​​​នេះក្តី ជន​​​សង្ស័យ​​​ពិត​​​ជា​​​សារភាព​​​ថា បាន​​​កាប់​​​ឈើ​​​នៅ​​​ក្នុង​​​តំបន់នោះ​​​​​​​​​ឲ្យ​​​លោក​​​ឈ្មួញ​​​ម្នាក់​​​ឈ្មោះថា ធឿន ដែល​​​បាន​​​ឲ្យ​​​លុយ​​​ពួកគេ​​​៣៥ដុល្លារ​​​ក្នុង​​​ឈើ​​​ផ្ចឹក​​​និង​​​គគីរ​​​មួយ​​​ម៉ែត្រ​​​គូប។

កាលពី​​​ថ្ងៃ​​​អាទិត្យ​​​ លោក សុភ័ណ្ឌ បាន​​​ប្រាប់​​​អ្នកយក​​​ព័ត៌មាន​​​ថា លោកសង្ស័យ​​​ទៅលើ​​​អ្នក​​​បាញ់​​​ប្រហារ​​​គឺជា​​​ទាហាន​​​មក​​​ពី​​​កងពល​​​ធំលេខ​​​៣​​​ ពីព្រោះ​​​ក្រុម​​​ល្បាត​​​បាន​​​ចាប់​​​ខ្លួន​​​សមាជិក​​​នៃ​​​កង​​​ពល​​​ធំ​​​នេះ​​​ពីបទ​​​កាប់ឈើ​​​ខុស​​​ច្បាប់​​​នៅក្នុង​​​តំបន់​​​ដដែល​​​នេះ​​​កាលពី​​​ពីរបី​​​ខែ​​​មុន។

ប៉ុន្តែ លោក ហ៊ុន បាននិយាយ​​​កាលពី​​​ម្សិលមិញ​​​ថា អ្នកទាំង​​​ប្រាំមួយ​​​នាក់​​​ដែល​​​ត្រូវ​​​បាន​​​ចាប់​​​ខ្លួន​​​ គឺជា​​​ជន​​​ស៊ីវិល​​​។

លោកស្នងការរង​​​រូបនេះ​​​បាននិយាយ​​​ថា “អ្នកទាំងប្រាំមួយ​​​នាក់​​​មិនមែន​​​ជាទាហាន​​​ទេ​​​។ ពួកគេ​​​ជា​​​ប្រជាជន​​​ធម្មតា​​​ដែល​​​ជួល​​​ដោយ​​​ឈ្មួញ​​រកស៊ី​ឈើ”។

លោកស្នងការរង​​​រូបនេះ​​​បាន​​​បង្ហាញ​​​អត្តសញ្ញាណ​​​ជន​​​សង្ស័យ​​​មាន​​​ឈ្មោះដូចជា សុខ ប៊ុនរឿន អាយុ៤២ឆ្នាំ​​​​​​ សុខ ជា​​​ អាយុ​​​២១ឆ្នាំ ងួន ជួន អាយុ​​​២៧ឆ្នាំ ណុប ប្រុស អាយុ​​​២៩ឆ្នាំ​​​ ស្រ៊ុន រិន អាយុ​​​៤៤ឆ្នាំ និង​​​ រី យ៉េស អាយុ​​​៥១ឆ្នាំ ហើយ​​​និយាយថា ភាគ​​​ច្រើន​​​គឺ​​​មក​​​ពីខេត្ត​​​បន្ទាយមាន​​​ជ័យ​​​។

លោក ចាប សុខ នាយផ្នែក​​​រដ្ឋបាលព្រៃឈើ​​​ជាំក្សាន្ត​​​ បាន​​​និយាយថា ការ​​​កាប់​​​ឈើ​​​ខុស​​​ច្បាប់​​​នៅ​​​ក្នុង​​​តំបន់​​​ព្រះរុក្ខ បាន​​​កើន​​​ឡើង​​​ក្នុង​​​រយៈពេល​​​ប៉ុន្មាន​​​ឆ្នាំ​​​ថ្មីៗនេះ​​​ ហើយ​​​បាន​​​ចោទ​​​ទាហាន​​​មូលដ្ឋាន​​​ថា បាន​​​ការពារ​​​ជន​​​ល្មើស ទោះជាពួកគេ​​​មិន​​​បាន​​​កាប់​​​ឈើ​​​ខ្លួន​​​ឯង​​​ក៏ដោយ។

លោក ចាប សុខ បាន​​​និយាយ​​​ថា “យើង​​​មិន​​​ដែល​​​ឃើញ​​​មុខ​​​អ្នក​​​កាប់​​​ឈើ​​​ទេ ពីព្រោះ​​​ពួកគេ​​​រត់​​​គេច​​​ពេល​​​គេ​​​ឃើញ​​​យើង​​​។ យើង​​​បាន​​​ឮថា ទាហាន​​​ខ្លះ​​​ការពារ​​​អ្នកកាប់​​​ឈើ​​​ ប៉ុន្តែ យើង​​​មិន​​​មាន​​​ភ័ស្តុតាង​​​ចោទពួកគេ​​​ថា ពាក់ព័ន្ធ​​​ក្នុង​​​ការ​​​កាប់​​​ឈើ​​​ទេ ព្រោះ​​​គេ​​​មិន​​​ឲ្យ​​​យើង​​​ចាប់​​​ខ្លួន​​​គេ​​​បានទេ​​​​​​”។

ទាហាន​​​ជាញឺកញាប់​​​ត្រូវ​​​គេ​​​ចាប់បាន​​​កំពុង​​​ដឹក​​​ឈើ​​​ទូទាំង​​​​ប្រទេស​​​ ហើយ​​​ជារឿយៗ​​​​​​មាន​​​នៅ​​​ក្នុង​​​របាយ​​​ការណ៍​​​នគរបាល​​​ថា គេមក​​​ជួយ​​​អ្នក​​​កាប់​​​ឈើ​​​ខុស​​​ច្បាប់​​​។ ប៉ុន្តែ ការ​​​បាញ់​​​សម្លាប់​​​មន្ត្រី​​​ដោយ​​​អ្នកកាប់ឈើ​​​ខុសច្បាប់​​​គឺ​​​កម្រ​​​កើត​​​មាន​​​ណាស់​​​។ រដ្ឋបាល​​​ព្រៃឈើ​​​បាន​​​និយាយថា ការ​​​បាញ់​​​ប្រហារ​​​​​​កាលពី​​​ថ្ងៃសៅរ៍​​​ គឺជា​​​ហេតុការណ៍​​​លើកដំបូង​​​ក្នុង​​​រយៈពេល​​​ប្រហែល​​​​​​២០​​​ឆ្នាំ​​​មកនេះ។

សួរកាលពី​​​ម្សិលមិញទាក់ទង​​​ទៅនឹង​​​ការជាប់ពាក់​​​ព័ន្ធ​​​របស់​​​ទាហាន​​​មូលដ្ឋាន​​​ក្នុង​​​ហេតុការណ៍​​​បាញ់​​​ប្រហារ​​​កាលពី​​​ថ្ងៃសៅរ៍​​​ លោក ស្រី ឌឹក មេបញ្ជាការ​​​កងពល​​ធំ​​​លេខ​​​៣ និង​​​លោក ស៊ី គិរី ស្នងការ​​​នគរបាល​​​ខេត្ត​​​ បាន​​​បដិសេធ​​​មិននិយាយ​​​ជាមួយ​​​អ្នកយក​​​ព័ត៌មាន។

សមាគមអភិរក្ស​​​សត្វ​​​ព្រៃ​​​ (WCS) កំពុង​​​ធ្វើ​​​ការ​​​នៅក្នុងតំបន់​​​ព្រះរុក្ខ​​​ចាប់តាំង​​​ពីឆ្នាំ​​​២០០០​​​ ដើម្បី​​​ជួយ​​​បណ្តុះ​​​បណ្តាល​​​មន្ត្រី​​​ល្បាត​​​ព្រៃឈើ​​​ ហើយ​​​ផ្តល់​​​ឲ្យ​​​ពួកគេ​​​នូវ​​​សម្ភារ​​​មួយ​​​ចំនួន​​។ នៅ​​​ក្នុង​​សេចក្តី​​​ថ្លែងការណ៍​​​មួយ​​​កាលពី​​​ម្សិលមិញ អង្គការ​​​ក្រៅ​​​រដ្ឋាភិបាល​​​នេះ​​​បាននិយាយថា ខ្លួន​​​បាន​​​ធ្វើ​​​ការ​​​ជាមួយ​​​លោក​​​ សាប់ យស ចាប់​​​តាំង​​​ពីឆ្នាំ​​​២០០៩​​​ និង​​​ធ្វើ​​​ការ​​​ជាមួយ​​​លោក សៀង ណារុង ចាប់តាំង​​​ពី​​​ឆ្នាំមុន។​​​

លោក រូសស៍ ស៊ិនក្លែរ នាយក​​​កម្មវិធីសមាគមអភិរក្ស​​​សត្វព្រៃ​​​ប្រចាំ​​​ប្រទេស បាន​​​និយាយថា តំបន់​​​ដែល​​​ក្រុម​​​ដើរ​​​ល្បាត​​​ត្រូវ​​​គេ​​​បាញ់​​​គឺជា​​​តំបន់​​​ក្តៅគគុក​​​ផ្នែក​​​កាប់​​​ឈើ​​​ខុសច្បាប់​​​ ដែល​​​ជាតំបន់​​​ព្រៃ​​​ស្រោង​​​សំបូរ​​​​​​ទៅ​​​ដោយ​​​ឈើ​​​មាន​​​តម្លៃ​​​ខ្ពស់​​​។ ស្ថិត​​​នៅ​​​ចន្លោះ​​​ជម្រក​​​សត្វព្រៃ​​​គូលេនព្រហ្មទេព​​​ ទៅទិស​​​ខាង​​​លិច​​​និង​​​ព្រៃការពារ​​​ព្រះវិហារ​​​ទៅទិសខាង​​​ជើង​​​និងកើត​​​ លោកនាយក​​​អង្គការ​​​នេះ​​​បាន​​​និយាយថា តំបន់​​​ព្រះរុក្ខ​​​ដោយមាន​​​ការជួយ​​​របស់​​​អង្គការ​​​លោក ​​​គឺ​​​ប្រហែល​​​ក្លាយ​​​ជាឋានៈ​​​​​​តំបន់​​​ការពារផ្លូវការ​​​ពីរបីខែទៀត​​​ប៉ុណ្ណោះ។

លោក ស៊ិនក្លែរ បាន​​​និយាយថា ការពិនិត្យ​​​ទៅលើ​​​វិធានការ​​​សន្តិសុខ​​​ដែលប្រើ​​​ពេល​​​ចុះ​​​ល្បាត​​​ព្រៃ​​​ឈើ​​​ គឺ​​​​​​ត្រូវ​​​ប្រយ័ត្ន​​​ប្រយែង​​​ ប៉ុន្តែ បាន​​​និយាយបន្ថែម​​​ថា ដោយ​​​​​​មាន​​​ការ​​​ស៊ើប​​​អង្កេត​​​កំពុង​​​បន្ត​​​ វា​​​ជា​​​ការ​​​ឆាប់​​​ពេក​​​មិន​​​អាច​​​ផ្តល់​​​អនុសាសន៍​​​ជាក់​​​លាក់​​​មួយ​​​ណា​​​បាន​​​ទេ។

លោក ស៊ិនក្លែរ បាន​​​និយាយ​​​ថា ក្នុងខណៈដែល​​​ក្រុម​​​ល្បាត​​​រដ្ឋបាល​​​ព្រៃឈើ​​​មិនអនុញ្ញាត​​​ឲ្យ​​​កាន់​​​អាវុធ​​​ក៏ដោយ ក៏​​​ទាហាន​​​និង​​​នគរបាល​​​ដែល​​​រួម​​​ដំណើរ​​​ជាមួយពួកគេ​​​ ពេល​​​ចុះល្បាត​​​គឺ​​​មាន​​​កាន់​​​អាវុធ​​​៕  ​​​រើន​​​ ​​​​​​​​​​(រាយការណ៍បន្ថែម​​​ដោយ Zsombor Peter)

 

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស