អត្រាថយចុះនៃចំនួនផ្សោតក្នុងទន្លេមេគង្គបានធ្លាក់ចុះគួរឲ្យកត់សម្គាល់ក្នុងរយៈពេលប៉ុន្មានឆ្នាំថ្មីៗនេះ ទោះបីជាចាំបាច់ត្រូវការពារផ្សោតផ្សេងៗទៀតរហូតដល់ពេញវ័យ ដើម្បីជួយសង្គ្រោះពួកវាកុំឲ្យងាប់ផុតពូជក៏ដោយ នេះបើយោងតាមរបាយការណ៍ថ្មីមួយចេញផ្សាយកាលពីម្សិលមិញ។
របាយការណ៍ដែលចេញផ្សាយរួមគ្នាដោយរដ្ឋបាលជលផល និងអង្គការមូលនិធិសត្វព្រៃពិភពលោក (WWF) នេះឲ្យដឹងថា មានផ្សោតប្រមាណ៨០ក្បាល ហើយចំនួននេះបានធ្លាក់ចុះក្នុងអត្រាជាមធ្យម១,៦ភាគរយក្នុងរយៈពេល៨ឆ្នាំកន្លងមកនេះ។
របាយការណ៍នេះលើកឡើងថា ថនិកសត្វដែលជិតងាប់ផុតពូជនេះបានបាត់បង់ក្នុងអត្រា៧ភាគរយក្នុងមួយឆ្នាំៗ។ តាមការប៉ាន់ប្រមាណថា បច្ចុប្បន្ន ចំនួនផ្សោតដែលរស់រានរហូតដល់ធំពេញវ័យ ស្ថិតក្នុងអត្រា០,៨ភាគរយបើធៀបនឹង០ភាគរយនៅក្នុងឆ្នាំ២០១៣។
របាយការណ៍ដដែលបន្តថា “ការកើនឡើងចំនួនផ្សោតដែលរស់រានរហូតដល់ពេញវ័យនេះ ផ្តល់ក្តីសង្ឃឹមថាស្ថានភាពនឹងប្រសើរឡើង ប្រសិនបើអត្រាងាប់អាចកែប្រែបាន។ ប៉ុន្តែ ខណៈមានភ័ស្តុតាងច្បាស់លាស់បង្ហាញពីការបន្តធ្លាក់ចុះចំនួនផ្សោត ក្តីសង្ឃឹមថាស្ថានភាពនឹងប្រសើរឡើងគឺនៅតែមាន ជាក់ស្តែងដូចចំនួនផ្សោតដែលរស់រានរហូតដល់ពេញវ័យជាដើម។ ប្រសិនបើអត្រាងាប់អាចបញ្ឈប់បាន ចំនួនផ្សោតនឹងនៅថេរ ហើយស្ថានភាពនឹងធូរស្រាលរយៈពេលវែង”។
ក្នុងសេចក្តីប្រកាសព័ត៌មានមួយ អង្គការWWF បានកោតសរសើរការបង្អង់ល្បឿននៃការធ្លាក់ចុះចំនួនផ្សោតថាបណ្តាលមកពីខ្លួនធ្វើការសហការជាមួយរដ្ឋបាលជលផលក្នុងកិច្ចការពារដែនជម្រករបស់ផ្សោត និងការរារាំងអ្នកនេសាទក្នុងតំបន់ការពារផ្សោត។
លោក ឈិត សំអាត នាយកអង្គការ WWF ប្រចាំប្រទេសកម្ពុជា បានមានប្រសាសន៍ថា អង្គការរបស់លោកបានបង្កើនការឃ្លាំមើលក្រុមល្បាតទន្លេរបស់រដ្ឋបាលជលផលនៅឆ្នាំនេះដើម្បីធានាថា ពួកគេកំពុងបន្តឃ្លាំមើលសកម្មភាពខុសច្បាប់។ លោកថ្លែងថា “ការងារសំខាន់ដែលយើងបានធ្វើ គឺការអនុវត្តច្បាប់។ យើងមានទីប្រឹក្សាផ្នែកអនុវត្តច្បាប់ដើម្បីចូលរួមជាមួយពួកគេក្នុងកិច្ចការល្បាត និងឃ្លាំមើល”។
លោក ម៉ុក ពន្លក នាយរងខណ្ឌរដ្ឋបាលជលផលខេត្តក្រចេះ កន្លែងដែលផ្សោតរស់ភាគច្រើនរស់នៅ បានសន្មតថា អត្រាផ្សោតងាប់ដែលថយចុះនេះ គឺបណ្តាលមកពីការបង្កើនការល្បាត សម្ភារល្អៗ ហើយការអប់រំណែនាំសហគមន៍ស្តីពីច្បាប់នេសាទ។
លោកបានគូសបញ្ជាក់ថា នៅឆ្នាំនេះ “យើងបានចាប់ផ្តើមល្បាតពេលយប់។ យើងក៏ធ្វើការផ្សព្វផ្សាយព័ត៌មានទៅដល់ពលរដ្ឋដែរ។ ពេលនេះយើងមានដូចជា សាំង និងសម្ភារជាដើមសម្រាប់ការល្បាត”៕ សុខុម