រដ្ឋបាលជលផល (FiA) នៃក្រសួងកសិកម្មរំពឹងថា នឹងបង្កើនវត្តមានរបស់ខ្លួនតាមបណ្ដោយឆ្នេរសមុទ្រ ដោយការបើកការិយាល័យថ្មីមួយនៅខេត្តកែប ជាទីដែលការនេសាទខុសច្បាប់ដោយនាវាក្នុងស្រុកនិងក្រៅស្រុកបានធ្វើឲ្យហិនហោចពូជត្រីយ៉ាងច្រើន និងបានបំផ្លាញតំបន់ដ៏ធំនៃប្រព័ន្ធអេកូឡូស៊ីក្រោមទឹក។
យោងតាមលោក អេង ជាសាន អគ្គនាយក រដ្ឋបាលជលផលបានឲ្យដឹងថា ឈូងសមុទ្រកែប ដែលជាធម្មតាមាននាវាអូសចៃរ៉ាខ្មែរខុសច្បាប់ និងជួនកាលមាននាវាអូសគូធំៗមកពីប្រទេសវៀតណាមផងនោះ សព្វថ្ងៃនេះស្ថិតនៅក្រោមយុត្តាធិការខណ្ឌរដ្ឋបាលជលផលខេត្តកំពត ប៉ុន្តែគួរតែមានកម្លាំងផ្ទាល់ខ្លួន។
លោក ជាសាន បានមានប្រសាសន៍កាលពីម្សិលមិញថា ” FiA បានធ្វើសំណើ ហើយវាស្ថិតនៅក្រសួងកសិកម្ម រុក្ខាប្រមាញ់ និងនេសាទ។ យើងសង្ឃឹមថា នឹងទទួលបានការសម្រេចយល់ព្រមក្នុងពេលឆាប់ៗ”។ ក៏ប៉ុន្តែលោកមិនបាននិយាយថា បានធ្វើសំណើនោះនៅពេលណាទេ។
លោកបានបន្ថែមថា “កែបជាខេត្តរបស់ខ្លួនផ្ទាល់ ហើយគ្រប់ខេត្តគួរមានខណ្ឌរដ្ឋបាល របស់ខ្លួនផ្ទាល់”។ លោកបានបដិសេធមិនពន្យល់ថា សាខាថ្មីនេះនឹងដំណើរការរបៀបណាទេក្រៅតែពីនិយាយថា “ពិតមែនហើយ នឹងមានការល្បាតថែមទៀត”។
បំពាក់ដោយទូកល្បាតតែមួយគ្រឿង មន្ត្រីជលផលដែលមានទីតាំងនៅក្នុងខេត្តកំពតបានត្អូញត្អែរអំពីការលំបាកក្នុងការល្បាតការពារខេត្តទាំងពីរដោយបានអះអាងថា ពួកជនល្មើសមានអ្នកឲ្យការណ៍ដែលឲ្យពួកគេដឹងជាមុនប្រសិនបើក្រុមល្បាតចេញដំណើរទៅទិសអាគ្នេយ៍ខេត្តកែប ជាកន្លែងដែលការនេសាទដោយអូសចៃរ៉ាគឺជាការខុសច្បាប់។
ដូចមន្ត្រីមូលដ្ឋានជាច្រើននាក់នៅតាមបណ្ដោយឆ្នេរសមុទ្រនោះដែរ លោក ជាសាន បានទទួលស្គាល់ថា ទូកវៀតណាមបើក ឆ្លងព្រំដែនសមុទ្រចូលដែនទឹកកម្ពុជាដើម្បីនេសាទ ប៉ុន្តែលោកបានមានប្រសាសន៍ថា អ្នកនេសាទខ្មែរក៏បើកចូលដែនទឹកប្រទេសវៀតណាមដែរ។
នៅពេលសួរថាតើនគរបាលសមុទ្រ ដែលទាំងអ្នកនេសាទខ្មែរនិងវៀតណាមចោទថា ទទួលសំណូកដើម្បីធ្វើមិនដឹងមិនឮចំពោះការនេសាទខុសច្បាប់ ល្បាតព្រំដែនមានប្រសិទ្ធភាពឬយ៉ាងណា លោកបានបដិសេធមិនធ្វើអត្ថាធិប្បាយទេ។
លោកបានមានប្រសាសន៍ថា “សុំអភ័យទោស ខ្ញុំមិនអាចឆ្លើយឲ្យបានត្រឹមត្រូវទេ”។
ក្រុមអភិរក្សដែលធ្វើការនៅឈូងសមុទ្រ កែបនិយាយថា ពូជត្រីនៅសល់ត្រឹម២៥ភាគរយនៃអ្វីដែលមាននៅឆ្នាំ២០០០ ដែលនៅពេលនោះការនេសាទដោយអូសចៃរ៉ាបានចាប់ផ្ដើមក្នុងតំបន់នោះ ហើយថា ការចុះ ថយបរិមាណត្រីនេះបានគំរាមដល់ការរកស៊ីចិញ្ចឹមជីវិតរបស់ប្រជាពលរដ្ឋប្រហែល១.៥០០គ្រួសារ។
នាវាអូសចៃរ៉ាក្នុងស្រុកប្រហែល៥០គ្រឿង ដែលបំផ្លាញកន្លែងបង្កកំណើតក្នុងសមុទ្រ ដោយអួនឆក់សណ្ដូន ហើយជួនកាល នាវាអូសគូវៀតណាមផងនោះដែលអូសអួនមានប្រវែងរាប់រយម៉ែត្រ បើកនៅឯនាយឆ្នេរសមុទ្រខេត្តកែប ភាគច្រើនគ្មានការទប់ស្កាត់ទេ។
ទាក់ទងនៅថ្ងៃម្សិលមិញ លោក ទេព យុទ្ធី អភិបាលរងខេត្តកែបដែលមានតួនាទីសកម្មក្នុងការទប់ស្កាត់វិធីនេសាទខុសច្បាប់និងដ៏បំផ្លិចបំផ្លាញ បានមានប្រសាសន៍ថា ការបង្កើត ខណ្ឌរដ្ឋបាលជលផលមួយនៅខេត្តកែបគឺយឺតពេល។
លោក យុទ្ធី បានមានប្រសាសន៍ថា មន្ត្រីជលផលបួននាក់ស្ថិតនៅក្នុងខេត្តកែបស្រាប់ ប៉ុន្តែពួកគេជាញឹកញាប់ពឹងផ្អែកលើនគរបាលសមុទ្រដែលឈរជើងលើកោះបីកន្លែងនៅឯនាយឆ្នេរសមុទ្រ ពីព្រោះពួកគេមិនមានទូកល្បាតរបស់ខ្លួនផ្ទាល់ទេ។
លោកបានឲ្យដឹងទៀតថា “មូលហេតុដែលជលផលខ្សោយក្នុងខេត្តកំពត គឺពីព្រោះមានមន្ត្រីតិចតួច និងគ្មានមធ្យោបាយធ្វើដំណើរ ដូច្នេះហើយពួកគេត្រូវល្បាតការពារដោយសហការជាមួយនគរបាលដែនសមុទ្រ”។
“ទូកខុសច្បាប់នៅតែមាន ហើយពិបាករកឲ្យឃើញទូកទាំងនោះណាស់ ពីព្រោះនៅពេលយើងចេញល្បាត ទូកទាំងនោះបាត់អស់”៕ និត