នគរបាលបាននិយាយកាលពីម្សិលមិញថា ការស៊ើបអង្កេតក្នុងករណីព្រះចៅអធិការវត្តមួយក្នុងខេត្តសៀមរាប ដែលសារភាពថាខ្លួនបានបង្ខំឲ្យសាមណេរចំនួន១០អង្គរួមភេទជាមួយខ្លួននោះ នឹងត្រូវពង្រីកបន្ថែម បន្ទាប់ពីលេចឮព័ត៌មានថា កាលពីមុន ព្រះសង្ឃអង្គនេះធ្លាប់គង់នៅវត្តចំនួនបីផ្សេងទៀត។
នគរបាលមូលដ្ឋានបានចាប់ខ្លួនព្រះចៅអធិការព្រះនាម វង្ស ចែត ព្រះជន្ម៤៦វស្សាកាលពីថ្ងៃអាទិត្យ បន្ទាប់ពីទទួលបានពាក្យបណ្ដឹងថា ព្រះសង្ឃអង្គនេះបានរួមភេទជាមួយសាមណេរក្មេងដែលមានព្រះជន្មចន្លោះពី១១វស្សាទៅ១៧វស្សានៅវត្តរតនៈមនី ក្នុងស្រុកក្រឡាញ់ ដែលដាច់ស្រយាលហើយពេលនេះនឹងស៊ើបអង្កេតទាក់ទិនរយៈពេលដែលព្រះសង្ឃអង្គនេះធ្លាប់គង់នៅវត្តក្នុងខេត្តកំពត សៀមរាប និងខេត្តបាត់ដំបង។
លោកស្រី ដួង ថាវរី នាយការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តសៀមរាប បានមានប្រសាសន៍ថា ”នគរបាលយើងនឹងបើកការស៊ើបអង្កេតដើម្បីស្វែងរកការពិតថា តើមានជនរងគ្រោះបន្ថែមទៀតទេ ពីព្រោះព្រះសង្ឃអង្គនេះធ្លាប់បានផ្លាស់ចេញពីវត្តពីរបីមករួចហើយ មុនពេលគាត់ក្លាយជាព្រះចៅអធិការវត្តរតនៈមនី”។
លោកស្រីបានលើកឡើងទៀតថា អំឡុងពេលនគរបាលសាកសួរ អន្ទិត វង្ស ចែត បានសារភាពថា ខ្លួនពិតជាបានរួមភេទជាមួយសាមណេរទាំងនោះមែន ហើយបានឲ្យប្រាក់ទៅសាមណេរទាំងនោះជាថ្នូរនៃការបិទមាត់ ប៉ុន្តែបានបញ្ជាក់ថា “គាត់មិនធ្លាប់ប្រព្រឹត្តអំពើចាប់រំលោភទេពីមុនមកទេ គឺទើបតែពេលគាត់ផ្លាស់មកវត្តរតនៈមនីប៉ុណ្ណោះ”។
លោកស្រីបានបន្តថា អន្ទិត វង្ស ចែត បានមកដល់ខេត្តសៀមរាប បន្ទាប់ពីចំណាយពេល២ឆ្នាំគង់នៅវត្តទ្រនាប់ឫស្សី ក្នុងស្រុកឈូក ខេត្តកំពត។ មុនពេលនោះ គាត់បានចំណាយពេល២ឆ្នាំគង់នៅវត្តកែវ ក្នុងស្រុកឯកភ្នំ ខេត្តបាត់ដំបង និងប្រហែល១ឆ្នាំគង់នៅវត្តតាគាក ក្នុងស្រុកពួក ខេត្តសៀមរាប។
មុនពេលសាងផ្នួស គាត់ធ្លាប់រៀបការ និងមានកូនពីរនាក់ ប៉ុន្តែបានលែងលះប្រពន្ធក្នុងឆ្នាំ២០០៣។ គាត់បានធ្វើជាទាហានចន្លោះពីឆ្នាំ១៩៧៩ ដល់ឆ្នាំ១៩៩៤។ លោកស្រីបានសាកសួរអន្ទិតរូបនេះថា ហេតុអ្វីបានជាខ្លួនផ្លាស់ចេញពីវត្តមួយទៅវត្តមួយក្នុងចំណោមវត្តចំនួនបួននេះក្នុងរយៈពេលប៉ុន្មានឆ្នាំ គាត់ឆ្លើយថា “គាត់ចង់បានតំណែងខ្ពស់” នៅក្នុងភេទជាបព្វជិត។
យោងតាមព្រះរាជអាជ្ញាបានឲ្យដឹងថា អន្ទិត វង្ស ចែត មានឱកាសបង្កើតទំនាក់ទំនងផ្លូវភេទជាមួយសាមណេរក្មេងៗនៅវត្តរតនៈមនី យ៉ាងសេរី ពីព្រោះក្នុងចំណោមព្រះសង្ឃចំនួន១៥អង្គ មានតែគាត់ និងលេខារបស់គាត់ប៉ុណ្ណោះដែលជាមនុស្សពេញវ័យ។ គាត់ត្រូវបានចោទប្រកាន់ និងដាក់ពន្ធនាគារកាលពីថ្ងៃអង្គារ។ពេលទាក់ទងកាលពីម្សិលមិញ សាមណេរមួយអង្គព្រះជន្ម ១៧វស្សាដែលស្ថិតនៅក្នុងចំណោមជនរងគ្រោះ បានមានសង្ឃដីកាថា ព្រះអង្គ និងព្រះសង្ឃប្រាំបួនអង្គទៀតបាននិមន្តទៅមន្ទីរពេទ្យបង្អែកខេត្តដើម្បីធ្វើតេស្តឈាមដែលបានបញ្ជាក់ថា ពួកគាត់មិនឆ្លងជំងឺអ្វីឡើយ។
សាមណេរដដែលក៏បានលើកឡើងដែរថា សាមណេររងគ្រោះមួយចំនួនដែលគង់នៅវត្តរតនៈមនី នៅឡើយ កំពុងពិចារណាចាកចេញពីវត្តនេះ។ ព្រះអង្គបន្តថា ”ពួកអាត្មាខ្លះចង់រើចេញទៅវត្តថ្មី ពីព្រោះនៅទីនោះនៅតែមានបញ្ហា។ លោកមួយអង្គនៅទីនោះដូចជើងកាងអញ្ចឹង ហើយវ៉ៃពួកអាត្មាជាញឹកញាប់” ប៉ុន្តែបានបដិសេធមិនបញ្ចេញព្រះនាមព្រះសង្ឃដែលប្រើហិង្សាអង្គនោះឡើយ។
ទាក់ទិនករណីនេះ មន្ត្រីសង្ឃបានព្យាយាមទាញហេតុផលថា ទង្វើរបស់អន្ទិត វង្ស ចែត ដែលអាចចាត់ទុកថាជាសកម្មភាពខុសប្រក្រតីនោះ មិនពាក់ព័ន្ធនឹងបព្វជិតទូទៅឡើយ៕ សុខុម