យោងតាមនគរបាលបានឲ្យដឹងថា ទាហាន ម្នាក់កំពុងរត់គេចខ្លួន បន្ទាប់ពីសម្លាប់មិត្តស្រីជាយូរមកហើយរបស់ខ្លួនកាលពីយប់ថ្ងៃសុក្រ ហើយបានដុតសាកសពរបស់នាងនៅក្នុងពាងទឹក បន្ទាប់មកបានរត់គេចខ្លួន ក្រោយពេលប្រាប់ករណីនេះដល់បងប្អូនប្រុសរបស់ខ្លួនដែលស្មានថា ជននេះគ្រាន់តែនិយាយលេងនោះ។
លោក នួន សានិត នាយរងការិយាល័យនគរបាលព្រហ្មទណ្ឌកម្រិតធ្ងន់រាជធានី បានឲ្យដឹងថា ឈ្មោះ សុង ទូច អាយុ៤៨ឆ្នាំជាទាហានកងយោធពលខេមរភូមិន្ទដែលរស់នៅក្នុងខណ្ឌសែនសុខ រាជធានីភ្នំពេញ បានរត់គេចខ្លួនបន្ទាប់ពីបានសម្លាប់មិត្តស្រីឈ្មោះ ទឹម សោភា អាយុ៣៤ឆ្នាំ។
លោកបានមានប្រសាសន៍ថា “យើងដឹងអំពីករណីនេះនៅម៉ោង៩ និង៣០នាទីព្រឹកមិញ បន្ទាប់ពីអ្នកភូមិបានឃើញសាច់ និងឆ្អឹងមនុស្សនៅក្នុងពាងទឹកមួយនៅមុខផ្ទះជួលរបស់ជនរងគ្រោះ ហើយបានរាយការណ៍ទៅនគរបាលមូលដ្ឋាន”។
លោកបានបន្ថែមថា “អ្នកជិតខាងបានឃើញជនសង្ស័យកំពុងដុតអ្វីមួយនៅក្នុងពាងទឹកនៅខាងមុខផ្ទះ ប៉ុន្តែ ពួកគាត់គិតថា ជននេះកំពុងដុតសំរាម ព្រោះគ្រួសាររបស់ជននេះតែងតែធ្វើដូច្នេះ”។
លោក នួន សានិត បានលើកឡើងទៀតថា អ្នកជិតខាងបានឮ សុង ទូច ឈ្លោះប្រកែកគ្នាយ៉ាងខ្លាំងជាមួយមិត្តស្រីដែលជាអ្នកគួកជេដី នៅយប់ថ្ងៃកើតហេតុ។
លោកបានលើកឡើងថា “នៅយប់ថ្ងៃសុក្រ ពួកគាត់បានឮប្តីប្រពន្ធទាំងពីរនេះស្រែក ប៉ុន្តែ មិនចាប់អារម្មណ៍នោះទេ។ លុះដល់ព្រឹកព្រលឹមថ្ងៃសៅរ៍ សាក្សីបានឃើញជនសង្ស័យជិះម៉ូតូយ៉ាងលឿនចេញពីផ្ទះ”។ ប្តីប្រពន្ធទាំងពីរនាក់នេះបានរស់នៅជាមួយគ្នាជាយូរមកហើយ ប៉ុន្តែ មិនបានរៀបការនោះទេ។ លោកបានលើកឡើងទៀតថា ”ប្តីប្រពន្ធទាំងពីរនាក់នេះមិនទាន់រៀបការទេ ប៉ុន្តែ តែងតែមានការឈ្មោះប្រកែកគ្នាដ៏ហិង្សា”។
លោក អេង សោភា នាយការិយាល័យនគរបាលព្រហ្មទណ្ឌកម្រិតស្រាលរាជធានីបានបន្ថែមថា សុង ទូច បានប្រាប់បងប្អូនប្រុសរបស់ខ្លួនពីអ្វីដែលខ្លួនបានធ្វើ មុនពេលរត់គេចកាលពីថ្ងៃសៅរ៍ ប៉ុន្តែ បងប្អូនរបស់ជននេះស្មានថា ជននេះគ្រាន់តែនិយាយលេង បន្ទាប់ពីមានការឈ្លោះប្រកែកគ្នា។
លោកបានមានប្រសាសន៍ថា “ជននេះបានប្រាប់បងប្អូនប្រុសរបស់ខ្លួនមុនពេលចាកចេញពីផ្ទះថា ខ្លួនបានសម្លាប់ប្រពន្ធដោយ ចៃដន្យ។ មកទល់នឹងពេលនេះយើងចាប់ខ្លួនជននេះមិនទាន់បាននៅឡើយទេ។យើង កំពុងស្វះស្វែងតាមចាប់ជននេះ”៕ ស៊ុយឈាង