នគរបាលបាននិយាយកាលពីម្សិលមិញថា ទាហានកងយោធពលខេមរភូមិន្ទម្នាក់ត្រូវបានបាញ់ចំក្បាលកាលពីយប់ថ្ងៃសៅរ៍ ខណៈពេលកំពុងដេកលង់លក់នៅក្នុងផ្ទះដែលគាត់រស់នៅជាមួយប្រពន្ធ និងកូនបួននាក់ក្នុងខេត្តបាត់ដំបង។
លោក ចិត្រ វណ្ណី ស្នងការរងនគរបាលខេត្តបានមានប្រសាសន៍កាលពីម្សិលមិញថា លោក លី ជនឈុន អាយុ៤៧ឆ្នាំជាពលបាលនៅកងវរសេនាតូចលេខ៥៣នៃកងយោធពលខេមរភូមិន្ទឈរជើងនៅក្នុងឃុំបួរ ស្រុកភ្នំព្រឹក បានស្លាប់ដោយត្រូវគ្រាប់កាំភ្លើងមួយគ្រាប់ចំក្បាល។
លោកបានថ្លែងថា “ជនរងគ្រោះជាទាហាន រូបនេះត្រូវគ្រាប់ត្រង់ផ្នែកខាងស្ដាំនៃក្បាល ហើយធ្លាយក្រោមត្រចៀកឆ្វេង បណ្ដាលឲ្យស្លាប់ភ្លាមៗ”។ លោកបានបន្ថែមថា អំពើមនុស្សឃាតនេះបានកើតឡើងនៅម៉ោង៦និង៤០នាទីល្ងាច ហើយថា នគរបាលបានទទួលដំណឹងនេះពីក្រុមគ្រួសាររបស់គាត់។
លោក សុង សុភ័ក្ត្រ អធិការនគរបាលស្រុកបានមានប្រសាសន៍ថា នគរបាលកំពុងស្វែងរកខ្មាន់កាំភ្លើង ហើយបានកំណត់ថា ជននេះបានប្រើកំាភ្លើងខ្លី កា-៥៤ ក្នុងការបាញ់សម្លាប់នេះ។
លោកបានថ្លែងថា “អង្គភាពស៊ើបអង្កេតរបស់យើងកំពុងធ្វើការស៊ើបអង្កេត ប៉ុន្តែមិនទាន់កំណត់បានអត្តសញ្ញាណខ្មាន់កាំភ្លើងនៅឡើយទេ”។ លោកបានបន្ថែមថា នគរបាលមិន ទាន់មានតម្រុយថាតើមូលហេតុអ្វីបណ្ដាលឲ្យមានការបាញ់សម្លាប់នេះឡើយ៕ សារុន