29 C
Phnom Penh

អ្នក​សម្រុះ​​សម្រួល​​របស់​គណបក្ស​​កាន់​អំណាច​​កំពុង​​​សម្រុះ​សម្រួល​​​ឲ្យ​​​លោក សម រង្ស៊ី វិល​ចូល​ស្រុក​វិញ​

ដោយ ឌឹ ខេមបូឌា ដេលី

បទវិភាគ

យោង​តាម​​​អ្នក​ដែល​ជាប់​ ពាក់​ព័ន្ធ​នៅ​ក្នុង​ការ​ពិភាក្សា​ឲ្យដឹងថា លោក សយ សុភាព ​ជា​អ្នក​អត្ថាធិប្បាយ​ព័ត៌មាន​ដ៏ល្បីល្បាញ​ និង​ជា​អ្នក​សម្រុះ​សម្រួ​ល​ ជាយូរ​មក​ហើយ​សម្រាប់​លោក​នាយក​រដ្ឋ​​​មន្ត្រី​ ហ៊ុន សែន ​កំពុង​​សម្រុះ​សម្រួល​ឲ្យ​មាន​ដំណោះ​ស្រាយ​ដែល​អាច​អនុញ្ញាត​​ឲ្យ​លោក ​​​សម រង្ស៊ី ប្រធាន​គណបក្ស​ប្រឆាំង​​វិល​ត្រឡប់មក​ប្រទេស​វិញ​​ដោយ​មិន​ប្រឈម​ការ​ចាប់​ខ្លួន។

កាលពី​ថ្ងៃ​សុក្រ ​លោក ហោ ណាំហុង រដ្ឋ​​​មន្ត្រី​ក្រសួងការ​បរទេស​បាន​ស្នើ​ឲ្យ​​​អនុវត្ត​​​​សាល​ក្រម​តុលាការ​​​កាលពី​ឆ្នាំ​២០១១​ ដែល​កាត់ទោស​ឲ្យ​លោក សម រង្ស៊ី ​ជាប់​ពន្ធនាគារ​រយៈ​​ពេល​​២ឆ្នាំ ​ចំពោះ​ការ​អះ​​​អាង​ថា ​រដ្ឋមន្ត្រី​រូប​នេះ​​​គឺ​ជា​អ្នក​ចូល​ដៃជើង​របស់​ខ្មែរ​ក្រហម​ ទោះ​បី​ជា​​ការ​ផ្ដន្ទាទោស​នេះ​​​ត្រូវ​​មជ្ឈដ្ឋាន​ទូទៅ​​យល់​ថា ត្រូវ​បាន​លើក​​​​លែង​ទោស​កាលពី​ឆ្នាំ​២០១៣​ ក្ដី។

លោក សម រង្ស៊ី បាន​សន្យា​​​វិល​​ត្រឡប់​​ពី​ទីក្រុង​សេអ៊ូល​​មក​កាន់​រាជធានី​​ភ្នំពេញ​វិញ​នៅ​យប់​ថ្ងៃ​ច័ន្ទ ប៉ុន្តែ​បាន​ប្ដូរ​ចិត្ត​​នៅ​ប៉ុន្មាន​ម៉ោង​មុន​ការ​ចេញ​ដំណើរ​​តាម​ការ​គ្រោង​ទុក​របស់​លោក ក្រោយ​ពី​​ក្រុម​តំណាង​រាស្ត្រ​​របស់​​គណបក្ស​ប្រជាជន​​កម្ពុជា​​បោះ​ឆ្នោត​ដក​អភ័យ​ឯកសិទ្ធិ​​តំណាង​រាស្ត្រ​​របស់លោក​ដែល​ការ​ពារ​លោក​ពី​ការ​ផ្ដន្ទាទោស​។

លោក​ សម រង្ស៊ី បាន​ថ្លែង​តាម​ទូរស័ព្ទ​កាល​ពី​ម្សិលមិញ​ថា ​លោក​តែង​តែ​យល់​ថា ការ​ព្រះរាជទាន​លើក​លែង​ទោស​​​ដល់​​លោក​​​​ កាលពី​ឆ្នាំ​២០១៣ ដែល​បាន​អនុញ្ញាត​ឲ្យ​លោក​វិល​ត្រឡប់​​មក​កាន់​ប្រទេស​កម្ពុជា​វិញ​ ដោយ​សេរី និង​ដោយ​គ្មាន​ការ​ប្រឈម​ការ​ផ្ដន្ទាទោស​​បទ​ព្រហ្មទណ្ឌ​មួយ​ចំនួន​នោះ ក៏​បាន​រាប់​បញ្ចូល​​សាល​ក្រមឆ្នាំ​២០១១​​ នៅ​ក្នុង​សំណុំ​រឿង​បរិហារ​កេរ្តិ៍​របស់​លោក ហោ ណាំហុង ដែរ​​​។

លោក​បាន​មាន​ប្រសាសន៍​ថា “​ជា​ការពិត​។ ​​​នៅ​ពេល​ខ្ញុំ​សម្រេច​ចិត្ត​​វិល​​ត្រឡប់​​មក​កម្ពុជា​វិញ​នៅ​ខែ​កក្កដា ឆ្នាំ​២០១៣ ខ្ញុំ​បាន​ប្រាប់អ្នក​គ្រប់​គ្នា​​​រួម​​​ទាំង​​មនុស្ស​​របស់​គណបក្ស​ប្រជា​​​ជន​កម្ពុជា​​ផង​ថា ខ្ញុំ​បាន​​សម្រេច​ចិត្ត​ហើយ​ មិន​ ថា មាន​ការ​ព្រះរាជទានលើក​លែង​ទោស​ដែល​ខ្ញុំ​មិន​ទាន់​មាន​ឬ​ក៏អត់នោះ​ទេ ពីព្រោះ​ការ​បោះ​ឆ្នោត​​គឺ​ជា​ពេល​ល្អ​ដែល​ត្រូវ​​ត្រឡប់​ មក​វិញ។ គេ​បាន​ប្រាប់​ឲ្យ​ខ្ញុំ​រង់ចាំ​ ពីព្រោះ​ពួកគេ​​កំពុង​​ត្រៀមរៀបចំ​ការ​លើក​លែង​ទោស​របស់​ខ្ញុំ​ ហើយ​មិន​ចង់​បាក់​មុខ​”។ លោក​ បានពន្យល់​ថា អ្នក​ទំនាក់​ទំនង​របស់​លោកគឺ​ជា “​មនុស្ស​ម្នាក់​ដែល​​ជិត​ស្និទ​នឹង​គណបក្ស​ប្រជាជន​កម្ពុជា​ និង​រដ្ឋាភិបាល​​ដែល​គ្រប់​​​គ្រង​ក្រុម​ហ៊ុន​សារព័ត៌មាន​មួយ​ចំនួន​”។

នៅ​ពេល​សាក​សួរ​ថា តើ​​ម្នាក់​នោះ​គឺ​​​លោក ​​​សយ សុភាព ​ដែល​ជា​ម្ចាស់​សារព័ត៌​​​មាន​ដើម​អម្ពិល និង​មានភាគហ៊ុន​ក្នុង​ ហ្វ្រេស ញូស៍ (Fresh News) និង​ជា​​អ្នក​សម្រុះ​សម្រួល​ដ៏ល្បី​ល្បាញ​របស់​គណបក្ស​ប្រជាជន​កម្ពុជា​ឬ​យ៉ាង​ណា​នោះ លោក សម រង្ស៊ី បាន​ឆ្លើយ​ថា លោក​​​​ ជឿ​ថា ជា​លោក សយ សុភាព។ ​​​​​​​​​

លោក​បាន​គូស​បញ្ជាក់​ថា ​”​ខ្ញុំ​គិត​ថា​ គឺ​ជា​គាត់​។ គាត់​បាន​ប្រាប់​ខ្ញុំ​ថា ‘ ខ្ញុំ​អាច​ធានា​អះ​​​អាង​​​​​ ចំពោះ​ឯក​ឧត្ដម​ថា អ្វី​ៗ​នឹង​ត្រូវ​បាន​រៀបចំ​​​’។ លើក​នេះ​​ខ្ញុំ​ក៏​បាន​ឮ​ដែរ​ពាក់​ព័ន្ធ​នឹង​រឿង​នេះ​ ប៉ុន្តែ​ខ្ញុំ​មិន​អាច​បង្ខំ​បាន​ទេ​។ ខ្ញុំ​ត្រូវ​រង់ចាំ​​ឲ្យ​អ្វី​ៗ​ កើត​ឡើង​សិន​”។

ចំណែក​ឯ​លោក សយ សុភាព ​បាន​បញ្ជាក់​ កាល​ពី​ម្សិល​មិញ​ថា កាល​ពី​ថ្ងៃ​ច័ន្ទ​ លោក​បាន​ជួប​ជាមួយ​ “លេខា” ម្នាក់​របស់​លោក​​ សម រង្ស៊ី ប៉ុន្តែ​លោក​​​បាន​បញ្ជាក់​​ថា តួនាទី​របស់​លោក​គឺគ្រាន់​តែ​​ផ្តល់​​យោបល់​​ប៉ុណ្ណោះ។

លោក​​មាន​ប្រសាសន៍​ថា “កាល​ពី​ម្សិល​មិញ ​ខ្ញុំ​ និង​លេខា​ម្នាក់​មក​ពី​ខាង​លោក សម រង្ស៊ី បាន​ជួប​ពិភាក្សា​គ្នា​ជា​លក្ខណៈ​ក្រៅ​ផ្លូវ​ការ។ យើង​បាន​មើល​ឃើញ​ស្ថាន​ភាព​​​យ៉ាង​ម៉េច ហើយ​យើង​​ក៏​ផ្តល់​គំនិត​​​យោបល់​​ដល់​គាត់ ប្រសិន​បើ​គាត់​ចង់​ស្តាប់។ខ្ញុំ​គ្រាន់​តែ​ផ្ដល់​គំនិត​យោបល់​​​ក្នុងនាម​ជាមិត្ត​​ និង​ជា​បុគ្គល​ម្នាក់​​ប៉ុណ្ណោះ មិនមែនក្នុង​នាម​ជា​អ្នក​សម្រុះ​សម្រួល​ទេ។ រវាង​អ្នក​ និង​ខ្ញុំ​ ខ្ញុំ​គ្រាន់​តែ​និយាយ​ធម្មតា​ថា ប្រសិន​បើ​គាត់​​​អាច​ថយ​មួយ​ជំហាន​​វា​ជា​ការ​ល្អ​ ពីព្រោះ​យើង​សុទ្ធ​តែ​ចាស់​ទុំ​ ហើយ​យើង​គួរ​តែ​និយាយ​​គ្នា​”។

​លោក​បាន​លើក​ឡើង​ថា ការ​ជជែក​គ្នា​នេះ​ធ្វើ​ឡើង​អំឡុង​ពេល​ទទួល​ទាន​កាហ្វេ ហើយ​លោក​សង្ឃឹម​ថា ​វា​នឹង​ឈាន​ទៅ​រក​ដំណោះ​ស្រាយ​​មួយ​ដែល​ស្រដៀង​គ្នា​ទៅ​នឹង​ពីរ​លើក​ចុង​ក្រោយ​ដែល​លោក សម រង្ស៊ី ត្រូវ​បាន​លើក​លែង​ទោស​ និង​អនុញ្ញាត​ឲ្យ​វិល​ត្រឡប់​ចូល​ស្រុក​វិញ​ដោយ​សេរី។

លោក​បាន​បន្ត​ថា “​នៅ​ក្នុង​ឆ្នាំ​២០០៦ និង​​​​ ឆ្នាំ​២០១៣ លោក សម រង្ស៊ី ពឹង​ផ្នែក​លើ​ការ​​ផ្ញើលិខិត​​។ យើង​គ្រាន់​តែ​ធ្វើ​រឿងនោះ​ជួស​មុខ​ឲ្យ​ប្រជាពលរដ្ឋ​កម្ពុជា​ និង​អ្នក​កាសែត​ដើម្បី​ជួយ​គ្នា​ប៉ុណ្ណោះ​។ ខ្ញុំ​គ្រាន់​តែ​ជួយ​តាម​រយៈការ​​ផ្ញើ​សារ​ប៉ុណ្ណោះ​”។

សូម​រំឭក​ថា កាលពី​ឆ្នាំ២០០៦ លោក ហ៊ុន ​​​សែន បាន​​ចេញ​លិខិត​មួយ​ច្បាប់​ថ្លែង​អំណរ​គុណ​លោក សយ សុភាព ចំពោះ​ការ​ជួយ​រដ្ឋា​​​ភិ​​​បាល​ដោះ​ស្រាយ​ករណី​ពាក់​ព័ន្ធ​លោក និង​ឥស្សរជន​ ព្រម​ទាំង​សកម្មជនផ្សេង​ទៀត​របស់​គណបក្ស​ប្រឆាំង​ផង​ដែរ​ ដោយ​សរសេរ​​​ ថា ការ​ងារ​របស់​លោក​​ត្រូវបាន​ធ្វើ​ឡើង​ក្នុង​ “បរិយាកាស​​ជា​គ្រួសារ​តែ​មួយ​”។

លោក សយ សុភាព​ បាន​គូស​បញ្ជាក់​កាល​ពី​ម្សិល​មិញ​​ថា ​ការ​​ចរចា​ដែល​បាន​ឈាន​ទៅ​ដល់​ការ​លើក​លែង​ទោស​លោក សម រង្ស៊ី ​កាល​ពី​ឆ្នាំ​២០១៣ បាន​​ចាប់​ផ្តើម​​តាំង​ពី​ខែ​មករា ឆ្នាំ​២០១១ម៉្លេះ​។​ត្រឡប់​ទៅ​ពេល​​មុន​នោះ​ក្នុង​ឆ្នាំ​២០០៦ លោក សម រង្ស៊ី​ បាន​​​សរសេរ​លិខិត​មួយ​ច្បាប់​​​ទៅ​លោក​ ហ៊ុន សែន ដើម្បី​សូម​ទោស​​ចំពោះ​​ការ​ចោទ​​​ប្រកាន់​លោក​​​ថា​ជា​​អ្នក​​រៀប​ចំការ​គប់​គ្រាប់​បែក​នៅ​​ក្នុង​​ឆ្នាំ​១៩៩៧​ទៅ​លើ​​​ពិធី​ជួបជុំ​មួយ​របស់​លោក​ក្នុង​រាជ​ធានី​ភ្នំ​ពេញ​ ដែល​បាន​សម្លាប់​​​អ្នក​គាំទ្រ​របស់​លោក​​​​ចំនួន១៦ នាក់ ​និង​​របួស​ជាង ១៥០ នាក់​ផ្សេងទៀត។

ក្រោយ​​លោក សម រង្ស៊ី សម្រេច​ចិត្ត​​​​មិន​វិល​​​ត្រឡប់​ពី​ទីក្រុង​សេអ៊ូលវិញ​ កាល​ពី​យប់​ថ្ងៃ​ច័ន្ទ លោក សុខ ឥសាន អ្នក​នាំ​ពាក្យ​​គណ​បក្ស​ប្រជា​ជន​កម្ពុជា ​បាន​មាន​ប្រសាសន៍​ថា ការ​ចរចា​ណាមួយ​​​បែប​នេះ​សម្រាប់​​សេរី​ភាព​របស់​លោក សម រង្ស៊ី ​មិន​អាច​​កើត​ឡើង​​​ឡើយ​នៅ​ពេល​​នេះ រហូត​ទាល់​តែ​ប្រធាន​គណ​​​​បក្ស​ប្រឆាំង​រូប​នេះ​​ជាប់​​ពន្ធ​នាគារ​សិន។

កាល​ពី​ម្សិល​មិញ អ្នក​នាំ​ពាក្យ​រូប​នេះ​បាន​​​​ទទួល​ស្គាល់​ថា ​កន្លង​មក លោក​ សយ សុភាព ​ពិត​ជា​​បាន​ជួយ​​គណបក្ស​កាន់​អំណាច​​ដោះ​​​ស្រាយ​ស្ថាន​ភាព​តាន​តឹង​ខាង​នយោបាយ​មែន ប៉ុន្តែ​បាន​​បញ្ជាក់​ថា វិធី​នោះ​​មិន​អាច​ជួយ​​​​ប្រធាន​គណបក្ស​ប្រឆាំង​រូប​នេះ​បាន​ឡើយ​លើក​​នេះ។

​លោក​បាន​​បន្ត​ថា “គណបក្ស​ប្រជាជន ​មិន​ដែល​​ពឹង​​ឲ្យ​លោក សយ​ សុភាព សម្រុះ​សម្រួល​នៅ​ក្នុង​នយោបាយ​​ទេ ​ប៉ុន្តែ​​មាន​បក្សផ្សេងទៀត​​ដែល​​បាន​ស្នើ​ឲ្យ​លោក សយ សុភាព ធ្វើ​សំណើ​​ទៅ​គណ​បក្ស​ប្រជា​ជន​កាល​ពី​ឆ្នាំ​២០០៨”។

អ្នក​​នាំ​ពាក្យ​រូប​នេះ​​បាន​ថ្លែង​ទៀត​ថា ដោយ​​សារ​តែ​លោក ហ៊ុន សែន ធ្លាប់​បាន​ស្នើ​សុំ​ឲ្យ​ព្រះ​មហា​ក្សត្រ នរោត្តម សីហមុនី ​ព្រះ​រាជ​ទាន​លើក​លែង​ទោស​​ដល់​លោក សម រង្ស៊ី ចំនួន​ពីរ​លើក​រួច​មក​ហើយ និង​បាន​ព្រមាន​ថា លោក​នឹង​មិន​​​ធ្វើ​បែប​នេះ​ម្តង​ទៀត​​​​នោះ​ ប្រធាន​គណ​បក្ស​​សង្គ្រោះ​ជាតិ​រូប​​​​នេះ​​នឹង​ចៀស​មិន​ផុត​ពី​​ការ​ជាប់​ពន្ធ​នាគារ​ឡើយ ប្រសិន​បើ​លោក​វិល​ចូល​ស្រុក​វិញ។

លោក​បាន​បន្ត​ថា “​សម្តេច​បាន​លើក​លែង​ ទោស​លោក សម រង្ស៊ី ពីរ​លើករួច​មក​ហើយ ហើយ​​នឹង​គ្មាន​លើក​ទី​៣ឡើយ​។ ​ប្រសិន​បើ​​មាន ​ការ​សម្រុះ​​សម្រួល វា​នឹង​ជាន់​គ្នា​​ជា​មួយ​នឹង​ច្បាប់។ គាត់​ល្មើស​ច្បាប់​ម្តង​ហើយ​ម្តង​ទៀត ដូច្នេះ​គាត់​នឹង​ត្រូវ​ទទួល​ការ​ផ្តន្ទា​ទោស”។

លោក សម រង្ស៊ី ​បាន​សន្យា​វិល​ត្រឡប់​​​មក​​កាន់​ប្រទេស​កម្ពុជាវិញ​​ កាល​ពី​​យប់​ថ្ងៃ​ច័ន្ទ​ដើម្បី​ប្រឈម​​ការ​ជាប់​ពន្ធ​នា​គារ​ ប៉ុន្តែ​បាន​មាន​ប្រសាសន៍​ថា លោក​​​បាន​កែ​ប្រែ​គម្រោង​ វិញ​ បន្ទាប់​ពី​​លោក អេង ឆៃអ៊ាង តំណាង​​​

គណ​បក្ស​សង្គ្រោះ​ជាតិ​​​​ បាន​​ផ្តល់​​យោបល់​ឲ្យ​លោក​​​​ពន្យារ​ពេល​ត្រឡប់​ចូល​ស្រុក​វិញ​​ពីរ​បី​ថ្ងៃ ដើម្បី​គេច​​ពី​ផែន​ការ​របស់​គណ​បក្ស​ប្រជា​​​ ជន​បង្ក​បញ្ហា​ក្រោម​ភាព​ងងឹត​​នៃ​ពេល​យប់។​​​​​​​​​​​​​​​​​​​​

យោង​តាម​លោក សម រង្ស៊ី បាន​ឲ្យ​ដឹង​ថា ​​អំពើ​ហិង្សា​​ដែល​ស្រដៀង​គ្នា​​ទៅ​នឹង​ការ​វាយ​​​​តំណាង​រាស្ត្រ​គណបក្ស​​សង្គ្រោះ​ជាតិ​ពីរ​រូប​ដោយ​​​ក្រុម​អ្នក​គាំទ្រ​គណ​បក្ស​ប្រជាជន​​កម្ពុជា នៅ​ខាង​ក្រៅ​​រដ្ឋ​​សភា​កាល​ពី​ខែ​មុន ​ប្រហែល​ជា​​ឈាន​ទៅ​រក​​​ភាព​តាន​តឹង​កាន់​តែ​ខ្លាំង​​ដែល​ធ្វើ​​ឲ្យ​លោក​ ហ៊ុន សែន ​ពន្យារ​ពេល​​ធ្វើ​កំណែ​ទម្រង់​​​បោះ​ឆ្នោត​​ ឬ​សូម្បី​​​ការ​បោះ​ឆ្នោត​​ជ្រើស​តាំង​តំណាងរាស្ត្រ​ឆ្នាំ​២០១៨​ទៀត​ផង។

អត្ថ​បទ​មួយ​ដែល​ចុះ​ផ្សាយ​​​ក្នុង​​កាសែត​រស្មី​កម្ពុជា កាល​ពី​ម្សិល​មិញ បាន​លើក​​ឡើង​ពី​ប្រភព​អនាមិក​មួយ​​ជិត​ស្និទ្ធ​នឹង​​លោក​ សម រង្ស៊ី ដែល​​និយាយ​ថា​ ពេល​នេះ​​លោក​កំពុង​​រៀប​ចំ​គម្រោង​​​វិល​ត្រឡប់​​មក​កាន់​រាជ​ធានី​ភ្នំ​ពេញ​វិញ​​នៅ​ថ្ងៃ​ព្រហស្បតិ៍​ ​ដោយ​ពន្យល់​ថា ​លោក​​នឹង​​​មក​ដល់​តាម​​ជើង​ហោះ​ហើរ​ពី​ទីក្រុង​ប៉ារីស។

ទាក់ទិន​បញ្ហា​នេះ លោក អេង ឆៃអ៊ាង តំណាង​រាស្ត្រ​គណ​បក្ស​សង្គ្រោះ​​ជាតិ​ បាន​មាន​ប្រសាសន៍​​ថា ការ​ចុះ​​ផ្សាយ​នោះ​មិន​មែន​​ ជា​ការ​ពិត​​​ទេ ហើយ​​ថា​គ្មាន​​​គម្រោង​បែប​នេះ​ឡើយ។ លោក​​គូស​បញ្ជាក់​ថា ”គេ​​សរសេរ​ រឿង​ប្រឌិត​។ ខ្ញុំក៏​​​ចេះ​ពី​របៀប​សរសេរ​បែប​​នេះ​ដែរ។ ថ្ងៃ​ស្អែក ថ្នាក់​ដឹក​នាំ​គណ​បក្ស​សង្គ្រោះ​ជាតិ​ នឹង​ប្រជុំ​ពិភាក្សា​អំពី​​ការ​វិល​ត្រឡប់​​របស់​គាត់ ហើយ​ប្រមូល​​រាល់​ព័ត៌​មាន​​ដើម្បី​ផ្ញើ​ទៅ​គាត់​​​សម្រាប់​ឲ្យ​គាត់​សម្រេច​ចិត្ត”។

លោក សម រង្ស៊ី ​ដែល​​កាល​ពី​យប់​ថ្ងៃ​​​ច័ន្ទ​បាន​​បដិសេធ​​​មិន​ធានា​​​​ថា ការ​​​ស្នាក់​នៅ​របស់​លោក​នៅ​បរទេស​នឹង​មិន​​បន្ត​​​រាប់​សប្តាហ៍ ឬ​​រាប់​ខែ​ដូច​ពេល​​​​​​កន្លង​​ទៅ​នោះ ក៏​បាន​​មាន​ប្រសាសន៍​​កាល​ពី​ម្សិល​មិញ​ដែរ​ថា ​គម្រោង​របស់​លោក​​​​កំពុង​រៀប​ចំ​នៅ​ឡើយ​។

លោក​​បាន​មាន​ប្រសាសន៍​ថា ”ខ្ញុំ​​បាន​ប្រាប់​អស់​លោក​ថា ខ្ញុំ​មាន​គម្រោង​​​ត្រឡប់​មក​វិញ ប៉ុន្តែ​​ខ្ញុំមិន​អាច​និយាយ​​ថា​ថ្ងៃ​ណា​ឲ្យ​​ប្រាកដ​បាន​ទេ។ វា​ស្រ័យ​​លើ​ស្ថាន​ភាព​។ ​​ខ្ញុំ​​មាន​រឿង​ផ្សេង​ដែល​​ត្រូវ​រង់​ចាំ​ និង​រឿង​​ជា​ច្រើន​ដែល​ត្រូវ​ដោះ​ស្រាយ។ ​វា​អា​ស្រ័យ​​លើ​ស្ថាន​ការណ៍​វិវឌ្ឍន៍។​ នៅ​ក្នុង​យុទ្ធ​សាស្ត្រ អ្នក​ត្រូវ​​​ពិចារណា​​គ្រប់​ចំណុច​ ហើយ​ពេល​ខ្លះ​​រឿង​ប្រែ​ប្រួល​​ដូច​ជា​​ការ​ដក​អភ័យ​ឯក​សិទ្ធិ​​របស់​ខ្ញុំ​​នៅ​ប៉ុន្មាន​ម៉ោង​មុន​​ពេល​ខ្ញុំ​​វិល​ត្រឡប់​ទៅ​វិញ​ជា​​ដើម។ ខ្ញុំ​​នឹង​ខ្វាក់​ភ្នែក ឬ​ឆ្កួត​លីលា​​ដែល​មិន​ប្រតិ​កម្ម​ទៅ​នឹង​​ចំណុច​ដែល​​បាន​​កែ​ប្រែ​​ស្ថាន​ភាព​ទាំង​មូល។ អភ័យ​ឯក​សិទ្ធិ​​គឺ​ជា​រឿង​សំខាន់។ អ្នក​បាន​សរសេរ​នៅ​ថ្ងៃ​​​នេះ​ថា វា​ជា​​​បញ្ហា​នៃ​ភាព​​គួរ​ឲ្យ​ជឿ​ទុក​ ចិត្ត​ ហើយ​កិត្តិ​យសរបស់​ខ្ញុំ​​កំពុង​​ប្រឈម​ការ​បាត់​បង់។នោះ​ជា​​មូល​​ហេតុ​ដែល​ជា​​បណ្ដោះ ​​អាសន្ន​​ខ្ញុំ​​មិន​អាច​និយាយ​បាន។ ​ប្រសិន​​បើ​​​រឿង​​ លើស​​​ពី​ការ​រំពឹង​ទុក សំខាន់​កើត​ឡើង​ដែល ​ចំណេញ​​ដល់​ខ្ញុំ ​ខ្ញុំ​នឹង​​ត្រឡប់​វិញ​ភ្លាម”៕ សុខុម​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស