មនុស្សប្រាំនាក់រស់នៅផ្ទះរួមគ្នាជាមួយស្ត្រីជនជាតិចិនម្នាក់ដែលត្រូវបានសម្លាប់យ៉ាងសាហាវនៅក្នុងផ្ទះល្វែងរបស់គាត់នៅក្នុងអគារអាផាតមិននៅជាយរាជធានីភ្នំពេញកាលពីថ្ងៃអាទិត្យនោះ កំពុងត្រូវបាននគរបាលឃុំខ្លួននៅឡើយកាលពីយប់មិញ បើទោះជាការកំណត់ផ្លូវច្បាប់សម្រាប់ការឃុំខ្លួនដោយគ្មានការចោទប្រកាន់ហួសរយៈពេលកំណត់ក្នុងករណីនេះក៏ដោយ។
លោក ទូច ផុន អធិការរងនគរបាលខណ្ឌពោធិ៍សែនជ័យកន្លែងដែលអំពើឃាតកម្មបានកើតឡើងបានមានប្រសាសន៍ថា បន្ទាប់ពីលើសរយៈពេលកំណត់៧២ម៉ោងសម្រាប់ការឃុំខ្លួនជនសង្ស័យដោយគ្មានការចោទប្រកាន់ នគរបាលបានព្យាយាមបញ្ជូនក្រុមនេះដែលរួមទាំងស្ត្រីម្នាក់ដែលពួកគេសង្ស័យ ថា ជាពិរុទ្ធជននោះ ទៅសាលាដំបូងរាជធានីភ្នំពេញកាលពីយប់មិញ ប៉ុន្តែយឺតពេលទៅហើយ។
លោកបានថ្លែងថា “យើងបានបញ្ជូនជនសង្ស័យជាជនជាតិចិនទាំងប្រាំនាក់ទៅសាលា ដំបូងរាជធានីភ្នំពេញកាលពីល្ងាចថ្ងៃអង្គារ ពីព្រោះយើងគ្មានសិទ្ធិឃុំខ្លួនពួកគេតទៅទៀត ឡើយ”។ លោកបន្ថែមថា ក្រុមនេះ ត្រូវបានបញ្ជូនទៅអធិការដ្ឋាននគរបាលខណ្ឌ ហើយនឹងត្រូវបញ្ជូនទៅតុលាការនៅព្រឹកនេះ។
លោក ទូច ផុន បាននិយាយថា បន្ទាប់ពីការសាកសួរអ្នកស្នាក់នៅផ្ទះរួមគ្នាទាំងនេះ និងការវិភាគស្នាមរបួស១៨កន្លែងដោយកាំបិតប៉័ងតោត្រង់កររបស់ជនរងគ្រោះមក នគរបាលជឿថា ចិន ហ៊ូយីង (Chen Huaying) អាយុ២៥ឆ្នាំ ត្រូវបានសម្លាប់ដោយស្រីស្នាក់នៅបន្ទប់ជាមួយគ្នា។
ដោយពន្យល់ថា ហេតុផលនេះបានសម្រេច ឲ្យបុរសបីនាក់ដែលរស់នៅក្នុងផ្ទះល្វែងនោះ ប៉ុន្តែក៏កំពុងត្រូវបានឃុំខ្លួនដែរនោះ លោកបានមានប្រសាសន៍ថា “ប្រសិនបើបុរសកាប់ [ជនរងគ្រោះ] គេនឹងមិនកាប់ច្រើនកាំបិតប៉័ងតោដូច្នេះទេ” ។
លោក ទូច ផុន បាននិយាយថា ស្ត្រីម្នាក់ក្នុងចំណោមពីរនាក់សារភាពថា បានលួចកាំបិតចំនួនពីរពីចុងភៅនៅផ្ទះដែលពួកគេស្នាក់នៅ ជាហេតុឲ្យនគរបាលសន្និដ្ឋានថា ស្ត្រីរូបនេះបានប្រព្រឹត្តបទឧក្រិដ្ឋនេះ បើទោះជាគាត់ឆ្លើយបដិសេធម្ដងហើយម្ដងទៀតក៏ដោយ។
លោកបាននិយាយថា “ស្ត្រីរូបនេះបានប្រាប់នគរបាលថា គាត់បានលួចកាំបិតប៉័ងតោ និងកូនកាំបិតពីចុងភៅសម្រាប់ចិតផ្លែឈើ”។លោកបានបន្ថែមថា នគរបាលឃើញថាវាចម្លែកដែលមានគេលួចកាំបិតប៉័ងតោទៅចិតផ្លែឈើនោះ។
លោក ទូច ផុន បានមានប្រសាសន៍ថា នគរបាលជឿថា ចិន ហ៊ូយីង និងអ្នកនៅបន្ទប់ជាមួយគ្នាបានប្រវាយប្រតប់គ្នានៅមុខបន្ទប់ដែលពួកគេស្នាក់នៅរួមគ្នានៅពេលជនសង្ស័យបានចាក់ជនរងគ្រោះត្រូវត្រង់ពោះ ហើយបន្ទាប់មកបានអូសចូលទៅក្នុងបន្ទប់ ទីដែលជនសង្ស័យបានយកកាំបិតប៉័ងតោកាប់ជនរងគ្រោះត្រង់ក។
លោក យឹម សារ៉ាន់ អធិការនគរបាលខណ្ឌពោធិ៍សែនជ័យបានមានប្រសាសន៍ថា ដំណើរការសាកសួរមនុស្សមួយក្រុមនេះជួបការលំបាកត្រង់ភាសា ដោយមានតែស្ថានទូតចិនផ្ដល់អ្នកបកប្រែភាសាប៉ុណ្ណោះកាលពីថ្ងៃពុធ។
លោកបានថ្លែងថា ”វាលំបាកសួរជនសង្ស័យ ទាំងនេះណាស់ ពីព្រោះពួកគេមិនចេះខ្មែរ ហើយយើងក៏មិនចេះចិនដែរ។ យើងចង់ឲ្យស្ថានទូតចូលរួមសាកសួរជាមួយយើង និងបកប្រែភាសាផង ពីព្រោះយើងមិនចង់ឲ្យពួកគេនិយាយថា នគរបាលធ្វើការធ្វេសប្រហែសឡើយ”៕ សារុន