ទោះបីជា រដ្ឋាភិបាលនៅក្នុងសប្តាហ៍នេះបានព្រមព្រៀងចាត់ “វិធានការពាក់ព័ន្ធ” ដើម្បីទម្លាយភាពជាប់គាំងនៅក្នុងសំណុំរឿងដ៏ចម្រូងចម្រាសចំនួនពីរនៅសាលាក្តីខ្មែរក្រហមក៏ដោយ ក៏ក្រុមមន្ត្រីបានបដិសេធមិនរៀបរាប់លម្អិតថា តើនឹងមានពាក់ព័ន្ធវិធានការជាក់លាក់អ្វីខ្លះនោះដែរ។
ការព្រមព្រៀងចាត់”វិធានការ”នេះធ្វើឡើងអំឡុងកិច្ចប្រជុំកាលពីថ្ងៃអង្គារ រវាងលោកឧបនាយករដ្ឋមន្ត្រី សុខ អាន និងលោក ស្ទេហ្វិន ម៉ាសាយអឺស (Stephen Mathias) ជំនួយការអគ្គលេខាធិការអង្គការសហប្រជាជាតិទទួលបន្ទុកកិច្ចការច្បាប់ ដែលអំឡុងពេលនោះ ពួកគាត់ទាំងពីរនេះបានពិភាក្សាពីអ្វីដែលពួកគាត់ចាត់ទុកថាជា “ការខ្វែងគំនិតគ្នា” នៅក្នុងសំណុំរឿងទាំងពីរនេះ។ បុគ្គលិកអង្គការសហប្រជាជាតិនៅសាលាក្តីខ្មែរក្រហមបាននិងកំពុងព្យាយាមអស់រយៈពេលជាច្រើនឆ្នាំមកហើយ ដើម្បីបន្តសំណុំរឿងទាំងពីរនះ ដោយប្រឈមនឹងការរារាំង ឬការធ្វើព្រងើយកន្តើយពីបុគ្គលិកភាគីខាងកម្ពុជានៅសាលាក្តី និងរដ្ឋាភិបាល។
សេចក្តីថ្លែងការណ៍ដែលចេញបន្ទាប់ពីកិច្ចប្រជុំមានខ្លឹមសារដូច្នេះថា “ភាគីទាំងពីរបានពិភាក្សាអំពីការខ្វែងគំនិតគ្នាដែលនៅតែបន្ត ដូចដែលបានបង្ហាញនៅក្នុងការឆ្លើយឆ្លងគ្នាបែបការទូតរវាងរាជរដ្ឋាភិបាលកម្ពុជានិងអង្គការសហប្រជាជាតិ ពាក់ព័ន្ធការអនុវត្តឲ្យបានពេញលេញនូវកាតព្វកិច្ចសហប្រតិបត្តិការដែលបានបង្ហាញនៅក្នុងកិច្ចព្រមព្រៀងរបស់អ.វ.ត.ក. ទាក់ទងសំណុំរឿងទាំងពីរនេះដែលបច្ចុប្បន្នស្ថិតក្រោមការសើុបអង្កេតរបស់សាលាក្តី”។
សេចក្តីថ្លែងការណ៍នេះមានខ្លឹមសារបន្តដូច្នេះថា “ភាគីទាំងពីរបានព្រមព្រៀងលើសារៈសំខាន់នៃដំណោះស្រាយដែលមានការពេញចិត្តទាំងស្រុង និងដែលនឹងឈានដល់ការឯកភាពក្នុងពេលឆាប់ៗតាមដែលអាចធ្វើទៅបាន ដោយស្របទៅនឹងលក្ខខណ្ឌនៃកិច្ចព្រមព្រៀងនេះ ហើយថា រាជរដ្ឋាភិបាលនឹងចាត់វិធានការពាក់ព័ន្ធដើម្បីសម្រេចគោលបំណងដ៏សំខាន់នេះ”។
ទោះជាយ៉ាងណា នៅពេលទាក់ទងកាល ពីពីរថ្ងៃមុន រដ្ឋាភិបាល និងមន្ត្រី អង្គការសហប្រជាជាតិបានបដិសេធមិនផ្តល់ព័ត៌មានលម្អិតឡើយលើអ្វីដែលរដ្ឋាភិបាលនឹងធ្វើដើម្បីជួយស្វែងរកដំណោះស្រាយនោះ។
លោក ឯក ថា អ្នកនាំពាក្យរដ្ឋាភិបាលនៅអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រីបានលើកឡើងថា “ខ្ញុំសូមទោស ខ្ញុំមិនអាចផ្តល់ព័ត៌មានណាមួយឲ្យលើសពីអ្វីដែលមាននៅក្នុងសេចក្តីថ្លែងការណ៍បានឡើយ”។
លោក ដេវីដ សេហ្វហ្វឺ (David Scheffer) អ្នកជំនាញពិសេសរបស់អង្គការសហប្រជាជាតិនៅសាលាក្តី លោក ឡាស អូលសេន (Lars Olsen) អ្នកនាំពាក្យអង្គការសហប្រជាជាតិប្រចាំសាលាក្តីខ្មែរក្រហម និងលោក នេត ភក្ត្រា អ្នកនាំពាក្យភាគីខាងកម្ពុជាសុទ្ធតែបដិសេធមិនធ្វើអត្ថាធិប្បាយបន្ថែមលើសេចក្តីថ្លែងការណ៍រួមនេះ។
សំណុំរឿងដ៏ចម្រូងចម្រាសទំាងពីរនេះគឺសំណុំរឿង០០៣ និង០០៤ បច្ចុប្បន្នកំពុងត្រូវ បានសើុបអង្កេតដោយចៅក្រមសើុបសួររបស់អង្គការសហប្រជាជាតិនៅសាលាក្តីនេះ ប៉ុន្តែ នគរបាលកម្ពុជាបានបដិសេធមិនអនុវត្តដីកាចាប់ខ្លួនជនសង្ស័យ មាស មុត និងអឹុម ចែម ដែលចេញកាលពីឆ្នាំមុនឡើយ ដោយលើកឡើងថា ពួកគេរង់ចាំធ្វើការស្ទាបស្ទង់មតិជាសាធារណៈជាមុនសិន មុនពេលធ្វើការចាប់ខ្លួនណាមួយ។
លោក ម៉ៅ ចាន់ដារ៉ា ប្រធានផ្នែកសន្តិសុខនៅសាលាក្តីនេះ និងឧត្តមសេនីយ៍មួយរូបនៅក្នុងជួរនគរបាលជាតិកម្ពុជាបានលើកឡើងកាលពីម្សិលមិញថា របាយការណ៍នៃការស្ទាបស្ទង់មតិនេះនៅមិនទាន់បញ្ចប់នៅឡើយទេ ហើយលោកក៏មិនដឹងថា វានឹងចប់នៅពេលណាដែរ។
លោកបានមានប្រសាសន៍ថា “ខ្ញុំនៅមិនទាន់ទទួលបានរបាយការណ៍ណាមួយទេ ប្រហែលពួកគេនៅមិនទាន់បញ្ចប់នៅឡើយទេ។ ប្រសិនបើពួកគេបញ្ចប់ ពួកគេនឹងបញ្ជូនរបាយការណ៍នេះមកឲ្យខ្ញុំហើយ”៕ ស៊ុយឈាង (រាយការណ៍បន្ថែមដោយ ឃួន ណារីម)