31 C
Phnom Penh

សំបុត្រ​​​បញ្ជាក់​​​កំណើត​​​ក្លែង​​​ក្លាយ​​​ធ្វើ​​​ឲ្យ​​​នគ​​​របាល​​​បើក​​​ការ​​​សើុប​​អង្កេត​​​

ដោយ ឌឹ ខេមបូឌា ដេលី

បទវិភាគ

ក្រុម​​​មន្ត្រី​​​បាន​​​លើក​​​ឡើង​​​កាល​​ពី​​​ម្សិល​​​មិញ​​​ថា ក្រសួង​​​មហាផ្ទៃ​​​កំពុង​​តាម​​​ស្វែង​​​រក​​​បុរស​​​ម្នាក់​​​ដែល​​​បាន​​​បង្ហោះ​​​សំបុត្រ​​​បញ្ជាក់​​​​​​កំណើត​​​ក្លែង​​​ក្លាយ​​​នៅ​​​លើ​​​ហ្វេសប៊ុក​​​ ដែល​​​សរសេរថា​​​​ទី​​​កន្លែង​​​កំណើត​​​របស់​​​បុរស​រូប​​​នេះស្ថិត​ក្នុង​ខេត្ត​​​តាកែវ​​​ ប្រទេស​​​វៀត​​​ណាម ​​​​ដោយ​​​សារហេតុ​​​ផលថា ​​​ជន​​​សង្ស័យ​​​មាន​​​ “បំណង​​​បំពុល​​​បរិយាកាស​​​”។

សំបុត្រ​​​បញ្ជាក់​​​កំណើត​​​សម្រាប់​​​ ឈ្មោះ ​​​ស៊ុត គង់ ត្រូវ​​​បាន​​​បង្ហោះ​​​នៅ​​​លើ​​​ទំព័រ​​​ហ្វេស​​​បុក​​​ដែល​​​មាន​​​ឈ្មោះ​​​ ស៊ុត​ គង់​នេះ​​​ កាល​​​ពី​​​ថ្ងៃ​​​ពុធ ហើយ​​​​​​ត្រូវ​​​បាន​​​គេ​​​ចែក​​​រំលែក​​​យ៉ាង​​​ព្រោង​​​ ​​​ព្រាត​​​។ សំបុត្រ​​​បញ្ជាក់​​​កំណើត​​​នេះ​​​សរសេរ​​​ថា​​​ បុរស​​​រូប​​​នេះ​​​កើត​​​នៅ​​​ថ្ងៃ​​​ទី​​​១៣​​​ ខែ​​​កុម្ភៈ​​​ ឆ្នាំ​​​១៩៨៧​​​ ក្នុង​​​ភូមិ​​​តាឡឹង​​​​ ឃុំ​​​ភ្នំដិន​​​ ស្រុក​​​គិរីវង់​​​ ​​​ខេត្ត​​​តាកែវ (ប្រទេស​​​វៀតណាម​​​)។

លោក ម៉ៅ ចាន់​​​តារា អគ្គ​​​នាយក​នៃអគ្គ​​​នា​​​យក​ដ្ឋាន​​​អត្តសញ្ញាណ​​​កម្ម​​​ ​​​ក្រសួង​​​មហាផ្ទៃ​​​ បាន​​​មាន​​​ប្រសាសន៍​​​ថា “ប្រជា​​​ពល​​​រដ្ឋ​​​គ្រប់​​​គ្នា​​​ដឹង​​​យ៉ាង​​​ច្បាស់​​​ថា ខេត្ត​​​តាកែវ​​​គឺ​​​ស្ថិត​​​នៅក្នុង​​​ប្រទេស​​​កម្ពុជា​​​។ យើង​​​កំពុង​​​តែ​​​សហការ​​​   ជា​​​មួយ​​​អគ្គស្នង​​​ការ​​​ដ្ឋាន​​​នគរ​​​បាល​​​ជាតិ​​​ដើម្បី​​​ស្រាវ​​​ជ្រាវ​​​គណនី​​​ហ្វេសប៊ុក​​​នេះ”។

នៅ​​​ពេល​​​ត្រូវ​​​បាន​​​សាក​​​សួរ​​​​​​​​​ថា​​​ តើ​​​ហេតុ​​​អ្វី​​​បាន​​​ជា​​​ក្រសួង​​​មហាផ្ទៃ​​​ចំណាយ​​​​​​​ធនធាន​​​ដើម្បី​​​ស្រាវ​​​ជ្រាវ​​​ការ​​​បង្ហោះ​​​តាម​​​ហ្វេស​​​ប៊ុក​​​ដែល​ទំនង​ជា​មិន​ធ្វើ​ឲ្យប៉ះពាល់ដល់​នរណា ម្នាក់​នេះ​​​ លោក​​​បាន​​​មាន​​​ប្រសាសន៍​​​ថា “​គេ​​​មាន​​​បំណង​​​បំពុល​​​បរិយាកាស​​​”។

នៅ​​​ក្នុង​​​សេចក្តី​​​ថ្លែង​​​ការណ៍​​​មួយ​​​ អគ្គ​​​នាយក​​​ដ្ឋាន​​​អត្ត​​​សញ្ញាណ​​​កម្ម​​​​​​បាន​​​​​​លើក​​​ឡើង​​​ថា ជន​​​ល្មើស​​​នឹង​​​ត្រូ​​​វដាក់​​​ទោស​​​ទណ្ឌ​​​តាម​​​ច្បាប់​​​ ប៉ុន្តែ ឧត្តម​​​សេនីយ៍​​​ ម៉ៅ ចាន់​​​តារា បាន​​​បដិសេធ​​​មិន​​​និយាយ​​​ថា តើ​​​ច្បាប់​​​អ្វីដែល​​​ជន​​​នេះ​​​បាន​​​បំពាន​​​នោះ​​​​​​ឡើយ​​​​​​។

ទោះ​​​ជា​​​យ៉ាង​​​ណា លោក​​​បាន​​​​​​លើក​​​ឡើង​​​ថា គោល​​​បំណង​​​នៃ​​​ការ​​​សើុបអង្កេតនេះ​​​​គឺ​​​ចង់រក​ឲ្យឃើញថា​ សំបុត្រ​​​បញ្ជាក់​​​កំណើត​​​ពិតជាខុសច្បាប់មែន​​​​។

លោក​​​បាន​​​មាន​​​ប្រសាសន៍​​​បន្ថែម​​​ថា ​​​”យើង​​​​​​បាន​​​ពិនិត្យ​​​សំបុត្រ​​​បញ្ជាក់​​​កំណើត​​​ច្បាប់​​​ដើម​​​របស់​​​​​ [ស៊ុត​ គង់] ហើយ​​​​​​សំបុត្រ​​​បញ្ជាក់​​​កំណើត​​​ នេះ​​​សរសេរ​ថាជន​​​នេះ​​​កើត​​​នៅ​​​ក្នុង​​​​​​ ឃុំ​​​ភ្នំដិន​​​ ស្រុក​​​គិរី​​​វង់ ខេត្ត​ តាកែវ​​​ប្រទេស​​​កម្ពុជា​​​”។

លោក​​​ យ៉ុក សារ៉ាត់ អធិការ​​​នគ​​​របាល​​​ស្រុក​​​គិរីរង់ បាន​​​​​​លើក​​​ឡើង​​​ថា មន្ត្រី​​​របស់​​​លោក​​​កំពុង​​​ជួយ​​​ក្នុង​​​ការ​​​សើុបអង្កេត​​​ដើម្បី​​​តាម​​​ស្វែង​​​រក​​​ឈ្មោះ ស៊ុត គង់​​​ នេះ ឬ​​​ថា តើ​​​នរណា​​​នៅ​​​ពីក្រោយ​​​ការ​​​បង្ហោះ​​​នេះ​​​ ប៉ុន្តែ ​​​បាន​​​បដិសេធ​​​មិន​​​ប្រាប់​​​ព័ត៌​​​មាន​​​លម្អិត​​​នៃ​​​ការ​​​សើុប​​​អង្កេ​​​ត​​​​​​នេះ​​​ឡើយ​​​។

លោក​​​បាន​​​មាន​​​ប្រសាសន៍​​​ថា “វា​​​ក្លែង​​​ក្លាយ ព្រោះគ្មាន​​​នរណា​​​ម្នាក់​​​សរសេរ​​​ថា ​​​ខេត្ត​​​ តាកែវ​​​ក្នុង​​​ប្រទេស​​​វៀតណាម​​​នោះ​​​ឡើយ​​​”។

លោក គៀត​ ច័ន្ទ​​​ថារិទ្ធ អ្នក​​​នាំ​​​ពាក្យ​​​នគ​​​របាល​​​ ជាតិមិនអាច​​​ទាក់​​​ទង​​​សុំ​​​ការ​​​​បំភ្លឺ​​​​បាន​​​ទេ។

មាន​​​ពល​​​រដ្ឋ​​​ខ្មែរ​​​យ៉ាង​​​តិច​​​៤​​​នាក់​​​ត្រូវ​​​បាន​​​ចាប់​​​ខ្លួន និង​​​ដាក់​​​ពន្ធនាគារ​​​​​​ពាក់​​​ព័ន្ធ​​​ការ​​​បង្ហោះ​​​ តាម​​​ហ្វេស​​​ប៊ុក​​​ក្នុង​​​រយៈ​​​ពេល​​​បួន​​​ខែ​​​កន្លង​​​មក​​​នេះ ក្នុង​​​នោះ​​​មាន​​​ដូច​​​ជា​​​​​​និស្សិត​​​ឈ្មោះ​​​ គង់ ​​​រ៉ាយ៉ា ​​​​​​ដែល​​​ជាប់​​​ពាក់​​​ព័ន្ធ​​​ពី​​​បទ​ជំរុញ​​​ឲ្យ​​​ធ្វើ​​​ “បដិវត្ត​​​ន៍ពណ៌”  ពល​​​ករ​​​ចំណាក​​​ស្រុក​​​ ឈ្មោះ​ ផង់​ សីហា ដែល​​​ជាប់​​​ពាក់​​​ព័ន្ធ​​​ពីបទ​​​គំរាម​​​សម្លាប់​​​លោក សុខ ទូច អ្នក​​​ស្រាវ​​​ជ្រាវ​​​ព្រំដែន ​​​សមាជិក​​​​​​ព្រឹទ្ធ​​​សភា​​​គណបក្ស​​​សង្គ្រោះ​​​ជាតិ លោក ហុង សុខហួរ ​​​ដែល​​​ជាប់​​​ពាក់​​​ព័ន្ធ​​​ពីបទ​​​បង្ហាញ​​​សន្ធិសញ្ញា​​​ព្រំដែន​​​ក្លែង​​​ក្លាយ និង​​​ អ្នក​​​គ្រប់​​​គ្រង​​​​​​​ភោជនីយ​​​ដ្ឋាន​​​ម្នាក់​ទៀត​ ឈ្មោះ តៅ សាវឿន ដែល​​​ជាប់​​​ពាក់​​​ព័ន្ធ​​​ពីបទ​​​គំរាម​​​ដាក់​​​គ្រាប់​​​បែក​​​ក្នុង​​​ពិធី​​​ប្រគល់​​​សញ្ញាបត្រ​​​។

មនុស្ស​​​បួន​​​នាក់​​​ផ្សេង​​​ទៀត​​​ ដែល​​​រួម​​​មាន​​​មន្ត្រី​​​ក្រសួង​​​ចំនួន​​​ពី​​​រ​​​នាក់​​​ និង​​​ទាហាន​ម្នាក់​​​ត្រូវ​​ បាន​​​ប្តឹង​​​ពី​​​បទ​​​បង្ហោះ​​​សារ​​​តាម​​​ហ្វេស​​​ប៊ុក​​​ស្តី​​​អំពី​​​ជីវិត​​​ផ្លូវ​​​ភេទ​​​របស់​​​សមាជិក​​​ព្រឹទ្ធ​​​មួយ​​​រូប​​​មក​​​ពី​​​គណបក្ស​​​ប្រជាជន​​​កម្ពុជា៕​ស៊ុយឈាង​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស