30 C
Phnom Penh

តុលាការ​​​ក្រុង​​​កោះ​​​ហៅ​​​លោក​​​ សម រង្ស៊ី

ដោយ ឌឹ ខេមបូឌា ដេលី

បទវិភាគ

ក្នុង​​​ពេល​​​ដែល​​​មេដឹក​​​នាំ​​​គណបក្ស​​​ប្រឆាំង​​​ជួប​​​ប្រជុំ​​​គ្នា​​​នៅ​​ក្នុង​​​ក្រុង​​​ម៉ានីល​​​នៅ​​​ថ្ងៃ​​​សុក្រ​ ដើម្បី​​​ស្វែង​​​រក​​​ការ​​​ឆ្លើយ​​​តប​​​ទៅ​​​នឹង​​​​​​​​​ការ​​​កើត​​​ឡើង​​​ជា​​​បន្ត​​​បន្ទាប់​​​នៃ​​​បញ្ហា​​​នយោបាយ​​​នា​​​ពេល​​​កន្លង​​​ទៅ​​​ថ្មី​​​ៗ​​​នេះ​​​ លោក សម រង្ស៊ី ប្រធាន​​​គណបក្ស​​​សង្គ្រោះ​​​ជាតិ​​​ត្រូវ​​​តុលាការ​​​ចោទ​​​ពី​​​បទ​​​ចោទ​​​ថ្មី​​​មួយ​​​ទៀត​​​ គឺ​​​ការ​​​សមគំនិត​​​ក្នុង​​​អំពើ​​​ក្លែង​​​ឯកសារ​​​សាធារណៈ​​​ និង​​​ការ​​​ញុះញង់​​​ទាក់​​​ទិន​​​នឹង​​​ការ​​​បង្ហោះ​​​ជា​​​សាធារណៈ​​​នៅ​​​លើ​​​ហ្វេស​​​ប៊ុក​​​របស់​​​លោក​​​ ដោយ​​​អ្នក​​​ដទៃ។

បទ​​​ចោទ​​​បាន​​​ធ្វើ​​​ឡើង​​​មួយ​​​សប្តាហ៍​​​ក្នុង​​​ពេល​​​ដែល​​​លោក​​​ សម រង្ស៊ី ​​​​​​​​​ ត្រូវ​​​និរទេស​​​ខ្លួន​​​ពី​​​ប្រទេស​​​បន្ទាប់​​​ពី​​​មាន​​​ដីកា​​​ឲ្យ​​​ចាប់​​​ខ្លួន​​​លោក​​​​​​ក្នុង​​​រឿង​​​ក្តី​​​បទ​​​បរិហារកេរ្តិ៍​​​កាល​​​ពី​​​៧​​​ឆ្នាំ​​​មុន។​ ប្រធាន​​​គណបក្ស​​​សង្គ្រោះជាតិ​​​រូប​​​េនះ​​​ក៏​​​ត្រូវ​​​ដក​​​​​​អភ័យ​​​ឯកសិទ្ធិ​​​របស់​​​លោក​​​ បន្ទាប់​​​ពី​​​មាន​​​ការ​​​បណ្តេញ​​​ចេញ​​​ពី​​​​​​សមាជិកភាព​​​រដ្ឋសភា​​​ដោយ​​​សន្លឹក​​​ឆ្នោត​​​គណបក្ស​​​ប្រជា​​​ជន​​​កម្ពុជា។

លោក សម រង្ស៊ី បាន​​​ស្ថិត​​​នៅ​​​​​​ក្នុង​​​ប្រទេស​​​កូរ៉េ​​​ខាង​​​ត្បូង​​​ក្នុង​​​ពេល​​​ដែល​​​គេ​​​ប្រកាស​​​ដីកា​​​ចាប់​​​ខ្លួន​​​ ហើយ​​​លោក​​​បាន​​​ស្ថិត​​​នៅ​​​ក្រៅ​​​ប្រទេស​​​ចាប់​​​តាំង​​​ពី​​​ពេល​​​នោះ​​​មក​​​ដោយ​​​ប្រែ​ក្រឡាស់​​​​លើ​​​សម្តី​​​សន្យា​​​ថា នឹង​​​វិល​​​​​​ត្រឡប់​​​មក​​​ប្រទេស​​​កម្ពុជា​​​វិញ​​​ និង​​​ប្រឈម​​​នឹង​​​ការ​​​ជាប់​​​ពន្ធនាគារ​​​។ ដោយ​​​មាន​​​ការ​​​ចេញ​​​បទ​​​ចោទ​​​ប្រឆាំង​​​នឹង​​​រូប​​​លោក​​​ដែល​​​អាច​​​ជាប់​​​ពន្ធនាគារ​​​១៧​​​ឆ្នាំ​​​បន្ថែម​​​ទៀត​​​ គឺ​​​មិន​​​ទាន់​​​ប្រាកដ​​​ប្រជា​​​​​​ថា ​​​ប្រធាន​​​គណបក្ស​​​សង្គ្រោះ​​​​​​​​​​​​ជាតិ​​​រូប​​​នេះ​​​​​​នឹង​​​វិល​​ត្រឡប់​​​មក​​​ប្រទេស​​​កម្ពុជា​​​នៅ​​​ពេល​​​ណា​​​នោះ​​​ទេ​​​។

តុលាការ​​​ក្រុង​​​ភ្នំពេញ​​​បាន​​​ប្រកាស​​​អំពី​​​បទ​​​ចោទ​​​ថា សម​​​គំនិត​​​ក្នុង​​​អំពើ​​​ក្លែង​​​បន្លំ​​​ឯកសារ​​​សាធារណៈ​​​  ប្រើ​​​ប្រាស់​​​ឯកសារ​​សាធារណៈ​​​ក្លែង និង​​​ញុះញង់​​​បង្ក​​​ឲ្យ​​​មាន​​​ភាព​​​វឹក​​​វរ​​​​នៅ​​​ក្នុង​​​ដីកា​​​មួយ​​​ដែល​​​ចេញ​​​កាល​​​ពី​​​ថ្ងៃ​​​សុក្រ​​​ ដោយ​​​ពន្យល់​​​ថា ជា​​​បទ​​​ចោទ​​​​​​បណ្តោះ​​​អាសន្ន​​​ ហើយ​​​នឹង​​​បញ្ជាក់​​​ថា​​​ មាន​​​ប្រសិទ្ធភាព​​​ ឬ​​​ទម្លាក់​​​ចោល​​​បន្ទាប់​​​ពី​​​លោក សម រង្ស៊ី ចូល​​​ខ្លួន​​​ដើម្បី​​​សាក​​​សួរ​​​ដោយ​​​ចៅ​​​ក្រម​​​សើុប​​​អង្កេត​​​នៅ​​​ថ្ងៃ​​​ទី​​​​​​៤ ខែ​​​ធ្នូ​​​ វេលា​​​ម៉ោង ៨​​​និង​​​៣០​​​នាទី​​​ព្រឹក។

ដីកា​​​នោះ​​​សរសេរ​​​ថា “ក្នុង​​​ករណី​​​មិន​​​​​​ចូល​​​ខ្លួន​​​តាម​​​ការ​​​​​​កំណត់​​​ខាង​​​លើ​​​នេះ​​ យើង​​​នឹង​​​ចេញ​​​ដីកា​​​បង្គាប់​​​ឲ្យ​​​ចាប់​​​ខ្លួន​​​ទៅ​​​តាម​​​ច្បាប់”។

មន្ត្រី​​​តុលាការ​​​មិន​​​អាច​​​ទាក់​​​ទង​​​សុំ​​​ការ​​​បំភ្លឺ​​​បាន​​​ទេ​​​កាល​​​ពី​​​ម្សិលមិញ ប៉ុន្តែ​​​អ្នក​​​នាំ​​​ពាក្យ​​​គណ​បក្ស​​​ប្រជា​​​ជន​​​កម្ពុជា​​​លោក សុខ ឥសាន​​​ បាន​​​មាន​​​ប្រសាសន៍​​​ថា លោក​​​បាន​​​ដឹង​​​អំពី​​​បទ​​​ចោទ​​​នោះ​​​ ហើយ​​​ថា វា​​​ទាក់​​​ទង​​​នឹង​​​រឿង​​​ក្តី​​​របស់​​​សមាជិក​​​ព្រឹទ្ធ​​​សភា​​​គណបក្ស​​​ប្រឆាំង​​​គឺ​​​លោក ហុង សុខហួរ ដែល​​​ត្រូវ​​​គេ​​​ចាប់​​​ខ្លួន​​​ និង​​​ដាក់​​​ពន្ធនាគារ​​​កាល​​​ពី​​​ខែ​​​សីហា​​​ តាម​​​បទ​​​បញ្ជា​​​ផ្ទាល់​​​ពី​​​លោក​​​នាយក​​​រដ្ឋ​​​មន្ត្រី ហ៊ុន សែន បន្ទាប់​​​ពី​​​ការ​​​បង្ហោះ​​​វីដេអូ​​​បង្ហាញ​​​សន្ធិ​​​សញ្ញា​​​ព្រំដែន​​​ក្លែង​​​ក្លាយ​​​នៅ​​​លើ​​​ហ្វេស​​​ប៊ុក​​​លោក រង្ស៊ី ។

លោក ឥសាន បាន​​​មាន​​​​​​​​​​​​​​​​​​ប្រសាសន៍​​​ថា “ទោះ​​​បី​​​ជា​​​ ឯកឧត្តម​​​ ហុង សុខហួរ បាន​​​និយាយ​​​ថា លោក​​​បាន​​​បង្ហោះ​​​ឯកសារ​​​ដោយ​​​ខ្លួន​​​ឯង​​​​​​ក៏​​​ដោយ ក៏​​​លោក​​​​​​បាន​​​បង្ហោះ​​​នៅ​​​លើ​​​គណនី​​​ហ្វេសប៊ុករបស់​​​ឯកឧត្តម សម រង្ស៊ី អ៊ីចឹង​​​គាត់​​​គឺ​​​ជា​​​អ្នក​​​សម​​​គំនិត​​​”។

អ្នក​​​នាំ​​​ពាក្យ​​​គណបក្ស​​​ប្រជា​​​ជនកម្ពុជា​​​រូប​​​េនះ​​​បាន​​​មាន​​​ប្រសាសន៍​​​ថា “សកម្ម​​​ភាព​​​នេះ​​​ពិត​​​ជា​​​ធ្វើ​​​ឲ្យ​​​ប៉ះ​​​ពាល់​​​ដល់​​​សន្តិសុខ​​​សង្គម ​​​ពី​​​ព្រោះ​​​វា​​​ខុស​​​គ្នា​​​ទាំង​​​ស្រុក​​​ពី​​​ឯកសារ​​​ដើម….​​​មិន​​​មែន​​​បញ្ហា​​​​​​ធម្មតា​​​ទេ​​​ ប៉ុន្តែ​​​​​​​​​​​​ជា​​​បញ្ហា​​​ធ្ងន់​​​ធ្ងរ​​​”។

លោក រង្ស៊ី បាន​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា លោក​​​​​​សូម​​​ស្វាគមន៍​​​ដំណឹង​​​ស្តី​​​ពី​​​បទ​​​ចោទ​​​បន្ថែម​​​ទៀត​​​ ទោះ​​​បី​​​ជា​​​លោក​​​​​​មិន​​​បាន​​​ឆ្លើយ​​​តប​​​ទៅ​​​នឹង​​​សំណួរ​​​ថា តើ​​​បទ​​​ចោទ​​​ទាំង​​​នោះ​​​អាច​​​ប៉ះពាល់​​​ដល់​​​សេចក្តី​​​សម្រេច​​​ចិត្ត​​​របស់​​​លោក​​​ថា តើ​​​នឹង​​​វិល​​​ត្រឡប់​​​មក​​​កាន់​​​កម្ពុជា​​​វិញ​​​ដោយ​​​របៀប​​​ណា​​​នោះ​​​ទេ​​​។

លោក​​ រង្ស៊ី បាន​​​មាន​​​ប្រសាសន៍​​​ក្នុង​​​អីុម៉េល​​​ថា “វា​​​ទំនង​​​ជា​​​អាច​​​ប្រទាំង​​​ប្រទើស​​​ ប៉ុន្តែ ជា​​​ដំណឹង​​​ល្អ​​​សម្រាប់​​​ខ្ញុំ​​​ គឺ​​​ថា តុលាការ​​​ដែល​​​គ្រប់​​​គ្រង​​​ដោយ​​​គណបក្ស​​​ប្រជា​​​ជន​​​កម្ពុជា​​​កាន់​​​តែ​​​ធ្វើ​​​ត្លុក​​​កំប្លែង​​​កាន់​​​តែ​​​ខ្លាំង​​​ ខ្ញុំ​​​កាន់​​​តែ​​ទទួល​​​បាន​​​ការ​​​គាំទ្រ​​​ដើម្បី​​​ស្វែង​​​រក​​​យុត្តិធម៌​​​​​​ឲ្យ​​​ជន​​​រង​​​គ្រោះ​​​ទាំង​​​អស់​​​នៃ​​​ការ​​​បង្ក្រាប​​​នយោបាយ​​​នា​​​ពេល​​​ថ្មី​​​ៗ​​​កន្លង​​​ទៅ​​​នេះ​​​នៅ​​​ប្រទេស​​​កម្ពុជា​​​”។

ប្រធាន​​​គណបក្ស​​​សង្គ្រោះ​​​ជាតិ​​​រូប​​​នេះ​​​បាន​​​មាន​​​ប្រសាសន៍​​​បន្ថែម​​​ថា “​​​នៅ​​​ពេល​​​​​​នេះ​​​​​ខ្ញុំ​​​នឹង​​​មិន​​​លេង​​​ជាមួយ​​​ត្លុក​​​​​​ទេ”។

លោក  រង្ស៊ី អនុប្រធាន​​​របស់​​​លោក​​​គឺ លោក កឹម សុខា និង​​​អ្នក​​​តំណាង​​​រាស្ត្រ​​​គណបក្ស​​​សង្គ្រោះជាតិ គឺ​​​លោក សុន ឆ័យ លោក យ៉ែម ប៉ុញ្ញាឫទ្ធ និង​​​លោក អេង ឆៃអ៊ាង បាន​​​ជួប​​​ប្រជុំ​​​គ្នា​​​នៅ​​​ក្រុង​​​ម៉ានីល​​​ កាល​​​ពី​​​​​​ថ្ងៃ​​​សុក្រ ដើម្បី​​​ពិភាក្សា​​​អំពី​​​យុទ្ធ​​​សាស្ត្រ​​​របស់​​​បក្ស​​​​​​​​ក្នុង​​​ការ​​​ដោ​​​ះ​​​ស្រាយ​​​បញ្ហា​​​ដែល​​​បាន​​​កើត​​​ឡើង​​​កន្លង​​​មក​​​ថ្មី​​​ៗ​​​នេះ​​​ រួម​​​មាន​​​បណ្តឹង​​​ប្រឆាំង​​​លោក  រង្ស៊ី ការ​​​បណ្តេញ​​​លោក កឹម សុខា ចេញ​​​ពី​​​តំណែង​​​សភា​​​ និង​​​ការ​​​វាយ​​​ដំ​​​ច្រំ​​​​​ធាក់​​​ទៅ​​​លើ​​​តំណាង​​​រាស្ត្រ​​​គណបក្ស​​​ប្រឆាំង​​​ពីរ​​​រូប​​​នៅ​​​ខាង​​​ក្រៅ​​​អគារ​​​សភា​​​ជាតិ​​​ ក្រោយ​​​ពី​​​មាន​​​​​​ការ​​​តវ៉ា​​​​​​គាំទ្រ​​​ដោយ​​​គណបក្ស​​​ប្រជា​​​ជន​​​កម្ពុជា​​​​​​​​​​​​​​​កាល​​​ពី​​​ដើម​​​ខែ​​​នេះ​​​។

លោក រង្ស៊ី បាន​​​បញ្ជាក់​​​ថា មាន​​​ការ​​​ប្រជុំ​​​មែន​​​ ប៉ុន្តែ បាន​​​បដិសេធ​​​មិន​​​រ៉ាយរ៉ាប់​​​​​​លម្អិត​​​ថា មាន​​​ការ​​​ពិភាក្សា​​​ទៅ​​​លើ​​​​​​អ្វី​​​នោះ​​​ទេ។

លោក សម រង្ស៊ី បាន​​​មាន​​​ប្រសាសន៍​​​ថា “នៅ​​​ក្រុង​​​ម៉ានីល​​​ មេដឹក​​​នាំ​​​គណបក្ស​​​សង្គ្រោះ​​​ជាតិ​​​កំពុង​​​កែ​​​តម្រូវ​​​ និង​​​សម្រួល​​​យុទ្ធ​​​សាស្ត្រ​​​គណបក្ស​​​ក្នុង​​​ពេល​​​ដែល​​​មាន​​​ស្ថាន​​​ការណ៍​​​ថ្មី​​​ៗ​​​កំពុង​​​វិវត្ត​​​។ អ្នក​​​យល់​​​ហើយ​​​ថា បញ្ហា​​​នេះ​​​មិន​​​អាច​​​ធ្វើ​​​ឲ្យ​​​ដឹង​​​​​​ឮ​​​ជា​​​សាធារណៈ​​​បាន​​​ទេ​​​។ អ្នក​​​នឹង​​​ឃើញ​​​អ្វី​​​ៗ​​​នឹង​​​ដំណើរ​​​ការ​​​យ៉ាង​​​ណា​​​ហើយ​​​​​​​​​​​​។ ប៉ុន្តែ សរុប​​​ទៅ​​​ យើង​​​មាន​​​សុទិដ្ឋិនិយម​​​​​​ ពីព្រោះ​​​ម្ខាង​​​ទៀត​​​បង្កើត​​​កំហុស​​​ច្រើន​​​ណាស់​​​”។

លោក ឥសាន អ្នក​​​នាំ​​​ពាក្យ​​​គណបក្ស​​​ប្រជា​​​ជន​​​កម្ពុជា​​​បាន​​​បញ្ជាក់​​​ថា រឿង​​​ក្តី​​​ថ្មី​​​ៗ​​​ប្រឆាំង​​​លោក រង្ស៊ី “​​​មិន​​​មែន​​​រឿង​​​នយោបាយ​​​ទេ ប៉ុន្តែ បទ​​​ព្រហ្មទណ្ឌ​​​” ។ ទោះ​​​​​​ជា​​​យ៉ាង​​​នេះ​​​ក្តី​ លោក​​​នាយក​​​រដ្ឋមន្ត្រី ហ៊ុន សែន បាន​​​រំឭក​​​​​​លោក រង្ស៊ី នៅ​​​ក្នុង​​​សុន្ទរកថា​​​មួយ​​​​​​នៅ​​​ក្រុង​​​ប៉ារីស​ ​​​កាល​​​ពី​​​ខែ​​​មុន​​​ថា លោក​​​ដឹង​​​អំពី​​​បញ្ហា​​​ផ្លូវ​​​ច្បាប់​​​ថ្មី​​​​​​ដែល​​​ទាក់​​​ទង​​​នឹង​​​ករណី​​​ហ្វេស​​​ប៊ុក​ហើយ​​​បាន​​​ព្រមាន​​​ថា ប្រសិន​​​បើ​​​មាន​​​រឿង​​​នោះ​​​កើត​​​ឡើង​​​ លោក​​​​​​នឹង​​​មិន​​​ផ្តល់​​​ការ​​​លើក​​​លែង​​​ទោស​​​ទៀត​​​ទេ​​​។

លោក​​​នាយក​​​រដ្ឋ​​​មន្ត្រី​​​បាន​​​មាន​​​ប្រសាសន៍​​​ថា “ម្ចាស់​​​ផេក​​​ គឺ​​​ រង្ស៊ី អ៊ីចឹង​​​ទេ​​​​​​​​​អាច​​​​​​ដល់​​​ម្នាក់​​​ហ្នឹង​​​។ ម្តង​​​នេះ ​​​ខ្ញុំ​​​នឹង​​​​​​ឈប់​​​លើក​​​លែង​​​ទោស​​​ឲ្យ​​​ហើយ​​​ ព្រោះ​​​ខ្ញុំ​​​ធ្លាប់​​​​​​លើក​​​លែង​​​ទោស​​​ឲ្យ​​​ម្នាក់​​​នេះ​​​ពីរ​​​ដង​​ហើយ៕រើន (រាយការណ៍​​​បន្ថែម​​​ដោយ Julia Wallace)​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស