កាលពីម្សិលមិញ លោក ប៉ា សុជាតិវង្ស អភិបាលរាជធានីភ្នំពេញបានចូលរួមជាអធិបតី ក្នុងពិធីរំឭកខួបប្រាំឆ្នាំនៃការរត់ជាន់គ្នាអំឡុងពិធីបុណ្យអុំទូកឆ្នាំ២០១០ដែលបានបណ្តាលឲ្យមនុស្សប្រមាណ៣៥៣នាក់ស្លាប់ ដែល នៅក្នុងនោះរដ្ឋាភិបាលចាត់ទុកថា ជាការបាត់បង់ជីវិតមនុស្សដ៏ច្រើនបំផុតតែមួយលើកនៅក្នុងប្រទេសកម្ពុជាចាប់តាំងពីរបបខ្មែរក្រហម។
សោកនាដកម្មនេះបានកើតឡើងនៅយប់ចុងក្រោយនៃពិធីបុណ្យអំុទូកពេលមនុស្ស ពីរក្រុមធំដែលធ្វើដំណើរក្នុងទិសដៅផ្ទុយគ្នាបានជាប់គាំងពពាក់ពពូនកម្រើកមិនរួចនៅលើស្ពានចេញចូលកោះពេជ្រ។ មនុស្សជាច្រើនបានជាប់គាំងនៅក្នុងក្រុមមនុស្ស ភាគច្រើនជាយុវជន អ្នកដើរកម្សាន្តមកពីបណ្តាខេត្ត បានថប់ដង្ហើមនៅក្រោមរាងកាយដែលគរពីលើគ្នា អ្នកផ្សេងទៀតត្រូវគេរត់ជាន់នៅពេលមានការភ័យស្លន់ស្លោ។
នៅស្តូបរំឭកដែលបានសាងសង់ឡើងនៅជាប់ស្ពានដែលត្រូវបានវាយកម្ទេចចោលតាំងពីពេលនោះ កាលពីម្សិលមិញ លោក ប៉ា សុជាតិវង្ស បានចែកអំណោយជាប្រាក់ចំនួន៥០ដុល្លារក្នុងមួយគ្រួសារ ជាអំណោយរបស់លោកនាយករដ្ឋមន្ត្រី ហ៊ុន សែន ដល់ប្រជាពលរដ្ឋ៧៣គ្រួសារ ដែលបានបាត់បង់សាច់ញាតិក្នុងហេតុការណ៍ផ្អើលរត់ជាន់គ្នានោះ ហើយបានមកចូលរួមពិធីនេះ ដោយអះអាងថា រដ្ឋាភិបាលមានការភ្ញាក់ផ្អើលយ៉ាងខ្លាំងពេលដឹងពីសោកនាដកម្មនេះ។
លោកបានមានប្រសាសន៍ថា “បើទោះជា ហេតុការណ៍បានកើតឡើងរយៈពេលប្រាំឆ្នាំកន្លងទៅហើយក៏ដោយ ក៏សោកនាដកម្មនេះនៅតែត្រូវបានចងចាំយ៉ាងច្បាស់ក្នុងអារម្មណ៍របស់ប្រជាពលរដ្ឋរបស់យើងទាំងក្នុងរាជធានីភ្នំពេញ និងតាមបណ្តាខេត្តដែរ”។
លោកបានបន្ថែមថា “យើងចាត់ទុកថ្ងៃ២២ វិច្ឆិកា ជាទិវាចងចាំ ហើយយើងមិនអាច បំភ្លេចបានឡើយ ពីព្រោះវាជាសោកនាដកម្ម ដ៏ធ្ងន់ធ្ងរ។ ហេតុការណ៍ផ្អើលរត់ជាន់គ្នានេះបានកើតឡើងដោយសារយើងមានការធ្វេសប្រហែស ពីព្រោះយើងមិនដែលមានហេតុការណ៍ដូចនេះពីមុនមកទេ”។
នៅក្នុងរយៈពេលប៉ុន្មានថ្ងៃបន្ទាប់ពីការរត់ជាន់គ្នាមក មន្ត្រីនគរបាលបានទទួលស្គាល់ថា មានកង្វះខាតក្នុងការដោះស្រាយក្រុមមនុស្សដែលសម្រុកទៅលេងកោះពេជ្រនៅយប់នោះ រួមមានកង្វះក្រុមមន្ត្រី និងកង្វះ ការបណ្តុះបណ្តាលជាដើម។ ពួកគេក៏បានបន្ទោសម្ចាស់ឯកជនកាន់កាប់កោះពេជ្រ គឺក្រុមហ៊ុនវិនិយោគទុនអាណិកជនកម្ពុជា ប៉ុន្តែការទទួលខុសត្រូវធ្លាក់ទៅលើសាលារាជធានីទៅវិញ។
ប៉ុន្តែបន្ទាប់ពី គណៈកម្មការពិសេសមួយដែលត្រូវបានបង្កើតឡើងដោយមានតែសមាសភាពមន្ត្រីរដ្ឋាភិបាល បានបញ្ចប់ការស៊ើបអង្កេតហេតុការណ៍នោះក្នុងរយៈពេលមួយសប្តាហ៍មក លោក ហ៊ុន សែន បានប្រកាស ថា គ្មាននរណាម្នាក់ត្រូវឲ្យទទួលខុសត្រូវ “ចំពោះការរត់ជាន់គ្នាដែលនឹកស្មានមិនដល់នេះឡើយ”។
គណៈកម្មការដែលមិនដែលបានបញ្ចេញរបាយការណ៍របស់ខ្លួនជូនសាធារណជននោះបានសន្និដ្ឋានថា ហេតុការណ៍ផ្អើលរត់ជាន់គ្នានេះបង្កឡើងដោយមនុស្សម្នាក់នៅក្នុងក្រុមមនុស្សដែលបានស្រែកថា ស្ពាន យោលនេះជិតបាក់ហើយ។ ការខិតខំប្រឹងប្រែងរបស់គណបក្សប្រឆាំងក្នុងការបង្កើតគណៈកម្មការទី២ ជាការស៊ើបអង្កេតឯករាជ្យរកមូលហេតុនៃការរត់ជាន់គ្នា ត្រូវបានបិទ។
អ្នកស្រី មួន ផល្លី ដែលបានបាត់បង់កូនស្រីពីរនាក់ឈ្មោះ ជឿន ធារៈ អាយុ២០ឆ្នាំ និង ជឿន ម៉ានី អាយុ៣០ឆ្នាំ អំឡុងហេតុការណ៍ផ្អើលរត់ជាន់គ្នា បានធ្វើដំណើរពីក្រុងតាខ្មៅក្នុងខេត្តកណ្តាលមកចូលរួមពិធីកាលពីថ្ងៃម្សិលមិញនេះ។
អ្នកស្រីបាននិយាយទាំងទឹកភ្នែកថា “ខ្ញុំក្រៀមក្រំណាស់ចំពោះការស្លាប់កូនស្រីរបស់ខ្ញុំពីរនាក់។ ជួនកាល ខ្ញុំសន្លប់នៅពេលខ្ញុំនឹកឃើញដល់ការស្លាប់របស់កូនស្រីខ្ញុំ។ វាជាការក្រៀមក្រំធំធេងណាស់នៅក្នុងជីវិតរបស់ខ្ញុំ”។
រដ្ឋាភិបាលបានរៀបចំការប្រណាំងទូកដែលមានរយៈពេលបីថ្ងៃនៅក្នុងរាជធានីភ្នំពេញតែម្តងប៉ុណ្ណោះចាប់តាំងពីការរត់ជាន់គ្នាមក។ រដ្ឋាភិបាលបានផ្អាកការប្រណាំង ទូកនៅឆ្នាំនេះ ដែលគ្រោងចាប់ផ្តើមនៅថ្ងៃអង្គារ ដោយអះអាងថា ស្ថានភាពគ្រោះរាំងស្ងួតបានធ្វើឲ្យទឹកទន្លេសាបមានកម្រិតទាបណាស់ ហើយតម្រូវឲ្យរដ្ឋាភិបាលផ្តោតធនធានរបស់ខ្លួនទៅលើការជួយប្រជាកសិករ ដែលរងផលប៉ះពាល់វិញ៕ សារុន