27 C
Phnom Penh

លោក ហ៊ុន សែន ញញឹម ខណៈ​​​ ​​​លោក សម រង្ស៊ី ស្វះ​​​ស្វែង​​​រក​​​ការ​​​​​​ ដាក់​​​សម្ពាធ​​​ការ​​​ទូត​​​លើ​​​រូប​​​លោក​​​

ដោយ ឌឹ ខេមបូឌា ដេលី

បទវិភាគ

ខណៈ​​​លោក​​​នាយក​​រដ្ឋ​​​មន្ត្រី ហ៊ុន សែន​​ញញឹម​​​​​​បិទ​​​មាត់​​​មិន​​​ជិត​​​ពេល​​​ចាប់​​​ដៃ​​​ជាមួយ​​​លោក បារ៉ាក់ អូបាម៉ា ប្រធានា​​​ធិបតី​​​​​​សហ​​​រដ្ឋ​​​អាមេរិក​ និង​​​​​​ទទួល​​​បាន​​​ការ​​​អញ្ជើញ​​​ជា​​​​​លើក​​​ដំបូង​​សម្រាប់​​​ដំណើរ​​​ទស្សនកិច្ច​​​ផ្លូវ​​​រដ្ឋ​​​ទៅ​​​កាន់​​​រដ្ឋ​​​ធានី​​​​​​វ៉ាស៊ីនតោនកាល​​​ពី​​​ចុង​​​សប្តាហ៍​​​កន្លង​​​ទៅ​​​នេះ​​​ លោក សម រង្ស៊ី ប្រធាន​​​គណ​​​បក្ស​​​ប្រឆាំង​​​​​មាន​​​ប្រសាសន៍​​​ថា ​​​លោក​​​បាន​​​​​​ធ្វើ​​​ដំណើរ​​​ទៅ​​​អឺរ៉ុប​​​ ដើម្បី​​​ព្យាយាម​​​ដាក់​​​សម្ពាធ​​​ការទូត​​​លើ​​​លោក​​​នាយក​​​រដ្ឋ​​​មន្ត្រី​​​។

សូម​​​បញ្ជាក់់​​​ថា លោក សម រង្ស៊ី មិន​​​ទាន់​​​​​​ឈាន​​​ជើង​​​​​​ចូល​​​ប្រទេស​​​កម្ពុជា ​​​វិញ​​ទេ​​​ចាប់​​​តាំង​​​ពី​​​​​​ថ្ងៃ​​​ទី​​​៥ ខែ​​​វិច្ឆិកាមក ហើយ​​​ប្រឈម​​​នឹង​​​ការ​​​ជាប់​​​ពន្ធនាគារ​​​យ៉ាង​​​ហោច​​​ណាស់​​​២ឆ្នាំ​​​​សម្រាប់​​​​​​​​ការ​​​ផ្តន្ទា​​​ទោស​​​​​​​ពីបទ​​​បរិហារ​​​កេរ្តិ៍​​​​​​ដែល​​​មាន​​​​​អាយុ​​​កាល​​​​​​រាប់​​​ឆ្នាំ​​​ ប្រសិន​​​បើ​​​លោក​​​ ត្រឡប់​​​មក​​​វិញ​​​ ហើយ​​​ប្រហែល​​​ជា​​​​​​​​​អាច​​​​​​​ប្រឈម​​​ការ​​​ជាប់​​​ពន្ធនាគារ​​​១៧​​​ឆ្នាំ​​​ទៀត​​​ដោយ​​​សារ​​​​​​តុលាការ​​​គំរាម​​​​​​ធ្វើ​​​ការ​​​​​​ចោទ​​​ប្រកាន់​​​ថ្មីៗ​​​​​​ពី​​​បទ​​​ក្លែង​​​បន្លំ ​​​និង​​​​​​បទ​​​ញុះញង់​​​​​ទាក់​​​​​​ទិន​​​ការ​​​បង្ហោះ​​​សារ​​​​​​តាម​​​ហ្វេស​​​ប៊ុក​​​។

cam-photo-politics-800x533លោក​​​ សម រង្ស៊ី បាន​​​បោះ​​​បង់​​​ឱកាស​​​ប្រឈម​​​តតាំង​​​ជា​​​​​​លើក​​​ទី​​​១​​​​​​​​​ក្នុង​សំណុំ​​​រឿង​​​​​​​ដែល​​​ហាក់​​​ដូច​​​​ជា​​​​​​ពាក់​​​ព័ន្ធ​​​នឹង​​​នយោបាយ​​​កាល​​​ពី​​សប្តាហ៍​​​មុន ​​ នៅ​​​ពេល​​​លោក​​​សម្រេច​​​ចិត្ត​​​មិន​​​ត្រឡប់​​​មក​​​វិញ​​​​តាម​​​យោបល់​​​​​ឲ្យ​​​​​​លោក​​​​​​​ស្វែង​​​រក​​​​​​ការ​​​ដាក់​​​សម្ពាធ​​​ការទូត​​​​​​​​​​​​​​​ដើម្បី​​​ឲ្យ​​​លោក​​​​​​អាច​​​វិល​​​​​​ត្រឡប់​​​មក​​​វិញ​​​ដោយ​​​មាន​​​សេរីភាព។

ទោះ​​​ជា​​​យ៉ាង​​​ណា ចាប់​​​តាំង​​​ពី​​​ពេល​​​នោះ​​​មក លោក​​​ ហ៊ុន សែន បាន​​​បង្ហាញ​​​សញ្ញា​​​តិច​​​តួច​​​ណាស់​​​​​​ថាលោក​​​កំពុង​​​ទទួល​​​រង​​​សម្ពាធ​​ឲ្យ​​​​​​អនុញ្ញាត​​លោក សម រង្ស៊ី ​​​បាន​​​វិល​​​ត្រឡប់​​​មក​​​វិញ ហើយ​​​​​​​ក្តី​​​​បារម្ភ​​​​​​ណា​​​មួយ​​​បែប​​​នេះ​​​បាន​​​​​​ធូរ​​​ស្រាល​​​​​​​​​ក្នុង​​​ទីក្រុង​​​គូឡាឡាំពួ កាល​​​ពី​​​​​រសៀល​​​​​​ ម្សិលមិញ នៅ​​​ពេល​​​លោក អូបាម៉ា ប្រកាស​​​ថា លោក​​​បាន​​​អញ្ជើញ​​​មេ​​​ដឹក​​​នាំ​​​១០​​​រូប​​​របស់​​​អាស៊ាន​​​ទៅ​​​កាន់​​​សហរដ្ឋ​​​​​​​​អាមេរិក នៅ​​​ឆ្នាំ​​​ក្រោយ​​​​​​។

យោង​​​តាម​​​ទីភ្នាក់​​​ងារ​​​សារព័ត៌​​​មាន ​​​Agence ​ France-Press ​​​​​ឲ្យ​​​ដឹង​​​ថា លោក ​​អូបាម៉ា ​​​បាន​​​លើក​​​ឡើង​​ក្នុង​​​សន្ទរកថាបិទ​​​​កិច្ច​​​ប្រជុំ​​​កំពូល​​​អាស៊ាន​​​លើក​​​ទី​​​២៧​​​ថា “ខ្ញុំ​​​មាន​​​ក្តី​​​សោមនស្ស​​​ ​​​រីករាយ​​​ដែល​​​ពួក​​​គាត់​​​ទទួលយក ហើយ​​​ខ្ញុំ​​​ទន្ទឹង​​​រង់​​​ចាំ​​​បន្ត​​​ការ​​​ងារ​​​របស់​​​យើង​​​” ហើយ​​​លោក​​​បាន​​​​​​​​​​​អះ​​​អាង​​​​​ថា ទំនាក់​​​ទំនង​​​ជិត​​​ស្និទ្ធ​​​ជាមួយ​​​បណ្តា​​​ប្រទេស​​​នៅ​​​អាស៊ី​​​ “ពិត​​​ជា​​​មាន​​​សារៈ​​​សំខាន់​​​” ចំពោះ​​​សន្តិសុខ​​​របស់​​​សហរដ្ឋ​​​អាមេរិក​​​។

កិច្ច​​​ប្រជុំ​​​កំពូល​​​នេះ​​​ធ្វើ​​​ឡើង​​​បន្ទាប់​​​ពី​​​មាន​​​​​ពាក្យ​​​សម្តី​​​វាយ​​​ប្រហារ​​​គ្នា​​​​​​រាប់​​​សប្តាហ៍​​​រវាង​​​សហរដ្ឋ​​​អាមេរិក​​​ និង​​​ប្រទេស​​​​​ចិន ជុំ​​​វិញ​​​ភាព​​​តាន​​​តឹង​​​នាវាចរ​​​ណ៍នៅ​​​សមុទ្រ​​​​​​ចិន​​​ខាង​​​ត្បូង​​​។  លោក ហ៊ុន សែន ​​​ដែល​​​ជា​​​សម្ព័ន្ធ​​​មិត្ត​​​​​​មួយ​​​រូប​​​​​​ក្នុង​​​ចំណោម​​​សម័្ពន្ធ​​​មិត្ត​​​ជិតស្និទ្ធ​​​បំផុត​​​​​របស់​​​ប្រទេស​​​ចិន​​​នៅ​​​ក្នុង​​​តំបន់ និង​​​ជា​​​​​​​​​​​​​​​​​​​​​​គោល​​​​​​ដៅ​​​ដែល​​​​​​សហរដ្ឋ​​​អាមេរិក បាន​​​ដាក់​​​ទណ្ឌ​​​កម្ម​​​ម្តង​​​ហើយ​​​ម្តង​​​ទៀត​​​​​​​​​ក្នុង​​​រយៈ​​​ពេល​​​ជាង​​​​​​៣០​​​ឆ្នាំ​​​​​​ដែល​​​លោក​​​កាន់​​តំណែង​​​​​​ជា​​​នាយក​​​រដ្ឋ​​​មន្ត្រី​​​​​មិន​​​ធ្លាប់​​​ទទួល​​​បាន​​​ការ​​​អញ្ជើញ​​​​​សម្រាប់​​​ដំណើរ​​​ទស្សនកិច្ច​​​ផ្លូវ​​​​​រដ្ឋ​​​ទៅ​​​កាន់​​​សហរដ្ឋ​​​អាមេរិក ​​​បែប​​​​​​​​​នេះ​​​ឡើយ​​​​​។

លោក សុខ ឥសាន អ្នក​​​នាំ​​​ពាក្យ​​​គណបក្ស​​​ប្រជាជន​​​កម្ពុជា​​​ បាន​​​ស្វាគមន៍​​​​ការ​​​អញ្ជើញ​​​នេះ​​​ដោយ​​​មាន​​​ប្រសាសន៍​​​ថា វា​​​បាន​​​បង្ហាញ​​​ថា លោក​​​ សម រង្ស៊ី កំពុង​​​ប្រយុទ្ធ​​​ក្នុង​​​សមរភូមិ​​​ចាញ់​​​ដែល​​​ខំស្វះ​​​ស្វែង​​​​​​រក​​​ការ​​​​​​គាំទ្រ​​​ផ្នែក​​​​​​ការ​​​ទូត​​​ចំពោះ​​​បុព្វហេតុ​​​របស់​​​លោក​​​។

លោក​​​បាន​​​បន្ត​​​ថា “វា​​​មិន​​​មែន​​​​​​ជា​​​លើក​​​ទី​​​១​​​ទេ​​​នៅ​​​​​​​​​ពេល​​​លោក​​​ សម រង្ស៊ី មាន​​​បញ្ហា ​​​គាត់​​​​​​ រត់​​​គេច ​​​ហើយ​ធ្វើ​​​វ​​​ើបែប​​​​​នេះ​​​ ប៉ុន្តែ​​​ត្រង់​​​​​ថា​​​គេ​​​ស្តាប់​​​គាត់​​​ ឬ​​​ក៏​​​អត់​​​ នោះ​​​ជា​​​បញ្ហា​​​មួយ​​​ទៀត​​​។ ​​​ទោះ​​​បីជា​​​គាត់​​​​​​ទៅ​​​ស្នើ​​​សុំ​​​គេ​​​ ហើយ​​​​​​ខំ​​​ឱប​​​ដៃ​​​ឱប​​​ជើង​​​​​​​​គេ​​​ក៏​​​ដោយ​​​ ក៏​​​គេ​​​នឹង​​​មិន​​​​​​ធ្វើ​​​តាម​​​គាត់​​​ដែរ​​​។បើ​​​​​​សម្តី​​​របស់​​​គាត់​​​មាន​​​ប្រសិទ្ធ​​​ភាព ​​​ហេតុ​​​អី​​​ប្រធានាធិបតី​​​សហ​​​រដ្ឋ​​​​​​អាមេរិក ​​​អញ្ជើញ​​សម្តេច ហ៊ុន សែន ឲ្យ​​​ទៅ​​​ធ្វើ​​​ទស្សន​​​កិច្ច​​​​​​​​​នៅ​​​​​​សហរដ្ឋ​​អាមេរិក​​​”។

មន្ត្រី​​​មួយ​​​រូប​​​នៅ​​​ក្រសួង​​​ការ​​​បរទេស​​​សហរដ្ឋ​​​អាមេរិក បាន​​​ថ្លែង​​​ប្រាប់​​​ព្រឹទ្ធសភា​​​សហរដ្ឋ​​​អាមេរិក​​​ កាល​​​ពី​​​ថ្ងៃ​​​ព្រហស្បតិ៍​​​ថា ​​​ព្រឹត្តិការណ៍​​​​ថ្មី​​​ៗ​​​នេះ​​​នៅ​​​​​​ក្នុង​​​ប្រទេស​​​កម្ពុជា គឺ​​​ជា ​​​”ហេតុ​​​ផល​​​​​​​​​មួយ​​​​​​ដែល​​​នាំ​​​ឲ្យ​​​​​មាន​​​​​ក្តី​​​បារម្ភ​​​ធំ​​​” ហើយ​​​ “ធ្វើ​​​ឲ្យ​​​នឹក​​​ឃើញ​​​​ដល់​​​​​​សម័យ​​​​​កាល​​​​​​ផ្ដាច់​​​ការ​​​​នៅ​​​​​​ក្នុង​​​ប្រវត្តិ​​​សាស្ត្រកន្លង​​​ទៅ​​​ថ្មីៗ​​​របស់​​​​​​​​កម្ពុជា​​​”។

​​​នៅ​​​ក្នុង​​​ខែ​​​​​​កន្លង​​​ទៅ តំណាង​​​រាស្ត្រ​​​គណ​​​បក្ស​​​​​​សង្គ្រោះ​​​ជាតិ​​​ ពីរ​​​រូប​​​ត្រូវ​​​បាន​​​​​ហ្វូង​​​​​​បាតុករ​​​ដែល​​​គាំទ្រ​​​គណបក្ស​​​ប្រជា​​​ជន​​​​​កម្ពុជា ​​​វាយ​​​ដំនៅ​​​ខាង​​​ក្រៅ​​​រដ្ឋ​​​សភា​​​ ខណៈ​​​កង​​​ទ័ព​​​ត្រូវ​​​បាន​​​​​​​​កេណ្ឌ​​​​​​ប្រមូល​​​​​​​​​​​​​​​​​ក្នុង​​​យុទ្ធនាការ​​​​​មួយ​​​ដែល​​​ទទួល​​​បាន​​​ជោគ​​​ជ័យ​​​​នៅ​​​ទី​​​បំផុត​​​ក្នុង​​​ការដក​​​​​​​​លោក  កឹម សុខា ចេញ​​​ពី​​​អនុប្រធាន​​​រដ្ឋ​​​សភា​​​។

ការ​​​បណ្ដេញ​​​លោក កឹម សុខា ​​​ដែល​​​គណ​​​បក្ស​​​សង្គ្រោះ​​​ជាតិ​​​និយាយ​​​ថា វា​​​ផ្ទុយ​​​ពី​​​រដ្ឋ​​​ធម្ម​​​នុញ្ញ បាន​​​កើត​​​ឡើង​​​មុន​​​​​​ពេល​​​មាន​​​ដី​​​​​​កា​​​ចាប់​​​ខ្លួន​​​លោក សម រង្ស៊ី ទាក់​​​ទិន​​​ការ​​​ផ្តន្ទាទោស​​​មួយ​​​ដែល​​​តុលាការ​​​​​​បាន​​​សម្រេច​​​កាល​​​ពី​​​ឆ្នាំ​​​២០១១ និង​​​​​​បន្ទាប់​​​មក​​​ការ​​​ដក​​​លោក ​​​សម ​​​រង្ស៊ី  ចេញ​​​ពី​​​រដ្ឋ​​​សភា​​​​​ក្រោម​​​​​ស្នាដៃ​​​តំណាង​​​រាស្ត្រ​​​​​​គណ​​​បក្ស​​​ប្រជា​​​ជន​​​កម្ពុជា កាល​​​ពី​​​ថ្ងៃ​​​ទី​​​១៦ ​​​ខែ​​​វិច្ឆិកា ។

តាម​​​រយៈ​​​សារ​​​អេឡិចត្រូនិក​​​មួយ​​​កាល​​​ពី​​​ថ្ងៃ​​​សៅរ៍ លោក សម រង្ស៊ី ដែល​​​កំពុង​​​​​​ស្ថិត​​​នៅ​​​​​​ក្នុង​​​ទីក្រុង​​​ម៉ានីល បាន​​​លើក​​​ឡើង​​​ថា លោក​​​​​​នៅ​​​តែ​​​មិន​​​ទាន់​​​មាន​​​គម្រោង​​​វិល​​​ត្រឡប់​​​មក​​​ក្រុង​​​ភ្នំពេញ​​​វិញ​​​នៅ​​​ឡើយ ហើយ​​​​​លោក​​​នឹង​​​​​​ធ្វើ​​​ដំណើរ​​​ទៅ​​​អឺរ៉ុប ​​​នៅ​​​សប្តាហ៍​​​នេះ​​​​​​ដើម្បី​​​ដាក់​​​សម្ពាធ​​​​​​ការទូត​​​លើ​​​លោក ​​​ហ៊ុន សែន ​​​បន្ទាប់​​​​​​ ពី​​​​​​មាន​​​​​​ស្ថាន​​​ភាព​​​ចលាចល​​​ផ្នែក​​​នយោបាយ​​​រាប់​​ខែ​​​​​​។

លោក សម រង្ស៊ី បាន​​​សរសេរ​​​ថា “សហ​​​ភាព​​​អឺរ៉ុប ប្រហែល​​​ជា​​​​​​​​​អនុម័ត​​​ដំណោះ​​​ស្រាយ ​​​មួយ​​​មក​​​លើ​​​កម្ពុជា ​​​នៅ​​​សប្តាហ៍​​​ក្រោយ។ ខ្ញុំ​​​​​​នឹង​​​​​​ទៅ​​​ដល់​​​ទីក្រុង​​​ព្រុចសែល នៅ​​​ថ្ងៃអង្គារ ទី​​​២៤ វិច្ឆិកា” ហើយ​​​លោក​​​បា​ន​​​គូស​​​បញ្ជាក់​​​ជា​​​​​​ថ្មី​​​​​​​​​​​​ថា លោក​​​ជឿ​​​ថា លោក ហ៊ុន សែន ​​​បាន​​​​​​ប្រើ​​​យុទ្ធ​​​សាស្ត្រ​​​ខុស​​​​​​នៅ​​​ក្នុង​​​ការ​​ប្រយុទ្ធ​​​​​​​​​របស់​​​លោក​​​ប្រឆាំង​​​គណបក្ស​​​សង្គ្រោះ​​​ជាតិ​​​។

លោកបាន​សរសេរ​ទៀត​​​ថា “ការ​រំលោភ​ច្បាប់​គឺ​ច្បាស់​ណាស់គណបក្ស​ប្រជាជន​កម្ពុជា​ប្រើ​ល្បិច​កខ្វក់​ទៅៗ។ ​​​ដោយសារ​អាកប្បកិរិយា​គ្មាន​ប្រជាធិបតេយ្យ​​​ ​របស់​ពួកគេ ពួកគេ​បាត់​​​បង់​អ្នក​គាំទ្រ​និង​អ្នក​មាន​សមានចិត្ត​កាន់តែ​ច្រើន​ក្នុង​ប្រទេស​កម្ពុជា និង​នៅ​លើ​ពិភព​លោក”។

មេដឹកនាំ​គណបក្ស​ប្រឆាំង​រូប​នេះ​មិន​អាច​ទាក់ទង​បាន​ទេ​កាលពី​ម្សិលមិញ។ យ៉ាង​​​ ណា​ក៏ដោយសារៈសំខាន់​នៃ​ការ​ចាប់​ដៃ​ជា​មិត្តភាព​របស់​លោក ហ៊ុន សែន ជាមួយ​លោក អូបាម៉ា និង​ការ​អញ្ជើញ​ឲ្យ​ទៅ​ធ្វើ​ទស្សនកិច្ច​នៅ​ក្រុង​វ៉ាស៊ីនតោន នឹង​មិន​មែន​ខាតបង់​លើ​ លោក សម រង្ស៊ី ដែល​បាន​ប្រើ​ប្រាស់បំណង​ប្រាថ្នា​​​​​របស់​លោក​នាយករដ្ឋមន្ត្រី ​​​ដែល​​​ចង់​បាន​ភាព​ត្រឹមត្រូវ​លើ​ពិភព​លោកជា​​​យូរ​​​មក​​​ហើយ​​​​​​មក​​​ធ្វើ​​​ជា​អាវុធ​នយោបាយ​ដ៏​សំខាន់​មួយ​របស់​លោក។

លោក សម រង្ស៊ី បាន​មាន​ប្រសាសន៍​កាល​​​ពី​ខែ​មករា​ឆ្នាំ​២០១៤ ពេល​ដែល​លោក អូបាម៉ា ​​​បាន​ចុះ​ហត្ថលេខា​ជា​ផ្លូវ​ការ​ផ្អាក​ជំនួយ​មួយ​ចំនួន​មក​កម្ពុជា នៅ​អំឡុង​ពេល​មាន​វិបត្តិ​នយោ បាយ​កាលពី​ឆ្នាំ​មុន​ថា “នេះ​បង្ហាញ​​​ពី​​​​ការ​ទះ​កំផ្លៀង​​​​លោក ហ៊ុន សែន។ លោក ហ៊ុន សែន​…​ភ័យ​​​ ​ព្រួយ​ពី​ភាព​នៅ​ឯកោ​ពី​អន្តរជាតិ​ជាង​អ្នក​​​ណា​ទាំង​អស់​ក្នុង​ប្រទេស​កម្ពុជា”។

លោក សម រង្ស៊ី បាន​លើក​សរសើរ​ការ​បោះ​​​​ឆ្នោត​ជាតិ​ឆ្នាំ​២០១៨​ថា​ជា​ឱកាស​ល្អ​បំផុត​របស់​គណបក្ស​ប្រឆាំង ក្នុង​ការ​ចូល​កាន់​អំណាច​ក្នុង​ពេល​ពីរ​ទសវត្សរ៍​នេះចាប់​តាំងពី​ការ​បោះ​ឆ្នោត​ដែល​ដឹកនាំ​ដោយ​អង្គការ​សហ​ប្រជាជាតិ​នៅ​ឆ្នាំ​១៩៩៣​មក និង​បាន​មាន​ប្រសាសន៍​ថា មូលហេតុ​របស់​លោក​មិន​វិល​ត្រឡប់​មក​វិញ​កាលពី​សប្តាហ៍​មុន គឺ​ដើម្បី​បញ្ចៀស​ហេតុការណ៍​ជា​បន្ត​បន្ទាប់ ដែល​​​​អាច​​ធ្វើ​​​ឲ្យ​​​លោក ហ៊ុន សែន មាន​​​ហេតុ​​​ផល​​​ដើម្បី​លុប​ចោល​ការ​បោះ​ឆ្នោត។

ក្រោយពី​ការ​បោះ​ឆ្នោត​បួន​លើក​ជា​បន្ត​បន្ទាប់​ដែល​លោក ហ៊ុន សែន បាន​ទទួល​ជ័យ​ជម្នះ ប៉ុន្តែ​ត្រូវ​រួម​រឹត​ដោយ​ការ​ចោទ​ប្រកាន់​ថា​មាន​ការ​លួច​បន្លំ​សន្លឹក​ឆ្នោត​នោះ គណ​​​បក្ស​​​​សង្គ្រោះ​ជាតិ​បាន​ចុះ​​កិច្ច​​​ព្រមព្រៀង​មួយ​ជាមួយ​គណបក្ស​ប្រជាជន​កម្ពុជា​កាលពី​ឆ្នាំ​មុន ដើម្បី​បង្កើត​គណៈ​​​កម្មាធិការ​រៀបចំ​ការ​បោះ​ឆ្នោត​ទ្វេ​បក្ស​ថ្មី និង​ធ្វើ​បញ្ជី​ឈ្មោះ​អ្នក​បោះ​ឆ្នោត​ថ្មី ដើម្បី​ធានា​ឲ្យ​មាន​ការ​បោះ​ឆ្នោត​ត្រឹមត្រូវ។

ក្នុង​វីដេអូ​មួយ​ដែល​បង្ហោះ​នៅ​ទំព័រ​ហ្វេស​​​ប៊ុក​របស់​លោក សម រង្ស៊ី កាលពី​ថ្ងៃ​សៅរ៍ លោក​និង​លោក កឹម សុខា បាន​អំពាវ​​​នាវ​ដល់​ពលរដ្ឋ​កម្ពុជា​ឲ្យ​រក្សា​ភាព​អំណត់

ខណៈ​ដែល​អ្នក​ទាំង​ពីរ​ធ្វើ​ដំណើរ​នៅ​ក្រៅ​ប្រទេស និង​រក​ដំណោះ​ស្រាយ​ដើម្បី​ឲ្យ​លោក សម រង្ស៊ី អាច​ត្រឡប់​មក​វិញ​បាន។

លោក កឹម សុខា បាន​មាន​ប្រសាសន៍​ក្នុង​វីដេអូ អង្គុយ​ជាប់​នឹង​លោក សម រង្ស៊ី ថា “ក្នុង​ ឱកាស​នេះ​ដែរ ខ្ញុំ​សូម​អំពាវនាវ​ដល់​ថ្នាក់​ដឹក​​​នាំ​គ្រប់​ជាន់​ថ្នាក់ សកម្មជន សកម្ម​នារី និង​ប្រជាពលរដ្ឋ​ខ្មែរ​ទាំង​អស់ មាន​ជំនឿ​ជឿ​​​ជាក់​​​​ លើ​ថ្នាក់​ដឹកនាំ​គណបក្ស​សង្គ្រោះ​ជាតិ” ​​​យើង​​​​រក្សា​នូវ​គោល​ជំហរ​ដដែល រឹងមាំ ឥត​បែក​​​បាក់​​​​គ្នា ហើយ​យើង​ខ្ញុំ​សូម​អំពាវនាវ​ដល់​បង​ប្អូន​មេត្តា​បន្ត​ចូលរួម​ជា​​​មួយ​គណបក្ស​សង្គ្រោះ​ជាតិ ដើម្បី​សម្រេច​នូវ​បេសកកម្ម​ប្រវត្តិ​​​សាស្ត្រ ​​​ក្នុង​ការ​សង្គ្រោះ​ជាតិ​យើង ក្នុង​ពេល​ឆាប់ៗ​ខាង​មុខ​នេះ”៕ សុខុម និង និត       ​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស