27.5 C
Phnom Penh

​សាលាឧទ្ធរណ៍​​​ច្រាន​​​ចោល​​​​​​​​​​​​​​​បណ្តឹង​​​មេធាវី​​​​​​លោក​​​​​​ ហុង សុខហួរ​​​ ទាក់ទិន​​​នឹង​​​សេចក្តី​​​សម្រេច​​​តុលាការ​​​ក្រុង​​​

ដោយ ឌឹ ខេមបូឌា ដេលី

បទវិភាគ

សាលា​​​ឧទ្ធរណ៍​​​ថ្ងៃ​​​នេះ​​​បាន​​​​​​​​​បដិសេធ​​​​​​មិន​​​ទទួល​​​យក​​​ពាក្យ​​​បណ្តឹង​​​​​​ទាស់​​​នឹង​​​​​​ការ​​​ឲ្យ​​​មាន​​​ការ​​​ស៊ើប​​​អង្កេត​​​ឡើង​​​វិញ​​​​​​របស់​​​​​​តុលា​​​ការ​​​ក្រុង​​​ភ្នំពេញ ដែល​​​ប្តឹង​​​​​​ដោយ​​​មេ​​​ធាវី​​​​​​​​​​​​​​​​​​​​​លោក ហុង សុខហួរ សមាជិក​​​ព្រឹទ្ធ​​​សភា​​​គណបក្ស​​​ប្រឆាំង​​​​​​​​​​​​​​ដែល​​​រង​​​ការ​​​​​​ចោទ​​​ប្រកាន់​​​ពីបទ​​​ក្លែង​​​​​​ឯកសារ​​​សាធារណៈ​​​ និង​​​​​​ញុះញង់។

ក្រោយ​​​ពី​​​បើក​​​សវនាការ​​​ប្រ​​​ហែល​​​២០​​​នាទី​​​ លោក ប្លង់ សំណាង​​​ ប្រធាន​​​ចៅ​​​ក្រម​​​ជំនុំ​​​ជម្រះ​​​សាលា​​​ឧទ្ធរណ៍ បាន​​​ប្រកាស​​​ថា “​​​ពាក្យ​​​បណ្តឹង​​​​​​របស់​​​មេធាវី​​​​​​​​​ ហុង សុខ​​​ហួរ​​​​​​ កាល​​​ពី​​​ថ្ងៃ​​​ទី​​​២១ ខែ​​​តុលា ឆ្នាំ​​​២០១៥ ធ្វើ​​​ខុស​​​​​​ពី​​​ទម្រង់​​​ច្បាប់​​​ ដែល​​​មិន​​​អាច​​​ទទួល​​​យក​​​បាន​​​ទេ”។

លោក ហុង សុខហួរ ត្រូវ​បាន​ចាប់​ខ្លួន​កាល​​​ពី​ថ្ងៃទី១៥ ខែ​សីហា ​ពោល​​គឺ​​ពីរ​ថ្ងៃ​​បន្ទាប់ពី​​​លោក​នាយក​រដ្ឋមន្ត្រី ហ៊ុន សែន ​បញ្ជា​ឲ្យ​ចាប់​ខ្លួន​លោក​​​​​ក្រោយពេល​ឃើញ​វីដេអូ​ឃ្លីប​​​​​បង្ហោះ​តាម​​ ​ហ្វេស​ប៊ុក​ដែល​​ក្នុង​នោះ​​លោក​បាន​​ធ្វើ​បទ​បង្ហាញ​អំពី​សន្ធិសញ្ញា​​​​​ក្លែង​​​ក្លាយ​​​​​​​​មួយ​រវាង​​កម្ពុជា​ និង​វៀតណាម។​​​

​​​លោក ជួង ជូងី មេ​​​ធាវី​​​​​​ការ​​​ពារ​​​ក្តី​​​របស់​​​លោក សុខហួរ បាន​​​និយាយថា ​​​ការ​​​សម្រេច​​​របស់​​​សាលា​​​ឧទ្ធរណ៍​​​​​​​​​​​​មិន​​​ទទួល​​​យក​​​ពាក្យ​​​បណ្តឹង​​​​​​របស់​​​លោក​​​ គឺ​​​​​​មិន​​​​​​ត្រឹម​​​ត្រូវ​​​ទេ ហើយ​​​លោក​​​នឹង​​​ពិភាក្សា​​​ជា​​​មួយ​​​លោក សុខហួរ​​​ ថា​​​តើ​​​​​​កូន​​​ក្តី​​​លោក​​​​​​នឹង​​​ប្តឹង​​​ទៅ​​​តុលាការ​​​កំពូល​​​ឬ​​​យ៉ាង​​​ណា។​​​​​​

​​​​​​​​​​​​កាល​​​ពី​​​ខែ​​​​​​តុលា​​​​​​ តុលាការ​​​ក្រុង​​​ភ្នំ​​​ពេញ​​​​​​បាន​​​បញ្ជា​​​ឲ្យ​​​​​​​​​មាន​​​ការ​​​​​​ស៊ើប​​​អង្កេត​​​​​​ស្រាវ​​​ជ្រាវ​​​ឡើង​​​វិញ​​​ចំពោះ​​ ​វី​​​ដេអូ​​​ឃ្លីប​​​ ដែល​​​បង្ហោះ​​​លើ​​​ហ្វេស​​​ប៊ុក​​​​​​របស់​​​លោក សុខហួរ​​​​​​​​​ ដោយ​​​​​​សម្រេច​​​ឲ្យ​​​​​​​​​សមាជិក​​​ព្រឹទ្ធ​​​សភា​​​ អាយុ​​​៥៩​​​ឆ្នាំ​​​រូប​​​នេះ ​​​​​​​​​​​​ដាក់​​​កាល​​​បរិច្ឆេទ​​​​​​​​​ឲ្យ​​​បាន​​​ច្បាស់​​​អំពី​​​​​ឯក​​​សារ​​​​​​ដែ​​​ល​​​ដក​​​ចេញ​​​ពី​​​​​​អ៊ិន​​​ធឺណិ​​​ត​​​ និង​​​​​​​​​បញ្ជាក់​​​​​​លេខ​​​ម៉ាស៊ីន​​​ និង​​​ សម្ភារ​​​ដល់​​​តុលាការ។​​​

​​​​​​ក្នុង​​​សវនាការ​​​កាល​​​ពី​​​ខែ​​​តុលា​​​ដែរ​​​​​​​​​ លោក សុខ​​​ហួរ បាន​​​បដិ​​​​​​សេធ​​​​​​ថា​​​មិន​​​បាន​​​​​​​​​ក្លែង​​​ឯក​​​សារ​​​​​​ទេ ដោយ​​​និយាយ​​​​​​ថា លោក​​​បាន​​​រក​​​ឃើញ​​​ឯក​​​សារ​​​នោះ​​​តាម​​​អ៊ិនធឺណិត​​​ច្រើន​​​​​​ឆ្នាំ​​​​​​​​​មក​​​ហើយ៕

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស