31 C
Phnom Penh

ខណៈ​​គណបក្ស​សង្គ្រោះ​ជាតិ​ធ្វើ​​​ពហិការ​ បក្ស​ប្រជា​ជន​​​​អនុម័ត​ច្បាប់​ចំនួន​បី​​យ៉ាង​តក់​ក្រហល

ដោយ ឌឹ ខេមបូឌា ដេលី

បទវិភាគ

ដោយ​គណបក្ស​សង្គ្រោះ​ជាតិ​​ធ្វើ​ពហិការ​​​ការ​ប្រជុំសភា​​កាលពី​ម្សិលមិញ ​គណបក្ស​​ប្រជា​ជន​កម្ពុជា​កំពុង​កាន់​អំណាច​​​បាន​កេង​ចំណេញ​​​ពី​​វត្តមាន​ផ្ដាច់​មុខ​របស់​ខ្លួន​​នៅ​ក្នុង​សភា ដើម្បី​​អនុម័ត​​​ច្បាប់​ដោយ​ឡែក​ចំនួន​បី​ជា​ឯកច្ឆន្ទ​​ ដោយ​មាន​​ការ​ពិភាក្សា​ឬ​ការ​ដេញ​ដោល​តិច​តួច​បំផុត​។

អង្គុយ​ប្រជុំ​​ពី​ម៉ោង​​៨ព្រឹក​រហូត​ដល់​ម៉ោង​៣​រសៀល​ តំណាង​រាស្ត្រ​៦៦​រូប​ក្នុង​ចំណោម​​​​តំណាង​រាស្ត្រ​​ទាំង​៦៨​រូប​​របស់​គណបក្ស​ប្រជាជន​កម្ពុជា​ បាន​អនុម័ត​ច្បាប់​ថវិកាជាតិ​សម្រាប់​ឆ្នាំ​២០១៦ ច្បាប់​ស្ថិតិ និង​ច្បាប់​ទូរគមនាគមន៍​ ដោយ​តំណាង​រាស្ត្រ​​គ្រាន់​តែ​លើក​ឡើង​ត្រួសៗ​ប៉ុណ្ណោះ​អំពី​គុណ​សម្បត្តិ​នៃ​ច្បាប់​នីមួយ​ៗ​មុន​​ពេល​​អនុម័ត​ច្បាប់​ទាំង​នោះ​។

លោក​​​នាយក​​​រដ្ឋ​​​មន្ត្រី ហ៊ុន សែន ចុះ​​​វត្តមាន​​​ចូល​​​ប្រជុំ​​​នៅ​​​រដ្ឋ​​​សភា​​​ កាល​​​ពី​​​ព្រឹក​​​ម្សិលមិញ។ សម័យ​​​ប្រជុំ​​​នេះ​​​បាន​​​អនុម័ត​​​ច្បាប់​​​ចំនួន​​​បី​​​​​​យ៉ាង​​​តក់​​​ក្រហល់​​​​​​ដោយ​​​គ្មាន​​​វត្ត​​​មាន​​​តំណាង​​​រាស្ត្រ​​​គណបក្ស​​​សង្គ្រោះ​​​ជាតិ។ រូបថតៈសីុវ​​​ ចាន់​​​ណា/The Cambodia Daily
លោក​​​នាយក​​​រដ្ឋ​​​មន្ត្រី ហ៊ុន សែន ចុះ​​​វត្តមាន​​​ចូល​​​ប្រជុំ​​​នៅ​​​រដ្ឋ​​​សភា​​​ កាល​​​ពី​​​ព្រឹក​​​ម្សិលមិញ។ សម័យ​​​ប្រជុំ​​​នេះ​​​បាន​​​អនុម័ត​​​ច្បាប់​​​ចំនួន​​​បី​​​​​​យ៉ាង​​​តក់​​​ក្រហល់​​​​​​ដោយ​​​គ្មាន​​​វត្ត​​​មាន​​​តំណាង​​​រាស្ត្រ​​​គណបក្ស​​​សង្គ្រោះ​​​ជាតិ។ រូបថតៈសីុវ​​​ ចាន់​​​ណា/The Cambodia Daily

ល្បឿន​នៃ​ការ​អនុម័ត​​របស់​រដ្ឋសភា​នេះ​គឺ​លឿន​ដូច​ផ្លេកបន្ទោរ​​បើ​ប្រៀប​ធៀប​ទៅ​នឹង​សម័យ​ប្រជុំ​​ផ្សេង​​ៗ​ទៀត​នៃ​រដ្ឋសភា​ដែល​​​​ធ្វើ​ឡើង​នៅ​ឆ្នាំ​នេះ​​ជាមួយ​​តំណាង​រាស្ត្រ​ទាំង​៥៥​រូប​របស់​គណបក្ស​សង្គ្រោះ​ជាតិ​​​​ ដែល​ពេល​ខ្លះ​ច្បាប់​ត្រូវ​បាន​ពិភាក្សា​ដេញ​ដោល​ជាច្រើន​ថ្ងៃ។

ទោះ​ជា​យ៉ាង​ណា លោក ឈាង វុន តំណាង​​រាស្ត្រ​គណបក្ស​ប្រជាជន​កម្ពុជា​បាន​មាន​ប្រសាសន៍​ថា ​ការ​បោះ​ឆ្នោត​​លឿន​​បែប​​​នេះ​គ្មានអ្វី​ខុស​នោះ​ទេ ពីព្រោះ​ច្បាប់​ទាំង​នេះ​​ត្រូវ​បាន​​គណៈកម្មការ​​សភា​​ដែល​ពាក់​ព័ន្ធ​​ពិនិត្យ​​​​​ផ្ទៀង​ផ្ទាត់​យ៉ាង​ប្រុង​ប្រយ័ត្ន​​ជាមុន​រួច​ទៅ​ហើយ​។

លោក​បាន​មាន​ប្រសាសន៍​បន្ទាប់ពី​ការ​ប្រជុំ​​ក្នុង​ថ្ងៃ​នោះ​​ថា ”​វា​ពិត​ជា​មាន​តម្លាភាព​ ពីព្រោះ​រដ្ឋសភា​បាន​អនុម័ត​ច្បាប់​ទាំង​នេះ​ដោយ​មាន​តំណាង​រាស្ត្រ​៦៨​រូប​​​ដែល​តំណាង​​​ឲ្យ​ប្រជាពលរដ្ឋ​ទូទាំង​ប្រទេស​។ ​វា​មិន​មែន​ជា​លើក​ទី១​ទេ​ដែល​រដ្ឋសភា​បាន​អនុម័ត​​ច្បាប់​ចំនួន​បី​ក្នុង​ពេល​​មួយ​ថ្ងៃ។ យើង​បាន​​ធ្វើ​បែប​នេះ​ជា​ញឹក​ញាប់​​មកហើយ ពីព្រោះ​យើង​​បាន​​ពិភាក្សា​រួច​ហើយ​​នៅ​ក្នុង​គណៈ​កម្មការ​ជំនាញ​។ គ្មាន​ប្រទេស​ណា​ពិភាក្សា​ដេញ​ដោល​​​​រឿង​ផ្សេងៗ​អំឡុង​សម័យ​ប្រជុំ​សភា​ពេញអង្គ​ទេ។ សវនាការ​​​​​ត្រូវ​បាន​ធ្វើ​ឡើង​នៅ​ក្នុង​គណៈកម្មការ​ សូម្បី​នៅ​អាមេរិក​​ ​និង​បារាំង​​ក៏​​គេ​ធ្វើ​អ៊ីចឹង​ដែរ។ ប្រជា​ធិបតេយ្យ​​​មិន​មាន​ន័យ​ថា ទាល់​តែ​ពិភាក្សា​ដេញ​ដោល​​នៅ​ក្នុង​សម័យ​ប្រជុំពេញអង្គ​ទេ។ យើង​ត្រូវ​ធ្វើ​ការ​ជាមួយ​គ្នា​​នៅ​ក្នុង​គណៈកម្មការ​ជំនាញ”។

​សូម​រំឭក​ថា ​​បន្ទាប់ពី​កិច្ចព្រមព្រៀង​​នយោ​បាយ​កាលពី​ឆ្នាំ​មុន គណបក្ស​ប្រជាជន​កម្ពុជា​​ និង​គណបក្ស​សង្គ្រោះ​ជាតិ​​គ្រប់​គ្រង​ម្នាក់​ប្រាំ​​នៃ​គណៈកម្មការ​សភា​ទ្វេ​បក្ស​ដែល​ទទួល​បន្ទុក​​​​​​គោល​នយោបាយ​​ជាក់​លាក់​រៀងៗ​ខ្លួន​ដូច​ជា​​វិស័យ​អប់រំ ការ​ពារ​ជាតិ​​ ឬ​បញ្ហា​ស្ត្រី​ជាដើម។ គណៈកម្មការ​នីមួយៗ​​ត្រូវ​ពិនិត្យ​ផ្ទៀង​ផ្ទាត់​ច្បាប់​ក្រោម​​រង្វង់​សមត្ថកិច្ច​របស់​ខ្លួន។

ខណៈ​ក្រុម​​តំណាង​រាស្ត្រ​​គណបក្ស​កាន់​អំណាច​មាន​សំឡេង​ភាគច្រើន​​នៅ​ក្នុង​សភា​​ដែល​មាន​១២៣​អាសនៈ សម័យ​ប្រជុំ​ចាប់​តាំង​ពី​ខែ​​សីហា​​កន្លង​ទៅ​​ក៏​​បាន​បង្ហាញ​​ពី​សំឡេង​ប្រឆាំង​​​របស់​តំណាង​រាស្ត្រ​​គណបក្ស​​សង្គ្រោះ​ជាតិ​​ដែរ។

ទោះ​ជាយ៉ាង​ណា កាលពី​​៦សប្ដាហ៍​មុន​តំណាង​រាស្ត្រ​គណបក្ស​សង្គ្រោះ​ជាតិ​​​ពីរ​រូប​​បាន​រង​ការ​វាយ​ដំ​ពី​សំណាក់​​​​​ក្រុម​បាតុករ​គាំទ្រ​​​គណបក្ស​ប្រជាជន​កម្ពុជា​​​ ដែល​រួម​មាន​ទាំង​ទាហាន​ស្លៀក​ពាក់​ស៊ីវិល​ផង ខណៈ​ពួក​លោក​ចេញពី​​ប្រជុំ​សភា​។ ការ​វាយ​ប្រហារ​​​ដ៏​សាហាវ​នេះ​​បាន​កើត​មាន​​បួន​ថ្ងៃ​មុន​ពេល​​គណបក្ស​ប្រជាជន​កម្ពុជា​ទម្លាក់​​​លោក កឹម សុខា ​អនុប្រធាន​គណបក្ស​ប្រឆាំង​​​ចេញពី​តំណែង​អនុប្រធាន​រដ្ឋសភា។

បន្ទាប់​មក លោក សម រង្ស៊ី ​ប្រធាន​គណ​បក្ស​​​សង្គ្រោះ​ជាតិ​​ត្រូវ​បាន​តុលាការ​បង្គាប់​ឲ្យ​​ចាប់​ខ្លួន​កាលពី​ខែ​មុន​ ហើយ​​​ឋានៈ​ជា​តំណាង​​​​រាស្ត្រ​របស់​លោក​ត្រូវ​បាន​ដក​ចេញ​​ភ្លាមៗ​។ ជា​​​​លទ្ធផល ​​កាលពី​ថ្ងៃ​អាទិត្យ​គណបក្ស​សង្គ្រោះជាតិ​​បាន​ប្រកាស​ធ្វើ​ពហិការ​មិន​ចូល​ប្រជុំសភា​រហូត​ទាល់​តែ​សុវត្ថិភាព​របស់​​ពួកគាត់​ត្រូវ​បាន​ធានា​ ហើយ​កិច្ចសហ​ប្រតិ​បត្តិការ​​​​ត្រូវ​បាន​ស្ដារ​ឡើង​វិញ​។

​ទោះ​ជា​យ៉ាង​ណា គណបក្ស​ប្រជាជន​កម្ពុជា​ហាក់​ដូច​ជា​មិន​ភ្ញាក់​ផ្អើល​ឡើយ​កាលពី​ម្សិល​មិញ។ អំឡុង​សុន្ទរកថា​​​របស់​ខ្លួន​ស្ដីពី​ថវិកា​ជាតិ​សម្រាប់​ឆ្នាំ​ក្រោយ ​ដែល​រួម​មាន​​​​​​ការ​ដំឡើង​ការ​ចំណាយ​១២,៣ភាគរយ​ដល់​​៤,២៧​ពាន់​លាន​ដុល្លារ​​នៅ​ឆ្នាំ​ក្រោយ​ លោក ​​អូន ព័ន្ធមុនីរ័ត្ន រដ្ឋមន្ត្រី​ក្រសួង​​​ហិរញ្ញវត្ថុ​​មាន​ប្រសាសន៍​ថា រដ្ឋាភិបាល​​កំពុង​បន្ត​​​ការ​ងារ​​។

លោក​បាន​ថ្លែង​ថា ​ការ​រីក​ចម្រើន​យ៉ាង​ឆាប់​រហ័ស​​នៅក្នុង​ប្រទេស​កម្ពុជា​បាន​បង្ខំ​ឲ្យ​រដ្ឋាភិបាល​របស់​គណបក្ស​ប្រជាជន​កម្ពុជា​បង្កើន​កម្ចី​សាធារណៈ​​ពី​៨២២លាន​ដុល្លារ​​នៅ​ឆ្នាំ​​នេះដល់​ប្រហែល​៩៦០លាន​ដុល្លារ​​នៅ​ឆ្នាំ​​ក្រោយ​ ដើម្បី​បង្គ្រប់​ថវិកា​ជាតិ​។

លោក​លើក​ឡើង​ទៀត​ថា ”​ការ​បង្កើន​​កម្ចី​​នេះ​​ គឺ​ដើម្បីទូទាត់​ការ​ធ្លាក់​ចុះ​ហិរញ្ញប្បទាន​ឥតសំណង​ពី​បណ្ដា​ដៃគូ​អភិវឌ្ឍន៍ ដោយ​សារ​​​តែ​​​នៅ​កម្ពុជា​មាន​ការ​រីក​ចម្រើន​​ជាង​មុន ដែល​​​ធ្វើ​ឲ្យ​ដៃគូ​អភិវឌ្ឍន៍​​បង្វែរ​ទៅ​ជា​​ឥណទាន​អនុគ្រោះ​​ជំនួស​ឲ្យ​​​ហិរញ្ញប្បទាន​ឥត​សំណង។ ប្រទេស​មួយ​ចំនួន​ដែល​ធ្លាប់​ផ្ដល់​ហិរញ្ញប្បទាន​​​ឥត​សំណង​ដល់​យើង​ ក៏​កំពុង​​ប្រឈម​ការ​លំបាក​ខ្លះ​ដែរ​”។

​នៅ​ឆ្នាំ​នេះ​ ​កម្ពុជា​​គ្រោង​នឹង​​​បង្កើន​ឋានៈ​​ពី​ប្រទេស​​ដែល​មាន​ “​ប្រាក់​ចំណូល​ទាប​” ទៅ​ជា​ប្រទេស​​ដែល​មាន​​ ”​ប្រាក់​ចំណូល​ក្រោម​មធ្យម” តាម​ការ​វាស់​ស្ទង់​របស់​ធនាគារ​ពិភព​លោក នៅ​ពេល​ខ្លួន​ឆ្លង​ផុត​តួលេខ​​​ផលិត​ផល​ជាតិ​សរុប​ក្នុង​ម្នាក់ៗ​​១.០៤៥​ដុល្លារ​ ដោយ​កាត់​បន្ថយ​ការ​ទទួល​បាន​ជំនួយ​របស់​ខ្លួន​។

ការ​បង្កើន​កម្ចី​​រួម​ជាមួយ​នឹង​កំណែទម្រង់​​ប្រមូល​ពន្ធ​កាលពី​ពេល​ថ្មីៗ​នេះ នឹង​ជួយ​​ដល់​ការ​​បង្កើន​ខ្ទង់​ចំណាយ​​១២,៣​ភាគរយ​នៅ​ឆ្នាំ​ក្រោយ​ ដែល​រួម​មាន​ទាំង​ការ​​​បង្កើន​ការ​ចំណាយ​២៨​ភាគរយ​សម្រាប់​វិស័យ​អប់រំ​រហូត​ដល់​ជិត​កន្លះ​ពាន់​លាន​ដុល្លារ​ និង​​ការ​បង្កើន​ការ​ចំណាយ​១៧ភាគរយ​សម្រាប់​វិស័យ​ការ​ពារ​ជាតិ​​រហូត​ដល់​ប្រហែល​​៣៧៩​លាន​ដុល្លារ​។

ទោះ​ជាយ៉ាង​ណា លោក ទៀ បាញ់ រដ្ឋ​មន្ត្រី​​ក្រសួង​ការ​ពារ​ជាតិ​​​បាន​ថ្លែង​ទៅ​កាន់​ក្រុម​អ្នក​យក​ព័ត៌មាន​អំឡុង​ពេល​​ចេញពី​​ប្រជុំស​ភា​ថា លោក​ជឿ​ថា ក្រសួង​របស់លោក​​​​មិន​ទទួល​បាន​​ការ​ដំឡើង​​​​ទេ ដោយ​លោក​បក​ស្រាយ​ថា ភាគច្រើន​នៃ​ការ​​​ដំឡើង​​នោះ​គឺ​ធ្លាក់​ទៅ​លើ​​មន្ត្រី​ និង​ទាហាន​​ដោយ​ផ្ទាល់​។

លោក​បាន​គូស​បញ្ជាក់​ថា “​បើ​ពិនិត្យមើល​ថវិកា​ឲ្យ​ទូលំទូលាយ ខ្ញុំ​មិន​ឃើញ​​កំណើន​​ណាមួយ​នៅ​ក្នុង​វិស័យ​ការ​ពារ​ជាតិ​ទេ។ ភាគ​ច្រើន​​គឺ​យើង​នឹង​ដំឡើង​ប្រាក់​ខែ​”។

ច្បាប់​ចម្លង​មួយ​នៃ​​ច្បាប់​ថវិកា​ជាតិ​បញ្ជាក់​ថា ​ប្រហែល​៨០​ភាគរយ​នៃ​ថវិកា​ការ​ពារ​ជាតិ​​​ នឹង​ធ្លាក់​ទៅ​លើ​ប្រាក់​ខែ​ដែល​​គណ​បក្ស​សង្គ្រោះ​​​ជាតិ​បាន​គាំទ្រ​​ជា​គោល​ការណ៍ ប៉ុន្តែ​ទន្ទឹម​នឹង​នេះ​គណបក្ស​ប្រឆាំង​មួយ​នេះ​ក៏​បាន​​ព្រមាន​ដែរ​ចំពោះ​​វត្តមាន​​​​​មន្ត្រី​ “​ខ្មោច​” ឬ​ក្លែង​ក្លាយ​ដែល​មាន​នៅ​ក្នុង​បញ្ជី​ប្រាក់​បៀវត្សរ៍​​​ដើម្បី​ឲ្យ​អ្នក​ផ្សេង​ប្រមូលយក​ប្រាក់​ខែ​របស់​ពួកគេ​។

នៅ​ឯ​ទីស្នាក់ការ​កណ្ដាល​​របស់​គណបក្ស​សង្គ្រោះជាតិ​​ក្នុង​ខណ្ឌមានជ័យ ​រាជធានី​ភ្នំពេញ​​​​កាលពី​ម្សិលមិញ គណបក្ស​ប្រឆាំង​បាន​​រៀប​ចំ​​កិច្ច​ពិភាក្សា​ផ្ទាល់​ខ្លួន​ក្នុង​ពេល​ដំណាល​គ្នា​​ស្ដីពី​ថវិកា​ជាតិ​​សម្រាប់​ឆ្នាំ​២០១៦ ក្រោម​អធិបតី​ភាព​លោក ប៉ុល ហំម ប្រធាន​​ស្ដីទី​​ ខណៈ​លោក សម រង្ស៊ី និង​លោក កឹម សុខា កំពុង​ស្ថិត​នៅ​បរទេស​។

បច្ចុប្បន្ន លោក សម រង្ស៊ី កំពុង​និរទេស​ខ្លួន​នៅ​អឺរ៉ុប​ដើម្បី​​គេច​វេះ​ពី​ការ​ចាប់​ខ្លួន​។ លោក យ៉ែម បុញ្ញឫទ្ធិ អ្នក​នាំពាក្យ​គណបក្ស​សង្គ្រោះជាតិ​​​​​បាន​មាន​ប្រសាសន៍​បន្ទាប់ពី​ការ​​​ប្រជុំ​ថា ​លោក​មិន​ដឹង​​ច្បាស់​​ថា​លោក កឹម សុខា នៅ​ទីណា​ទេ ប៉ុន្តែ​គណបក្ស​បាន​សម្រេច​​​​ហើយ​​​​ថា តំណាង​រាស្ត្រ​​របស់​ខ្លួន​មិន​គាំទ្រ​ថវិកា​ជាតិ​នេះទេ​។

​​ដោយ​ចង្អុល​បង្ហាញ​ថា ការ​បង្កើន​កម្ចី​បរទេស​គឺ​ជា​បញ្ហា​មួយ​ក្នុង​ចំណោម​បញ្ហា​​​ពាក់​​ព័ន្ធ​ថវិកា​ជាតិ លោក​បាន​​​មាន​ប្រសាសន៍​ថា ”​នៅ​ក្នុង​ថវិកា​ជាតិ​សម្រាប់​ឆ្នាំ​២០១៦​យើង​ មើល​ឃើញ​​ចំណុច​វិជ្ជមាន​ខ្លះ​ និង​អវិជ្ជ​មាន​ខ្លះ​។ យើង​​​​ត្រូវ​​ការ​​ឲ្យ​ចំណូល​ និង​ឥណ​ទាន​មាន​តុល្យភាព​។ ដើម្បី​​តុល្យភាព​ល្អ​ប្រសើរ​​​​គឺ​ត្រូវ​ប្រមូល​ចំណូល​ឲ្យ​បាន​ហ្មត់ចត់ និង​ពន្ធ​ដារ​ឲ្យ​បាន​ត្រឹម​ត្រូវ​ ហើយ​កាត់​បន្ថយ​ការ​​​ចំណាយ​មិន​ចាំបាច់​។ និយាយ​រួម​ យើង​មិន​​គាំទ្រ​​សេចក្ដី​ព្រាង​ច្បាប់​នោះទេ​”។

​អ្នក​នាំពាក្យ​រូប​នេះ​បាន​លើក​ឡើង​បន្ត​ថា លោក​​មាន​ការ​សោក​ស្ដាយ​ដែល​គណបក្ស​សង្គ្រោះ​ជាតិ​​មិន​អាច​​​ចូល​​សភា​បាន​ ហើយ​បាន​អំពាវ​នាវ​ឲ្យ​រដ្ឋាភិបាល​ធានា​សុវត្ថិភាព​​របស់​​​តំណាង​រាស្ត្រ​គណបក្ស​​ប្រឆាំង ហើយ​វិល​ទៅ​រក​ស្មារតី​នៃ​កិច្ច​សហប្រតិបត្តិការ​សភា​​ក្នុង​ពេល​ឆាប់ៗ។

ទាក់​ទិន​​បញ្ហា​នេះ លោក អេង ឆៃអ៊ាង តំណាង​រាស្ត្រ​​មួយ​រូប​ទៀត​របស់​គណបក្ស​សង្គ្រោះជាតិ​​​​ប្រើ​ពាក្យ​មិន​សូវ​ធ្ងន់ធ្ងរ​ប៉ុន្មាន​ទេ ដោយ​លោក​បាន​បង្ហោះ​​​សេចក្ដី​ថ្លែង​ការណ៍​មួយ​នៅ​​លើ​​ទំព័រ​ហ្វេសប៊ុក​​​របស់​លោក​​នៅ​រសៀល​ថ្ងៃ​នោះ ដោយ​​ពណ៌នា​អំពី​សម័យ​ប្រជុំ​សភា​​ដែល​គ្មាន​​វត្តមាន​​គណ​បក្ស​ប្រឆាំង​ចូលរួម​ថា គ្មាន​រសជាតិ​។

លោក​បាន​សរសេរ​ថា “​ការ​ប្រជុំ​រដ្ឋសភា​នៅ​ថ្ងៃ​នេះ​ដោយ​គ្មាន​វត្តមាន​​អ្នក​តំណាង​រាស្ត្រ​គណបក្ស​​សង្គ្រោះ​ជាតិ​អាច​ប្រៀប​បាន​​ទៅ​​នឹង​សម្ល​ដែល​មាន​តែ​ទឹក និង​ត្រី ហើយ​គ្មាន​អំបិល បន្លែ​ ឬ​គ្រឿង​ផ្សំ​ផ្សេង​ទៀត”៕ សុខុម (រាយការណ៍​ដោយ ម៉ិច ដារ៉ា)​​​​​​​​​​​​​​​​​​​​​​​

 

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស