ពីរសប្តាហ៍បន្ទាប់ពីអាជ្ញាធរបានបំផ្លាញផ្ទះរបស់ប្រជាពលរដ្ឋរាប់សិបគ្រួសារក្នុងខេត្តបាត់ដំបង នៅពេលដែលពួកគេតវ៉ានៅមុខការិយាល័យស្រុករុក្ខគិរី អ្នកភូមិប្រហែល២០០នាក់បាននាំយកសាទុក្ខរបស់ពួកគេមកអភិបាលខេត្តកាលពីថ្ងៃច័ន្ទ។
អ្នកភូមិទាំងនោះកំពុងទាមទារឲ្យដកមន្ត្រីមូលដ្ឋានពីរនាក់ និងប្រធានសហគមន៍ម្នាក់ ដែលពួកគេចោទថា បានរួមគំនិតជាមួយពួកឈ្មួញឈើដើម្បីកាប់ព្រៃសហគមន៍របស់ពួកគាត់ដោយខុសច្បាប់។ ពួកគេក៏ចង់ប្រើតំបន់ដីព្រៃមួយផ្នែកដើម្បីដាំដំឡូងមីផងដែរ។
ក្រុមនេះបានចាកចេញពីឃុំស្តុកប្រវឹក នៅម៉ោងប្រហែល៦ព្រឹក ហើយត្រូវប៉ូលិសស្កាត់ផ្លូវពីរដងក្នុងពេលធ្វើដំណើរ នៅទីបញ្ចប់ពួកគេបានមកដល់សាលាខេត្តក្នុងក្រុងបាត់ដំបង នៅម៉ោងប្រហែល១១ថ្ងៃ។
លោក ចិត្រ វណ្ណី ស្នងការរងខេត្ត បានមានប្រសាសន៍ថា “យើងបានឃាត់ពួកគេនៅតាមផ្លូវដើម្បីឆែករកលិខិតអនុញ្ញាត ពីព្រោះយើងបារម្ភថា ពួកគេអាចបង្កអំពើហិង្សា។ ក្រោយពីយើងបានសួរពួកគេ យើងបានអនុញ្ញាតឲ្យពួកគេបន្តដំណើរ”។
លោក ចាន់ សុផល អភិបាលខេត្ត បានជួបជាមួយតំណាងបីនាក់របស់ក្រុមអ្នកភូមិនៅការិយាល័យរបស់លោក និងបានទទួលពាក្យបណ្តឹងរបស់ពួកគេ ដែលបានអំពាវនាវឲ្យដកប្រធានផ្នែកជលផល យូ បញ្ញវន្ត មេឃុំ អ៊ូ អៀង ប្រធានសហគមន៍របស់ពួកគេផ្ទាល់ឈ្មោះ អ៊ុន អឿង។
ក្រុមអ្នកភូមិបានបន្ទោសមន្ត្រីបីនាក់នេះ ថាបានបណ្តោយឲ្យមានការកាប់ឈើខុសច្បាប់ស្រេចតែចិត្តក្នុងព្រៃសហគមន៍តាអឿនទំហំ១.៣២៤ហិកតា ដែលត្រូវបានបង្កើតឡើងដោយក្រសួងកសិកម្មក្នុងឆ្នាំ២០០២ និងបម្រុងទុកប្រើជាប្រភពអាហារសម្រាប់ប្រជាពលរដ្ឋ២៥០គ្រួសារដែលរស់នៅក្នុងតំបន់នោះ។
កាលពីខែមុន នៅពេលដែលអ្នកភូមិប្រហែល១០០នាក់បានបិទផ្លូវនៅក្រៅការិយាល័យស្រុកដើម្បីទាមទារឲ្យដកលោក បញ្ញាវន្ត អាជ្ញាធរបានដុតបំផ្លាញផ្ទះបួនខ្នង និងកម្ទេចជម្រកតូចៗ៣៥កន្លែងដោយរណារ ព្រោះពួកគេបាននិយាយថា សំណង់ទាំងនោះសង់ដោយខុសច្បាប់ក្នុងតំបន់ព្រៃការពារ។
លោក ព្រំ ពត់ តំណាងម្នាក់ដែលបានជួបជាមួយលោកអភិបាលខេត្តកាលពីថ្ងៃច័ន្ទ បាននិយាយថា ក្រុមមន្ត្រីមូលដ្ឋាននិងអ្នកតំណាងឲ្យសហគមន៍ មិនបានប្រឹងប្រែងដើម្បីការពារព្រៃនេះទេ។
គាត់បាននិយាយថា “ផ្ទុយទៅវិញ ពួកគេបានរួមគំនិតជាមួយពួកឈ្មួញកាប់ផ្តួលដើមឈើ និងលក់ដីព្រៃសហគមន៍ ហើយបន្ទាប់មកចែកលុយគ្នា”។
លោក អៀង ជាមេឃុំ បានបដិសេធថា មិនបានធ្វើខុសទេ និងបានអះអាងថា អ្នកភូមិចង់ឲ្យគេដកគាត់ចេញ ពីព្រោះគាត់បានរារាំងពួកគេមិនឲ្យឆ្ការព្រៃដើម្បីប្រើជាដីកសិកដ្ឋាន។
លោកបាននិយាយថា “ពួកគេចង់ដកខ្ញុំពីតំណែងរបស់ខ្ញុំ ពីព្រោះយើងមិនបានអនុញ្ញាតឲ្យពួកគេកាប់ឆ្ការដីព្រៃសហគមន៍”។
លោក បញ្ញាវន្ត និងលោក អឿង មិនអាចទាក់ទងសុំការពន្យល់បានទេ៕និត