កាលពីម្សិលមិញ តុលាការបានចេញដីកាចាប់ខ្លួនជំនួយការម្នាក់របស់លោក សម រង្ស៊ី ប្រធានគណបក្សប្រឆាំង ដែលជួយគ្រប់គ្រងទំព័រហ្វេសប៊ុកដ៏មានប្រជាប្រិយភាពរបស់លោក និងជាអ្នកទទួលខុសត្រូវចំពោះការផលិតវីដេអូដែលក្នុងនោះលោក ហុង សុខហួរ សមាជិកព្រឹទ្ធសភាដែលកំពុងជាប់ពន្ធនាគារ ធ្វើបទបង្ហាញអំពីសន្ធិសញ្ញាក្លែងក្លាយមួយ។
កាលពីខែសីហា លោក ហុង សុខហួរ ត្រូវបានបញ្ជាឲ្យចាប់ខ្លួនដោយលោកនាយករដ្ឋមន្ត្រី ហ៊ុន សែន ដែលកើតជំងឺដេកមិនលក់បន្ទាប់ពីមើលវីដេអូសមាជិកព្រឹទ្ធសភារូបនេះធ្វើបទបង្ហាញសន្ធិសញ្ញាក្លែងក្លាយដែលបង្ហាញពីកិច្ចព្រមព្រៀងមួយជាមួយប្រទេសវៀតណាម ដើម្បីរម្លាយព្រំដែនភាគខាងកើត។
លោក សម រង្ស៊ី ដែលពេលនេះកំពុងនិរទេសខ្លួននៅបរទេសដើម្បីគេចវេះដីកាចាប់ខ្លួនលោកដែលតុលាការបានចេញកាលពីខែមុន ត្រូវបានកោះហៅឲ្យចូលខ្លួនទៅតុលាការនៅថ្ងៃសុក្រ ដើម្បីធ្វើការសាកសួរទាក់ទិនវីដេអូខាងលើតាមការចោទប្រកាន់បណ្ដោះអាសន្នពីបទសមគំនិតក្លែងបន្លំឯកសារ និងបទញុះញង់។
ទោះជាយ៉ាងណា លោក សម រង្ស៊ី បានគូសបញ្ជាក់ថា លោកមិនបានស្ថិតនៅក្នុងប្រទេសកម្ពុជាទេ នៅពេលវីដេអូនោះត្រូវបានបង្ហោះ ហើយមានប្រសាសន៍ថា ក្រុមការងារហ្វេសប៊ុករបស់លោកជាអ្នកបង្ហោះវីដេអូនោះ ហើយបន្ទាប់មកក៏បានលុបវាចោលវិញ។
ដីកាចាប់ខ្លួនកាលពីម្សិលមិញ គឺសម្រាប់លោក សម្បត្តិ សត្យា ជាសមាជិកម្នាក់ក្នុងចំណោមសមាជិកសំខាន់ៗនៃក្រុមការងារហ្វេសប៊ុករបស់លោក សម រង្ស៊ី។
ដីកាចាប់ខ្លួននេះមានខ្លឹមសារថា “ឈ្មោះ សម្បត្តិ សត្យា កើតថ្ងៃទី១៤ ខែកុម្ភៈ ឆ្នាំ១៩៩០ ត្រូវចោទប្រកាន់ពីបទសមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តកាលពីថ្ងៃទី១២ និង១៣ ខែសីហា ឆ្នាំ២០១៥”។
ដីកានេះបញ្ជាក់ថា លោក សម្បត្តិ សត្យា ត្រូវគេជឿថាកំពុងរត់គេចខ្លួន ហើយ “បញ្ជាដល់កម្លាំងសាធារណៈឲ្យស្រាវជ្រាវរកចាប់ និងនាំខ្លួនឈ្មោះខាងលើនេះមកប្រគល់ជូនសាលាដំបូងរាជធានីភ្នំពេញ ដើម្បីចាត់ការតាមច្បាប់”។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានី មានប្រសាសន៍ថា លោកបានឃើញដីកាចាប់ខ្លួនលោក សម្បត្តិ សត្យា ហើយ ព្រមទាំងដីកាដោយឡែកមួយទៀតសម្រាប់ចាប់ខ្លួនលោក អ៊ុង ជុងលាង ប្រធានក្រុមការងារទំព័រហ្វេសប៊ុករបស់លោក សម រង្ស៊ី ផងដែរ។
លោកបានលើកឡើងថា ”ខ្ញុំបានឃើញដីកាចាប់ខ្លួននេះហើយ ហើយខ្ញុំមិនចាត់ការសំណុំរឿងនេះទៀតទេ។ មានមនុស្សពីរនាក់”។
លោក ប៉ែន ពុទ្ធសភា ជា “អ្នករាយការណ៍ពិសេស” ម្នាក់ដែលធ្វើការសម្រាប់កម្មវិធីព័ត៌មានពេលរាត្រីលើទំព័រហ្វេសប៊ុករបស់លោក សម រង្ស៊ី និយាយថា លោក សម្បត្តិ សត្យា លោក អ៊ុង ជុងលាង និងជំនួយការម្នាក់ទៀតដែលពាក់ព័ន្ធការផលិតវីដេអូនេះ បានរត់ភៀសខ្លួនទៅប្រទេសហ្វីលីពីន បាត់ហើយតាមការណែនាំថា ពួកគេអាចប្រឈមការចាប់ខ្លួន។
លោកបានបន្តថា ”ពួកគេកំពុងស្ថិតនៅក្នុងប្រទេសហ្វីលីពីន។ យើងសុំឲ្យយុវជនទាំងអស់នោះកុំភ័យស្លន់ស្លោ ឬព្រួយបារម្ភអី ពីព្រោះចំណាត់ការនេះគឺដើម្បីបំបាក់ស្មារតីរបស់យុវជន ហើយបើយើងខ្លាចការគំរាមកំហែងរបស់ពួកគេ ប្រទេសជាតិនឹងចប់ ហើយប្រជាធិបតេយ្យនឹងមិនកើតឡើងទេ”។
លោកបាននិយាយទៀតថា សមាជិកទី៣នៃក្រុមនេះគឺលោក សម្បត្តិ ដេវីដ ដែលជាជំនួយការរបស់លោក ហុង សុខហួរ ប៉ុន្តែលោកមិនទាន់ឃើញដីកាចាប់ខ្លួនជំនួយការរូបនេះនៅឡើយទេ។
ចំណែកឯលោក ឆៃ ស៊ីណារិទ្ធ អគ្គស្នងការរងនគរបាលជាតិទទួលបន្ទុកសន្តិសុខផ្ទៃក្នុងបានមានប្រសាសន៍ថា លោកមិនទាន់ទទួលបានដីកាចាប់ខ្លួនណាមួយទេ។ ”សំណុំរឿងនេះកំពុងស្ថិតក្នុងដៃចៅក្រមស៊ើបសួរ។ វាទំនងជាធ្លាក់ដល់ដៃក្រសួង ឬនគរបាលហើយ ប៉ុន្តែយើងមិនទាន់ទទួលបានទេ”។
ឧត្តមសេនីយ៍ឯករូបនេះមានប្រសាសន៍ទៀតថា នគរបាលអាចនឹងស្នើសុំឲ្យនគរបាលអន្តរជាតិអាំងទែប៉ូលជួយស្វែងរកបុរសដែលសមត្ថកិច្ចកំពុងតាមចាប់ខ្លួនទាំងនេះនៅក្នុងប្រទេសហ្វីលីពីន ប្រសិនបើអាចកសាងសំណុំរឿងដែលគួរឲ្យជឿទុកចិត្ត។
លោកបានគូសបញ្ជាក់ថា ”យើងចាំបាច់ត្រូវពិនិត្យមើលវិធាន និងគោលការណ៍របស់អាំងទែប៉ូល។ ប្រសិនបើសំណុំរឿងនេះស្របតាមគោលការណ៍របស់អាំងទែប៉ូល យើងនឹងធ្វើការស្នើសុំ ពីព្រោះអាំងទែប៉ូលត្រូវការភ័ស្តុតាង និងអ្វីជាច្រើនផ្សេងទៀត”។
សូមរំឭកថា កាលពីខែមុន លោក សម រង្ស៊ី ថ្លែងថា លទ្ធភាពនៃការចោទប្រកាន់លោកទាក់ទិនវីដេអូខាងលើនេះដែលអាចមានទោសជាប់ពន្ធនាគាររហូតដល់ទៅ១៧ឆ្នាំ គឺមិនសមរម្យឡើយ ពីព្រោះលោកមិនជាប់ពាក់ព័ន្ធនឹងការផលិតវីដេអូនោះ។
លោក សម រង្ស៊ី បានសរសេរក្នុងសារអេឡិចត្រូនិកមួយកាលពីថ្ងៃទី២១ ខែវិច្ឆិកាថា ”លោក ហុង សុខហួរ សមាជិកព្រឹទ្ធសភា បានបង្ហោះការធ្វើបទបង្ហាញ/ឯកសាររបស់លោកលើទំព័រហ្វេសប៊ុករបស់ខ្ញុំកាលពីថ្ងៃទី១២ ខែសីហា ឆ្នាំ២០១៥។ វាត្រូវបានលុបចេញវិញមិនដល់២៤ម៉ោងក្រោយផងកាលពីថ្ងៃទី១៣ ខែសីហា។ ចាប់ពីសប្ដាហ៍ទី៤ នៃខែកក្កដា ដល់ថ្ងៃទី១៥ ខែសីហា ខ្ញុំស្ថិតនៅសហរដ្ឋអាមេរិក អឺរ៉ុប ឬកំពុងជិះយន្តហោះ ហើយទើបតែត្រឡប់មកកម្ពុជាវិញកាលពីថ្ងៃទី១៦ ខែសីហា ប៉ុណ្ណោះ។ ទំព័រហ្វេសប៊ុករបស់ខ្ញុំមានអ្នកគ្រប់គ្រងពីរនាក់ និពន្ធនាយកពីរនាក់ និងអ្នកសម្របសម្រួលពីរនាក់”។
ប្រធានគណបក្សប្រឆាំងរូបនេះដែលមានប្រសាសន៍ថា លោកនឹងធ្វើដំណើរទៅដល់ទីក្រុងព្រុចសែលនៅថ្ងៃច័ន្ទ មិនអាចទាក់ទងតាមទូរស័ព្ទបានទេកាលពីម្សិលមិញ ហើយលោកមិនបានឆ្លើយតបសារអេឡិចត្រូនិកដែលស្នើសុំឲ្យលោកឆ្លើបំភ្លឺជុំវិញដីកាចាប់ខ្លួនចុងក្រោយនេះឡើយ៕ សុខុម (រាយការណ៍បន្ថែមដោយ Alex Willemyns)