សមាជិក​សភា​សហរដ្ឋ​អាមេរិក​​សម្ដែង​កង្វល់​អំពី​ប្រទេស​កម្ពុជា

សមាជិក​សភា​សហរដ្ឋ​​​អាមេរិក​​១៦​រូប​​​បាន​សរសេរ​លិខិត​​​មក​លោក​នាយករដ្ឋមន្ត្រី​ ហ៊ុន សែន​ ដើម្បី​បន្ថែម​​ការ​ព្រួយ​បារម្ភ​របស់​ខ្លួន​​ទៅ​លើ​ការ​អំពាវនាវ​ថ្មីៗ​​ជាច្រើន ដើម្បី​ឲ្យ​មាន​ការ​​ស្ដារ​បរិយាកាស​ប្រជាធិបតេយ្យ​​ក្នុង​ប្រទេស​កម្ពុជា​ឡើង​វិញ និង​​ឲ្យ​លុប​ចោល​​ដីកា​ចាប់​ខ្លួន​​ដែល​ចេញ​​ចំពោះ​​លោក សម រង្ស៊ី មេដឹកនាំ​គណបក្ស​ប្រឆាំង។

ដោយ​មាន​​ហត្ថលេខា​​សមាជិក​​​​សភា​សហ​រដ្ឋ​​​អាមេរិក​​ទាំង​ខាង​គណបក្ស​​ប្រជាធិប​​តេយ្យ​​​ ទាំង​​ខាង​គណបក្ស​​​សាធារណរដ្ឋ​​ លិខិត​ដែល​ចុះ​កាលបរិច្ឆេទ​ថ្ងៃ​ព្រហស្បតិ៍​​ ផ្ញើ​មក​លោក ហ៊ុន សែន ​សម្ដែង​នូវ​ “​កង្វល់​​ដ៏ជ្រាល​ជ្រៅ​អំពី​ការ​ប្រឹង​ប្រែង​​​ដើម្បី​បង្អាក់​ការ​ចម្រើន​លូតលាស់​​​នៃ​លទ្ធិប្រជាធិបតេយ្យ​ក្នុង​ប្រទេស​​​របស់​អ្នក”។

លិខិត​​​​​​លើក​ឡើង​នូវ​ការ​ដក​លោក សម រង្ស៊ី ចេញ​ពី​សភា​ជាតិ​កាលពី​ខែ​វិច្ឆិកា ព្រមទាំង​ការ​វាយ​ដំ​ច្រំធាក់​ដ៏ឃោរឃៅ​កាលពី​ថ្ងៃទី​២៦​​​​​ខែ​តុលា លើ​​តំណាង​រាស្ត្រ​គណបក្ស​សង្គ្រោះ​​ជាតិ​ពីរ​រូប​នៅ​ក្រៅ​សភា ​ដោយ​អំពាវ​នាវ​​ដល់​​​លោក​នាយក​​រដ្ឋមន្ត្រី​ឲ្យ​ ”​បញ្ឈប់​ការ​រំខាន​យាយី​ និង​ការ​ធ្វើ​ទុក្ខ​បុក​ម្នេញ​លើ​គណបក្ស​ប្រឆាំង​​នៅ​ប្រទេស​កម្ពុជា”។

លិខិត​​ដែល​ចុះ​ហត្ថលេខា​ដោយ​លោក​ Ed ​​​Royce ​ប្រធាន​គណៈកម្មាធិការ​សភា​​ទទួល​​បន្ទុក​កិច្ច​ការ​បរទេស​​ និង​​សមាជិក​សភា​ផ្សេង​ទៀត​ មាន​ខ្លឹមសារ​ថា “​ប្រជា​​​ពលរដ្ឋ​​​នៃ​ប្រទេស​​​​​កម្ពុជា​​សម​នឹង​ទទួល​បាន​​​ការ​ស្ដាប់​មតិ​របស់​ខ្លួន​ក្នុង​សង្គម​មួយ​​ដែល​ស្វាគមន៍​ឲ្យ​មាន​ការ​ពិភាក្សា​​បើក​ទូលាយ​ និង​ការ​​គោរព​តម្លៃ​ប្រជា​​​ធិបតេយ្យ”។

លិខិត​នោះ​បាន​បន្ថែម​ថា ”យើង​​អំពាវ​នាវ​​​​ឲ្យ​លោក​ឈប់​ជា​បន្ទាន់​នូវ​ការ​រំខាន​យាយី​ និង​ការ​ធ្វើ​ទុក្ខបុកម្នេញ​លើ​គណបក្ស​ប្រឆាំង​នៅ​កម្ពុជា​ លុប​ចោល​ដីកា​ចាប់​ខ្លួន​លោក សម ​​រង្ស៊ី និង​ត្រូវ​​​ប្រគល់​​​សមាជិកភាព​​​តំណាង​រាស្ត្រ​​​ទៅ​​​ឲ្យ​​​លោក សម រង្ស៊ី វិញ បញ្ឈប់​គ្រប់​ទម្រង់​ទាំង​អស់​នៃ​អំពើ​ហិង្សា​នយោបាយ​ និង​​ពង្រឹង​​បរិយាកាស​មួយ​​ដែល​លទ្ធិប្រជា​ធិបតេយ្យ​អាច​​ចម្រើន​លូតលាស់​ទៅ​បាន”។

កាលពី​ខែ​​​មុន លោក​ បាន​ គីមូន អគ្គ​លេខា​ធិការ​អង្គការ​សហប្រជាជាតិ​​បាន​ចាត់​ទុក​ដីកា​​​​ចាប់​ខ្លួន​លោក សម រង្ស៊ី ជា “​ព្រឹត្តិការណ៍​ដ៏​កង្វល់” មួយ ខណៈ​ដែល​សមាជិក​នៃ​សភា​អឺរ៉ុប​​​​បាន​គំរាម​​កាត់​ជំនួយ​នៅ​​ពេល​​អនុម័ត​ដំណោះ​​​ស្រាយ​មួយ ​​ដែល​អំពាវនាវ​​ឲ្យ​ប្រគល់​​​សេរី​ភាព​​​មក​មេដឹកនាំ​គណបក្ស​ប្រឆាំង​វិញ​នោះ។

ក្រសួង​ការ​បរទេស​​អាមេរិក​​​ក៏​បាន​និយាយ​​​​​ដែរ​ថា ព្រឹត្តិការណ៍​​នយោបាយ​ថ្មីៗ​នៅ​ទីនេះ “ធ្វើ​​ឲ្យ​នឹក​ឃើញ​អំឡុង​ពេល​ផ្ដាច់ការ​មួយ​ក្នុង​អតីត​កាល​ថ្មីៗ​​របស់​ប្រទេស​កម្ពុជា​” រីឯ​​​​អ្នក​ធ្វើ​​របាយការណ៍​ពិសេស​​របស់​អង្គការ​​​​សហ​ប្រជា​​ជាតិ​​ស្ដីពី​​សិទ្ធិ​មនុស្ស​​នៅ​កម្ពុជា​​បាន​និយាយ​ថា ​ប្រទេស​កម្ពុជា​​អាច​​​ឈាន​ដល់​ “ដំណាក់​កាល​​​​ចុង​ក្រោយ​​ដ៏គ្រោះ​ថ្នាក់​” ក្នុង​ពេល​ឆាប់ៗ។

ប៉ុន្តែ​លោក ហោ ណាំហុង រដ្ឋមន្ត្រី​ក្រសួង​​​ការ​បរទេស​​បាន​មាន​ប្រសាសន៍​​កាលពី​ម្សិល​មិញ​ថា លោក​មិន​​ខ្វល់​​តាម​ការ​​ទាមទារ​​ពី​​ក្រៅ​​ប្រទេស​ទេ បើ​ទោះ​ជា​​​មាន​ការ​គំរាម​ពី​សមា​ជិក​សភា​អឺរ៉ុប ថា​​​នឹង​ពិនិត្យ​ឡើង​វិញ​​​​នូវ​ជំនួយ​​​​រាប់​រយ​លាន​ដុល្លារ​មក​កម្ពុជា​ ប្រសិន​បើ​ដំណោះ​ស្រាយ​​របស់​ពួកគេ​​​ត្រូវ​គេ​មិន​អើ​ពើ​​ក៏ដោយ។

លោក​បាន​​ប្រាប់​អ្នក​យក​ព័ត៌មាន​នៅ​ពិធី​សប្បុរស​មួយ​​​ក្នុង​ក្រុង​ភ្នំពេញ​ថា ”សមាជិក​សភា​​​អឺរ៉ុប​​ និង​សមាជិក​សភា​អាមេរិក​​​​មាន​សិទ្ធិ​របស់​ ខ្លួន [ប៉ុន្តែ] ខ្ញុំ​​ជឿជាក់​ថា ​​ប្រទេស​ជាតិ​​​យើង​​​​​ក្រោម​ ការ​ដឹកនាំ​​របស់​​សម្ដេច​តេជោ ហ៊ុន សែន នឹង​កាន់​តែ​ឈាន​ទៅ​មុខ​​​ក្នុង​ការ​កសាង​ប្រទេស​ជាតិ​យើង​​ឲ្យ​រីក​ចម្រើន​លើ​គ្រប់​វិស័យ”។

“ទោះបី​​​មាន​​​ជំនួយ ឬ​គ្មាន​ជំនួយ​ក៏ដោយ គឺ​​​យើង​នៅ​​​តែ​​​ទៅ​​​មុខ ចាប់ពី​​​ថ្ងៃ​​​នេះ​​​ទៅ ​កម្ពុជា​​​​​​តែងតែ​​​ទៅ​​​មុខ ឥត​ថយ​ក្រោយ​​​ពី​មួយ​ខែ​ទៅ​មួយ​ខែ​ ពី​មួយ​ឆ្នាំទៅ​មួយ​ឆ្នាំ”។

លោក ហោ ណាំហុង ​បាន​រំឭក​ឡើង​វិញ​ថា ដីកា​ចាប់​ខ្លួន​លោក សម រង្ស៊ី ​ដែល​កើត​ចេញ​ពី​​​​សេចក្ដី​សម្រេច​របស់​តុលាការ​​ឆ្នាំ​២០១១ ដាក់​ទោស​លោក សម រង្ស៊ី ឲ្យ​ជាប់​ពន្ធនាគារ​២​ឆ្នាំ​ពីបទ​បរិហារកេរ្តិ៍​រដ្ឋមន្ត្រី​ក្រសួង​ការ​បរទេស​រូប​នេះ គឺ​ជា​បញ្ហា​ផ្លូវ​ច្បាប់​ ហើយ​មិន​​ទាក់​ទង​នឹង​រឿង​នយោបាយ​ទេ។

លោក​​មាន​ប្រសាសន៍​ថា ”យើង​ចាំបាច់​​ត្រូវ​ដំណើរ​ការ​កិច្ច​ការ​ទាំង​នេះ​​ស្រប​ទៅ​តាម​​​​រដ្ឋធម្មនុញ្ញ​ និង​ច្បាប់​ជាតិ​ ហើយ​និង​នីតិរដ្ឋ​របស់​យើង”។

ថ្លែង​នៅ​ឯ​កិច្ច​ប្រជុំ​មួយ​​ជាមួយ​តំណាង​រាស្ត្រ​​គណបក្ស​សង្គ្រោះជាតិ​​នៅ​ពេល​ព្រឹក​​នោះ លោក កឹម សុខា អនុប្រធាន​គណបក្ស​ប្រឆាំង​​មាន​ប្រសាសន៍​ថា រដ្ឋាភិបាល​​​គណ​​​​​​បក្ស​ប្រជាជន​កម្ពុជា​​គួរ​មាន​ឆន្ទៈ​​ពិនិត្យ​ឡើង​វិញ​នូវ​ការ​រិះគន់​មក​ពី​​ប្រភព​ខាង​ក្រៅ ជា​ជាង​ចេះ​តែ​​ធ្វើ​មិន​ដឹង​មិន​ឮ​ទាំង​ស្រុង​​​នោះ។

លោក កឹម សុខា ​បាន​និយាយ​​អំពី​លិខិត​​មក​ពី​​សមាជិក​សភា​​អាមេរិក​ថា ”​តាម​យើង​ដឹង​ ប្រទេស​ជាច្រើន​​ដែល​​កាន់​លទ្ធិប្រជា​ធិបតេយ្យ ហើយ​ជា​ពិសេស​សមាជិក​សភា​​​របស់​ពួកគេ​​គឺ​មាន​សិទ្ធិ​​​ នៅ​ពេល​ណា​ពិភព​លោក​មាន​បញ្ហា ពួកគេ​មិន​សប្បាយ​ចិត្ត ​ពួកគេ​​​មាន​សិទ្ធិ​របស់​ពួកគេ”។

លោក​​បន្ថែម​ថា ”យើង​​ជា​ម្ចាស់​ប្រទេស​​​​​នេះ ដូច្នេះ​​យើង​ចាំបាច់​​​ត្រូវ​ពិនិត្យ​ថា តើ​គេ​និយាយ​​ជា​​​រឿង​សម​ហេតុ​ផល​ឬអត់​ ហើយ​យើង​​មិន​គួរ​​ចេះ​តែ​បដិសេធ​​វា​ទាំង​អស់​ទេ”។

លើ​ទំព័រ​ហ្វេសប៊ុក​របស់​លោក​កាលពី​ថ្ងៃ​ព្រហស្បតិ៍ លោក សម រង្ស៊ី ​ក៏​​មាន​ប្រសាសន៍​ដែរ​ថា ព្រឹត្តិការណ៍​នយោបាយ​​នាពេល​ថ្មីៗ​ ក្នុង​នោះ​មាន​ទាំង​ដីកា​ចាប់​ខ្លួន​ដែល​បាន​ធ្វើ​ឲ្យ​លោក​និរទេស​​ខ្លួនឯង​​នៅ​អឺរ៉ុប​​ផង​​​នោះ ​​បាន​នាំ​ឲ្យ​ប្រទេស​កម្ពុជា​​ឈាន​​​ទៅ​រក”​​​របប​​​បក្ស​តែ​មួយ ដូច​ក្នុង​សម័យ​សង្គ្រាម​ត្រជាក់”។

លោក សុខ ឥសាន ​អ្នក​នាំពាក្យ​គណបក្ស​ប្រជាជន​កម្ពុជា​​​បាន​មាន​ប្រសាសន៍​ថា លិខិត​ថ្មី​បំផុត​​មកពី​សមាជិក​សភា​អាមេរិក​១៦​រូប តំណាង​ឲ្យ​​​សំឡេង​ភាគ​តិច​​ប៉ុណ្ណោះ​​ពី​សភា​​ដែល​មាន​សមាជិក​៤៣៥​រូប ហើយ​លោក​បាន​លើក​ឡើង​ថា លោក សម រង្ស៊ី បាន​ធ្វើ​ការ​ជ្រើស​រើស​មិន​វិល​ត្រឡប់​មក​កម្ពុជា និង​​ប្រឈម​នឹង​ការ​ចាប់​ខ្លួន​របស់​លោក។

លោក​បានថ្លែង​ថា “គ្មាន​នរណា​​កម្ចាត់​គាត់​ទេ។ គាត់​កម្ចាត់​ខ្លួន​ឯង។ វា​មិន​មែន​​​ជា​គណ​បក្ស​តែ​មួយ​នោះ​​ទេ ព្រោះ​​​យើង​​អនុវត្ត​​​លទ្ធិ​ប្រជាធិបតេយ្យ​ សេរីពហុបក្ស៕ និត

 

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.