កំពង់ផែស្វយ័តភ្នំពេញដែលកាន់កាប់ដោយរដ្ឋបានក្លាយជាក្រុមហ៊ុនទី៣ ដែលបានចុះបញ្ជីក្នុងផ្សារមូលបត្រកាលពីម្សិលមិញ ដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគោះកណ្តឹងបើកនៅថ្ងៃជួញដូរដែលគេឃើញថា តម្លៃភាគហ៊ុននៅក្នុងកំពង់ផែនេះបានកើនឡើងបន្តិចបន្តួច។
កំពង់ផែនេះបានចូលរួមជាមួយរដ្ឋាករទឹកស្វយ័តភ្នំពេញ និងរោងចក្រកាត់ដេរ ហ្គ្រេន ធ្វីន អុីនធឺណេសិនណលដែលកាន់កាប់ដោយតៃវ៉ាន់ក្នុងការជួញដូរនៅក្នុងផ្សារមូលបត្រកម្ពុជាដែលបានចាប់ផ្តើមកាលពីខែកក្កដា ឆ្នាំ២០១១។
ទន្ទឹមនឹងផ្សារមូលបត្របានប្រឹងប្រែងដើម្បីទទួលបានសន្ទុះកើនឡើងមក តំបន់សេដ្ឋកិច្ចពិសេសភ្នំពេញ និងក្រុមហ៊ុន ធី វ៉ាយ ហ្វេសិន ជាក្រុមហ៊ុនកាត់ដេរដែលកាន់កាប់ដោយតៃវ៉ាន់ ក៏រំពឹងថា នឹងផ្សព្វផ្សាយជាសាធារណៈនៅឆ្នាំក្រោយផងដែរ។
លោក ហ៊ាន សាហីុប ប្រធានផ្សារមូលបត្រកម្ពុជាបានមានប្រសាសន៍អំឡុងការចាប់ផ្តើមកាលពីម្សិលមិញដែលលោកសង្ឃឹម ថា ការចុះបញ្ជីថ្មីបំផុតនេះនឹងកត់សម្គាល់ឲ្យឃើញពីចំណុចរបត់នៃផ្សារមូលបត្រដ៏ក្មេងខ្ចី ដែលបច្ចុប្បន្នមានភាគហ៊ុនប្រហែល៥.០០០ ដែលបានជួញដូរក្នុងមួយថ្ងៃៗ។
លោក សាហីុប បានថ្លែងថា “តួលេខទាំងនេះនៅទាបនៅឡើយ បើប្រៀបធៀបទៅនឹងផ្សារមូលបត្រក្នុងប្រទេសដទៃទៀតក្នុងតំបន់។ដូច្នេះការជំរុញឲ្យមានការជួញដូរតាមរយៈការបង្កើនទំហំនៃការជួញដូរប្រចាំថ្ងៃ និងចំនួនវិនិយោគិន គឺជាភារកិច្ចសំខាន់ ដែលចាំបាច់ត្រូវសម្រេចឲ្យបាន”។
តម្លៃភាគហ៊ុន នៅក្នុងកំពង់ផែនេះគឺ៥.១២០រៀលនៅមុនចាប់ផ្តើមការជួញដូរកាលពីម្សិលមិញ កើនឡើងរហូតដល់៥.១៤០ រៀលនៅពេលម៉ោងបិទការជួញដូរ។ ភាគហ៊ុនជាង១៣.០០០ត្រូវបានជួញដូរអំឡុងថ្ងៃនោះ ដោយជាង៤,១៣លានបានលក់នៅក្នុងការបើកលក់ជាសាធារណៈលើកដំបូង។
លោក ហៃ បាវី ប្រធានកំពង់ផែនេះបានមានប្រសាសន៍ថា វាឆាប់ពេកហើយក្នុងការវាស់ស្ទង់អំពីចំណាប់អារម្មណ៍ជាសាធារណៈចំពោះក្រុមហ៊ុននេះ។ លោកបានថ្លែងថា “ខ្ញុំគិតថាតម្លៃនេះនឹងកើនឡើងក្នុងរយៈពេល៣ខែ ៦ខែ ឬ១ឆ្នាំ នៅពេលវិនិយោគិនសិក្សា អំពីក្រុមហ៊ុនបានត្រឹមត្រូវ។ ដូច្នេះតម្លៃនេះមិនអាចត្រូវបានវាយតម្លៃភ្លាមៗទេ”។
យោងតាមលោក ចន ម៉ាកហ្គីនលី (John McGinley)ដៃគូគ្រប់គ្រងបានឲ្យដឹងថា កំពង់ផែនេះបានឲ្យក្រុមហ៊ុនក្នុងស្រុកគឺក្រុមហ៊ុនដៃគូយុទ្ធសាស្ត្រមេគង្គជួយរៀបចំការបើកលក់ជាសាធារណៈលើកដំបូង។ ក្រុមហ៊ុននេះគ្រប់គ្រងក្រោម១០ភាគរយនៃក្រុមហ៊ុន និង៣០ភាគរយនៃភាគហ៊ុនបានលក់កាលពីម្សិលមិញ។
លោក ម៉ាកហ្គីនលី បានថ្លែងថា លោកមានទំនុកចិត្តថា កំពង់ផែនេះនឹងដំណើរការល្អប្រសើរខណៈដែលសកម្មភាពសេដ្ឋកិច្ចក្នុងប្រទេសត្រូវបានពង្រីក។
លោកបានលើកឡើងថា “ក្រុមហ៊ុនមានក្រុមខ្លាំង មានសមត្ថភាព និងមានទំនាក់ទំនងជាមួយវិស័យកម្មន្តសាល និងវិស័យនាំចេញ ដែលកំពុងមានការកើនឡើង។ហេតុដូច្នោះហើយ កំពង់ផែមានទំនាក់ទំនងទូលំទូលាយចំពោះយន្តការសេដ្ឋកិច្ចក្នុងប្រទេសកម្ពុជាហើយក៏ចាត់ទុកថាជាការវិនិយោគដែលមាន ទំនុកចិត្ត”។ លោកបានបន្ថែមថា “យើងមិនសូវបារម្ភប៉ុន្មានទេអំពីការប្រែប្រួលក្នុងរយៈពេលខ្លីក្នុងក្រុមហ៊ុននេះ ដោយសារយើងគិតថា ក្រុមហ៊ុននឹងបន្តអនុវត្តនៅក្នុងរយៈពេលវែង”៕សារុន (រាយការណ៍បន្ថែមដោយ Tej Parikh)