26 C
Phnom Penh

​ប្រទេស​កម្ពុជា ខាត​បង់​​៤ពាន់​លាន​ដុល្លារទៅ​លើ​​​​​រំហូរ​​ចេញ​​ហិរញ្ញវត្ថុ​ខុស​ច្បាប់​​​​​​ក្នុង​ឆ្នាំ​២០១៣

ដោយ ឌឹ ខេមបូឌា ដេលី

បទវិភាគ

សេដ្ឋកិច្ច​របស់ប្រទេស​កម្ពុជា បាន​ខាត​បង់​ជាង​៤ពាន់លាន​ដុល្លារ​​​ទៅ​លើ​រំហូរ​ចេញ​​​​ហិរញ្ញវត្ថុ​ខុស​ច្បាប់​ក្នុង​ឆ្នាំ​២០១៣​ ដែល​​ច្រើន​​​​ជាង​​១,៤​​​នៃ​ផលិត​ក្នុង​ស្រុក​សរុប​ (GDP) កាល​​​ពី​ឆ្នាំ​​មុន​ទៅ​​ទៀត នេះ​បើ​យោង​តាម​​របាយ​​​ការណ៍​មួយ​​ចេញ​ផ្សាយ​កាលពី​ម្សិល​មិញ​ដោយ​អង្គការ​​ “សុចរិតភាព​​​ហិរញ្ញវត្ថុ​សកល”​ (Global Financial Integrity)​ ឬ​ហៅ​កាត់​ GFI ​ដែល​មាន​មូលដ្ឋាន​នៅ​​រដ្ឋធានី​វ៉ាស៊ីនតោន។

ផ្អែក​តាម​​​ទិន្នន័យ​ពាណិជ្ជ​​កម្ម​ដែល​ត្រូវ​បាន​រាយការណ៍​ជូន​មូលនិធិ​​រូបិយវត្ថុ​អន្តរ​ជាតិ​​ (IMF) របាយការណ៍​នេះ​​​បង្ហាញ​ថា ហិរញ្ញ​​​វត្ថុ​៤ពាន់​លាន​ដុល្លារ​ដែល​បាន​​ចេញ​ពី​​​ប្រទេស​​​​កម្ពុជា​ ដោយ​ខុស​ច្បាប់​នៅក្នុង​ឆ្នាំ​​២០១៣​ គឺ​ជា​ចំណែក​មួយនៃ​​​ហិរញ្ញវត្ថុ​​១,១​លានលាន​ដុល្លារ​ ដែល​បាន​​ចេញ​ដោយ​ខុស​ច្បាប់​ពី​បណ្ដា​ប្រទេស​កំពុង​អភិវឌ្ឍន៍​ទូទាំង​ពិភព​លោក​ក្នុង​​ឆ្នាំ​នោះ​។

សម្រាប់​កម្ពុជា​​ របាយការណ៍​នេះ​ក៏​បាន​បង្ហាញ​​ដែរ​​ថា ហិរញ្ញ​វត្ថុ​​ចំនួន​១៥​,០៩​ពាន់​លាន​ដុល្លារ​ត្រូវ​បាន​ខាត​បង់​​ដោយ​សារ​​រំហូរ​ចេញ​ខុស​ច្បាប់​​នៅ​ក្នុង​ទសវត្សរ៍​គិត​​រហូត​មក​ទល់​​ឆ្នាំ​២០១៣ ដោយ​​​កំណើន​ធំៗ​ត្រូវ​បាន​កត់​ត្រា​ក្នុង​ឆ្នាំ​នីមួយៗ​​​​ ដូច​ជា​​នៅ​​​ឆ្នាំ​២០១២​ ខាតបង់​​៣,៦២​ពាន់​លាន​ដុល្លារ​ ​​ឆ្នាំ​២០១១​ខាតបង់​១,៧៣​ពាន់​លាន​ដុល្លារ ឆ្នាំ​២០១០​ខាត​បង់​១,២៧ពាន់​លាន​ដុល្លារ​ ហើយ​នៅ​ឆ្នាំ​២០០៩​ ខាត​បង់​ចំនួន​៩៣០​លាន​ដុល្លារ​។

តួលេខ​​៤ពាន់​លាន​ដុល្លារ​​នៅ​ក្នុង​រំហូរ​ចេញ​ខុស​ច្បាប់​នេះ​​ ស្មើ​នឹង​២៦,៣​ភាគរយ​នៃ​​ ​GDP សរុប​១៥,២៣​ពាន់​លាន​ដុល្លារ​របស់​ កម្ពុជា ដែល​ត្រូវ​បាន​កត់​ត្រា​ដោយ​ធនាពិភព​លោក​ក្នុង​ឆ្នាំ​នោះ​ ជា​អនុបាត​មួយ​ដែល​​តិច​ជាង​ឆ្ងាយណាស់​​បើ​ប្រៀប​ធៀប​​ទៅ​នឹង​​​បណ្ដា​​​​​​​ប្រទេស​ជិតខាង​របស់​កម្ពុជា​។

យោង​តាម​ GFI បាន​ឲ្យ​ដឹង​ថា រំហូរ​ចេញ​ខុស​ច្បាប់ពី​ប្រទេស​ថៃ ​ក្នុង​ឆ្នាំ​២០១៣​ មាន​ចំនួន​​៣២,៩​ពាន់​លាន​ដុល្លារ​ ស្មើនឹង​៨,៥​ភាគរយ​នៃ​ GDP ៣៨៧​,២៥​ពាន់​លាន​ដុល្លារ​របស់​ខ្លួន​ក្នុង​​​ឆ្នាំ​នោះ ​តាម​ការ​គណនា​ដោយ​ធនាគារ​ពិភព​លោក​។ រំហូរ​ចេញ​ខុស​ច្បាប់​​១៧,៨៣​​ពាន់​លាន​ដុល្លារ​​របស់​វៀតណាម​ គឺ​ស្មើនឹង​១០,៤​ភាគរយ​នៃ​GDP​ ១៧១,២២​ពាន់​លាន​ដុល្លារ​បស់​ខ្លួន​។

របាយការណ៍នេះ​គូស​បញ្ជាក់​​ទៀត​​ថា ជំនួយ​បរទេស​ទាំង​អស់​​​​ដែល​ជួយ​​ដល់​បណ្ដា​ប្រទេស​កំពុង​អភិវឌ្ឍន៍​ក្នុង​ឆ្នាំ​២០១៣​​ ​​មាន​​ចំនួន​សរុប​ត្រឹម​តែ​៩៩​,៣​ពាន់​លាន​ដុល្លារ​ប៉ុណ្ណោះ ជា​តួលេខ​មួយ​ដែល​តិច​ជាង​១០​ភាគរយ​​​នៃ​រំហូរ​ចេញ​​​ហិរញ្ញវត្ថុ​ខុស​ច្បាប់​​១,១​​​លាន​លាន​ដុល្លារ​។ របាយការណ៍​នេះ​បញ្ជាក់​ថា រាល់​ជំនួយ​​១ដុល្លារ​​ដែល​ជួយ​ដល់​បណ្ដា​ប្រទេស​កំពុង​អភិវឌ្ឍន៍ “​មាន​ជាង​១០​ដុល្លារ​អាមេរិក​ បាន​​ហូរ​ចេញ​ដោយ​ខុស​ច្បាប់​”។

របាយការណ៍​នេះ​ផ្ដល់​អនុសាសន៍​ឲ្យ​រដ្ឋា​ភិបាល​នៃ​​បណ្តា​ប្រទេស​ដូច​កម្ពុជា​ ជា​ដើម ផ្ដោត​​លើ​កិច្ច​ប្រឹងប្រែង​លុប​បំបាត់​រំហូរ​ចេញ​​​ហិរញ្ញវត្ថុ​ខុស​ច្បាប់​ដែល​ចេញ​ពី​ប្រទេស​ ពីព្រោះ​ការ​ប្រើ​ប្រាស់​​ដោយ​ស្រប​ច្បាប់​នូវ​​ហិរញ្ញ​វត្ថុទាំង​នោះ​នៅ​ក្នុង​ប្រទេស​ ឬ​ការ​យក​​​ពន្ធ​ឲ្យ​បាន​ត្រឹម​ត្រូវ​របស់​ខ្លួន​​ អាច​ជា​ចលករ​​​ជំរុញ​កំណើន​សេដ្ឋកិច្ច​។

របាយការណ៍​របស់​ GFI​ ​បាន​បង្ហាញ​ថា “​ខណៈ​តម្លៃ​សរុប​នៃ​ពាណិជ្ជកម្មនេះ​​មិន​ត្រូវ​បាន​អនុវត្ត​តាម​កម្មវិធី​​​អភិវឌ្ឍន៍ ពន្ធ​ពាក់ព័ន្ធ​សកម្មភាព​ខុស​ច្បាប់​នេះ​​​​អាច​​​បែង​ចែក​បាន​សម្រាប់​កិច្ច​ប្រឹង​ប្រែង​ផ្សេង​ៗ​ដើម្បី​លុប​បំបាត់​ភាព​ក្រីក្រ។ ការ​កាត់​បន្ថយ​សូម្បី​មួយ​ភាគ​តូច​​នៃ​រំហូរ​ចេញ​ខុស​ច្បាប់​ទាំង​នេះ​​ នឹង​មាន​ឥទ្ធិពល​ខ្លាំង​ក្លា​​​លើ​សមត្ថភាព​របស់​រដ្ឋាភិបាល​​ក្នុង​ការ​ដោះ​ស្រាយ​តម្រូវ​ការ​របស់​​​ប្រជាជន​ដែល​ងាយ​រងគ្រោះ​បំផុត​របស់​ខ្លួន​​”។

​អង្គការ​នេះ​​​​សន្មត​ថា ​៣,៨៦​​ពាន់​លាន​ដុល្លារ​​នៃ​ហិរញ្ញវត្ថុ​៤ពាន់​លាន​ដុល្លារ​ដែល​ត្រូវ​បាន​ខាត​បង់​នៅ​កម្ពុជា ​ក្នុង​​ឆ្នាំ​២០១៣ បណ្ដាល​មកពី​ការ​ធ្វើ​វិក្កយបត្រ​ពាណិជ្ជកម្ម​មិន​ត្រឹម​ត្រូវ ជា​ការ​អនុវត្ត​មួយ​​ដែល​ក្រុម​ហ៊ុន​នានា​​រាយការណ៍​មិន​​ត្រឹម​ត្រូវ​​​អំពី​តម្លៃ​​នៃការ​នាំ​ចូល ឬ​​នាំ​ចេញ ទៅ​មន្ត្រី​មូលដ្ឋាន​​ដើម្បី​​លួច​នាំ​ប្រាក់​ចេញទៅ​ក្រៅ​ប្រទេស​ដោយ​ស្ងាត់ៗ​។

ជា​ឧទាហរណ៍ ក្រុម​ហ៊ុន​នាំចេញ​​មួយ​ប្រហែល​ជា​រាយ​ការណ៍​ប្រាប់​សមត្ថកិច្ច​អំពី​​ថ្លៃ​លក់​ទាប​ខ្លាំង​បើ​ប្រៀបធៀប​ទៅ​នឹង​តម្លៃ​ជាក់​ស្ដែង​​នៃ​ទំនិញដែល​លក់​ចេញ​​​​របស់​ខ្លួន បន្ទាប់​មក​ទទួល​​យក​ប្រាក់​​នោះ​ដោយ​ខុស​ច្បាប់​ចូល​ក្នុង​គណនី​ក្នុង​ស្រុក​ ហើយ​​​ផ្ញើ​ចំណែក​​​ដែល​​មិន​​​បាន​ប្រកាស​​នៃ​ការ​លក់​នោះ​​ក្នុង​ធនាគារ​​នៅ​ឯ​បរទេស​។

របាយ​ការណ៍​របស់​ GFI ​​បាន​លើក​ឡើង​ថា ​ឆ្នាំ​នេះ​​គឺ​ជា​លើក​ដំបូង​ហើយ​ដែល​ខ្លួន​​អាច​ទទួល​បាន​ទិន្នន័យ​ពាណិជ្ជកម្ម​ទ្វេភាគី​ពី​ប្រទេស​កម្ពុជា​ ដែល​​ធ្វើ​ឲ្យ​ខ្លួន​​​អាច​ប្រៀប​ធៀប​​ទិន្នន័យ​ពាណិជ្ជកម្ម​ដែល​​ត្រូវ​បាន​រាយ​ការណ៍​របស់​ប្រទេស​នេះ​​​ជាមួយ​ទិន្នន័យ​​​​របស់​បណ្ដា​សេដ្ឋកិច្ច​ជឿន​លឿន​ដែល​ធ្វើ​ពាណិជ្ជកម្ម​​ជាមួយ​កម្ពុជា ដើម្បី​ស្រាវជ្រាវ​​​រកភាព​ខុស​គ្នា​។ ​

​ទាក់​ទិន​បញ្ហា​នេះ លោក កែន រដ្ឋា ​​អ្នក​នាំ​ពាក្យ​ក្រសួង​ពាណិជ្ជកម្ម​​ មិនអាចទាក់ទង​សុំ​ការ​បំភ្លឺ​បាន​ទេ​កាលពី​ម្សិលមិញ។ ចំណែក​ឯលោក ងី តាយី ​រដ្ឋលេខាធិការ​ក្រសួង​ហិរញ្ញ​​វត្ថុ​ បាន​មាន​ប្រសាសន៍​ថា លោក​ចង់​ឃើញ​ព័ត៌មាន​លម្អិត​បន្ថែម​ទៀត​ស្ដីពី​​រំហូរ​ចេញ​ខុស​ច្បាប់​​​ដូច​​ការ​ចោទ​ប្រកាន់​ខាង​លើ​ មុន​នឹង​ជឿ​លើ​របាយការណ៍​​​របស់​ GFI ប៉ុន្តែ​បាន​​​​គូស​បញ្ជាក់​ថា លោក​នឹង​បើក​ចិត្ត​ទូលាយ។

លោក​ថ្លែង​ថា ”​ឲ្យ​ពួកគេ​បង្ហាញ​ព័ត៌មាន​​លម្អិត​​​ស្តីពី​ក្រុមហ៊ុន​ទាំង​នោះ​មកចុះ ប៉ុន្តែ​រដ្ឋា​ភិបាល​ប្រហែល​ជា​មិន​ពាក់​ព័ន្ធ​បញ្ហា​នេះ​ទេ ពីព្រោះ​​មន្ត្រី​ពន្ធដារ​ជា​អ្នក​ត្រួត​ពិនិត្យ​វិក្កយបត្រ​ទាំង​នោះ​”។

លោក ស្តេហ្វិន ហ៊ីកហ្គីនស៍ (Stephen Higgins) ជា​ដៃគូ​គ្រប់គ្រង​​នៅ​ក្រុម​ហ៊ុន ”​ដៃ​គូ​យុទ្ធ​សាស្ត្រ​​​មេគង្គ​” (Mekong Strategic Partners) ដែល​ជា​​​ក្រុម​ហ៊ុន​ប្រឹក្សា​យោបល់ ​បាន​មាន​ប្រសាសន៍​ថា តួលេខ​រំហូរ​ចេញ​ខុស​ច្បាប់​នេះហាក់​ដូច​ជា​ខ្ពស់​ហួស​ហេតុ​។

លោក​​​បាន​ធ្វើ​ការ​កត់​សម្គាល់​​ថា ”​៤ពាន់​លាន​ដុល្លារ​គឺ​ជា​ចំនួន​ច្រើន​ណាស់។ ខ្ញុំ​មិន​ជឿ​ថា វា​ជា​តួលេខ​ពិត​ទេ។ ​ម្យ៉ាង​វិញ​ទៀត ការ​​នាំ​សាច់​ប្រាក់​ចេញ​​ពី​ទី​នេះ​​​មិន​ពិបាក​ទេ ដូច្នេះ​ហេតុ​អី​បានជា​​គេ​ប្រើ​វិធី​សាស្ត្រ​នោះ​​ ខ្ញុំ​មិន​​ប្រាកដ​​ទេ”។

លោក សុន ឆ័យ តំណាង​រាស្ត្រ​គណបក្ស​ប្រឆាំង ​​ដែល​ជា​អនុប្រធាន​​​គណៈកម្មការ​ធនាគារ​ និង​ហិរញ្ញវត្ថុ​​នៃ​​​រដ្ឋសភា​ បាន​មាន​ប្រសាសន៍​ថា លោក​​ក៏​ប៉ាន់​​ស្មាន​​​ថាកម្រិត​រំហូរ​​​​ចេញ​ខុស​ច្បាប់​នេះ​​ទាប​ជាង​នេះ​ដែរ ប៉ុន្តែ​ថា របាយការណ៍​របស់​ GFI ​បាន​ផ្តល់​ពន្លឺ​លើ​បញ្ហា​ដ៏​​ធំមួយ​​។

​លោក​ថ្លែង​ថា ​”ប្រទេស​កម្ពុជា​​ មាន​អំពើ​ពុករលួយ​​ច្រើន ភាព​មិន​​ប្រាកដ​ប្រជា​ ប្រព័ន្ធ​ដែល​មិន​​អាច​​ជឿទុក​ចិត្ត​បាន​ និង​គ្មាន​ឱកាស​ល្អៗ។ ដូច្នេះ​​គេ​ត្រូវ​ស្វែង​រក​ជម្រើស​។ ទន្ទឹម​នឹង​​​​នេះ ​​សម្រាប់​លុយ​កខ្វក់​ដូច​ជា​លុយ​បាន​ពី​គ្រឿង​​ញៀន ឬ​​លុយ​កខ្វក់​ផ្សេង​ទៀត​ជា​​​ដើម គេ​តែង​តែ​​​មក​លាង​សម្អាត​នៅ​ទីនេះ”។

លោក​បាន​​​​គូស​បញ្ជាក់​​​ថា ការ​ចំណាយ​សរុប​​​​​របស់​រដ្ឋាភិបាល​​ក្នុង​ឆ្នាំ​២០១៣ ​​មាន​ចំនួនតែ​​៣ពាន់​លាន​ដុល្លារ​ប៉ុណ្ណោះ​។ “​៤​ពាន់​​លាន​ដុល្លារ​​​​​​គឺ​ច្រើន​ជាង​​ថវិកា​ជាតិ​ទៅ​ទៀត​។ ​​វា​ជា​ចំនួន​លុយ​យ៉ាង​ច្រើន​សន្ធឹក​សន្ធាប់។ តើ​ចាំបាច់​ត្រូវ​​​​​ពិនិត្យ​មើល​​លុយ​​ទាំង​នេះ​នៅ​កន្លែង​ណា”៕ សុខុម (រាយការណ៍​បន្ថែម​ដោយ កង​ សុធា​)​

 

 

© 2023, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស