ក្រោយពីលោក សម រង្ស៊ី ប្រធានគណបក្សសង្គ្រោះជាតិសម្រេចឲ្យគណបក្សរបស់លោកចូលរួមជាមួយគណបក្សប្រជាជនកម្ពុជា ឡើងវិញដោយប្រុងប្រយ័ត្ននៅរដ្ឋសភាជាជាងការធ្វើពហិការទាំងស្រុងនោះ ក្រុមមន្ត្រីជាន់ខ្ពស់មកពីគណបក្សទាំងពីរបានជួបពិភាក្សាគ្នានៅរដ្ឋសភាកាលពីម្សិលមិញដែលជាលើកដំបូងចាប់តាំងពីមានស្ថានភាពចលាចលផ្នែកនយោបាយកាលពីខែមុនមក។
ក្នុងកិច្ចប្រជុំតាមរយៈប្រព័ន្ធ Skype កាលពីរសៀលថ្ងៃពុធ លោក សម រង្ស៊ី បានប្រាប់ក្រុមតំណាងរាស្ត្រគណបក្សសង្គ្រោះជាតិនៅក្នុងរាជធានីភ្នំពេញថា យ៉ាងហោចណាស់ គណបក្សប្រឆាំងគួរតែបង្ហាញវត្តមានក្នុងកិច្ចប្រជុំគណៈកម្មការសភា ទោះបីជាពួកលោកមិនចូលរួមកិច្ចប្រជុុំទាំងនោះក៏ដោយ។
លោក សម រង្ស៊ី ដែលកំពុងរស់នៅក្នុងប្រទេសបារាំង ជាថ្មីម្តងទៀតដើម្បីគេចពីដីកាចាប់ខ្លួននៅក្នុងប្រទេសកម្ពុជា បានគូសបញ្ជាក់ថា “ក្នុងគណៈកម្មការ យើងត្រូវស្ដាប់ ប៉ុន្តែយើងអត់ទៅចូលរួម ឬគាំទ្រទេ”។
លោកលើកឡើងថា ការសម្រេចថា តើត្រូវចូលរួមសម័យប្រជុំសភាពេញអង្គនៅពេលខាងមុខឬអត់ ត្រូវមើលលើស្ថានការណ៍ជាក់ស្ដែង។ លោកថ្លែងថា “វាអាស្រ័យលើប្រធានបទ ហើយចំពោះពេញអង្គ យើងអត់ចូលរួមទេ លើកលែងតែមានការជជែកគ្នា ឯកភាពគ្នាលើសេចក្ដីព្រាងច្បាប់”។
សូមរំឭកថា ក្រុមតំណាងរាស្ត្រគណបក្សសង្គ្រោះជាតិបានធ្វើពហិការការអនុម័តច្បាប់ចំនួនបីក្នុងរដ្ឋសភាកាលពីសប្ដាហ៍មុន ដើម្បីប្រឆាំងតវ៉ានឹងការវាយប្រហារមកលើគណបក្សរបស់ពួកលោកកាលពីពេលថ្មីៗនេះ ដែលរួមមានទាំងការប្រើអំពើហិង្សាលើតំណាងរាស្ត្រពីររូប គឺលោក ញ៉យ ចំរើន និងលោក គង់ សភា នៅពេលលោកទាំងពីរចាកចេញពីរដ្ឋសភាកាលពីចុងខែតុលាផងដែរ។
លោក សម រង្ស៊ី ក៏ត្រូវបានដកឋានៈជាតំណាងរាស្ត្រផងដែរ បន្ទាប់ពីតុលាការចេញដីកាចាប់ខ្លួនលោកកាលពីថ្ងៃទី១៣ ខែវិច្ឆិកាពាក់ព័ន្ធសំណុំរឿងបរិហារកេរ្តិ៍មួយដែលមានចំណាស់៧ឆ្នាំ ចំណែកឯលោក កឹម សុខា អនុប្រធានរបស់លោក ត្រូវបានក្រុមតំណាងរាស្ត្រគណបក្សប្រជាជនកម្ពុជា បណ្តេញចេញពីតំណែងអនុប្រធានរដ្ឋសភាកាលពីថ្ងៃទី៣០ ខែតុលា។
ទោះជាយ៉ាងណា គណបក្សប្រជាជនកម្ពុជា ហាក់ដូចជាមិនភ្ញាក់ផ្អើលចំពោះការធ្វើពហិការរបស់គណបក្សសង្គ្រោះជាតិឡើយ ហើយបានអនុម័តច្បាប់ចំនួនបីដោយសំឡេងភាគច្រើនរបស់ខ្លួនយ៉ាងងាយ ដែលរួមមានទាំងច្បាប់ថវិកាជាតិឆ្នាំ២០១៦ និងច្បាប់ទូរគមនាគមន៍ដ៏ចម្រូងចម្រាសផងដែរ នៅក្នុងសម័យប្រជុំដ៏វែងដែលចាប់ផ្ដើមតាំងពីព្រឹកបន្តរហូតដល់ពេលរសៀល។
ក្នុងកិច្ចប្រជុំតាមរយៈប្រព័ន្ធ Skype កាលពីថ្ងៃពុធ លោក សម រង្ស៊ី បានមានប្រសាសន៍ថា គណបក្សសង្គ្រោះជាតិនឹងបន្តការធ្វើពហិការសម័យប្រជុំពេញអង្គ ប្រសិនបើគណបក្សប្រជាជនកម្ពុជា បន្តមិនអើពើចំពោះតួនាទីរបស់ខ្លួននៅក្នុងរដ្ឋសភា។
លោកបានលើកឡើងថា “បើគេមិនឲ្យតម្លៃ គេមិនសួរយោបល់យើង គេ [សម្រេច] រំលងយើង គេចង់ធ្វើអីស្រេចតែចិត្តគេ នៅក្នុងករណីហ្នឹង យើងអត់ចូលរួមទេ” ហើយបានគូសបញ្ជាក់ជាថ្មីម្តងទៀតថា ទោះជាយ៉ាងណា គណបក្សសង្គ្រោះជាតិ គួរតែព្យាយាមបញ្ចេញឥទ្ធិពលលើការព្រាងច្បាប់ដើម្បីកែលម្អវា។
លោកមានប្រសាសន៍ទៀតថា “យើងត្រូវយកយោបល់អ្វីដែលសង្គមស៊ីវិល និងប្រជាពលរដ្ឋលោកចង់បាន លោកចង់ឲ្យកែ លោកចង់ឲ្យបន្ថែម លោកចង់ឲ្យលុបអីយ៉ាងម៉េច ហើយយើងនឹងជួបជាមួយប្រជាពលរដ្ឋ”។
នៅឯរដ្ឋសភាកាលពីល្ងាចម្សិលមិញ លោក កឹម សុខា និងលោក ស ខេង រដ្ឋមន្ត្រីក្រសួងមហាផ្ទៃ បានដឹកនាំគណបក្សរៀនៗខ្លួនចូលរួមកិច្ចពិភាក្សាអំពីការងារទៅថ្ងៃមុខក្នុងរដ្ឋសភា ដែលបច្ចុប្បន្នកំពុងស្ថិតក្នុងសម័យប្រជុំ និងកំពុងត្រៀមបោះឆ្នោតអនុម័តច្បាប់សហជីពថ្មី។
គណបក្សទាំងពីរបានចេញសេចក្ដីថ្លែងការណ៍រួមមួយទំព័រ ហើយថ្នាក់ដឹកនាំនៃគណបក្សទាំងពីរក៏បានថ្លែងទៅកាន់ក្រុមអ្នកយកព័ត៌មានមួយភ្លែតដែរ មុនពេលបង្វែរសំណួរទៅលោក សក់ សេដ្ឋា រដ្ឋលេខាធិការក្រសួងមហាផ្ទៃ ដែលជាអ្នកនាំពាក្យគណបក្សប្រជាជនកម្ពុជា និងតំណាងរាស្ត្រ យឹម សុវណ្ណ ដែលជាអ្នកនាំពាក្យគណបក្សសង្គ្រោះជាតិ។
លោក កឹម សុខា បានមានប្រសាសន៍ថា “យើងបានពិភាក្សាអំពីផលប្រយោជន៍ធំៗនៅពេលបច្ចុប្បន្ន ពេលអនាគត និងការពង្រឹងការផ្សះផ្សារជាតិ និងការបម្រួបបម្រួមជាតិ។ រឿងផ្សេងទៀត អ្នកនាំពាក្យរបស់យើងអាចឆ្លើយបាន”។
លោក សក់ សេដ្ឋា អ្នកនាំពាក្យគណបក្សប្រជាជនកម្ពុជា បានថ្លែងថា ជំនួបក្រៅផ្លូវការមួយកាលពីដើមសប្ដាហ៍នេះ បានជួយត្រួសត្រាយផ្លូវសម្រាប់កិច្ចពិភាក្សារយៈពេល៤០នាទីកាលពីម្សិលមិញ និងការចេញសេចក្ដីថ្លែងការណ៍រួម។
លោកបានគូសបញ្ជាក់ថា “តាមពិត ថ្នាក់ដឹកនាំគណបក្សទាំងពីរបានជួបគ្នារួចមកហើយកាលពីពីរថ្ងៃមុន ហើយតាមរយៈកិច្ចពិភាក្សានេះ ថ្នាក់ដឹកនាំគណបក្សទាំងពីរបានផ្ដួចផ្ដើមឲ្យមានចំណុចសំខាន់ៗមួយចំនួនសម្រាប់កិច្ចពិភាក្សា” ហើយថា មានការព្រមព្រៀងគ្នាលើចំណុចសំខាន់ៗចំនួនបួន។
ទី១ បង្កើតគណៈកម្មការមួួយដែលចូលរួមដោយគណបក្សទាំងពីរ ដើម្បីពិភាក្សាអំពីសេចក្ដីព្រាងច្បាប់សហជីព។ ទី២ បង្កើតគណៈកម្មការមួយទៀតដើម្បីពិភាក្សាអំពី “វប្បធម៌សន្ទនា” ថ្មីដែលលោក សម រង្ស៊ី និងលោកនាយករដ្ឋមន្ត្រី ហ៊ុន សែន បានលើកកម្ពស់យ៉ាងសកម្មរហូតមកទល់ពេលតុលាការចេញដីកាចាប់ខ្លួនលោក សម រង្ស៊ី កាលពីខែមុន។
ទី៣ គណបក្សទាំងពីរព្រមព្រៀងពង្រឹងទំនាក់ទំនងការងារ។ ទី៤ គណបក្សទាំងពីរព្រមព្រៀងដោះស្រាយបញ្ហានានាដោយឈរលើស្មារតីបង្រួបបង្រួមជាតិ និងស្របតាមគោលការណ៍ នៃលទ្ធិប្រជាធិបតេយ្យ។
ចំណែកឯលោក យឹម សុវណ្ណ បានមានប្រសាសន៍ថា គណបក្សរបស់លោកត្រូវជួបជាមួយគណបក្សប្រជាជនកម្ពុជា ដើម្បីលើកកម្ពស់ “វប្បធម៌សន្ទនា” ទោះបីកាលពីពេលថ្មីៗនេះមានការវាយប្រហារខាងនយោបាយ និងការប្រើអំពើហិង្សាទៅលើគណបក្សប្រឆាំងយ៉ាងណាក្ដី។
លោកបានលើកឡើងអំពីច្បាប់សហជីពថា ”វាពាក់ព័ន្ធអត្ថប្រយោជន៍របស់កម្មករកាត់ដេរជាច្រើនសែននាក់។ ដូច្នេះ យើងចាប់អារម្មណ៍លើច្បាប់នោះ ហើយយើងនឹងបង្កើតក្រុមការងារដើម្បីពិភាក្សាជាមួយគ្នា។ យើងមិនចង់មានជម្លោះនឹងគ្នាទេ ហើយយើងចង់ឲ្យស្ថានភាពនយោបាយ សេដ្ឋកិច្ច ព្រមទាំងសង្គមរបស់យើងដើរទៅដោយរលូន ដូច្នេះយើងត្រូវតែជួបគ្នា”។
លោក សក់ សេដ្ឋា មានប្រសាសន៍ថា បញ្ហាដកលោក សម រង្ស៊ី ចេញពីរដ្ឋសភា និងដីកាចាប់ខ្លួនលោក ព្រមទាំងការដកលោក កឹម សុខា ចេញពីអនុប្រធានរដ្ឋសភា មិនត្រូវបានលោក កឹម សុខា និងលោក ស ខេង លើកយកមកពិភាក្សាទេ។ លោកបានលើកឡើងបន្ថែមទៀតថា ”ជំនួបចរចានេះទើបតែកើតឡើងទេ ហើយសម្រាប់បញ្ហានេះ ថ្នាក់ដឹកនាំនៃគណបក្សទាំងពីរមិនបានពិភាក្សាទេ”៕ សុខុម