សាលាក្តីខ្មែរក្រហមបានប្រកាសថា លោក មាស មុត អតីតមេបញ្ជាការកងទ័ពជើងទឹកនៅសម័យខ្មែរក្រហមបានបង្ហាញខ្លួននៅចំពោះមុខចៅក្រមក្នុងក្រុងបាត់ដំបងកាលពីម្សិលមិញ ដើម្បីប្រឈមនឹងការដាក់ឲ្យស្ថិតនៅក្រោមបទចោទមួយចំនួន រួមមានដូចជាអំពើប្រល័យពូជសាសន៍ជាដើម ពោលគឺជាង៩ខែបន្ទាប់ពីគាត់ត្រូវបានដាក់ឲ្យស្ថិតនៅក្រោម ការពិនិត្យដោយកំបាំងមុខ ពីបទឧក្រិដ្ឋ កម្មប្រឆាំងមនុស្សជាតិ និងឧក្រិដ្ឋកម្មសង្គ្រាម។
អតីតមេបញ្ជាការកងទ័ពជើងទឹករូបនេះត្រូវបានចោទប្រកាន់ដោយសហចៅក្រមស៊ើបអង្កេតអន្តរជាតិ មៃឃើល បូឡេនឌ័រ (Michael Bohlander) ដែលជំនួសតំណែង របស់ចៅក្រម ម៉ាក ហាម៉ុន (Mark Harmon) កាលពីខែសីហា ពីបទឧក្រិដ្ឋជាច្រើនរួមមានដូចជាអំពើប្រល័យពូជសាសន៍ និងបទឧក្រិដ្ឋជាច្រើនទៀតប្រឆាំងមនុស្សជាតិ រួមមានដូចជា ការធ្វើមនុស្សឃាត ការសម្លាប់រង្គាល និងការធ្វើឲ្យទៅជាទាសករនៅក្នុងសំណុំរឿង០០៣នៅអង្គជំនុំជម្រះវិសាមញ្ញក្នុងតុលាការកម្ពុជា (ECCC)ជាដើម។
បទចោទមួយចំនួនរួមមានដូចជាអំពើប្រល័យពូជសាសន៍ជាដើម ត្រូវបានបន្ថែមតាំងពីមានដីកាសម្រេចចុះថ្ងៃទី០៣ ខែមីនា មកម្លេ៉ះ ខណៈបទចោទមួយចំនួនត្រូវបានលុបចោលជាមួយនឹងដីកាបង្គាប់ឲ្យនាំខ្លួនដែលចេញកាលពីខែធ្នូឆ្នាំមុន និងដែលនគរបាលយុត្តិធម៌មិនយកចិត្តទុកដាក់។
ពេលទាក់ទងតាមអីុម៉េលម្សិលមិញ លោក ម៉ៃឃើល កាណាវា៉ស (Michael Karnavas) មេធាវីការពារក្តីឲ្យលោក មាស មុត បានលើកឡើងថា កូនក្តីរបស់លោកត្រូវបានចោទប្រកាន់នៅខេត្តបាត់ដំបងដោយសារសុខភាពទ្រុឌទ្រោមរបស់គាត់។
លោកបានមានប្រសាសន៍ថា “ការចោទប្រកាន់ធ្វើឡើងនៅក្នុងក្រុងបាត់ដំបងដោយសារសុខភាពរបស់លោក មាស មុត។ វាគ្មានអ្វីខុសពីធម្មតាទេ”។
នៅពេលត្រូវបានសួរថា តើលោកនៅតែចាត់ទុកបទចោទទាំងនោះថា “គ្មានសុពលភាព” ដោយសារមានតែចៅក្រមសើុបអង្កេត មួយរូបចុះហត្ថលេខាដូចដែលលោកបានជំទាស់នៅក្នុងសេចក្តីថ្លែងការណ៍កាលពីខែមិថុនា ដដែល ឬយ៉ាងណា លោក ម៉ៃឃើល កាណាវ៉ាស បានលើកឡើងថា លោកយល់ថា ចៅក្រមសហសើុបអង្កេតជាតិ យូ ប៊ុនឡេង ”មិនជំទាស់” ចំពោះការដែលលោក មាស មុត ត្រូវបានកោះហៅ និងចោទប្រកាន់ដោយចៅក្រម ម៉ៃឃើល បូឡេនឌ័រ ឡើយ។
លោក ឡាស អូលសេន (Lars Olsen) អ្នកនាំពាក្យសាលាក្តីបានលើកឡើងថា លោកមិនអាចបង្ហាញសេចក្តីលម្អិតថា តើហេតុអ្វីបានជាបទចោទមួយចំនួនត្រូវបានលុបចោលពីដីកាសម្រេចនាខែមីនានោះឡើយ ដោយសារតែភាពសម្ងាត់នៃការសើុបអង្កេត។ លោកបានបដិសេធមិននិយាយថា តើក្រុមជនជាតិភាគតិច ជាតិសាសន៍ ឬសាសនាណា ដែលលោក មាស មុត ប្រឈមនឹងការចោទប្រកាន់ពីបទប្រព្រឹត្តអំពើប្រល័យពូជសាសន៍ នោះឡើយ ដោយលើកឡើងថា វាក៏ជាភាពសម្ងាត់ដែរ។
បទចោទទាំងនេះគឺជាបទចោទចុងក្រោយបំផុតដែលត្រូវបានសម្រេចចោទប្រកាន់នៅក្នុងសំណុំរឿង០០៣ និង០០៤ ដែលរដ្ឋាភិបាលជំទាស់ ដោយលោក យឹម ទិត្យ ហៅតាទិត្យ ត្រូវបានចោទប្រកាន់នៅថ្ងៃពុធ ពីបទឧក្រិដ្ឋមួយចំនួនដូចជាបទប្រល័យ ពូជសាសន៍លើខ្មែរក្រោម ជាជនជាតិភាគតិចមកពីវៀតណាមខាងត្បូងជាដើម។ លោក អៅ អាន ហៅតាអានប្រឈមនឹងការចោទប្រកាន់កាលពីមីនា ខណៈអ្នកស្រី អឹុម ចែម ត្រូវបានដាក់ឲ្យស្ថិតក្រោមការពិនិត្យកំបាំងមុខនៅក្នុងខែដដែល ប៉ុន្តែ គាត់បានបដិសេធមិនប្រឈមមុខតទល់ជាមួយចៅក្រមឡើយ។នគរបាលក៏បានបដិសេធមិនអនុវត្តដីកាបង្គាប់ឲ្យនាំខ្លួនអ្នកស្រីដែរ។
បន្ទាប់ពីត្រូវបានចោទប្រកាន់ពីខែមីនា លោក មាស មុត បាននិយាយថា គាត់ “ខ្វាយខ្វល់នឹងការដាំដុះពោត និងដំឡូងមីរបស់គាត់” ជាងសកម្មភាពរបស់សាលាក្តីខ្មែរក្រហម។ ក្រសួងមហាផ្ទៃបានលើកឡើងថា មុនពេលចាប់ខ្លួនលោក មាស មុត ចាំបាច់ត្រូវមានការស្ទាបស្ទង់មតិអ្នកជិតខាងរបស់គាត់នៅក្នុងស្រុកសំឡូតជាតំបន់មួយក្នុងចំណោមមូលដ្ឋានដ៏រឹងមាំចុងក្រោយរបស់ខ្មែរក្រហមជាមុនសិន។
លោក ហែម សារុំ នាយប៉ុស្តិ៍ឃុំតាសាញ់ ដែលជាតំបន់លោក មាស មុត រស់នៅបានលើកឡើងកាលពីម្សិលមិញថា ថ្មីៗនេះ មន្ត្រីសាលាក្តីបានចុះមកសួរសុខទុក្ខអតីតមេបញ្ជាការកងទ័ពជើងទឹកចាស់ជរារូបនេះ ដែលថ្មីៗនេះទើបតែត្រឡប់ពីព្យាបាលជំងឺងនៅប្រទេសថៃ ពីរដងរួចមកហើយ។
លោក ហែម សារុំ បានមានប្រសាសន៍ថា “មន្ត្រី ECCC បានចុះមកសួរសុខទុក្ខគាត់ម្តង ទៀតជាលើកទី២ លើកនេះស្របពេលដែលព្រះសង្ឃបួនទៅប្រាំអង្គកំពុងសូត្រមន្តរំដោះគ្រោះឲ្យបុរសវ័យចំណាស់រូបេនះ ព្រោះគាត់ត្រូវបាន បញ្ជូនទៅព្យាបាលនៅក្នុងមន្ទីរពេទ្យនៅប្រទេសថៃ ប៉ុន្មានខែថ្មីៗនេះប៉ុន្តែ គាត់មិនបានគ្រាន់បើទេ ហើយគ្រូពេទ្យថៃបានឲ្យគាត់ត្រឡប់មកផ្ទះវិញ។ គាត់ឈឺធ្ងន់ណាស់”។
ទោះបីជាមិនដឹងអំពីរឿងរ៉ាវនៅសាលាក្តី ក៏ដោយ ក៏លោក ហែម សារុំ បានលើកឡើងថា លោកគិតថា សាលាក្តីគួរតែបញ្ឈប់នីតិវិធីរបស់ខ្លួនប្រឆាំងលោក មាស មុត។
លោកបានមានប្រសាសន៍ថា “យើងមិនដឹងថា តើដីកាបង្គាប់ឲ្យនាំខ្លួនត្រូវបានលុបចោល ឬយ៉ាងណានោះឡើយ តែប្រសិនបើដីកាបង្គាប់ឲ្យនាំខ្លួនត្រូវបានលុបចោល នេះគឺជារឿងល្អហើយ។អង្គការសហប្រជាជាតិមិនគួរខ្វាយខ្វល់នឹងសំណុំរឿងនេះទេ ព្រោះគាត់មិនអាចទទួលទានអ្វីបានឡើយ ផឹកបានត្រឹមតែទឹកប៉ុណ្ណោះ ហើយកំពុងដេកនៅនឹងកន្ទេល”៕ស៊ុយឈាង