អ្នកភូមិប្រហែល២០០នាក់ក្នុងខេត្តកំពង់ស្ពឺបានតវ៉ានៅមុខការិយាល័យស្រុកឱរ៉ាល់កាលពីថ្ងៃច័ន្ទ ដើម្បីអំពាវនាវឲ្យអាជ្ញាធរបង្កើនការប្រឹងប្រែងរបស់ពួកគេក្នុងការដោះស្រាយជម្លោះដីធ្លីច្រើនឆ្នាំមកហើយរបស់ពួកគាត់ជាមួយក្រុមហ៊ុនចម្ការអំពៅរបស់លោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។
យោងតាមក្រុមសិទ្ធិមនុស្សឲ្យដឹងថា ក្រុមហ៊ុនស្ករសភ្នំពេញបានដណ្តើមយកដីរាប់ពាន់ហិកតាពីគ្រួសារជាច្រើនក្នុងមូលដ្ឋាននោះតាំងពីឆ្នាំ២០១០មក។ កាលពីដើមខែសីហា គណៈកម្មការសិទ្ធិមនុស្សរបស់សភាជាតិបានផ្ញើលិខិតមួយច្បាប់ទៅអាជ្ញាធរខេត្ត ដោយបានអំពាវនាវដល់អាជ្ញាធរខេត្តធ្វើយ៉ាងណាឲ្យគ្រួសារទាំងនោះទទួលបានដីធ្លីរបស់ពួកគាត់វិញ។
លោក ព្រំ សុធី អ្នកតវ៉ាម្នាក់កាលពីថ្ងៃច័ន្ទ តំណាងឲ្យប្រជាពលរដ្ឋ៤២១គ្រួសារ បាននិយាយថា អ្នកភូមិបានមកជួបជុំគ្នានៅការិយាល័យស្រុកនេះ ដើម្បីទាមទារឲ្យអាជ្ញាធរធ្វើតាមសំណើរបស់គណៈកម្មការនេះ។
លោកបាននិយាយថា “យើងមកតវ៉ានៅការិយាល័យស្រុកដើម្បីស្នើឲ្យអាជ្ញាធរពន្លឿនការដោះស្រាយ។ ក្រុមហ៊ុនបានរានដីចម្ការរបស់យើង ប៉ុន្តែក្រុមហ៊ុនមិនបានបង់ប្រាក់សំណងឲ្យយើងទេ”។
លោកអភិបាលស្រុក មួង ធី បាននិយាយថា គ្មានគ្រួសារណាដែលកំពុងតវ៉ាមានសិទ្ធិកាន់កាប់ដីនោះស្របច្បាប់ទេ។ លោកបានអះអាងថា ផ្ទុយទៅវិញ គ្រួសារភាគច្រើនបាននិងកំពុងកាន់កាប់ដីព្រៃសាធារណៈដោយខុសច្បាប់ ហើយគ្មានសិទ្ធិទទួលបានសំណងពីក្រុមហ៊ុនស្ករសភ្នំពេញទេ។
លោកបាននិយាយថា “ចំពោះករណីនេះ យើងដោះស្រាយបានប្រហែល៧០ភាគរយនៃគ្រួសារទាំងនោះប្រហែលប្រាំឬប្រាំមួយឆ្នាំមកហើយ ហើយភាគច្រើនបំផុតនៃគ្រួសារនៅសេសសល់កំពុងកាន់កាប់ដីព្រៃរបស់រដ្ឋ”។
លោកអភិបាលស្រុក ធី បាននិយាយថា គ្រួសារជាច្រើនដែលទទួលបានសំណង ខ្លះទទួលបានដីថ្មី ខ្លះបានប្រាក់។ លោកបាននិយាយថា គ្រួសារនៅសល់ពីនោះ នឹងមិនទទួលបានអ្វីទេ ពីព្រោះពួកគេបានកាប់ឆ្ការដីព្រៃរដ្ឋដោយខុសច្បាប់។
លោក ស៊ីន សត្ថា ជាអ្នកតំណាងឲ្យក្រុមហ៊ុនស្ករសភ្នំពេញ បាននិយាយថា លោកបានជួបជាមួយលោក យ៉ុង ផាត់ បន្ទាប់ពីជួបជាមួយក្រុមអ្នកតវ៉ានៅស្រុកឱរ៉ាល់ ហើយលោកបានបញ្ជាក់ថា ក្រុមហ៊ុននេះបានទិញដីទាំងនោះដោយស្របច្បាប់។
លោកបាននិយាយថា “ខ្ញុំបានជួបមេរបស់ខ្ញុំ ហើយគាត់បាននិយាយថា ក្រុមហ៊ុនបានទិញដីនោះពីម្ចាស់ឯកជនជាច្រើននាក់ ហើយយើងនឹងទុកឲ្យអាជ្ញាធរដោះស្រាយរឿងនេះ”៕និត