អាជ្ញាធរខេត្តសៀមរាបកំពុងតាមស្វែងរកអ្នកនេសាទជនជាតិវៀតណាមរាប់សិបនាក់ដែលរងការចោទប្រកាន់ថា បានយកបំពង់ទីបវាយដំលើអ្នកនេសាទខ្មែរមួយក្រុម ខណៈពួកគាត់កំពុងនេសាទនៅបឹងទន្លេសាបកាលពីយប់ថ្ងៃច័ន្ទ។
បុរសជនជាតិខ្មែរមួយក្រុមមានគ្នា១៨នាក់កំពុងនេសាទដូចសព្វដងនៅបឹងទន្លេសាបក្នុងស្រុកប្រាសាទបាគង នាវេលាម៉ោងប្រហែល១០យប់ ពេលនោះស្រាប់តែមានបុរសជនជាតិវៀតណាមមួយក្រុមបើកកាណូតមួយគ្រឿងយ៉ាងលឿនចូលចន្លោះទូកនេសាទរបស់ពួកគាត់ ហើយបានធ្វើឲ្យម៉ងរបស់ពួកគាត់រហែកខ្ទេចខ្ទីអស់ នេះបើយោងតាមលោក មិន ចន្ថា អធិការនគរបាលស្រុកនេះ។
លោកបានមានប្រសាសន៍ថា “អ្នកនេសាទខ្មែរ បានព្យាយាមឃាត់កាណូតេនះ ដើម្បីសួរនាំថា តើហេតុអ្វីបានជាពួកគេបើកកាណូតកាត់មងរបស់ពួកគាត់ ប៉ុន្តែ ជនជាតិវៀតណាមពីរបីនាក់ដែលជិះកាណូតលឿននេះបានទូរស័ព្ទហៅគ្នីគ្នារបស់ពួកគេមកចំនួន៨កាណូតបន្ថែមទៀត ហើយបន្ទាប់មកពួកគេក៏បើកការវាយដំតែម្តង”។
លោកបានបន្ថែមថា “ជនរងគ្រោះបានប្រាប់អាជ្ញាធររបស់យើងថា ជនជាតិវៀតណាមប្រហែល៤០នាក់ជិះកាណូតចំនួន៨គ្រឿងមក ហើយពួកគេបានវាយដំលើអ្នកនេសាទខ្មែររបស់យើង ដោយប្រើបំពង់ទីប និងម៉ាឡេត បន្ទាប់មកបានជិះកាណូតគេចខ្លួនបាត់”។
លោក មិន ចន្ថា បានលើកឡើងទៀតថា មនុស្ស១៣នាក់បានរងរបួស ក្នុងនោះប្រាំនាក់រងរបួសធ្ងន់ ប៉ុន្តែ ថា គ្មាននរណាម្នាក់បានទៅមន្ទីរពេទ្យឡើយ។ “ឥឡូវនេះ យើងកំពុងតែសហការជាមួយកងរាជអាវុធហត្ថស្រុកដើម្បីធ្វើការជាមួយជនរងគ្រោះ ក្នុងគោលបំណងតាមស្វែងរកជនដៃដល់ទាំងនេះ”។
លោកបានបន្ថែមថា ការតាមស្វែងរកបានផ្តោតគោលដៅលើតំបន់មួយហៅថា ចុងឃ្នៀសក្នុងឃុំកំពង់ភ្លុក។ជនរងគ្រោះទាំង១៨នាក់បានដាក់ពាក្យបណ្តឹងទៅកាន់នគរបាលដោយអ្នករងរបួសចំនួន១៣នាក់បានទាមទារសំណង១.០០០ដុល្លារក្នុងម្នាក់ៗ។
ខណៈបរិមាណត្រីនៅក្នុងបឹងទន្លេសាប និងដៃទន្លេថយចុះ ការប៉ះទង្គិចគ្នាដ៏ហិង្សារវាងអ្នកនេសាទកើតមានយ៉ាងញឹកញាប់ ដោយជារឿយៗរវាងសហគមន៍ខ្មែរ និងសហគមន៍វៀតណាម។
កាលពីដើមខែនេះ បុរសជនជាតិវៀតណាមម្នាក់ត្រូវក្រុមបុរសបិទមុខឡើងលើទូកកាប់សម្លាប់នៅក្នុងករណីមួយដែលអាជ្ញាធរចាត់ទុកថា “ជាជម្លោះផ្ទាល់ខ្លួន”។
លោក នឹង នី មេឃុំកំពង់ភ្លុក បានអះអាងកាលពីម្សិលមិញថា ខណៈអ្នកនេសាទខ្មែរ៩៧ភាគរយប្រើវិធីសាស្ត្រនេសាទស្របច្បាប់ អ្នកនេសាទវៀតណាមមិនធ្វើតាមច្បាប់ទេ ដូចជានេសាទដោយប្រើយ៉ាំងកាវ និងម៉ាញ់ ហើយបិទដៃទន្លេដើម្បីចាប់ត្រីជាដើម។
លោកបានមានប្រសាសន៍ថា “អ្នកភូមិ[ខ្មែរ]យើង នេសាទដោយស្របច្បាប់ ប៉ុន្តែជនជាតិវៀតណាមមកពីចុងឃ្នៀស មិនគោរពតាមច្បាប់ទេ ពួកគេប្រើប្រាស់ឧបករណ៍នេសាទហាមឃាត់”៕ស៊ុយឈាង