អតីតទាហានខ្មែរក្រហមម្នាក់មកពីកងពលរបស់លោក មាស មុត អតីតមេបញ្ជាការកងទ័ពជើងទឹកសម័យខ្មែរក្រហម បានប្រាប់សាលាក្តីខ្មែរក្រហមកាលពីម្សិលមិញថា អតីតមេបញ្ជាការកងទ័ពជើងទឹករូបនេះ បានចេញបទបញ្ជាឲ្យចាប់ខ្លួន និងសម្លាប់ជនជាតិវៀតណាម និងថៃរាប់ពាន់នាក់ដែលត្រូវបានចាប់ខ្លួននៅសមុទ្រអំឡុងសម័យប៉ុល ពត ។
សាក្សី ដែលគេប្រាប់អត្តសញ្ញាណត្រឹមតែថាជា 2-TCW-1000 ដោយសារគាត់ជាប់ពាក់ព័ន្ធនៅក្នុងការសើុបអង្កេតក្នុងសំណុំរឿង០០៣ ដែលលោក មាស មុត ប្រឈមនឹងការដាក់ឲ្យស្ថិតនៅក្រោមការពិនិត្យពីបទឧក្រិដ្ឋមួយចំនួនរួមមានដូចជាអំពើប្រល័យពូជសាសន៍ជាដើមនោះ បានប្រាប់រឿងរ៉ាវលម្អិតនៃអំពើដ៏ឃោរឃៅដែលសាក្សីរូបនេះនិយាយថា ត្រូវបានប្រព្រឹត្តលើ “សត្រូវសួរពូជ” របស់របបនេះនៅឆ្នេរសមុទ្រដែលឥឡូវហៅថា ខេត្តព្រះសីហនុ។
សាក្សីរូបនេះដែលបានចូលរួមជាមួយទ័ពព្រៃកុម្មុយនិស្តក្នុងឆ្នាំ១៩៧២ ហើយក្រោយមកបានក្លាយជាកងការពាររបស់លោក មាស មុត បាននិយាយថា ទាហានមកពីកងពលលេខ១៦៤របស់អតីតមេបញ្ជាការកងទ័ពជើងទឹករូបនេះត្រូវបានគេប្រាប់នៅកន្លែងហ្វឹកហាត់១៩៧៩ឲ្យដឹងអំពីគោលនយោបាយសម្លាប់ជនជាតិវៀតណាមដែលចាប់បាននៅឈូងសមុទ្រថៃ។
សាក្សីរូបនេះបាននិយាយថា “យើងត្រូវបានណែនាំឲ្យសម្លាប់រង្គាល ទោះបីជាទារកក៏ដោយ ព្រោះពួកគេគឺជាសត្រូវសួរពូជរបស់យើង ហេតុដូច្នេះដាច់ខាតយើងត្រូវតែសម្លាប់ពួកគេចោល។ ហើយវាជាការទទួលខុសត្រូវរបស់កងវរៈសេនាតូចនីមួយៗក្នុងការអនុវត្តតាមការណែនាំទាំងនេះ។ គ្រូបង្វឹកគឺជាមេបញ្ជាការនៃកងវរៈសេនាតូចនីមួយៗ ដែលទទួលបទបញ្ជាពីថ្នាក់លើ។ វាគឺជាគោលនយោបាយរបស់បក្សកុម្មុយនិស្តកម្ពុជា”។
ដំណាក់កាលទី២ នៃសំណុំរឿង០០២ប្រឆាំង នួន ជា និង ខៀវ សំផន អតីតមេដឹកនាំខ្មែរក្រហម បច្ចុប្បន្នកំពុងផ្តោតលើការចោទប្រកាន់ដែលរបបនេះបានប្រព្រឹត្តអំពើប្រល័យពូជសាសន៍លើប្រជាពលរដ្ឋវៀតណាម បន្ទាប់ពីក្តោបក្តាប់អំណាច។ កាលពីថ្ងៃច័ន្ទ លោក មាស មុត ត្រូវបានដាក់ឲ្យស្ថិតនៅក្រោមការពិនិត្យពីបទឧក្រិដ្ឋមួយចំនួន រួមមានដូចជាអំពើប្រល័យពូជសាសន៍ក្នុងសំណុំរឿង០០៣ដែលរដ្ឋាភិបាលជំទាស់ជាដើម។ ទោះជាយ៉ាងណា ក្រុមដែលគេចោទប្រកាន់ថា លោកបានផ្តោតគោលដៅលើនៅមិនទាន់បង្ហាញនៅឡើយទេ។
សាក្សីកាលពីម្សិលមិញ ដំបូងឡើយអះអាងថា ខ្លួនបានឃើញការចាប់ខ្លួនតែមួយចំនួនតូចប៉ុណ្ណោះ អំឡុងពេលដែលខ្លួនធ្វើជាទាហានខ្មែរក្រហម។ ទោះជាយ៉ាងណា ពេលសាកសួរដោយសហព្រះរាជអាជ្ញាអន្តរជាតិ នីកូឡាស ឃូមយ៉ង់ (Nicholas Koumjian) សាក្សីរូបនេះបានបញ្ជាក់អំពីការលើកឡើងពីមុនរបស់ខ្លួនដែលថា ជនជាតិវៀតណាម និងថៃរាប់ពាន់នាក់ត្រូវបានចាប់ខ្លួន និងសម្លាប់ចន្លោះឆ្នាំ១៩៧៥ដល់ឆ្នាំ១៩៧៩។
សាក្សីរូបនេះបាននិយាយថា “បាទ វាត្រឹមត្រូវហើយ… ក្នុងចំណោមពួកគេគឺអ្នកនេសាទថៃ និងជនជាតិវៀតណាមដែលធ្វើដំណើរទៅប្រទេសថៃ។ ហេតុដូច្នេះពួកគេត្រូវបានចាប់ខ្លួន និងសម្លាប់អំឡុងពេលនោះ”។
បន្ទាប់មកសាក្សីរូបនេះបានលើកឡើងម្តងទៀតពីការអះអាងធ្វើឡើងនៅក្នុងកិច្ចសម្ភាសន៍លើកមុនជាមួយមជ្ឈមណ្ឌលឯកសារកម្ពុជាដែលថា បទបញ្ជាដែលផ្តោតគោលដៅលើជនភៀសខ្លួនជនជាតិវៀតណាម គឺចេញពីលោក មាស មុត ដោយផ្ទាល់។ “អ្វីដែលលោកអ្នកបានអានគឺជាការពិត៖កប៉ាល់វៀតណាម…មានបទបញ្ជាពីកងពល”។
លោក នីកូឡាស ឃូមយ៉ង់ ក៏បានបង្ហាញលិខិតមួយច្បាប់ចុះហត្ថលេខាដោយ “លោក មាស មុត” ដែលសាក្សីរូបនេះនិយាយថា គឺជាមេបញ្ជាការកងទ័ពជើងទឹក ដោយគូសបញ្ជាក់ថា “មេៗ” ជនជាតិវៀតណាមចំនួន១២០នាក់ត្រូវបានចាប់ខ្លួន និងបាញ់សម្លាប់អំឡុងរយៈពេលបីថ្ងៃនៅចុងខែមីនា ឆ្នាំ១៩៧៨។ទោះជាយ៉ាងណា សាក្សីរូបនេះអះអាងថា ខ្លួនមិនបានដឹងហេតុការណ៍នេះដោយផ្ទាល់ឡើយ។
សាក្សីរូបនេះ បានប្រាប់លោកស្រី ម៉ារី ហ្គីរ៉ូដ (Marie Guiraud) មេធាវីតំណាងដើមបណ្តឹងរដ្ឋប្បវេណីថា ត្រូវសម្លាប់នៅនឹងកន្លែង ឬត្រូវចាប់ខ្លួនហើយនាំមកសាកសួរ គឺវាអាស្រ័យលើចំនួនមនុស្សដែលត្រូវបានចាប់ខ្លួនដោយកងពលលេខ១៦៤។
សាក្សីរូបនេះបាននិយាយបន្តទៀតថា “ខ្ញុំគត់សម្គាល់ឃើញថា ពេលមានចាប់កប៉ាល់នីមួយៗ តែងតែមានបទបញ្ជាពីថ្នាក់លើឲ្យនាំមនុស្សដែលត្រូវបានចាប់ខ្លួនមនុស្សមកលើគោក។ ប៉ុន្តែ ប្រសិនបើចំនួនមនុស្សដែលត្រូវបានចាប់ខ្លួនមានត្រឹមតែមួយចំនួនតូចនោះ បទបញ្ជាគឺថា ឲ្យសម្លាប់ពួកគេចោលនៅលើកោះ ហើយយកតែកប៉ាល់មកគោកប៉ុណ្ណោះ។ មានតែមនុស្សក្នុងចំនួនច្រើនទេដែលនឹងត្រូវចាប់ខ្លួន ហើយនាំមកដីគោកដើម្បីសាកសួរទាក់ទិនអំពីអ្វីដែលបានកើតឡើងនៅវៀតណាម និងកម្ពុជា”។
អតីតកម្មាភិបាលរូបនេះ ក៏បាននិយាយរៀបរាប់ឡើងវិញអំពីហេតុការណ៍ពីរដាច់ដោយឡែកដែលទារកជនជាតិវៀតណាមត្រូវទាហានខ្មែរក្រហមសម្លាប់ គឺទារកម្នាក់ដែលត្រូវបោះចូលក្នុងទឹកសមុទ្រ ខណៈវាកំពុងយំពេលឃើញម្តាយរបស់ខ្លួនត្រូវគេចងដៃនៅកំពង់ផែអូរឈើទាល និងទារកម្នាក់ទៀតនៅកោះប៉ូឡូវ៉ៃ ដែលត្រូវបានសម្លាប់ជាមួយឪពុកម្តាយរបស់ខ្លួន។
អតីតកម្មាភិបាលរូបនេះបាននិយាយថា “ពួកគាត់ [ឪពុកម្តាយ] ត្រូវគេប្រាប់ឲ្យលុតជង្គង់ចុះនៅក្រោមដើមដូង ហើយដៃរបស់ពួកគាត់ត្រូវគេចងស្លាបសេក។ ពេលឃើញម្តាយរបស់ខ្លួនហូរឈាម វា[ទារកអាយុ១ខួប]បានវារទៅរកម្តាយរបស់ខ្លួន ស្រាប់តែទាហានចាប់ទារកនោះបោកទៅនឹងដើមដូងតែម្តង”។
ទោះបីជាសាក្សីរូបនេះផ្តល់សក្ខីកម្ម អំពីការចាប់ខ្លួន និងសម្លាប់ជនជាតិថៃក៏ដោយក្តី តែគាត់និយាយថា ពួកគេស្ថិតក្នុងស្ថានភាពប្រសើរជាងជនជាតិវៀតណាម ដោយពន្យល់ថា ពេលមួយ ខ្លួនបានចូលរួមក្នុងការចាប់ខ្លួនជនជាតិថៃចន្លោះពី៦០ទៅ៨០នាក់ ប៉ុន្តែក្រោយមកត្រូវកម្មាភិបាលដែលយាមពួកគេប្រាប់ថា ទុកឲ្យពួកគេនៅរស់ចុះ។
សាក្សីរូបនេះបាននិយាយថា “គេធ្វើដាក់ជនជាតិវៀតណាម ខុសពីជនជាតិថៃ ជនជាតិវៀតណាមត្រូវគេចាត់ទុកថា ជាសត្រូវសួរពូជរបស់ប៉ុល ពត មិនថាពួកគេជាទាហាន ឬពលរដ្ឋសាមញ្ញទេ”។
ដំណើរការនីតិវិធីនៅសាលាក្តីត្រូវបានផ្អាករហូតដល់ថ្ងៃទី៥ ខែវិច្ឆិកា ជាពេលដែលមេធាវីការពារក្តីនឹងចាប់ផ្តើមសាកសួរសាក្សីរូបនេះ៕ស៊ុយឈាង