យោងតាមមន្ត្រីដែលធ្លាប់ដោះស្រាយបញ្ហាពាក់ព័ន្ធអង្គការមិនមែនរដ្ឋាភិបាលការពារបរិស្ថានឲ្យដឹងថា អង្គការនេះដែលកំពុងមានរឿងអាស្រូវកំហែងទារប្រាក់នៅក្នុងខេត្តសៀមរាប មានប្រវត្តិធ្លាប់ប្រើបុគ្គលិករបស់ខ្លួនឲ្យរកលុយដោយខុសច្បាប់ដើម្បីធ្វើឲ្យខ្លួនមានបាន។
អង្គការការពារ និងអភិវឌ្ឍន៍ធនធានធម្មជាតិ កំពុងប្រឈមការបិទទ្វារដោយក្រសួងមហាផ្ទៃ បន្ទាប់ពីបុគ្គលិកបួននាក់របស់ខ្លួនត្រូវបានចាប់ខ្លួននៅលើទន្លេសាបកាលពីថ្ងៃសៅរ៍ពីបទដកហូតអួនរបស់អ្នកនេសាទម្នាក់ និងទារប្រាក់លោះចំនួន១០០ដុល្លារ។ យោងតាមនគរបាលបានឲ្យដឹងថា បុគ្គលិកអង្គការនេះបានស្លៀកពាក់ឯកសណ្ឋានស្រដៀងនឹងឯកសណ្ឋានរបស់មន្ត្រីរដ្ឋបាលជលផល។
កាលពីថ្ងៃច័ន្ទ មន្ត្រីនគរបាលមួយរូបក្នុងតំបន់នោះបានលើកឡើងថា លោកទទួលបានការរាយការណ៍ជាប្រចាំអំពីការរកលុយខុសច្បាប់ក្នុងរូបភាពស្រដៀងគ្នានេះ ប៉ុន្តែមិនដែលចាប់បានជនល្មើសទេ។ ហើយកាលពីម្សិលមិញ លោក ហង្ស ហ៊ុន នាយការិយាល័យចរាចរណ៍ផ្លូវទឹក នៃស្នងការដ្ឋាននគរបាលខេត្ត បានមានប្រសាសន៍ថា មន្ត្រីរបស់លោកចាប់បានជនកំហែងទារប្រាក់ចំនួនបួននាក់កាលពីឆ្នាំមុន ដែលស្លៀកពាក់ជាបុគ្គលិកអង្គការការពារ និងអភិវឌ្ឍន៍ធនធានធម្មជាតិ។
លោកថ្លែងថា កាលពីលើកនោះ ប្រជាពលរដ្ឋមូលដ្ឋានបានរាយការណ៍ថា បុរស២៤នាក់បានជិះទូកបួនគ្រឿងឆ្វែលពេញសហគមន៍នេសាទចុងឃ្នាស ហើយប្រមូលប្រាក់បានប្រហែល៥០០ដុល្លារ ប្រេងម៉ាស៊ូតពីរកាន និងប្រេងសាំងពីរកាន។ ពេលសមត្ថកិច្ចទៅដល់ បុរសបួននាក់ត្រូវបានចាប់ខ្លួន ចំណែកឯអ្នកផ្សេងទៀតបានជិះទូកគេចខ្លួនអស់។
លោកបានលើកឡើងទៀតថា ”យើងមិនហ៊ានដេញតាមពួកគេទេ ពីព្រោះពួកគេមានកំាភ្លើង។ អ្នកទាំងនោះធ្វើការឲ្យអង្គការក្រៅរដ្ឋាភិបាលមួយ ដើម្បីតែកំហែងទារប្រាក់ពីអ្នកនេសាទក្នុងតំបន់នោះប៉ុណ្ណោះ។ បើអ្នកនេសាទមិនព្រមឲ្យលុយ ពួកគេដកហូតទូក និងរបស់របរ។ ពួកគេគឺជាចោរជំរិតទារលុយ”។
លោក ហង្ស ហ៊ុន មានប្រសាសន៍បន្តថា ក្នុងចំណោមមនុស្សទាំងបួននាក់ដែលត្រូវបានចាប់ខ្លួនក្នុងប្រតិបត្តិការឆ្មក់បង្ក្រាបកាលពីឆ្នាំមុុន មានពីរនាក់ឈរជើងនៅខេត្តសៀមរាប រីឯពីរនាក់ទៀតធ្វើការនៅខេត្តបាត់ដំបង ក្នុងពេលនោះ។ ក្នុងចំណោមអ្នកដែលត្រូវបានចាប់ខ្លួនកាលពីថ្ងៃសៅរ៍ មានពីរនាក់ធ្វើការនៅខេត្តបាត់ដំបង ហើយពីរនាក់ទៀតធ្វើការនៅខេត្តកំពង់ធំ។
ទាក់ទិនបញ្ហានេះ លោក គិញ វ៉ើត នាយកអង្គការការពារ និងអភិវឌ្ឍន៍ធនធានធម្មជាតិ បានមានប្រសាសន៍ថា មនុស្សទាំងបួននាក់ដែលត្រូវបានចាប់ខ្លួនកាលពីថ្ងៃសៅរ៍ មានភារកិច្ចត្រូវប្រមូលព័ត៌មាននៅក្នុងខេត្តរបស់ពួកគេរៀងៗខ្លួន ហើយលោកមិនដឹងថាហេតុអ្វីបានជាពួកគេនៅក្នុងខេត្តសៀមរាបទេ។
លោកក៏មានប្រសាសន៍ដែរថា លោកមិនធ្លាប់ទទួលបានពាក្យបណ្ដឹងពីបទកំហែងទារប្រាក់ពាក់ព័ន្ធបុគ្គលិករបស់លោកនោះទេ ហើយថា ពួកគេនឹងត្រូវបញ្ឈប់ពីការងារ ប្រសិនបើតុលាការសម្រេចឲ្យពួកគេជាប់ពិរុទ្ធភាព។
ទោះជាយ៉ាងណា លោក ហង្ស ហ៊ុន ដែលការរៀបរាប់របស់លោកត្រូវបានបញ្ជាក់ដោយលោក ភួង លីណា នាយខណ្ឌរដ្ឋបាលជលផលខេត្តសៀមរាប បានមានប្រសាសន៍ថា យោងតាមមនុស្សបួននាក់ដែលត្រូវបានចាប់ខ្លួនកាលពីឆ្នាំមុនបានឲ្យដឹងថា ការកំហែងទារប្រាក់គឺជាផ្នែកមួយនៃបេសកកម្មរបស់អង្គការនេះ។ លោកថ្លែងថា ”ពួកគេបានប្រាប់យើងថា ពួកគេត្រូវបានតម្រូវឲ្យដើរប្រមូលលុយឲ្យមេរបស់ពួកគេឲ្យបានយ៉ាងហោចណាស់៣០០លានរៀលក្នុង១ឆ្នាំ”។
ជនសង្ស័យទាំងបួននាក់ដែលត្រូវបានចាប់ខ្លួនកាលពីពេលថ្មីៗនេះដូចជា ខាន់ សុខេម អាយុ៤៣ឆ្នាំ ខាន់ ទូច អាយុ៤៨ឆ្នាំ ឈឹម ឈីង អាយុ៣៨ឆ្នាំ និង លឹម សាវុធ អាយុ៥២ឆ្នាំ ត្រូវបានចោទប្រកាន់ពីបទកំហែងទារប្រាក់ ហើយត្រូវបានឃុំខ្លួនបណ្ដោះអាសន្ន។ ពួកគេប្រឈមការជាប់ពន្ធនាគាររហូតដល់៥ឆ្នាំ ប្រសិនបើតុលាការសម្រេចឲ្យពួកគេជាប់ពិរុទ្ធភាព។
ទន្ទឹមនឹងនេះ អង្គការការពារ និងអភិវឌ្ឍន៍ធនធានធម្មជាតិ អាចនឹងត្រូវក្រសួងមហាផ្ទៃបិទទ្វារក្រោមច្បាប់អង្គការមិនមែនរដ្ឋាភិបាលដ៏ចម្រូងចម្រាសដែលត្រូវបានអនុម័តកាលពីខែសីហា ទោះបីជាមានការជំទាស់យ៉ាងខ្លាំងក្លាពីសំណាក់ម្ចាស់ជំនួយ និងមន្ត្រីអង្គការសិទ្ធិមនុស្សដែលព្រួយបារម្ភខ្លាចច្បាប់នេះត្រូវបានប្រើប្រាស់ដើម្បីដាក់ពិន័យអង្គការមិនមែនរដ្ឋាភិបាលចំពោះទង្វើប្រព្រឹត្តដោយបុគ្គលិករបស់ខ្លួនយ៉ាងណាក្ដី។
លោក ឆាន់ ច័ន្ទសុភក្តិ អ្នកនាំពាក្យនាយកដ្ឋានរដ្ឋបាលនៃក្រសួងមហាផ្ទៃ បានមានប្រសាសន៍កាលពីម្សិលមិញថា ប្រសិនបើរកឃើញថាបុរសទាំងបួននាក់នេះបានប្រើប្រាស់ឯកសារដែលចេញដោយអង្គការមួយនេះ ដូចជាប័ណ្ណសម្គាល់ខ្លួនជាដើមនោះ អង្គការនេះនឹងត្រូវចាប់ឲ្យទទួលខុសត្រូវ។
លោកបានបន្តថា ”យើងនឹងបិទអង្គការនេះ ប្រសិនបើរកឃើញថា ឯកសារមួយចំនួនពាក់ព័ន្ធនឹងជនល្មើសទាំងនេះ” ហើយបានមានប្រសាសន៍បន្ថែមទៀតថា លោក គិញ វ៉ើត នាយកអង្គការខាងលើនេះ អាចនឹងត្រូវកោះហៅមកសាកសួរ នៅពេលទទួលបានរបាយការណ៍ពេញលេញពីនគរបាលខេត្តសៀមរាប។
លោក គិញ វ៉ើត បានមានប្រសាសន៍កាលពីម្សិលមិញថា លោកបានធ្វើដំណើរទៅខេត្តសៀមរាប ដើម្បីស៊ើបពាក់ព័ន្ធការចោទប្រកាន់មកលើបុគ្គលិករបស់លោក។ នៅពេលសុំឲ្យពន្យល់ពីការងាររបស់អង្គការខ្លួន លោកលើកឡើងថា លោកមានបុគ្គលិកចំនួន២៦នាក់ ដែលខិតខំប្រមូលព័ត៌មានពាក់ព័ន្ធការបំផ្លាញធនធានធម្មជាតិនៅតាមបណ្តាខេត្តភាគឧត្ដរ ដូចជាខេត្តសៀមរាប បាត់ដំបង កំពង់ធំ ព្រះវិហារ ឧត្ដរមានជ័យ និងបន្ទាយមានជ័យ។
ទោះជាយ៉ាងណា កាលពីពេលល្ងាចម្សិលមិញ លោកមិនអាចទាក់ទងសុំឲ្យឆ្លើយសំណួរជុំវិញការចាប់ខ្លួនកាលពីឆ្នាំមុនបានទេ៕សុខុម