35 C
Phnom Penh

ឆ្លងកាត់​​​ទ្វីប

ដោយ ឌឹ ខេមបូឌា ដេលី

បទវិភាគ

កម្មករ​​​នៅ​​​ឯ​​​​​​រោង​​​ចក្រ​​​អេមរុ រ៉ាយ និង​​​ឃ្លាំង​​​ក្នុង​​​ក្រុង​​​ភ្នំពេញ​​​លី​​​ការ៉ុង​​​អង្ករ។ រូប​​​ថតៈ John Vink
កម្មករ​​​នៅ​​​ឯ​​​​​​រោង​​​ចក្រ​​​អេមរុ រ៉ាយ និង​​​ឃ្លាំង​​​ក្នុង​​​ក្រុង​​​ភ្នំពេញ​​​លី​​​ការ៉ុង​​​អង្ករ។ រូប​​​ថតៈ John Vink

នៅឯរោងចក្រ​​​ក្នុងក្រុង​​​ភ្នំពេញ​​​ កម្មករ​​​រៀបចំ​​​អង្ករដើម្បី​​​នាំចេញ​​​

រូបភាព ដោយ John vink

ឈរមើល​​​ក្រុម​​​កម្មករ​​​មួយ​​​ដែលកំពុង​​​តែបែក​​​ញើស​​​ជោកអាវ​​​ និង​​​លើក​​​​​​ការ៉ុង​​​អង្ករ​​​គ្រាប់​​​វែង​​​កម្ពុជា​​​ទម្ងន់​​​៥០គីឡូក្រាមក្នុង​​​មួយ​​​​​​ការ៉ុង​​​ដាក់​​​លើ​​​ឡាន​​​កុងតឺនឺ លោក​ ធី ហុងរិទ្ធ បាន​​​ពន្យល់​​​ថា ការ​​​ដឹក​​​ជញ្ជូន​​​គឺជាការ​​​ចាប់​​​ផ្តើម​​​នៃ​​​ដំណើរ​​​មួយ​​​ ដែលឆ្លងកាត់​​​តាម​​​ទ្វីបពីរ​​​។

លោក ហុងរិត​​​ ជាអ្នកចាត់​​​ចែង​​​ភស្តុភារ​​​នៅឯ​​​ក្រុមហ៊ុន​​​​​​អេមរុ រ៉ាយ បាន​​​និយាយ​​​បន្ទាប់ពី​​​ពិនិត្យ​​​មើល​​​បញ្ជី​​​ប្រចាំ​​​ថ្ងៃ​​​នៅឯ​​​រោងចក្រ​​​ទំហំ​​​៨.០០០​​​ម៉ែត្រ​​​ការ៉េ​​​​​​ និងឃ្លាំង​​​ស្តុក​​​នៅជាយ​​​ក្រុង​​​ភ្នំពេញ​​​ថា “ការបញ្ជាទិញ​​​នេះ​​​គឺ​​​ឆ្ពោះទៅ​​​ក្លៃប៉េដា ប្រទេស​​​លីទុយ​​​អានី​​​។ រថយន្ត​​​នេះ​​​នឹង​​​ដឹក​​​ទៅកាន់​​​កំពង់​​​ផែ​​​ក្រុង​​​ព្រះសីហនុ​​​ ហើយ​​​បន្ទាប់មក​​​ ដឹក​​​តាម​​​ផ្លូវសមុទ្រ​​​ទៅ​​​អឺរ៉ុប​​​”។

ចម្ងាយ​​​ពីរបីម៉ែត្រ​​​ពីទីនោះ​​​ មាន​​​ក្រុមកម្មករ​​​ប្រាំមួយនាក់​​​កំពុង​​​លីបាវ​​​អង្ករ​​​ឲ្យទាន់​​​តាម​​​កាល​​​កំណត់​​​ ក្នុងខណៈដែលពួកគេ​​​លើក​​​ជញ្ជូន​​​ឲ្យ​​​គ្រប់​​​១៥០​​​តោន​​​តាម​​​ការ​​​បញ្ជាទិញ​​​ដែល​​​មាន​​​តម្លៃ​​​​​​ជា​​​ទឹក​​​ប្រាក់​​​ជាង​​​៦០​​​ពាន់​​​ដុល្លារ​​​។

ការ​​​ក្រឡេក​​​មើល​​​មួយ​​​ខ្វាច់​​​​​​ទៅ​​​លើ​​​លិខិត​​​បញ្ជា​​​ទិញភ្ជាប់​​​នឹង​​​ឯកសារ​​​របស់​​​លោក ហុងរិត​​ទ្ធ បាន​​​បង្ហាញ​​​​​​ថា ការ​​​ដឹក​​​ជញ្ជូន​​​នឹង​​​ទៅ​​​ដល់​​​កំពង់ផែ​​​បាល់តិច​​​នៅថ្ងៃទី​​​១២​​​ ខែមករា គឺមាន​​​រយៈពេល​​​ប្រហែល​​​ប្រាំសប្តាហ៍​​​ បន្ទាប់​​​ពី​​​ទំនិញ​​​នេះចាក​​​ចេញពី​​​ឃ្លាំង​​​អេមរុ។

នៅក្នុង​​​ឃ្លាំង​​​មាន​​​កម្មកពីរនាក់​​​លើក​​​​​​ការ៉ុង​​​​​​អង្ករ​​​ដាក់លើ​​​​​​ម៉ាស៊ីន​​​ទាញដាក់លើ​​​រថយន្ត​​​ ដែល​​​នៅទីនោះ​​​មាន​​​កម្មករ​​​បួននាក់​​​ទៀត​​​ដែល​​​​​​ចាំ​​​​​​​​​​​​​​​លើក​​​​​​ការ៉ុង​​​​​​​​​​​​ដាក់លើ​​​ស្មា មុននឹង​​​ទម្លាក់​​​បាវ​​​នោះ​​​ដាក់​​​​​​ក្នុង​​​កុងតឺនឺ​​​​​​។

កម្មករ​​​ក្រុម​​​ហ៊ុន​​​អេមរុ​​​លើក​​​អង្ករ​​​​​​ពាក់​​​កណ្តាល​​​កែ​​​ច្នៃ​​​ចេញ​​​ពី​​​រថយន្ត។ រូប​​​ថតៈ John Vink
កម្មករ​​​ក្រុម​​​ហ៊ុន​​​អេមរុ​​​លើក​​​អង្ករ​​​​​​ពាក់​​​កណ្តាល​​​កែ​​​ច្នៃ​​​ចេញ​​​ពី​​​រថយន្ត។ រូប​​​ថតៈ John Vink

នៅក្បែរនោះ​​​អ្នក​​​មើល​​​ការ​​​ខុសត្រូវម្នាក់​​​រាប់​​​ការ៉ុង​​​​​​នីមួយៗ​​​យ៉ាង​​​យកចិត្ត​​​ទុកដាក់​​​នៅពេល​​​ដែល​​​ការ៉ុង​​​​​​នោះ​​​ដល់​​​រថយន្ត​​​ ដោយ​​​កត់ត្រា​​​សរុប​​​នៅលើ​​​​​​ផ្ទាំង​​​​​​ក្រដាស​​​ធំមួយ​​​ដែល​​​ភ្ជាប់​​​ទៅនឹង​​​ទ្វារ​​​កុងតឹនឺដើម្បី​​​បញ្ជាក់ថា ចំនួន​​​សរុប​​​៥០០​​​ការ៉ុង​​​បាន​​​ចូលទៅក្នុង​​​កុងតឺនឺ។

លោក ហុងរិទ្ធ បាន​​​និយាយមុន​​​នឹង​​​បែរ​​​ទៅរក​​​ក្រដាស​​​​​​ឯកសារ​​​មួយ​​​ដុំ​​​នៅលើ​​​តុ​​​របស់​​​លោកថា “រថយន្ត​​​កុង​​​តឺនឺ​​​នីមួយៗ​​​អាច​​​ផ្ទុក​​​បាន​​​២៥តោន​​​ ដូច្នេះ​​​យើង​​​ដឹក​​​ប្រាំមួយ​​​ដង​​​ទៅក្រុង​​​ព្រះសីហនុ​​​”។

លោក សុង សារ៉ន ប្រធាន​​​​​​ប្រតិបត្តិ​​​ក្រុម​​​ហ៊ុន​​​អេមរុ រ៉ាយ​​​ បាន​​​និយាយថា ក្រុមហ៊ុន​​​របស់​​​លោក​​​គឺជា​​​ក្រុមហ៊ុន​​​មួយ​​​ក្នុង​​​បណ្តា​​​ក្រុមហ៊ុន​​​៧០​​​ ឬ៨០​​ ​ដែល​ធ្វើ​​​ប្រតិបត្តិការ​​​នៅក្នុង​​​វិស័យ​​​នាំចេញ​​​អង្ករ​​​ដែល​​​កំពុង​​​តែ​​​ប្រកួត​​​ប្រជែង​​​គ្នា​​​កាន់​​​តែខ្លាំង​​​ ប៉ុន្តែ ស្ថិត​​​ក្នុង​​​ភាព​​​ក្មេង​​​ខ្ចី​​​នៅឡើយ​​​។

លោក សារ៉ន បាននិយាយថា “យើង​​​ធ្វើ​​​ជា​​​សាជីវកម្ម​​​ជា​​​ក្រុមហ៊ុន​​​នាំចេញ​​​ចាប់តាំងពី​​​ឆ្នាំ​​​២០០៩​​។ មុននោះ​​​យើង​​​ជា​​​ក្រុមហ៊ុនចែកចាយ​​​អង្ករ​​​ក្នុង​​​ស្រុក​​​ប៉ុណ្ណោះ​​​”។

លោក សារ៉ន បាន​​​និយាយថា បើកនៅ​​​ឆ្នាំ​​​២០១២​​​ រោងចក្រ​​​នៅភ្នំ​​​ពេញ​​​ដែល​​​មាន​​​តម្លៃ​​​ជាទឹក​​​ប្រាក់​​​​​​៨លាន​​​ដុល្លារ​​​របស់​​​ក្រុមហ៊ុន​​​ គឺឥឡូវនេះអាច​​​​​​កែ​​​ច្នៃ​​​​​​អង្ករ​​​​​​ប្រហែល​​​៦០ពាន់​​​តោន​​​ក្នុងមួយឆ្នាំ​​​ ពោល​​​គឺ​​​៨០ភាគរយ​​​ត្រូវ​​​បរិភោគ​​​នៅអឺរ៉ុប​​​។

លោក សារ៉ន បាន​​​និយាយថា “នៅអឺរ៉ុប​​​ខាង​​​លិច​​​ ប្រទេស​​​បារាំង អាល្លឺម៉ង់ ហូឡង់ អុីតាលី ចក្រភព​​​អង់គ្លេស​​​ និងប្រទេស​​​បែលហ្ស៊ិក​​​ គឺជាប្រទេស​​​ដែលនាំ​​​ចូល​​​ធំបំផុត​​​របស់​​​យើង​​។ នៅអឺរ៉ុប​​​ខាង​​​កើត​​​មានប្រទេស​​​ប៉ូឡូញ ឆែក ប៉ុលហ្គារី ហុងហ្គារី រុស្ស៊ី និង​​​បេឡារុស”។

កម្មករ​​​បិទ​​​ទ្វារ​​​​​​កុង​​​តឺ​​​នឺ​​​​​​​​​​​​នៅ​​​ឯ​​​ឃ្លាំង​​​អង្ករ​​​​​​​​​របស់​​​ក្រុម​​​​ហ៊ុនខ្មែរ​​​ហ៊ូត​​​គ្រុប​​​​​​ក្នុង​​​ក្រុង​​​ភ្នំ​​​ពេញ។ ប្រាំ​​​ថ្ងៃ​​​ក្នុង​​​មួយ​​​សប្តាហ៍ មាន​​​កុង​​​តឺនឺ​​​ពី​​​៥​​​ទៅ​​​១០​​​ដែល​​​ផ្ទុក​​​​​​​​​អង្ករ​​​៤០​​​តោន​​​​​​ដឹក​​​ទៅ​​​កាន់​​​កំពង់​​​ផែ​​​ក្នុង​​​ក្រុង​​​ព្រះ​​​សីហនុ។ រូប​​​ថតៈ John Vink
កម្មករ​​​បិទ​​​ទ្វារ​​​​​​កុង​​​តឺ​​​នឺ​​​​​​​​​​​​នៅ​​​ឯ​​​ឃ្លាំង​​​អង្ករ​​​​​​​​​របស់​​​ក្រុម​​​​ហ៊ុនខ្មែរ​​​ហ៊ូត​​​គ្រុប​​​​​​ក្នុង​​​ក្រុង​​​ភ្នំ​​​ពេញ។ ប្រាំ​​​ថ្ងៃ​​​ក្នុង​​​មួយ​​​សប្តាហ៍ មាន​​​កុង​​​តឺនឺ​​​ពី​​​៥​​​ទៅ​​​១០​​​ដែល​​​ផ្ទុក​​​​​​​​​អង្ករ​​​៤០​​​តោន​​​​​​ដឹក​​​ទៅ​​​កាន់​​​កំពង់​​​ផែ​​​ក្នុង​​​ក្រុង​​​ព្រះ​​​សីហនុ។ រូប​​​ថតៈ John Vink

នៅឆ្នាំ​​​២០១០​​​ រដ្ឋាភិបាល​​​បាន​​​កំណត់​​​គោលដៅនាំចេញអង្ករ​​​១លានតោនរាល់​​​ឆ្នាំ​​​ត្រឹម​​​ឆ្នាំ​​​២០១៥​​។ ទោះ​​​ជា​​​យ៉ាង​​​​​​នេះ​​​ក្តី កាលពី​​​សប្តាហ៍​​​មុន លោកនាយករដ្ឋមន្ត្រី ហ៊ុន សែន បាន​​​ទទួលស្គាល់ថា គោលដៅនេះ​​​មិន​​​អាច​​​សម្រេច​​​បាន​​​ទេ ដោយ​​​មាន​​​ប្រសាសន៍ថា ប្រទេសកម្ពុជា​​​ទំនង​​​ជា​​​នាំចេញ​​​បាន​​​ត្រឹម​​​តែ៥០០​​​ពាន់​​​តោន​​​ប៉ុណ្ណោះទៅបរទេស​​​។

ទោះជាយ៉ាង​​​​​​ណា​​​ក៏​​​ដោយ​​​ ការ​​​នាំអង្ករ​​​ចេញបាន​​​កើនឡើង​​​រាល់ឆ្នាំ​​​ ចាប់តាំង​​​ពីគោលដៅ​​​ត្រូវ​​​កំណត់​​​។ នៅឆ្នាំ​​​២០១៤​​​ ការ​​​នាំចេញ​​​មាន​​​ចំនួន​​​៣៨៧​​​.០៦១តោន​​​។

លោក សារ៉ន បាន​​​ចាត់ទុក​​​កំណើន​​​នោះ​​​ដោយសារ​​​តែមាន​​​ការ​​​បូក​​​បញ្ចូល​​​នៃ​​​វិនិយោគ​​​ពី​​​ធនាគារ​​​ពាណិជ្ជកម្មកម្ពុជា​​​ វិនិយោគិន​​​ឯកជន និងរដ្ឋាភិបាល​​​ដែល​​​បាន​​​ផ្តល់​​​កម្ចី​​​ដោយមាន​​​លក្ខខណ្ឌ​​​អនុគ្រោះ​​​ចំពោះ​​​រោង​​​ម៉ាស៊ីន​​​កិន​​​ស្រូវ​​​តាម​​​រយៈ​​​ធនាគារ​​​អភិវឌ្ឍ​​​ជនបទ​​​។

លោក សារ៉ន បាន​​​ិយាយ​​​ថា មុន​​​នឹង​​​​​​គោល​​​ដៅ​​​បាន​​​​​​បំពេញ​​​ ជំហាន​​​មួយ​​​ចំនួន​​​ត្រូវ​​​តែ​​​ធ្វើ​​​ឡើង​​​ រួម​​​មាន​​​​​​បើក​​​ទី​​​ផ្សារ​​​​​​​​​អង្ករ​​​កម្ពុជា​​​ ជា​​​ពិសេស​​​​​​ទី​​​ផ្សារ​​​​​​នៅ​​​ខាង​​​ក្រៅ​​​​​​គោល​​​ដៅ​​​ផ្តោត​​​​​​របស់​​​​​​ក្រុម​​​ហ៊ុន​​​អេមរុ​​​ រ៉ាយ។

​​​​​​​​​​​​​​​​​លោក សារ៉ន បាន​​​និយាយ​​​ថា “យើង​​​ត្រូវ​​​រក​​​ទី​​​ផ្សារ​​​​​​ដូច​​​ជា​​​ប្រទេស​​​ឥណ្ឌូ​​​ណេ​​​​ស៊ី​​​ និង​​​ហ្វី​​​លី​​​ពីន​​​ ពី​​​ព្រោះ​​​​​​ពួក​​​គេ​​​​​​ក៏​​​ជា​​​​​​​​​ប្រទេស​​​នាំ​​​ចូល​​​អង្ករ​​​​​​ដ៏​​​ធំ​​​ដែរ”។

ត្រឡប់​​​មក​​​​​​រោង​​​ចក្រ​​​​​​នៅ​​​ក្នុង​​​ខណ្ឌ​​​ព្រែក​​​ព្នៅ​​​​​​វិញ លោក មល់ ម៉ុក អ្នក​​​គ្រប់​​​គ្រង​​​ផ្នែក​​​ផលិត​​​កម្ម​​​បាន​​​និយាយ​​​ថា ការ​​​ផ្តោត​​​របស់​​​លោក​​​គឺ​​​ដើម្បី​​​ធានា​​​ថា​​​​​​ក្រុម​​​ហ៊ុន​​​​​​អាច​​​នាំ​​​ចេញ​​​​​​អង្ករ​​​មាន​​​គុណ​​​ភាព​​​ទៅ​​​បរទេស។

ឧបករណ៍​​​​​​ប្រើ​​​សម្រាប់​​​​​​វាស់​​​ប្រវែង​​​អង្ករ​​​ក្នុង​​​ពេល​​​​​​ត្រួត​​​ពិនិត្យ​​​​​​គុណ​​​ភាព​​​នៅ​​​ឯ​​​ឃ្លាំង​​​អង្ករក្រុម​​​​ហ៊ុនខ្មែរ​​​ហ៊ូត​​​គ្រុប។​​​⁣  រូប​​​ថតៈ John Vink
ឧបករណ៍​​​​​​ប្រើ​​​សម្រាប់​​​​​​វាស់​​​ប្រវែង​​​អង្ករ​​​ក្នុង​​​ពេល​​​​​​ត្រួត​​​ពិនិត្យ​​​​​​គុណ​​​ភាព​​​នៅ​​​ឯ​​​ឃ្លាំង​​​អង្ករក្រុម​​​​ហ៊ុនខ្មែរ​​​ហ៊ូត​​​គ្រុប។​​​⁣  រូប​​​ថតៈ John Vink

លោក ម៉ុក បាន​​​ពន្យល់​​​ថា​​​ អង្ករ​​​សម្រូប​​​​​​ដឹក​​​ចូល​​​មក​​​រោង​​​ចក្រ​​​រាល់​​​ថ្ងៃ​​​ដោយរោង​​​​​​​​​ម៉ាស៊ីន​​​កិន​​​ស្រូវ​​​តាម​​​ខេត្ត​​​ និង​​​​​​ម៉ាស៊ីន​​​​​​ក្រុម​​​ហ៊ុន​​​ផ្ទាល់​​​ ត្រូវ​​​បាន​​​ត្រួត​​​ពិនិត្យ​​​ដំបូង​​​​​​ដោយ​​​ក្រុម​​​​​​គ្រប់​​​គ្រង​​​​​​គុណ​​​ភាព​​​​​​របស់​​​ក្រុម​​​ហ៊ុន​​​អេមរុ រ៉ាយ​​​ ដែល​​​​​​រក​​​មើល​​​គ្រាប់​​​អង្ករ​​​ណា​​​ដែល​​​មិន​​​ល្អ​​​។​​​

លោក ម៉ុក បាន​​​និយាយ​​​ថា “អង្ករ​​​ត្រូវ​​​តែ​​​ពិនិត្យ​​​មើល​​​​​​គុណ​​​ភាព មាន​​​ដូច​​​ជា​​​​​​ទំហំ ពណ៌​​​ដូច​​​ដី​​​ស សត្វ​​​ល្អិត​​​ ភាព​​​សុទ្ធ​​​ និង​​​​​​សំណើម​​​​​​ជា​​​ដើម”។ លោក​​​​​​បាន​​​បញ្ជាក់​​​ថា ​​​​​​​​​ក្រោយ​​​ពី​​​ឆ្លង​​​កាត់​​​ការ​​​ត្រួត​​​ពិនិត្យ​​​រួច​​​​​​ គេ​​​ដាក់​​​អង្ករ​​​នៅ​​​ក្នុង​​​​​​ឃ្លាំង​​​ស្តុក ដើម្បី​​​រង​​​់ចាំ​​​ការ​​​បញ្ជា​​​ទិញ​​​​​​ពី​​​អតិ​​​ចិជន​​​អន្តរ​​​ជាតិ។

លោក ម៉ុក បាន​​​​​​និយាយ​​​ថា ​​​បន្ទាប់​​​មក​​​អង្ករ​​​​​​​​​ឆ្លង​​​កាត់​​​តាម​​​​​​ដំណាក់​​​ការ​​​កែ​​​ច្នៃ​​​ចុង​​​ក្រោយ​​​ ដែល​​​ត្រូវ​​​សម្អាត​​​ ដុស​​​ខាត់​​​ និង​​​ជ្រើស​​​រើស​​​​​​ដោយ​​​ពណ៌ និង​​​ទំហំ​​​ មុន​​​នឹង​​​ឆ្លង​​​កាត់​​​តាម​​​ការ​​​ត្រួត​​​ពិនិត្យ​​​គុណ​​​ភាព​​​ម្តង​​​ទៀត​​​ ពោល​​​គឺ​​​​​​ពេល​​​នេះ​​​ធ្វើ​​​​​​ឡើង​​​ដោយ​​​ក្រុម​​​ហ៊ុន​​​​​​​​​មាន​​​​​​កិច្ច​​​សន្យា​​​​​​​​​​​​ពី​​​អ្នក​​​ទិញ ​​​ហើយ​​​ទើប​​​វេច​​​ខ្ចប់​​​។​​​

មិន​​​សុទ្ធ​​​តែ​​​អង្ករ​​​ទាំង​​​អស់​​​ដែល​​​កែ​​​ច្នៃ​​​ដោយ​​​​​​ក្រុម​​​ហ៊ុន​​​​​​អេមរុ​​​ រ៉ាយ​​​ មាន​​​គោល​​​ដៅ​​​សម្រាប់​​​នាំ​​​ចេញ​​​ទេ ទោះ​​​ជា​​​យ៉ាង​​​នេះ​​​ក្តី​​​ លោក ម៉ុក បាន​​​និយាយ​​​ក្នុង​​​ពេល​​​ដែល​​​លោក​​​ផ្អែ​​​ក​​​នឹង​​​ប្រអប់​​​មាន​​​សរសេរ​​​ថា អង្ករ​​​ផ្កា​​​ម្លិះ​​​​​​ស​​​រី​​​រាង្គ​​​​​​​​​មាន​​​គុណ​​​ភាព​​​ គឺ​​​សម្រាប់​​​នាំ​​​ចេញ​​​ទៅ​​​ប្រទេស​​​បារាំង។​​​

លោក ម៉ុក​​​ បាន​​​និយាយ​​​ថា “ចំពោះ​​​អង្ករ​​​ដែល​​​មាន​​​គុណ​​​ភាព​​​ទាប​​​ ក្រោយ​​​ពី​​​យើង​​​​​​​​​ដុស​​​ខាត់​​​រួច​​​ អង្ករ​​​នោះ​​​ត្រូវ​​​យក​​​ទៅ​​​លក់​​​​​​ក្នុង​​​ទី​​​ផ្សារ​​​ក្នុង​​​ស្រុក​​​​​​ដែល​​​នឹង​​​លក់​​​ឲ្យ​​​អ្នក​​​បិត​​​ស្រា និង​​​ធ្វើ​​​ជា​​​ចំណី​​​សត្វ”៕ រើន​​​​​​​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស