មន្ត្រីក្រសួងយុត្តិធម៌ ព្រះរាជអាជ្ញា មន្ត្រីប៉ូលិស និងកងរាជអាវុធហត្ថប្រហែល១០០នាក់បានជួបប្រជុំគ្នានៅថ្ងៃនេះក្នុងក្រុងភ្នំពេញ ដើម្បីពន្លឿនការសើុបអង្កេតទៅក្នុងករណីឧក្រិដ្ឋកម្ម ជាពិសេសករណីទាក់ទងនឹងការប្លន់ប្រដាប់អាវុធទូទាំងប្រទេស។
លោក ម៉ក់ ជីតូ អគ្គស្នងការរងនគរបាលជាតិបានមានប្រសាសន៍ក្នុងសន្និសីទកាសែតថា នគរបាលបានកំណត់មុខសញ្ញាក្រុមចោរប្លន់ប្រដាប់អាវុធដែលបានប្លន់ថ្មីៗកន្លងមកនេះហើយ ប៉ុន្តែលោកមិនបានបញ្ជាក់ថា ក្រុមចោរប្លន់នោះមានគ្នាប៉ុន្មាននាក់ទេ។
ឧត្តមសេនីយ៍ឯក ម៉ក់ ជីតូ បានមានប្រសាសន៍ថា “អំពើប្លន់កន្លងមក យើងកំណត់មុខសញ្ញាបានហើយ”។
លោក ហុង វិណុល មេបញ្ជាការងកងរាជអាវុធហត្ថលើផ្ទៃប្រទេស បានមានប្រសាសន៍ថា ជនសង្ស័យប្លន់ប្រដាប់អាវុធដែលសមត្ថកិច្ចចាប់បានមិនទាន់ឆ្លើយថា ពួកគេបានទិញអាវុធពីឃ្លាំងក្រសួងការពារជាតិទេ។
កាលពីសប្តាហ៍មុន លោកនាយករដ្ឋមន្ត្រី ហ៊ុន សែន បានបញ្ជាឲ្យសមត្ថកិច្ចបង្ក្រាបក្រុមឧក្រិដ្ឋជនប្រដាប់អាវុធ ដែលបង្កឲ្យមានអំពើហិង្សានិងក្នុងករណីខ្លះ ធ្វើឲ្យមនុស្សស្លាប់ ដែលជាអំពើប្លន់ដែលចាប់កើតឡើងនៅពាក់កណ្តាលខែវិច្ឆិកា ដោយបណ្តាលឲ្យកុមារាអាយុ១៣ឆ្នាំម្នាក់ស្លាប់ដោយត្រូវគ្រាប់កាំភ្លើង ក្នុងពេលដែលជនល្មើសពីរនាក់បានព្យាយាមប្លន់ម៉ូតូមា៉ាកហុងដាឌ្រីមស៊េរីថ្មី ពីបងប្រុសរបស់វានៅក្នុងខេត្តកំពត។
បទល្មើសបានកើតឡើងជាបន្តបន្ទាប់ដោយមានការប្លន់ម៉ូតូជាច្រើនករណីស្រដៀងៗគ្នា ហើយនៅថ្ងៃទី១១ ខែធ្នូ កងរាជអាវុធហត្ថក្រុងភ្នំពេញបានប៉ះទង្គិចប្រដាប់អាវុធជាមួយជនល្មើសពីរនាក់ ដែលបានបាញ់សម្លាប់យុវជនម្នាក់ ហើយប្លន់យកម៉ូតូហុងដាឌ្រីមរបស់គាត់កាលពីព្រឹកថ្ងៃនោះ។
កាលពីសប្តាហ៍កន្លងមក ជនល្មើសបានប្លន់ប្រដាប់អាវុធបីកន្លែងផ្សេងៗគ្នានៅក្នុងខេត្តបី គឺ ខេត្តកណ្ដាល ពោធិ៍សាត់ និងបាត់ដំបង ដែលក្នុងនោះ ស្ត្រីម្នាក់ត្រូវបាញ់ស្លាប់ និងប្លន់យកមាស និង លុយគិតជាទឹកប្រាក់ជាង ៣៣០.០០០ដុល្លារអាមេរិក៕