កាលពីថ្ងៃអាទិត្យ គណៈកម្មាធិការជាតិរៀបចំការបោះឆ្នោត (គ.ជ.ប.) បានបញ្ចប់ការប្រកាសរយៈពេល១០ថ្ងៃសម្រាប់ការដាក់ពាក្យសម្រាប់តួនាទីរដ្ឋបាលជាន់ខ្ពស់ ដោយមានពាក្យសុំ១២៤ច្បាប់ត្រូវបានដាក់ជូន នេះបើតាមស្ថាប័ននេះបានលើកឡើងក្នុងសេចក្តីថ្លែងការណ៍ដោយអគ្គលេខាធិការមួយរូប និងអគ្គលេខាធិការរងបួនរូបគ្រោងនឹងធ្វើការជ្រើសរើស។
លោក នី ចរិយា សកម្មជនសិទ្ធិមនុស្សដ៏ឆ្នើមមួយរូបស្ថិតក្នុងចំណោមបុគ្គលិកអង្គការមិនមែនរដ្ឋាភិបាល និងប្រធានមួយចំនួនទៀតដែលបានដាក់ពាក្យសម្រាប់តួនាទីថ្នាក់ដឹកនាំនៅ គ.ជ.ប.នេះ។
លោក ហង្ស ពុទ្ធា អ្នកនាំពាក្យស្ថាប័ននេះបានមានប្រសាសន៍ថា កាលវិភាគសម្រាប់ការជ្រើសរើសនេះមិនទាន់កំណត់នៅឡើយទេ ហើយថា អ្នកដាក់ពាក្យទាំងអស់ភាគច្រើនមកពីអង្គការមិនមែនរដ្ឋាភិបាល គណបក្សនយោបាយ និងសាកលវិទ្យាល័យនានា។
លោកបានមានប្រសាសន៍ថា “ខ្ញុំបានឃើញអគ្គលេខាធិការ និងអគ្គលេខាធិការរងបច្ចុប្បន្នក៏បានដាក់ពាក្យសម្រាប់តួនាទីនេះដែរ”។
លោក ទេព នីថា អគ្គលេខាធិការគ.ជ.ប.បច្ចុប្បន្នបានបញ្ជាក់អះអាងថា លោកបានដាក់ពាក្យសម្រាប់តួនាទីនេះជាថ្មីម្តងទៀត ប៉ុន្តែ បានបដិសេធមិនធ្វើអត្ថាធិប្បាយបន្ថែមទេ។
លោក ទេព នីថា ដែលត្រូវបានរិះគន់យ៉ាងខ្លាំងពីសំណាក់គណបក្សប្រឆាំងចំពោះការរៀបចំការបោះឆ្នោតកន្លងមក ដែលការបោះឆ្នោតទាំងនោះត្រូវបានរៀបចំឡើងដើម្បីគាំទ្រគណបក្សប្រជាជនកម្ពុជានោះ បានមានប្រសាសន៍ថា “ខ្ញុំគ្រាន់តែជាបេក្ខជនមួយរូបប៉ុណ្ណោះ ហើយនៅពេលឆាប់ៗនេះពួកគេនឹងធ្វើការជ្រើសរើស ហើយខ្ញុំក៏មិនចង់ធ្វើអត្ថាធិប្បាយអ្វីអំពីរឿងនោះដែរ”។
ក្នុងចំណោមអ្នកដាក់ពាក្យពីខាងក្រៅគឺលោក នី ចរិយា ជាប្រធានផ្នែកស៊ើបអង្កេតនៅអង្គការសិទ្ធិមនុស្សអាដហុក ដែលរងការរិះគន់។ បច្ចុប្បន្ននេះ លោក នី ចរិយា កំពុងប្រឈមការចោទប្រកាន់ពីបទបរិហារកេរ្តិ៍ និងព្យាយាមបង្វិតបង្ខំមន្ត្រីតុលាការ ជាការចោទប្រកាន់ដែលធ្វើឲ្យមានកំហឹងពីអង្គការសិទ្ធិមនុស្សអន្តរជាតិ និងអ្នកគាំទ្រដែលលើកឡើងថាជាហេតុផលនយោបាយ។
លោក នី ចរិយា បានមានប្រសាសន៍ថា លោក គិតថា លោកមានឱកាសក្នុងការទទួលបានតួនាទីមួយក្នុងចំណោមតួនាទីអគ្គលេខាធិការរងទាំងបួន ហើយលោកប៉ាន់ប្រមាណថា លោកត្រូវការរយៈពេលប្រហែលកន្លះឆ្នាំដើម្បីបង្កើនចំណេះដឹងរបស់លោកទាក់ទងការបោះឆ្នោត។
លោកបានថ្លែងថា “ការងារមុនៗរបស់ខ្ញុំគឺមិនទាក់ទងការបោះឆ្នោតទាំងស្រុងនោះទេ
ប៉ុន្តែ ខ្ញុំមានចំណេះដឹងមួយចំនួនទាក់ទងការបោះឆ្នោត ដូចជាច្បាប់បោះឆ្នោតជាដើម។
ដូច្នេះខ្ញុំត្រូវការពេលបន្ថែមទៀតដើម្បីស្វែងយល់ឱ្យបានច្រើនពីការបោះឆ្នោត។
លោកបានមានប្រសាសន៍ថា “ខ្ញុំធ្លាប់ធ្វើការច្រើនជាមួយខុមហ្វ្រែល [គណៈកម្មាធិការដើម្បីការបោះឆ្នោតដោយសេរី និងយុត្តិធម៌] ហើយខ្ញុំមានចំណេះដឹងច្រើនទាក់ទងច្បាប់បោះឆ្នោត។ វាដូចជាការប្រឡងអ៊ីចឹង ដូច្នេះសង្ឃឹម៥០-៥០តែប៉ុណ្ណោះ”៕សារុន