30 C
Phnom Penh

រូប​​​ថត​​​​​​ជំទាវ​​​ទី១ដែល​គេ​កាត់​​ត​ធ្វើ​​​ឲ្យ​​​​​​​​​នាយក​​​រដ្ឋ​​​​​​មន្ត្រី​ក្ដៅ​​​​​​​ក្រហាយ​​​

ដោយ ឌឹ ខេមបូឌា ដេលី

បទវិភាគ

លោក​​​​​​នាយក​​​រដ្ឋ​​​មន្ត្រី ហ៊ុន សែន បាន​​​គំរាម​​​​​​ចាត់​​​វិធាន​​​ការ​​​​​​ផ្លូវ​​​​​​ច្បាប់​​​​លើ​សកម្ម​​​ជន​​​គណ​​​បក្ស​​​​​ប្រឆាំង​​​កាល​​​​ពី​​​ម្សិល​​​មិញ ​​​បន្ទាប់​​​ពី​​​​​​លេច​​​ចេញ​​​រូប​​​ថត​​​កាត់​​​ត​មួយ​​​សន្លឹក​​​​​​តាម​​​ហ្វេស​​​​ប៊ុក ​ដែល​​​បង្ហាញ​​​ពី​​​​​​លោក​​​ស្រី ប៊ុន រ៉ានី ភរិយា​​​របស់​​​​លោក​​​ឈរ​​​កន្ធែក​​​​​​ជើង​​​។

​​​​​​ជា​​​​​​ថ្មី​​​​​ម្ដង​​​ទៀត ការ​​​គំរាម​​​របស់​​​លោក​​​នាយក​​​​រដ្ឋ​​​មន្ត្រី​​​ដែល​​​ធ្វើ​​​ឡើង​​​តាម​​​​​​​​​ទំព័រ​​​ហ្វេស​​​ប៊ុក​​​​​​ផ្ទាល់​​​​​​​ខ្លួន​​​​​​​​​​​នេះ បាន​​​​​​​​បង្ហាញ​​​ពី​​​ភាព​​​រសើប​​​យ៉ាង​​​ខ្លាំង​​​របស់​​​លោក​​​​​​ចំពោះ​​​​​​ការ​​​​​​​​​​​​ចំអក​​​របស់​​​សាធា​រណ​​​​​ជន​​​ ​ចាប់​តាំង​ពី​​​​​​​​​លោក​​​​​​​​​​​ចាប់​​​ផ្ដើម​​​​​​​​កាន់​​​កាប់​​​​​​គេហ​​​ទំព័រ​​​​​​​​​​បណ្តាញ​​​​​​ទំនាក់​​​ទំនង​​​​​​សង្គ​​​ម​​​​មក​។

​​​កាល​​​ពី​​​ដើម​​​​​សប្ដាហ៍​​​​​​នេះ ​លោក ​ហ៊ុន ​សែន ​​បាន​​​បង្ហោះ​​​​​​រូប​​​​​​ថត​​​មួយ​​​ចំនួន​​​នៃ​​​គ្រួសារ​​​​​របស់​​​លោក​​​សម្រាក​​​វិស្សម​​​កាល​​​​​​នៅ​ក្នុង​​​​​​​ក្រុង​​​​​​ព្រះ​សីហនុ ដើម្បី​​​អបអរ​​​​​​សាទរ​​​​​ឆ្នាំ​​​ថ្មី​​​​​​ឆ្នាំ​​​សកល។ ​​​

កាល​​​​ពី​​​ម្សិល​​​មិញ លោក​​​បាន​​​ចែក​​​រំលែក (Share) ​​​រូប​​​ថត​​​​​​​​កាត់ត​​​នោះ​​​នៅ​​​លើ​​​​​​ទំព័រ​​​ហ្វេសប៊ុក​​​របស់​​​​​លោក ដោយ​​​​​​មាន​​​ប្រសាសន៍​​​ថា លោក​​​​​​ខឹង​​​​​​យ៉ាង​​​​​​​ខ្លាំង​​​​​​ពេល​​​​​​ឃើញ​​​រូប​​​​​​ថត​​​នេះ និង​​​​​​សារ​​​បញ្ចេញ​​​មតិ (Comment) ដ៏​អសុ​​​រស។

លោក​​​បាន​​​​​​លើក​​​ឡើង​​​​​​​​​តាម​​​​​​រយៈ​​​សារ​​​​មួយ​​​​​​អម​​​ដោយ​​​រូប​​ថត​​​នោះ​​​ថា “ជា​​​អកុសល ​​​មាន​​​បុគ្គល​​​មក​​​ពី​​​បក្ស​​​ប្រឆាំង​​​​​​ជ្រុល​​​និយម​​​មួយ​​​ចំនួន​​​​​​បាន​​​ព្យាយាម​​​​​​យក​​​រូប​​​ភរិយា​​​ខ្ញុំ​​​ ​​​យក​​​ទៅ​​​កែ​​​បំប្លែង​​​​​​​​ក្នុង​​​កុំ​​​ព្យូទ័រ​​​តាម​​​កម្ម​​​វិធី​​​ (Photoshop) ដូច​​​ឃើញ​​​​​ក្នុង​​​​​​ស្នាម​​​ក្រឡា​​​ឥដ្ឋ​​​វៀច​​​​​​​​​​​ក្នុង​​​រូប​​ដែល​​​ពួក​​​នេះ​​​​​​បាន​​​​​ទាញ​​​​​​ជើង​​​ភរិយា​​​​​​ខ្ញុំ​​​​​​ឲ្យ​​​មើល​​​ទៅ​​​​​​មាន​​​លក្ខណៈ​​​​​​​មិន​​​សម​​​រម្យ​​​ ដើម្បី​​​​​​​​​ពួកគេ​​​វាយ​​​ប្រហារ”។

​​​​​​នៅ​​​ក្នុង​​​រូប​​​​​​​​​ថត​​​នេះ ​​​លោក​​​ស្រី ប៊ុន រ៉ានី ​ឈរ​​​​​ពី​​​ក្រោយ​​​ចៅៗ​​​​​ក្នុង​​​​​​ឥរិយាបថ​​​កន្ធែក​​​ជើង។​​អម​​​​​​​​​រូប​​​​​​ថត​​​នេះ​​គឺ​​​ជា​​​​​​រូបភាព​​​ផ្ទាំង​​​ស្គ្រីន​​​​​​​នៃ​​​ទំព័រ​​​ហ្វេស​​​ប៊ុក​​​​​​មួយ​​​ដែល​​​​​​បាន​​​បង្ហោះ​​​​​រូប​​​ថត​​​​​​នេះ ​​ហើយ​​​​​​នៅ​​​លើ​​​​​​នោះ ម្ចាស់​​​ទំព័រ​​​ហ្វេស​​​ប៊ុក​​​​​ឈ្មោះ ​​​​Haknuman Leung ​​​បាន​​​​​​សរសេរ​​​ថា “ស្អីគេ!! ​ស្ត្រី​ទី១ខ្មែរឈរ​​​អញ្ចឹង!!! ពិត​​​ជា​​​គំរូ​​​អាក្រក់​​​របស់​​​នារី​​​​ខ្មែរ​​​មែន! ជោរ​​​មើល​​​​​​ប្រពន្ធ​​​ផង​​​ជោរ!!!”។

គណនី​​​​​​ដើម​​​ដែល​​​​​​ដាក់​​​ឈ្មោះ​​​តាម​​​​​ព្រះ​អាទិទេព​​​ស្វា ហនុមាន នេះ ទំនង​​​ជា​​​ត្រូវ​​​បាន​​​លុប​​​​​​ចោល​​​​​​​​​កាល​​​ពី​​​ម្សិល​​​មិញ ​​​ប៉ុន្តែ​​​​​​​​​​វា​​​​​មាន​​​​​​រូប​​​​​​​​​​​លោក សម រង្ស៊ី ​​​​​​នៅ​​​ពី​​​ក្មេង​​​​​​​​ដែល​​​​​​ថត​​​​​​រូប​​​​​​​​ពី​​​ខាង​​​​​​មុខ​​​ទង់​​​ជាតិ​​​ខ្មែរ។ លោក ហ៊ុន សែន បាន​​​​​​​​​លើក​​​​​ឡើង​​​ថា “សកម្ម​​​ជន​​​បក្ស​​​ប្រឆាំង​​​​​​” ជា​​​​​​អ្នក​​ទទួល​​​ខុស​​​ត្រូវ​​​ចំពោះ​​​​​​ “ល្បិច​​​ថោក​​​ទាប​​​” ​​​នេះ ​ហើយ​​​​​បាន​​​ប្ដេជ្ញា​​​​​​នាំ​​​ខ្លួន​​​អ្នក​​​​​ទាំង​​​នោះ​​​ឡើង​​​តុលាការ​​​។​​​​​​

​លោក​​សរសេរ​ថា “​​រាល់​ទង្វើ​​​ទាំង​ឡាយ​ណា​​​ដែល​បំផ្លាញ​ដល់​កិត្តិយស​ខ្ញុំ​ និង​ក្រុម​គ្រួសារ​ ក្នុង​នាម​ជា​នាយក​រដ្ឋមន្ត្រី​នៃ​ប្រទេស​មួយ គឺ​ពួកគេ​ត្រូវ​តែ​​​ទទួល​ខុស​ត្រូវ​​ចំពោះមុខ​ច្បាប់​”។

​​​​សូម​រំឭក​ថា​ ក្នុង​ឆ្នាំ​កន្លង​ទៅ ​​នៅ​​ពេល​លោក ហ៊ុន សែន ​​ខំប្រឹង​ប្រជែង​ដើម្បី​ទទួល​បាន​ការ​ចាប់​អារម្មណ៍​​កាន់​តែ​​​ច្រើន​​​ពី​សាធារ​ណ​ជន​​តាម​​​បណ្ដាញ​ទំនាក់​ទំនង​សង្គម​របស់​លោក ​​ដែល​បច្ចុប្បន្ន​​​ទំព័រ​​ហ្វេសប៊ុក​របស់​លោក​មាន​​អ្នក​ចុច​ “​ចូល​ចិត្ត​” (Like) ​ជិត​១,៧លាន​នាក់​​ បើ​​​ប្រៀបធៀប​ទៅ​នឹង​ជិត​២លាន​នាក់​​សម្រាប់​ទំព័រ​ហ្វេសប៊ុក​របស់​លោក សម រង្ស៊ី នោះ លោក​ក៏​បាន​​រិះគន់​ជាញឹក​ញាប់​​ដែរ​ទៅ​លើ​​​អ្នក​ដែល​ប្រមាថ​រូប​លោក​។

​កាលពី​ថ្ងៃ​ច័ន្ទ ​អំឡុង​សុន្ទរកថា​ក្នុង​ពិធី​​ប្រគល់​សញ្ញាបត្រ​ដល់​​និស្សិត​​មកពី​សាកល​វិទ្យាល័យ​​​​នីតិសាស្ត្រ​ និង​វិទ្យាសាស្ត្រ​សេដ្ឋ​កិច្ច លោក ហ៊ុន សែន បាន​​​ទូន្មាន​​​យុវជន​​​កុំ​ឲ្យ​​ប្រើ​ពាក្យ​ប្រមាថ​តាម​បណ្ដាញ​ទំនាក់​ទំនង​សង្គម ដោយ​​គូស​បញ្ជាក់​ថា​ លោក​អាច​​រក​ឃើញ​ទីតាំង​​​របស់​ពួកគេ​​ និង​ចាប់​ខ្លួន​​​ពួកគេ​បាន​ក្នុង​រយៈ​ពេល​​៧ម៉ោង។ លោក​នាយក​រដ្ឋមន្ត្រី​​​បាន​បញ្ចេញ​ឈ្មោះ​​​​​ជន​​បរិហារកេរ្តិ៍​​លោក​ម្នាក់​​ ដែល​បាន​បង្ហោះ​​មតិយោបល់​​លើ​ទំព័រ​ហ្វេសប៊ុក​របស់​​លោក​​​ដោយ​​សួរ​ថា ​តើ​នាយក​រដ្ឋមន្ត្រី​​​នឹង​​ ”​ដេញ​យួន​​ចេញ​ពី​ប្រទេស​” ដែរ​ទេ។ ​

លោក​បាន​​​ប្រាប់​ទៅ​ក្រុម​និស្សិត​​ថា ​​”​ខ្ញុំ​បាន​​​ឆ្លើយ​តប​ថា ​​​ពូ​សង្ឃឹម​ថាក្មួយ​ចេះ​ប្រើ​ពាក្យ​​​សមរម្យ​ជាង​នេះ​​។ បើ​ពូ​ចង់​ចាត់​ការ​ក្មួយ​​  យើង​​​​នឹង​ចាប់​បាន​​​ក្នុង​​រយៈ​ពេល​យូរ​បំផុត​​៧​ម៉ោង។ ​ហើយ​​មិន​ចាំបាច់​បញ្ជូន​កម្លាំង​​​ពី​ភ្នំពេញ​ទេ ​ពីព្រោះ​​​កម្លាំង​នៅ​មូលដ្ឋាន​​បាន​ត្រៀម​ខ្លួន​គ្រប់​ពេល​។ ដូច្នេះ ​​​កុំលេង​​​ដោយ​​​​ការ​ប្រើ​ពាក្យ​​ប្រមាថ​”។

​ខណៈ​មជ្ឈដ្ឋាន​ជាច្រើន​ចោទ​សួរ​​ថា​ តើ​​​ការ​គំរាម​កំហែង​បែប​នេះ​​គឺ​ជា​ការ​រំលោភ​​សេរីភាព​បញ្ចេញ​មតិ​​​ឬ​យ៉ាង​ណា​នោះ ​​លោក ​​សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​ បាន​ការ​ពារ​​​​ពាក្យ​សម្ដី​ធ្ងន់ៗ​របស់​លោក​ ​ហ៊ុន សែន កាលពី​ម្សិលមិញ​។

​លោក​​​មាន​ប្រសាសន៍​ថា ​”​ខ្ញុំ​ក៏បាន​ឃើញ​រូប​ថត​នោះ​ដែរ ហើយ​ខ្ញុំ​គិត​ថា វា​ជា​ការ​ប្រមាថ​ធ្ងន់ធ្ងរ​​​ដែល​ប៉ះពាល់​​យ៉ាង​ធ្ងន់​ធ្ងរ​ដល់​សិទ្ធិ​បុគ្គល​ ជា​ពិសេស​បុគ្គល​ដែល​ជាថ្នាក់​ដឹកនាំ​របស់​ប្រទេស​។ សេរីភាព​បញ្ចេញ​មតិ​​​មិន​ត្រូវ​​ប្រើ​ប្រាស់​ដោយ​ការ​បំពាន​សិទ្ធិ​​​របស់​អ្នក​ដទៃ​នោះ​ទេ”។

​ទាក់​ទិន​បញ្ហា​នេះ លោក អ៊ូ ចាន់រិទ្ធ តំណាង​​​រាស្ត្រ​គណបក្ស​សង្គ្រោះជាតិ​ បាន​បដិសេធ​ថា គ្មាន​សកម្មជន​​បក្ស​ប្រឆាំាង​ណាម្នាក់​​​ពាក់​ព័ន្ធ​​​នឹង​ការ​​​​បង្កើត​រូប​ភាព​​ប្រមាថ​មាក់​ងាយ​នេះ​ឡើយ​។ លោក​បាន​​​គូស​បញ្ជាក់​ថា ​”​​​​ដំបូង​​ឡើយ​​ យើង​មិន​ចង់​ឆ្លើយ​តប​នឹង​រឿង​នេះ​ទេ ពីព្រោះ​វា​មិន​មែន​ជា​បញ្ហា​របស់​ជាតិ ហើយ​សកម្មជន​​គណបក្ស​សង្គ្រោះជាតិ​​​​ផ្ដោត​តែ​​លើ​ការ​បំពេញ​ការ​ងារ​របស់​បក្ស​ប៉ុណ្ណោះ។ យើង​គ្មាន​​ពេល​ធ្វើ​រឿង​​ឥត​ប្រយោជន៍​បែប​នេះ​ទេ”​៕ សុខុម​​​​​​​​​​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស