កាលពីម្សិលមិញ មន្ត្រីក្រសួងមហាផ្ទៃបានបង្ហាញកាន់តែពិស្តារថែមទៀតអំពីផែនការដើម្បីពង្រឹងសុវត្ថិភាពចរាចរណ៍ផ្លូវគោកតាមការរំពឹងទុកនៃច្បាប់ចរាចរណ៍ថ្មី ដែលចូលជាធរមាននៅទូទាំងប្រទេសនាថ្ងៃនេះ និងបានទទួលស្គាល់ថា កិច្ចខិតខំប្រឹងប្រែងនឹងជួបការលំបាកចៀសមិនផុតទេ។
លោក រុន រ័ត្នវាសនា ប្រធាននាយកដ្ឋាននគរបាលចរាចរនិងសណ្តាប់ធ្នាប់សាធារណៈ បានមានប្រសាសន៍ថា ផែនការនេះនឹងមិនពាក់ព័ន្ធនឹងការជួលមន្ត្រីនគរបាលចរាចរថែមទៀតទេ។ ប៉ុន្តែលោកបានមានប្រសាសន៍ថា វាមានន័យថានឹងធ្វើការច្រើនម៉ោងជាងមុនសម្រាប់មន្ត្រី១.៧៥០នាក់នាក់ មានស្រាប់នៅទូទាំងប្រទេស ដែលរហូតមកដល់ពេលនេះធ្វើការឆ្លាស់ថ្ងៃ គម្រោងពេលរបស់ពួកគេអាស្រ័យតាមកន្លែងដែលពួកគេឈរជើង។
លោកបានមានប្រសាសន៍ថា “កម្លាំងនគរបាលចរាចរណ៍នឹងនៅដដែល។ កាលពីមុន កម្លាំងរបស់យើងធ្វើការតាមថ្ងៃផ្សេងគ្នានៅតាមខេត្តនីមួយៗ។ ឥឡូវ យើងនឹងធ្វើការនៅថ្ងៃតែមួយនៅទូទាំងប្រទេស”។
មន្ត្រីនឹងមិនទទួលបានប្រាក់បន្ថែមតាមម៉ោងទេ។ ប៉ុន្តែពួកគេនឹងត្រូវទុក៧០ភាគរយនៃប្រាក់ពិន័យដែលពួកគេប្រមូលបានពីអ្នកបើករថយន្ត គឺកើនពី៥០ភាគរយដែលពួកគេទទួលបានពីមុន។ ប្រាក់នៅសល់នឹងត្រូវចែករវាងនាយកដ្ឋាននគរបាលនិងក្រសួង។
នៅឯសិក្ខាសាលាមួយស្តីពីច្បាប់ថ្មីនេះនៅក្រសួងមហាផ្ទៃកាលពីម្សិលមិញ លោក គៀត ច័ន្ទថារិទ្ធ អ្នកនាំពាក្យនគរបាលជាតិ បានមានប្រសាសន៍ថា មន្ត្រីទាំង១.៧៥០នាក់នឹងត្រូវចែកជាក្រុមមានគ្នាប្រហែល១០នាក់។ លោកបានមានប្រសាសន៍ថា ១១១ក្រុមនឹងត្រូវដាក់នៅតាមបណ្តោយផ្លូវក្នុងប្រទេស នៅសល់ពីនោះនឹងល្បាតនៅតាមតំបន់នានា ដែលរថយន្តធំៗ រថយន្តក្រុង និងរថយន្តតួរីសប្រមូលផ្តុំ។ ក្នុងចំណោមក្រុមដែលល្បាតផ្លូវ ៧១ក្រុមនឹងធ្វើការនៅពេលថ្ងៃ ក្រុមក្រៅពីនោះធ្វើនៅពេលយប់ ជាពេលដែលការអនុវត្តច្បាប់សឹងតែមិនមានទេ។
ក្នុងបំណងកាត់បន្ថយអំពើពុករលួយដែលកើតមានខ្លាំងក្នុងចំណោមនគរបាលចរាចរ មន្ត្រីនឹងលែងប្រមូលប្រាក់ពិន័យនៅនឹងកន្លែងទៀតហើយ ប៉ុន្តែនឹងត្រូវចេញសំបុត្រពិន័យ ដែលត្រូវបង់នៅតាមការិយាល័យដែលគេកំណត់។ ឧត្តមសេនីយ៍ឯក គៀត ច័ន្ទថារិទ្ធ ថ្លែងថា ការិយាល័យចំនួន១១៦នៅទូទាំងប្រទេសត្រូវបានកំណត់ដើម្បីដោះស្រាយដំណើរការនេះ។
លោកបានមានប្រសាសន៍ថា “យើងនឹងជួបការលំបាកមួយចំនួនអំឡុងពេលអនុវត្ត ពីព្រោះនឹងមានការពិន័យច្រើន ប្រជាជនគេចចេញពីកន្លែងត្រួតពិនិត្យ ការខ្វះកន្លែងរក្សាទុករថយន្តដែលឃាត់ទុក និងអ្នកទទួលការពិន័យដែលមិនទៅបង់ប្រាក់”។
បន្ទរតាមសម្តីរបស់អ្នកនាំពាក្យរូបនេះ លោករដ្ឋមន្ត្រីក្រសួងមហាផ្ទៃ ស ខេង បានមានប្រសាសន៍អំឡុងសិក្ខាសាលានោះថា គ្មានផែនការថ្មីណាសុក្រិតទេ។
លោកមានប្រសាសន៍ថា “អ្វីៗដែលយើងធ្វើមានជួបបញ្ហាជាច្រើន ហើយយើងចាំបាច់ត្រូវដឹងបញ្ហា ដូច្នេះយើងអាចរកដំណោះស្រាយ។ ប្រសិនបើយើងមិនធ្វើ យើងមិនដឹងអ្វីដែលជាបញ្ហាទេ ហើយយើងនឹងមិនដឹងដោះស្រាយវារបៀបណាទេ។
លោក ស ខេង បានមានប្រសាសន៍ថា ឧទាហរណ៍ មានម៉ូតូប្រហែល១,២លានគ្រឿងបានចុះបញ្ជីក្នុងក្រុងភ្នំពេញ ប៉ុន្តែមានអ្នកបើកបរតែ៧០.០០០នាក់ប៉ុណ្ណោះ មានអាជ្ញាប័ណ្ណ ជាបញ្ហាធំមួយប្រសិនបើនគរបាលចរាចរព្យាយាមឃាត់ម៉ូតូរបស់គ្រប់អ្នកបើកបរគ្មានអាជ្ញាប័ណ្ណទុកនោះ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ក៏បានចូលរួមក្នុងសិក្ខាលាសានោះដែរ និងបានមានប្រសាសន៍ថា លោកគាំទ្រផែនការនេះ។
លោក យ៉ិនទៀង បានរងការស្តីបន្ទោសជាខ្លាំងពីក្រសួងមហាផ្ទៃកាលពីខែមុន បន្ទាប់ពីបានលើកឡើងនូវការមិនពេញចិត្តជាទូទៅជាមួយនឹងសំណូក ដែលទារដោយនគរបាលចរាចរនិងមន្ត្រីក្រសួងមហាផ្ទៃនោះ បានប្តេជ្ញាថានឹងប្រើ “ច្រាសដែក” សម្អាតអំពើពុករលួយ”៕និត